Read idoma IJĒ KÚ USÓLŌMƆN 3 Bible Online

IJĒ KÚ USÓLŌMƆN 3 - idoma bible

IJĒ KÚ USÓLŌMƆN 3

¹Ipú iyɔ̄lā kú um, otú alɛwa ɛyí agōdō kú um, N yɔ̄ í nā ɔnā kú ɔ̄cɛ nōo he um ɔtū ā. N yɔ̄ ī tíne ɔ̄cɛ nōo he um ɔtū ā, amáŋ ń má ɔ̄ ŋ́. N hī ɔ̄ igwú, amáŋ ó cɛ̄ igwú kú um ŋ́.

²N gbɔɔ́ ō yɛ ɛbɛɛbɛ kú igelī ā, ipú úláyi mɛ́mla ɛplá dúúdu. N nyɔ̄ í yɔ̄ ī tíne ɔ̄cɛ nōo he um ɔtú ā. N tíne nū, amáŋ ń má ɔ̄ ŋ́.

³Ācogbāājɛ nēe bá ī yɛ igelī ā lɛ um má. Anɔ́ɔ n da uwá ɔ̄kā ka, “Aá má ohumɔtū?”

⁴Obōōbū nɛ̄ n le glá uwá ā, n lɛ ɔ́ má. N gāá bī ɔ̄ kli, n klla cɛ̄ lɛ ɔ́ nyɔ̄ gɛ ŋ́. Jāā gbéeko nɛ̄ n lɛ ɔ́ bī wā ipú inū kú ɔlɛ́ ɛ́nɛ́ um, ipú īnu ɛga nēé ma um piíí ā.

⁵Ācɛnyā kú Ujerúsālɛm, aá le okónu ce ga um, Aá lɛ ɔkpá gbo ŋmá iyē kú īkpɛ̄ɛnū nōo gē kwinya nɛ̄hi ā, mɛ́mla ulúu kú ipácí, ka aá gáā je unwalu lɛ alɔ ŋ́, jāā gbéeko nɛ̄ alɔ lɛ ɔnyɛ kú īyī alɔ jé kwɛyí.

⁶Ɔdí gē wā ŋmá ipú ígbíli abɔ́ɔ kpúmmm bɛ̄ɛka ódūdū ā, nōo yɔ̄ ī kpóocu kwūūū mla umáari mɛ́mla ufránkīnsɛnsi, ɛ́dɔ kú ɔtulalī ōkpóocu nɛ̄ ācɛ otɔ́sú ī je lá ā.

⁷Usólōmɔn nēé bī ɛyí akpa kú ɔcɛ́ kú nū yɔ̄ ī wā abɔ́ɔ á. Aícɔ́ɔja nēe lɔfú fíyɛ́ dúú ā, ofɛtá le ɔ́ yɛjīla tá yɔ̄ ī gbō ɔ̄.

⁸Odúúdú ūwā jé ō nuunu mla ɔkpacaŋgelī. É wɛ ācɛ nɛ̄ ɛfú ō kpó le jé ūwā iyē ɛɛ́, ɔnyɔɔnyɛ kú uwá lɛ ɔkpacaŋgelī kú nū ce átákwū yɔ̄ ī gbāajɛ otú ohígbū aólɛlā.

⁹É bī Usólōmɔn ɛyí akpa kú ɔcɛ́ kú nū, nēé bī ɔcí nōo lɔhi fíyɛ́ dúú le gbā ɔ̄ ā.

¹⁰É le oje nɛ̄hɛ́ ma plá ɔ́kpa ā iyē, É le ijā kú oje ɔdɔ he tū īlī nōo klá anú ā, īlī kú ɔgalúlā klá ɔdōōcīce kú nū, nɛ̄ ayípáncɛ́nyā kú Ujerúsālɛm lɛ ijā he tū ɔ̄ lɔɔlɔhi.

¹¹Ācɛnyā kú Usáyɔn, aá wā gāa má Usólōmɔn, ɔcɛ́ ā. Ó lɛ ɔfulā nɛ̄ ɛ́nɛ́ nū le wu ɔ́ ɛyí ɛ̄cī nōó lɛ ɔnyā ā wu ɛyí. Ɛ̄cī ɔ́ɔmā wɛ ɛ̄cī kú éeyē mɛ́mla ɔtū nɛ̄hɛ́ kú nū.