Read idoma Ɔ̄COKÓĪTÁ 7 Bible Online

Ɔ̄COKÓĪTÁ 7 - idoma bible

Ɔ̄COKÓĪTÁ 7

¹Iyē olɔhi ō lé, lɔhi fíyɛ́ anɔ̄ ōkpóocu ā. Ɛ̄cī nɛ̄ ɔ̄cɛ kwú ā lɔhi fíyɛ́ eko nēé ma ɔ́ ā á.

²Ó lɔhi fíyɛ́ kú ɔ̄cɛ kóō ga ɛyíkwū ikɔkɔ ō ga ɔlɛ́ nēé yá ucɛ klá ɛcɛ, ohígbū ka ācɛ nēe yēeyī ā cíkā ō blakwu iyī ūwā ka ikwū yɔ̄ ī gbēyī odúúdú uwā.

³Ɔtūnōbí lɔhi fíyɛ́ ɛhɛ oōyɛ á. Ó lɔfú bīya ɔtū kú uwɔ glá, amáŋ ó gē cɛ̄ gā uwɔ géē jé ɔdā lɔɔlɔhi.

⁴Ɔ̄cɛ nōo ī gbɛlá lɛyíkwu éeyē ō gwó piyóó wɛ olíla. Ɔ̄cojéeyī ī gbɛlá lɛyíkwu ikwū.

⁵Ó lɔhi kú ācɛ o jéeyī kéē dɛ̄gba tū uwɔ, fíyɛ́ ācɛ ɔdāhá kéē gwíijē ī cɛ̄tra uwɔ.

⁶Ɛ́gɛ́nɛ̄ ujē gē tá kpákpá ipu ɔlá ā, ɛ́gɔ́ɔmā nɛ̄ ɛhɛ ō yɛ kú olíla lɛ á. Ɛ̄nyā wɛ áncā, ó lɛyí ŋ́.

⁷Eko nɛ̄ ɔ̄cɛ ojéeyī lɛ ɔ̄cɛ pīyatū, ucē kú olíla nōó yá abɔ́ɔ á. Ómíci nɛ̄ ācɛ gē mīyɛ lé ā gē bīya ucɛ̄ olɔhi. Ó klla ī bīya ɔ̄cɛ iyē.

⁸Oŋmɛ́yí kú ɔdā dóódu lɔhi fíyɛ́ ohútú kú nū á. Ɔtōōlé mɛ́mla ogbēyī cíí, lɔhi fíyɛ́ ɔbɔ́cɛ ō yá á.

⁹A híī cɔ̄nū kú ɔdā dúúmā fíyaa ŋ́. Ohígbū ká olíla gē kpó ɛlā tū ɔtū á.

¹⁰A híī dɔɔ̄kā ka ɔdíya nɛ̄ eko íkée ā lɔhi fíyɛ́ abālɔbányā ā ŋ́. ohígbū ka, íjééyī dúúmā ī yɔ̄ ipú ɔ̄kā nāa da nyā ŋ́.

¹¹Íjééyī lɔhi bɛ̄ɛka agbénú nɛ̄ ācɛ gē lúúgwū nū ŋmá ɛgiyí aádáádā uwā ā. Ó gē tīile piyóó lɛ odúúdú ācɛ nēe yɔ̄ ipú ɛcɛ nyā ā.

¹²Íjééyī gē gbo ɔ̄cɛ ɛyí ɛ́gɛ́nɛ̄ ije gē gbō ɔ̄cɛ ɛyí ā, Itene kú íjééyī lɛ óndú nū ā, wɛ ka ó lɛ oyēeyī kú ɔ̄cɛ ojéeyī ɔ́ɔmā tū.

¹³Lɛ eyī yɛ úklɔ́ kú Ɔwɔicō, kú ā má ɔ̄. Ɔdā dúúmā nōo le pú ā, ɔ̄nyɛ ɔhá gē yá ɔ̄ kóō lɛ nā kpaakpa glá ā?

¹⁴Eko dúúmā nōó le lɔhi gā uwɔ, gwéeyē. Eko dúúmā nōó kē le bɔ̄bí, blakwu Ɔwɔicō nōo yá eko éyi ā, anú klla kē yá eko ɔhá ɔ́ɔmā dúú á. Ohígbū ɔ́ɔmā, ɔ̄cɛ í jé ɔdā dúúmā ohígbū óócí kú nū glá ŋ́.

¹⁵Ipú oyēeyī áncā kú um nyā, n lɛ ɛjɛ̄ɛ̄jī ɔdā nyā má ɛɛ́. Ɔ̄cɛ o le kpaakpa nááná ā gē yíífi ipú ucē okpaakpa kú nū glá, ɔ̄cɛ obɔ̄bíipú ā gē yēeyī ligbó ipú ɔbíipú kú nū glá.

¹⁶A híī yá olɔhi glɛjī ajɛ ŋ́, ɛ́ɛ́ nāa gē jíjéeyī nɛ̄hi glɛjī ajɛ ŋ́. Ɔdíyá nāa gē ŋmó iyī uwɔ ā?

¹⁷A híī bī ɔ́bíipú nɛ̄hi ŋ́, ɛ́ɛ́ nāa gē wɛ olíla ŋ́. Ɔdíyá nāa gē je īyī uwɔ ŋmó gbɔbū lɛ eko kú ikwū kú uwɔ ā?

¹⁸Ó géē lɔhi ga uwɔ, cɛ́ɛ́ ká ā yá odúúmā kú ūwā glaajɛ ŋ́. Ɔ̄cɛ dúúmā nōo gē yúufi Ɔwɔicō, géē bū ɔ̄.

¹⁹Íjéeyī gē je íkwu mɛ́mla ɔfú onwuné fíyɛ́ lɛ ɔ̄cɛ o jéeyī, fíyɛ́ ɔfú kú aɔ́cɛ́ igwó nēe bá ī gbō igelī ékpónú.

²⁰Ɔ̄cɛ dúúmā í yɔ̄ ipú ɛcɛ nyā, nōo gē yá ɔdā nōo le kpaakpa eko dóódu, nōó bīya íne ŋ́ nɛɛ ŋ́.

²¹Á híī jāhɔ lɛ odúúdú ɛlā nɛ̄ ācɛ gē ka ā ŋ́, ohígbū nāa géē pó abɔ̄ ɔ̄cocɛ̄hɔ̄ kú uwɔ í yɔ̄ ī cá uwɔ ɛcá.

²²Ohígbū ka, awɔ abɔ̄īyī uwɔ jé ipú ɔtū kú uwɔ, ka eko alɛwa, a cá ācɛ ɛcá dúú.

²³N bī íjééyī kú um lɛ odúúdú nū jámá ɛɛ́. Anɔ́ɔ n le abɔ̄ gbɔtū ka n géē jéeyī. Amáŋ ɔ́ɔmā le ligbó ŋmá ɛgiyí um.

²⁴Ɔdā nōo kē yɔ̄ ɛɛ́ mā le ligbó nɛ̄hi lɛ alɔ, ó lipú, klla lipú nɛ̄hi lɛ alɔ, ɔnyɛ̄ lɔfú pīyɛ̄ ɔ̄ tɛ́ɛcɛ glá ā?

²⁵N lɛ ɔtū kú um pīya kwu ká n̄ jé ɔdā mɛ́mla o kllɔcɛ́ ɔdā ō jé, cɛ́ɛ́ kú n jéeyī. N klla lɛ ɔ́ pīya tɔ̄há mɛ́mla ɛlā kú alɛɛcɛ. N le má ka ɔ́bíipú wɛ ɔdāhá, íla kē wɛ ɛ́lɛ́ nɛ.

²⁶Ɔdā ohɔ́nɔ fíyɛ́ ikwū éyi nɛ̄ um má ā yɔ̄ á. Ɔdā ɔ́ɔmā wɛ ɔ̄cɛnyā. Ihɔtū kú nū nōo ī mafú lɛ ɔ̄cɛ ā gē kwú ɔ̄cɛ ā bɛ̄ɛka ukpa ā. Abɔ̄ kú nū nōo le ce uwɔ ɔkɔ ā lɛbɛ̄ɛka ɛ́yá nōo gē kwú ɔ̄cɛ ā. Ɔ̄cɛ dúúmā nōo gē yá ɔdā nōo he Ɔwɔicō ɔtū ā lɔfú nyatá ŋmá abɔ̄ kú ācɛnyā glá. Amáŋ ɔ̄cɛnyā ā géē kwú ācobīyíne tulúu bɛ̄ɛka ítū ā.

²⁷Ɔ̄cojéeyī ā kahíníī, “N jé aɔ́dā nēe bá nyā klé klé, abɔ̄ n yɔ̄ ī tíne ō jɛ́ɛyí kú ɔdā dóódu ā.

²⁸N yɔ̄ ī tíne ō jɛ́ɛyí ɔdā ɔhá, amáŋ, ń má ɛyí nū ɛ́ɛ́ ŋ́. N lɔfú má ɔ̄cɛnyīlɔ ékpónú ŋmá ipú ācɛ úlā ɛpa ce ofigwo nɛ̄ n lɔfú lɛ ojīlīmā ce ɔ́ glá. Amáŋ, ń má ɔ̄cɛnyā ékpónú ŋmá ipú ulá ɛpa ce ofigwó dóódu nōo le kpaakpa ŋ́.

²⁹Ɔdā ékpónú nɛ̄ n má ɛɛ́ mā, wɛ kahíníī, ‘Ɔwɔicō lɛ alɛɛcɛ yá kpaakpa, amáŋ ācɛ kwú īyī ūwā ú yá gbájí nɛ̄ɛ̄nɛ̄hi.’”