Read idoma IJĒ KÚ USÓLŌMƆN 2 Bible Online

IJĒ KÚ USÓLŌMƆN 2 - idoma bible

IJĒ KÚ USÓLŌMƆN 2

¹N lɔhi ō má eyī bɛ̄ɛka ododó nēe ī jɛ̄ bá ɛyí ɛfu kú Ussárɔn, mɛ́mla ododó kú ɔpɛ́ kú ɛfu á.

²Ɔ̄cɛnyīlɔ ā kahíníī, “Ɛ́gɛ́nɛ̄ ododó gē kwu ɔtāhɛ̄ ujē ā, ɛ́gɔ́ɔmā nɛ̄ ɔ̄cohumɔtū ā lɛ ɔtāhɛ̄ kú anyā ohile á.

³Ɔ̄cɛnyá ā kahíníī, “Ɛ́gɛ́nɛ̄ ɔcí kú umángolo lɛ ipú aɔ́cí kú ūpū ohile ā, ɛ́gɔ́ɔmā nɛ̄ ɔ̄cohumɔtū ā lɛ ɔtāhɛ̄ kú ācɛnyīlɔ ohile á. Ó he um ɔtū ká n cīce obobowú kú nū, īkpō nōó ī gwá ā lɔnyɛ tū um nɛ̄hi.

⁴Ó lɛ um bī wā ɛga nōó ī yá ucɛ kú nū ā, anɔ́ɔ ó kē le ihɔtū kú nū mafú ga um bɛ̄ɛka ɛ́gɛ́nɛ̄ é lɛ otúta kwu kē ma odée fú á.

⁵Lɛ ɔfú tū um iyē mla ufáyin ō ŋmó. Lɛ um owu tú kwu ɔhá mla īkpɔ̄cí nēé hī ka ápu ā, ohígbū ka abɔ̄ le hɛ́ um iyē ohígbū ihɔtū ɛɛ́.

⁶Ka abɔ̄lúfīyē kú nū kóō tá ɛháajɛ ɛyí kú um, ká n lɛ ɛyí ce ɔ́, ká abɔ̄lɔ́ná kú nū kóō yɔ̄ ī yɛ um iyē.

⁷Aá kócōō lɛ okónu ce gā um, ācɛnyā kú Ujerúsālɛm, Aá lɛ ɔkpá gbo oŋmá lɛ iyē kú īkpɛ̄ɛnū mɛ́mla ulúu, ká aá í gáā junwula lɛ alɔ ŋ́, jāā gbéeko nɛ̄ alɔ lɛ ɔnyɛ kú ihɔtū kú alɔ jé kwɛyí.

⁸Ɔ̄cɛnya ā kahíníī, “N pó ɔkɔ kú ɔ̄cohumɔtū ā, ó yɔ̄ ī kwinya ŋmá ɛyí ɛfú, yɔ̄ ī wúla aɛ́fu ā tū lɛyíkwu um.

⁹Ohumɔtū lɛbɛ̄ɛka īkpɛ̄ɛnū ā. Ó klla lɛbɛ̄ɛka, ɔyí ɔbá ɔca ā. Ó háyi abɔ́ɔ pīya ɔdɔ, ó lɛ eyī bū uwíndo, klla lɛ eyī bū ɛplá kú nū.

¹⁰Ohumɔtu ā yɔ̄ í kɛlā ga um kahíníī, “Cāŋjɛ ká ā wā ohumɔtū, ohumɔtū wā mla um.

¹¹Ɔgwā wā í le yɛ ɛɛ́, ɔwɔ kwú hɛ́, klá mɛ ɛɛ́.

¹²Ododó kwú hépu klɛ́ɛcɛ ɛɛ́, eko kú ijē ōgwó gā ɛɛ́, alɔ kē bā ī pó ɔkɔ ijē kú okóho ɔkpɔkpɔ̄ ipácí kú ɔlɛ́ alɔ ɛɛ́.

¹³Ɔcí kú ufígi le gwá klla gbɔɔ́ ō pīya ɛɛ́. Ɔcí ufáyin le héepu klla yɔ̄ ī kpóocu kwūūū ɛɛ́. Cāŋjɛ, ohumɔtū, ɔnyā ojɔ̄ncɛ́nya kú um, cāŋjɛ ká ā wā.

¹⁴Ɔ̄cɛnyīlɔ ā kahíníī, “A lɛbɛ̄ɛka okóhō nōo tayínū ɔ̄gɔ̄ ɛcɔ̄ ɛyí ɛfu ā. Ká n̄ lɛ eyī ō héyīfuú kú uwɔ ā má. Ká n lɛ ɔkɔ ólɔnyɛ kú uwɔ ā pó.

¹⁵Lɛ aɛ́pā ā kwú lɛ alɔ. Aɛ́pā nɛncɛ́ ɔ́ɔmā gē je ɛhɔ̄ kú ɔcí ufáyin kú alɔ bīya ā, eko nɛ̄ ɔcí ufáyin kú alɔ gbɔɔ́ ō héepū ā.

¹⁶Ɔcɛ̄nyā ā kahíníī, “Ohumɔtū ā wɛ ákú um, n kē wɛ ákú nū, ó gē je ɔdōlé lɛ aálá kú nū ā ɔtāhɛ̄ kú ɔcí ō yá ododó.

¹⁷Jāā gbéeko nɛ̄ owu kú ofúlɔcī gbɔɔ́ ō tá, nɛ̄ otū gbɔɔ́ ō bī, kwúcē, ohumɔtū. Pīyɛyí wā fíyaa bɛ̄ɛka īkpɛ̄ɛnū ō kwinya ā, bɛ̄ɛka ɔyí ulúu nōo yɔ̄ ī kwinya ɛyí ɛfu okplókō kplokō ā.