Read idoma IJĒ KÚ USÓLŌMƆN 5 Bible Online

IJĒ KÚ USÓLŌMƆN 5 - idoma bible

IJĒ KÚ USÓLŌMƆN 5

¹Ákú abɔ̄yī um, ɔnyā um, n gā ipú ɛhɔ̄ kú um ɛɛ́. N yɔ̄ ī kpó anɔ̄ mɛ́mla Umáari kú um tū, n yɔ̄ ī lé ɛnwú kú um mɛ́mla āgā ɛnwú kú um ɛɛ́. N yɔ̄ ī gwá ejé mɛ́mla enyāmɛ̄ kú um.

²N yɔ̄ ī gbɔlā, amáŋ odo kú um yēeyī yɔ̄ ī nɔ̄nā. N nɔ̄na, anɔ́ɔ ohumɔtū ā yɔ̄ ī lɛ abɔ̄ gbo ɔwɛ kahíníī, “Lɛ ɔwɛ nwūla gā um, ákú abɔ̄yī um, ohumɔtū, okóhō kú um, nōó lɛ ɛcá dúúmā ŋ́ mā. Ohígbū ka ébú le cē klá um ɛyí. Ébú kú otú ā, yɔ̄ ī hɛ́ ŋmá ɛyí kú um wā ajɛ kótókótó.

³N lɛ īlī pllá tóohɛ́ɛwa ɛɛ́, abɔ̄ n géē kpó īlī ā tū ohí igbɔhá gɛ. N kē le ikpó nā ɛɛ́, n klla kwú ɔ̄ ú blínyī igbɔhá kpɔ́ nɛɛ?

⁴Anú nōo ī yíihɔtū kú um ā, kwú abɔ̄ í bū ɛplá ɔwɛ kú ɔlɛ́ um ā, Anɔ́ɔ n gbɔɔ́ ō piyɔtū nū á.

⁵N le tá cāŋjɛ nyɔ̄ gáā nwūla ɔwɛ lɛ ɔ́. Umáari klá um abɔ̄, enyi nū kē yɔ̄ ī hɛ́ ŋmá um ayíkābɔ̄, abɔ̄ n lɛ abɔ̄ bī ɛga onwūla ɔwɛ ā.

⁶N lɛ ɔwɛ nwūla lɛ ohumɔtū, amáŋ ó kē nyɛ̄ɛ̄ le yɛ ɛɛ́. Odo kú um gebí tū um ipú, eko nōó kɛlā ā. N tíne nū, amáŋ ń má ɔ̄ ŋ́, n hī ɔ̄ igwú, amáŋ ó cɛ̄ ŋ́.

⁷Eko nɛ̄ ācogbāajɛ ā bá ī yɛ otú ā, é lɛ um má. É ŋmó um ijē, lɛ um yá ágbe. Ācogbāajɛ ɔ́ɔmā kwú īlī kú um fa ŋmá um iyē

⁸Aá lɛ okónu cē gā um, anyā kú Ujerúsālɛm, Ka eko dúúmā nɛ̄ aá lɛ ohumɔtū má, aá géē da ɔ́ ka unwū kú ihɔtū kú nū gáā ŋmó um ɛɛ́.

⁹Awɔ nōo jɔ̄ɔ̄nyā fíyɛ́ odúúdú ācɛnyā ā, Ɔdí yá nɛ̄ ɔ̄cɛ nōo he uwɔ ɔtū nyā wɛ ɛyɛ́ɛ́yí hɛ̄ ācɛnyīlɔ ohile ā tá ā? Ɛ́ɛ́ nɛ̄ a ge da alɔ ka alɔ yá ɔdā nyā ā?

¹⁰Ohumɔtū ā jōklóbīya klla lɔfú iyē, Ó kwɛcɛ yōlīī ipú ācɛ úlā ofu cɛhɔ̄.

¹¹Ɛyí kú nū wɛ oje udɔ ɛ́nɛ́nɛ̄, īnyīlɛyí kú nū le gwā, klla lɛ sunúúú bɛ̄ɛka ɔtágláma ā.

¹²Aíkpēyī kú nū klla lɔhi bɛ̄ɛka, aókóho ɛpa nēe le iyē gwá ipú enyāmɛ̄ nēe bá pī ɔkpá nōo yɔ̄ í pɛ́ wulɛ́wulɛ́ ā.

¹³Ábáa kú nū lɔhi bɛ̄ɛka ɛhɔ̄ nɛ̄ ɛdɔ ēpū dóódu mɛ́mla ɔcí ɔtulalí yɔ̄ anú ā. Akpókónu kú nū lɛbɛ̄ɛka ododó nōo le dɛ̄ sɔɔɔ mla ɔtulalī kú Umáari ā.

¹⁴Abɔ̄ kú nū kwu yōōlō bɛ̄ɛka ɔdā nēé le oje ɔdɔ yá ɔ̄ ā, klla lɛ eliká nēé lɛ ɛcɔ̄ ō ceyī ŋmaáŋmaá kpó wu ɔ́ ā. Ɔkpíyē kú nū le mulɔ́mulɔ́ bɛ̄ɛka ɛcɔ̄ɔwɔ ā, mɛ́mla ɛcɔ̄ nēé gē kpó wu īlī nyɛɛ́nyɛɛ́ ā.

¹⁵Ikpó kú nū lɛbɛ̄ɛka upíla kú ɛcɔ̄ nɛ̄hɛ́ ohéyīfuú nēé lɛ ɔ́ bu kwu ɔ̄gɔ̄ kú ojē ɔdɔ ā. Ó háyi glíímá bɛ̄ɛka aɛ́fu kú Ulɛ́bānɔn ā, klla tū ɛgahi bɛ̄ɛka aɔ́cí usɛ́da kú nū ā.

¹⁶Okónu kú nū lɔnyɛ lingɔtɔɔɔ bɛ̄ɛka ɛnwú ā. Ɔdā dóódu kú nū lɔhi nɛ̄hi, klla ī cɛ̄ lɛ ɔ́ he um ɔtū nɛ̄hi. Ɛ́gɛ́nyā nɛ̄ ohumɔtū, nōo kwu um ajaajɛ ā lɛ ā á, anyā kú Ujerúsālɛm.