Read idoma Ɔ̄COKÓĪTÁ 6 Bible Online

Ɔ̄COKÓĪTÁ 6 - idoma bible

Ɔ̄COKÓĪTÁ 6

¹N le má ká ipú ɛcɛ nyā, ɛdɔ ɔ́bíipú mɛ́mla opíyā ɔ̄cɛ tū éyi yɔ̄ nɛ̄hi.

²Ɔwɔicō gē je agbénú, ojīlīmā mɛ́mla ɔdā dóódu nɛ̄ ɔ̄cɛ cɛgbá ā lɛ ɔ̄cɛ éyi. Amáŋ ó gáā cɛ̄ lɛ ɔ́ jɔ́ɔnyɛ kú nū ŋ́. Ikɔkɔ ɔ́ɔmā ugbɔga gáā jɔ́ɔnyɛ nū á. Odúúdú nū wɛ áncā. Ó lɔhi ŋ́.

³Ɔ̄cɛ lɔfú ma ayí ofɛhɔ̄, ɛ́gɛ́ dúú nōó lɛ́ɛcɛ lɛ, ó lɔfú yēeyī gbéeko nōó le gbo ókplícī. Ɔ́dāŋ nōó má ukpɛ̄ kú éeyē kú nū ŋ́, nɛ̄ ayí ā í nyi ɔ́ okwū kú ojīlīmā ŋ́. Ó lɛ ā, n ka ɔyí obene nēé ma nōo gekwú ā lɔhi fíyɛ́ ɔ̄cɛ ɔ́ɔmā á.

⁴Olɔhi lɛ ɔyí ɔ́ɔmā abɔ̄ é ma ɔ́ ŋ́ mā. Ohígbū koó gebí tāajɛ ga ipú obū, cɛ́ɛ́ é kwú mlanyī nū bōōbū.

⁵O má ɔdā dúúmā kú oyēeyī ɛ́ɛ́ nōó gē jé ɛ́gɛ́nɛ̄ oyēeyī lɛ ā ŋ́. Amáŋ, nááná ā, ó kē lɛ omlɛ́nyɔ́ lɛ.

⁶Akú nū lɔhi fíyɛ́ ɔ̄cɛ ɔ́ɔmā nōó jɔ́ɔnyɛ kú oyēeyī jéjéē ɛ́ɛ́ ŋ́ mā, nááná nɛ̄ ó lɔfú yēeyī iháyí úlā ɛhɔ̄ ā. Uwá ɛplɛ́ɛpa bá yɔ̄ ī ga ɛga ékpónú eko nēé gekwú.

⁷Odúúdú úklɔ́ nɛ̄ ɔ̄cɛ gē yá ā, wɛ ohígbū kéē lɛ odée má lé mɛ́mla o lɛ odée má gwá nɛ, amáŋ ipú kú ɔ̄cɛ í kē ī nū ŋ́.

⁸Ile nyá nɛ̄ ojéeyī lɛ fíyɛ́ olíla ā? Olɔhi nyá nōó wɛ lɛ olɛɛhá kóō jé ɛ́gɛ́nɛ̄ ɔ̄cɛ gē lā oyēeyí kú nū ā?

⁹Odúúdú nū wɛ áncā mɛ́mla inya oōnū owu nɛ. O lɔhi fíyɛ́ cɛ́ɛ́ ka ɔdā nāa lɛ ā, kóō jɛ̄ uwɔ, fíyɛ́ ō yɔ̄ ī tíne ɔdā ɔhá piyóó ā.

¹⁰Ɔdā dóódu nōo gē yá ā, é tɛtɛ lɛ ɔ́ mīya táajɛ gbojī ɛɛ́. Alɔ kē jé ka, ɔ̄cɛ í táafú mla ɔ̄cɛ nōo lɔfú fíyɛ́ ɔ̄ ā glá ŋ́.

¹¹Ɛ́gɛ́nɛ̄ a táafú gbojī lɛ ā, ɛ́gɔ́ɔmā nōó wɛ áncā lɛ á. Ó kē lɔhi gā uwɔ̄ fíyɛ́ ŋ́.

¹²Ɔ̄nyɛ jé ɔdā nōo lɔhi lɛ ɔ̄cɛ, ipú eko kpíi, kú oyēeyī áncā kú nū ā? Oyēeyī nōo gē wā ī yɛ bɛ̄ɛka ojiji ā. Abɔ̄ o yá lɛ ɛ́ɛ́ nɛ̄ ɔ̄cɛ gē jé ɔdā nōo í yá igbīhi nū, eko nōó gekwú ŋmá ipú ɛcɛ ā.