Read idoma Ɔ̄COKÓĪTÁ 9 Bible Online

Ɔ̄COKÓĪTÁ 9 - idoma bible

Ɔ̄COKÓĪTÁ 9

¹N gbɛlá nɛ̄hi kwu aɔ́dā dóódu nēe bá nyā, n kē le má ka, odúúdú ɔdā nɛ̄ ācɛ okpaakpa mɛ́mla ācɛ ojéeyi gē yá ā bá ipú abɔ̄ kú Ɔwɔicō. Ó kōō wɛ ihɔtū ámāŋ ka iwɔ́tū kú uwā. Ɔ̄cɛ dóódu í jé ɛjɛ̄ɛ̄jī ɔdā nēe í yɔ̄ ɛ̄cɔ̄bū kú nū ŋ́.

²Amáŋ odúúdú uwā gē ŋmɛ́yí ɛga ékpónú, kwu ācɛ okpaakpa, mɛ́mla ācobɔ̄bíipú, kwu ācɛ olɔhi mɛ́mla ācɛ obɔ̄bí, kwu ācɛ oyēŋēē, mɛ́mla ācɛ nōo le tēelihɔ, kwu ācɛ nēe gē gwɛ́ɛya lɛ Ɔwɔicō mɛ́mla ācɛ nēé gē gwɛ́ɛya lɛ ɔ́ ŋ́. Ɔdā nōo gē yá ɔ̄cɛ olɔhi ā, anú gē yá ācobīyíne dúú á. Kwu Ācɛ o gbɛka, mɛ́mla ācɛ nɛ̄ ó gē gbɛka ŋ́ mā a.

³Ɔdōbɔ̄bí éyi nɛ̄ n má ipú ɛcɛ nyā, wɛ ka, ikwū ékpónú gē ŋmó odúúdú ācɛ á. Eko nɛ̄ ācɛ yēeyī ā, ɔtū kú uwā le mu mla ɔdōbɔ̄bí, mɛ́mla íla, amáŋ igbeékpónú, é gekwú ŋmá ɛcɛ.

⁴Ɔ̄cɛ dúúmā nōo yēeyī ɛ́ɛ́ mā, lɛ eyīyōce. Ohígbū ka, ewō nōo yēeyī ā lɔhi fíyɛ́ ágábá nōo gekwú á.

⁵Ohígbū ka ācɛ nēe yēeyī ɛ́ɛ́ mā, jé ka aá géē kwú. Amáŋ, okwū í jé ɔdā ɔhá dúúmā gɛ ŋ́. É lɛ ile dúúmā gɛ ŋ́, ācɛ klla kwú mlanyī uwā dúúdú ɛɛ́.

⁶Ihɔtū, eyījii, ímálányī mla ɔdā dóódu kú uwá mɛ ɛɛ́. É lɛ ukpɛ̄ kú ɔdā dúúmā nōo ī yá ipú ɛcɛ nyā igbɔhá ɛ́ɛ́ gɛ ŋ́.

⁷Nyɔ̄, ká ā lé ɔdōlé kú uwɔ mla ɔtū nɛ̄hɛ́, ká ā gwá ejé kú uwɔ mla éeyē, ohígbū ka ɛ̄nyā nɛ̄ Ɔwɔicō cɛ̄ kú ā yá á.

⁸Lɛ ifa kú uwɔ yá yēŋēē ká ɔtū kóō he uwɔ. Lɛ anɔ̄ okpóocu tū ɛyí kú uwɔ lɔɔlɔhi.

⁹Jɔ́ɔnyɛ kú oyēeyī mla ɔnyā o he uwɔ ɔtū nāa lɛ ipú ɛcɛ nōo wɛ áncā nyā ā. Jɔ́ɔnyɛ kú ɛ̄cī dóódu kú ɛcɛ áncā nyā mla ɔnyā uwɔ ā. Ohígbū ka ɛ̄nyā ōfōōfūnū wɛ ukpɛ̄ kú ɔnyɛ kú oyēeyī nɛ̄ Ɔwɔicō je ga uwɔ ipú odúúdú úklɔ́ kú uwɔ ipú ɛcɛ á.

¹⁰Ɔdā dúúmā nāa lɛ abɔ̄ bī ɔ̄ gē yá abālɔbányā, yá ɔ̄ lɔɔlɔhi mla odúúdú ɔfú kú uwɔ, ohígbū ká, únóji[4] nāa gē nyɔ̄ á, úklɔ́, íjééyī mɛ́mla ohílīpú, mla ɔdōōjé ɔhá dúúmā í yɔ̄ abɔ́ɔ gɛ ŋ́.

¹¹Ɔdā nɛ̄ n má ipú ɛcɛ ā wɛ ka, ó wɛ odúúdú ācɛ nōo kwinya fíyɛ́ dúú ipú ɛcɛ nyā, gē mīyɛ uloko ā ŋ́. Ó wɛ ɔ̄cɛ nōo lɛ ɔtū fíyɛ́ dúú ā gē yálé ɔgbɛ́fú ā ŋ́. Ó wɛ ācɛ nōo jéeyī fíyɛ́ dúú ā gē lɛ̄ agbénú ā ŋ́. Ó wɛ ɔ̄cɛ nōo cíkā ō lé ɔcɛ́ fíyɛ́ dúú ā gē cɔcɛ́ ā ŋ́. Iyɔ̄nɔ ámáŋ ka iyaōolɔhí lɔfú yɔ̄ lɛ odúúdú uwā kpɛ́mm.

¹²Á jé ɛ̄cī nɛ̄ ákú uwɔ gē wā ā ŋ́. Lɛbɛ̄ɛka ɛbéenyi nɛ̄ ɛ́yá gē kwú acígilí ā, ámāŋ ka ígbáanɔ nɛ̄ ukpa gē kwū acígilí ā, ɛ́gɔ́ɔmā nɛ̄ ɛ̄cī obɔ̄bí mla ikwū gē je ukpa tá ajɛ gē gbēyī ɔnyɔ̄ɔnyɛ kú alɔ lɛ á.

¹³N má ocábɔmafú kú íjééyī ipú ɛcɛ nyā nōo jɛ um eyī nɛ̄hi.

¹⁴Igelī nɛ̄ŋcɛ́ éyi yɔ̄ nɛ̄ ācɛ í lɛwa nɛ̄hi ŋ́. Ɔcɛ́ olɔfú nɛ̄hi éyi gaá le ɔfú kpó kwu ɔ́. Ó le íbɔm cē tū ɔ̄.

¹⁵Amáŋ, ɔlɛhɔ́cɛ éyi yɔ̄ ipú ɔlɛ́ ɔ́ɔmā nōo jéeyī nɛ̄hi. Ó bī íjéeyī kú nū lɛ ɔlɛ́ ɔ́ɔmā hɛ́tá. Amáŋ, ɔ̄cɛ dúúmā í bla kwu olɛhɔ́cɛ ɔ́ɔmā gɛ ŋ́.

¹⁶Ohígbū ɔ́ɔmā, nɛ̄ n ka ka íjééyī lɔhi fíyɛ́ ɔfú á. Amáŋ, ɔ̄cɛ dúúmā í lɛ ɛlá wu íjééyī kú olɛhɔ́cɛ ā ɛ́ɛ́ nēé gē jahɔ̄ lɛ ɔ́ ŋ́.

¹⁷Ɛlā oŋiniŋini kú aójéeyī lɔhi ō pó fíyɛ́, ɛgba kú ɔcɛ́ ɔtāhɛ̄ aígabɔ̄ nēe wɛ aólíla á[5]

¹⁸Íjééyī lɔhi fíyɛ́ ɛdɔ iyɔ́fú dóódu á, amáŋ ɔ̄cobīyíne ékpónú gē bīya ɔdā olɔhi alɛwa.