Read idoma Ɔ̄COKÓĪTÁ 8 Bible Online

Ɔ̄COKÓĪTÁ 8 - idoma bible

Ɔ̄COKÓĪTÁ 8

¹Ɔ̄cojéeyī ōfōōfūnū géē jɛ́ɛyí kú ɔdā dóódu á. Ijéeyī kú ɔ̄cojéeyī gē cɛ̄ lɛ ɔ́ ī cɛ̄ɛhɛ mɛɛ, ó klla ī yá ká eyī nēé kwúflá ā kóō gā ajɛ.

²Lɛyí táajɛ lɛ ɔ́da mɛ́mla íne kú ɔcɛ́. Ā híī ŋmúleyikwū ká ā cokónu lɛ Ɔwɔicō ŋ́.

³Ɔcɛ́ lɔfú yá ɔdā dóódu nōo he ɔ́ ɔtū, ohígbū ɔ́ɔmā, nyɛ̄ɛ̄ ŋmá iyɔ̄bū nū. A híī klá ɛga obɔ̄bí ɛ́gɔ́ɔmā ŋ́.

⁴Ohígbū ka ɛlā kú ɔcɛ́ kwajɛ kli, ɔ̄cɛ dúú í tá ɔ̄ áafú glá ŋ́ ɛ́ɛ́ nɛ̄ ɔ̄cɛ í ka ka ɔdā nōó yá ā ɔ́ɔ lɔhi ŋ́ nɛɛ ŋ́.

⁵Ɔ̄cɛ dúúmā nōo lɛyítáajɛ lɛ ɔcɛ́, abɔ̄ dúúmā í gáā kwu ɔ́ ŋ́. Ɔ̄cɛ ojéeyī ge jé eko mɛ́mla ɔwɛ o yá odée.

⁶Ohígbū ka ɔdā dóódu lɛ ɔwɛ, mla eko nɛ̄ ɔ̄cɛ gē yá ɔ̄, náaná nɛ̄ unwalu kú nū ce ɔ̄cɛ ā.

⁷Ɔ̄cɛ dúúmā kú alɔ í jé ɔdā nōo gáā yá ā ŋ́. Ɔ̄cɛ dúúmā í yɔ̄ nōo gáā da alɔ ɔdā nōo gáā yá ā ŋ́.

⁸Ɔ̄cɛ dúúmā í ci ikwū kú abɔ̄yīnū glá ŋ́, ɛ́ɛ́ nōó gē ci ɛ̄cī ikwú kú nū eko nɛ̄ eyī ikwū kū nū le nyā glá ŋ́. Ikwū wɛ ɛfú nɛ̄ alɔ géē kpó piíí. Alɔ í gáā kwu hɛ ɔ̄ tá glá ŋ́. Ó lɛ ɔwɛ dúúmā nɛ̄ alɔ gáā pīya ɔ̄ tū, le kwu hɛ ɔ̄ abɔ̄ tá glá ŋ́.

⁹N má odúúdú ɔdā nēe bá nyā eko nɛ̄ n yɔ̄ ī gbɛlá kwu ɔdā nɛ̄ ācɛ gē yá ipú ɛcɛ ā. Ɛcɛ nɛ̄ ācɛ ōhī lɔfú nɛ̄hi, anɔ́ɔ ācɛ o hile bá ī móowē ipú abɔ̄ kú ācɛ nēe bī ɔfú mɛ́mla íkwú ā.

¹⁰N má ɛga nēé nyɔ̄ í nyi okwū kú ɔ̄cobɔ̄bíipú éyi. Amáŋ eko nɛ̄ ācɛ nēe nyɔ̄ í nyi okwū kú ɔ̄cobɔ̄bíipú nyā, bá ī wā ɔlɛ́ ŋmá únóji ā, ācɛ gbɔɔ́ ō cɛ̄tra ɔ̄cɛ nōo kwú ā ipɔ́lɛ́ piíí nōo yá ɔdōbɔ̄bí ā. Ɛ̄nyā ā wɛ áncā nɛ.

¹¹Abɔ̄ ācɛ í gē móōwē kú ɔdōbɔ̄bí nēé yá ā fíya ŋ́ mā, ɔ́ɔmā yá nɛ̄ ācɛ gē tútū kéē yá ɔdōbɔ̄bí á.

¹²Náaná nɛ̄ ɔ̄cɛ ō yá ɔdōbɔ̄bí ā gē yá ɔdōbɔ̄bí nɛ̄hi klla ī lɛ́ɛcɛ kpɔ́ ā, N jé ka, ó géē lɔhi lɛ ācɛ nēe ī yúufi Ɔwɔicō mɛ́mla ācɛ nēe gē lɛ ojīlīmā ce Ɔwɔicō ā.

¹³Abɔ̄ ācobɔ̄bíipú ā í yúufi Ɔwɔicō ŋ́ mā, ó gáā lɔhi lɛ uwá glá ŋ́. Oyēeyī kú uwá í gáā yɔ̄ ligbó fíyɛ́ ojiji kú ɔdée glá ŋ́.

¹⁴Ɔdā áncā yɔ̄ ī yá ipú ɛcɛ nyā nɛ̄ ó lɛyí ŋ́ kpɔ́. Ācɛ o yá olɔhi mɛ́mla ācɛ okpaakpa ā, bá ī mīyɛ ulɛ́ kú ācobɔ̄bíipú mɛ́mla ācɛ ō yá alācī. Ācɛ o yá ɔdōbɔ̄bí ā, kē bá ī mīyɛ ulé kú ācɛ o yá olɔhi. Ɛ̄nyā dúú ā, í lɛyi ŋ́, ó klla wɛ áncā.

¹⁵Ohígbū ɔ́ɔmā ā, o yɔ̄ ī jɔ́ɔnyɛ kú oyēeyī ā lɔhi fíyɛ́ á. Ohígbū ka, ɔdā dúúmā í yɔ̄ ipú ɛcɛ,[3] nōo lɔhi fíyɛ́ o yɔ̄ í lé mɛ́mla oōgwá ŋ́. Cɛ́ɛ́ ká ɔtū kóō he ɔ̄cɛ ipú oyēeyī nɛ̄ Ɔwɔicō je lɛ ɔ́ ipú ɛcɛ ā.

¹⁶Eko dúúmā nɛ̄ n lɛ abɔ̄ tū ɔtū, kú um jé ɔdā nōo ī yá ipú ɛcɛ ā, N le má ka ɔ̄cɛ gē yēeyī otú gbɔ́ɔ̄cī leyīkwu ɛcɛ cɔ́ɔ́ ohígbū ɛnya ōfōōfūnū.

¹⁷Amáŋ n má ɔdā dóódu nɛ̄ Ɔwɔicō yá ipú ɛcɛ ā. Ɔ̄cɛ dúúmā í gáā jɛ́ɛyí kú ɔdā nōo yɔ̄ ī yá ipú ɛcɛ ā glá ŋ́. Ɛ́gɛ́ dúú nɛ̄ ɔ̄cɛ bɔkwu nū kóō jɛ́ɛyí nū lɛ. Ɔ́dāŋ́ ka, ɔ̄cojéeyī dúúmā ka anúɔ jé ɔ̄ nááná, ó gáā jɛ́ɛyí nū gbóógbóō glá ŋ́.