Read idoma IJĒ KÚ USÓLŌMƆN 1 Bible Online

IJĒ KÚ USÓLŌMƆN 1 - idoma bible

IJĒ KÚ USÓLŌMƆN 1

¹Aɛ́nyā wɛ ijē nēe lɔnyɛ fíyɛ́ dúú nɛ̄ Usólōmɔn gwó ā á.[1]

²Ɔ́ncɛ́nyā ā kahíníī, “Eyī yá um ká ā wā í mú um ɔtū klla ā lɛ okónu kwu um okónu, ohígbū ka ɔwɛ nɛ̄ n he uwɔ ɔtū lɛ ā, lɔhi fíyɛ́ ɔdā olɔhi nɛ̄ ejé ī je lɛ ācɛ nōo ī gwá ā.

³Ɔtulalī kú uwɔ ī kpóocu nɛ̄hi, O hī iyē kú uwɔ lɛbɛ̄ɛka anɔ̄ mɛ́mla ɔtulālī nōo ī ōkpóocu nɛ̄hi gē mīyɛ ɛbɛɛbɛ tū abɔ̄ ā. Ohígbū ɔ́ɔmā yá nɛ̄ odúúdú ayípáncɛ́nyā gē yíhɔtū tū uwɔ piíí á.

⁴Kwú um ú ka ālɔ̄ le kwu ŋmá amānyā, kwú pīya ɔcɛ́ kú um, ká ā lɛ um bī ga inu ɔlɛ́ uwɔ. Alɔ géē gwéeyē tɔ̄há kú ɔtū kóō he alɔ ipú ihɔtū kú uwɔ, N géē cɛ̄tra ɛ́gɛ́nɛ̄ n he uwɔ ɔtū lɛ ā. Anú lɔhi fíyɛ́ ɛ́gɛ́nɛ̄ ejé olɔhi ī he ācɛ o gwá ejé ɔtū lɛ ā á. Ó yéyīji ŋ́, a he odúúdú ayípáncɛ́nyā ɔtū nɛ̄hi.

⁵Ācɛnyā kú Ujerúsālɛm, N le tá óbí, amáŋ n jɔ̄ɔ́ncɛ́nyā nɛ̄hi, n le sunúúú bɛ̄ɛka otómbīye ā. N klla héyīfuú bɛ̄ɛka ukɔ́tin kú inu ɔlɛ́ Usólōmɔn ā.

⁶Áa híī lɛ eyī gwū um bónū, ohígbū óbí kú um ā ŋ́, ohígbū ka ɛnɔ cɛ̄ um, je um tá óbí fiyuu á. Ayínɛ́ um nɔ̄nyīlɔ le cɔ̄nū mla um, anɔ́ɔ é kwú um ú tá yɔ̄ ī leyīkwu ɛhɔ̄ kú ufáyin kú ācɛ ɔhá, anɔ́ɔ n má ɛga leyīkwu iyī um gɛ ŋ́ má.

⁷Ɔ̄cohumɔtū, da um mɛ́ɛ́, ɛga nɛ̄ a géē kpó aɔ́dāajɛ kú uwɔ nyɔ̄ í lúlé ícɛ ā. Iní nēé géē nyɔ̄ í mlɛ́nyɔ́ olɛ́ɛnɔ ā? Ká n híī yɔ̄ ī yɛ ɛbɛɛbɛ gē tíne uwɔ, ipú aálá kú ɔ̄cogbāálá ɔhá ŋ́.

⁸Ɔ̄cɛnyīlɔ ā kahíníī, “Á jé abɔ́ɔ ŋ́ nɛɛ, ɔnyā nōo jɔ̄ɔ̄ncɛ́nyā fíyɛ́ anyā dóódu ā? Nyɔ̄ ká ā gāá yɛce aálá ā, ká ā tíne ácí lɛ ayí aɛ́wū, ɛgiyí aáklɔ̄kpɛ kú ɔ̄cogbāálá ā.

⁹Ɔ̄cohumɔtū, n le uwɔ gbla aɔ́nyā kú úgbɔ́ɔnya okpɛ́fú kú ɔcɛ́ kú Íjīpiti nēe lɛ ɛgahi klla héyīfuú nɛ̄hi ā.

¹⁰Ɔdōplahɔ̄ mɛ́mla agbá ōtɔ̄ɔkɔ kwú uwɔ ú yá héyīfuú nɛ̄hi.

¹¹Amáŋ alɔ géē yá agbá ōtɔ̄ɔkɔ kú ojē ɔdɔ ī kpó ɛ́cɛ kú oje nɛ̄hɛ́ tū ɔ̄ ga uwɔ.

¹²Abɔ̄ ɔcɛ́ kú um gwutá agōdō ā, ocu kú ɔtulalī kú um kpó klá anú kpɛmm.

¹³Ɔ̄cohumɔtū, gē kpócu lɔhi tū um bɛ̄ɛka eko nōó gwutá ce ɛplá amɛ̄ ɛpɛplɛ́ɛpa kú um ā.

¹⁴Ɔ̄cohumɔtū klla lɛbɛ̄ɛka odódó kú ipácí nōo gē nwūla ipú ɛhɔ̄ ufáyin kú Éngēdi ā.

¹⁵Ɔcɛ̄nyīlɔ ā kahíníī, “Ɔ̄cohumɔtū, a jɔ̄ɔncɛ́nyā klla lɔhi nɛ̄hi, ihɔtū yá kú eyī kú uwɔ kóō yɔ̄ ī fíyajɛ.

¹⁶Ɔ̄cɛnyā ā kahíníī, “Ɔ̄cohumɔtū, a jōklóbīya nɛ̄hi, a gē cɛ̄ lɛ ɔtū he um nɛ̄hi. Ácí ɛ̄mɛ̄ɛ̄mɛ̄ ā gáā wɛ agōdō kú alɔ mɛ́ɛ̄ á.

¹⁷Ɔcí usɛ́da gāá wɛ aflá kú inu kú alɔ á. Ɔcí nēe hī ka Upáyin ā nɛ̄ alɔ gāá le fīyɛ̄ ɔ̄ ɛyí á.