Read idoma IJĒ KÚ USÓLŌMƆN 4 Bible Online

IJĒ KÚ USÓLŌMƆN 4 - idoma bible

IJĒ KÚ USÓLŌMƆN 4

¹Mɔ́ɔ̄ ɛ́ɛ́, ohumɔtū, a jɔ̄ɔ̄nyā nɛ̄hi. Īkpēyī kú uwɔ yɔ̄ ī fíyajɛ mla ihɔtū, ipú īlī ō kléeyī kú uwɔ. Īnyīlɛyí kú uwɔ yɔ̄ ī jíliyē, yɔ̄ i hɛ́ kputu, bɛ̄ɛka ígwu kú aɛ́wū nēe bá ī wúla ɔpɛ́ kú Ugílɛ̄di wā ajɛ ā.

²Ayīnu kú uwɔ wɛ ɛnɛ̄hɛ́ kwɛ́mm bɛ̄ɛka aálá nēé lɛ uwá ɔnwū wā, klla le uwá iyē gwá bōōbū á. Odúúmā í fu ŋmá anú ŋ́, odúúdú uwā jōōjīlē kplīgīdī.

³Akpókónu kú uwɔ lɛbɛ̄ɛka ɛwɔ́ ā. Eko dúúmā nɛ̄ a ī kɛlā, ó lɔhi oōmá nɛ̄hi. Ábáa kú uwɔ ī ceyī mlómló ŋmá ipú īlī ō kléeyī kú uwɔ ā.

⁴A tū ɔcɔ́ɔkɔ gené-gené nōo lɔhi bɛ̄ɛka inu olɔfú kú Udéfīdi ā. Agbá ō tɔ̄ɔkɔ nōo playi awɔ ɔkɔ ā, le uwɔ yá héyīfuú bɛ̄ɛka ohéyīfuú kú aɔ́kplɛ́fú mɛ́mla aóbō alɛwa nēé kpó playi anú ā.

⁵Aámɛ̄ kú uwɔ ā héyīfuú lɛbɛ̄ɛka ayí ɔblá nēe wɛ áplɛ́ ɛpa ā.

⁶N géē klá ɛyí ɛfu kú umáari mɛ́mla ɛyí kú ufránkīnsɛnsi, jāā gbéeko nɛ̄ eyī le nyā nɛ̄ obū le kwu.

⁷Ohumɔtū, a jɔ̄ɔ̄nyā nɛ̄ɛ̄nɛ̄hi, á lɛ ɛcá ámāŋ ɔ́nyí dúúmā ŋ́.

⁸Wā mɛ́mla um ŋmá Ulɛ́bānɔn, ɔnyā um. Wā ŋmá Ulɛ́bānɔn mɛ́mla um. Wāajɛ ŋmá ɛyí ɛfu kú Amána, ŋmá ɛyí ɛfu kú Usénɛ́ɛ mɛ́mla ɛfu kú Uhɛ́mɔn, ɛga nɛ̄ aágábá mɛ́mla ɛjɛ lā ā.

⁹Olɔnyɛtum mɛ́mla ɔnyā um, eyī omɛ́ɛbɛ kú uwɔ mɛ́mla agbá nɛ̄ a le tɔ̄ɔkɔ ā, kwú um odo ú ɛɛ́.

¹⁰Ihɔtū kú uwɔ cɛ̄ lɛ ɔtū gē he um nɛ̄hi, ákú abɔ̄yī um, ɔnyā um. Ihɔtū kú uwɔ lɛ um ɔnyɛ klla lɛ ɔhi fíyɛ́ ejé á. Ɔtulaiī kú uwɔ kpóocū fíyɛ́ odúúdú aɔ́tulalī ɔhá á.

¹¹Akpókónu kú uwɔ lɔnyɛ tū um lingɔɔɔ bɛ̄ɛka ɛnwú, ohumɔtū. Ígblɛ́nyī kú uwɔ lɔnyɛ bɛ̄ɛka enyāmɛ̄ mɛ́mla ɛnwú. Īlī ō tōōhí kú uwɔ lɛ odúúdú ocū kú Ulɛ́bānɔn.

¹²Ákú abɔ̄yī um, ɔnyā um, a lɛbɛ̄ɛka ɛhɔ̄ nēé lɛ ɔ́ gwū nɛ̄ ɔ̄cɛ ɔhá í gē ga ɔ́ ŋ́ mā. A klla lɛbɛ̄ɛka njɔlɔ kú ami ōfōōfū um, nɛ̄ ɔ̄cɛ dúú ɔhá í gwá éŋkpɔ̄ ŋmá anú ŋ́ mā.

¹³Ɛhɔ̄ ɔ́ɔmā, gē bū ɛdɔ aɔ́cí o gwíīkpō ɛdɔ ɛyɛ́ɛyɛ́yí, é géē bá ī jɛ̄ bɛ̄ɛka ɛhɔ̄ kú aɔ́cí nēé hī upɔmegrɛ́nēeti nōo ī gwá īkpō olɔhi fíyɛ́ dúú ā. Īkpō kú Uhéna mɛ́mla Unádi í gáā ŋá abɔ́ɔ ŋ́.

¹⁴Mɛ́mla Usáfrɔn, Ukálāmɔsi, mɛ́mla Usinámɔn, ámāŋ ɛdɔ kú ɔtulalī dóódu.

¹⁵Njɔlɔ kú éŋkpɔ̄ olɔhi gē kpó éŋkpɔ̄ tū ɛhɔ̄ ā mɛ́mla ɔkpá nōo gē pɛ́ ŋmá Ulɛ́bānɔn ā.

¹⁶Ɔ̄cɛnyā kahíníī, “Le héyī, owu kú ɛhícō kú ɛcɛ! Wā, owu kú ɛháajɛ kú ɛcɛ! Aá gaá tá klá ɛhɔ̄ kú um, ka aá cɛ̄ lɛ ocu kú nū kóō pɛ́ klá ɛga dóódu. Ohumɔtū, kóō wā ipú ɛhɔ̄ kú nū wā í lé ɛdɔ īkpɔ̄cí nōo he ɔ́ ɔtū fíyɛ́ dúú ā.