Read idoma IJĒ KÚ USÓLŌMƆN 8 Bible Online

IJĒ KÚ USÓLŌMƆN 8 - idoma bible

IJĒ KÚ USÓLŌMƆN 8

¹Eyī yá um ka a kwú pīya ɔyínɛ̄ um nɔ̄nyīlɔ, nōo gwá amɛ̄ kú ɛ́nɛ́ nōo ma um ā. Cɛ́ɛ́ ɔ́dāŋ ka n lɛ uwɔ má uláyi, n lɔfú lɛ ɔtū mū uwɔ ɔtū, nɛ ɔ̄cɛ dúúmā í gáā lɛ ɛlá wu ɔ́ ŋ́.

²N kē í bī uwɔ wā ipú inu kú ɔlɛ́ ɛ́nɛ́ nōo ma um ā, cɛ́ɛ́ a lɛ ihɔtū nwū um. N kē í je ejé ō kpóocu kú um gā uwɔ, mɛ́mla ejé kú upɔmegrɛ́nēeti kú um.

³Abɔ̄lúfīyē kú uwɔ tá ɛháajɛ ɛyí kú um, anɔ́ɔ abɔ̄lɔ́ná kú uwɔ kē yɔ̄ ī yɛ um iyē á.

⁴Anyā kú Ujerúsālɛm, aá lɛ okónu ce gā um, ka aá í gáā junwalu lɛ alɔ ŋ́ jāā gbéeko nɛ̄ alɔ lɛ ɔnyɛ kú ihɔtū kú alɔ jé kwɛyí.

⁵“Ɔ̄nyɛ̄ yɔ̄ ī wɛ̄ɛcɛ ŋmá ipú ígbíli abɔ́ɔ, lɛ abɔ̄ flá mɛ́mla ɔ̄cɛ nōo he ɔ́ ɔtū ā?” “Ɛháajɛ ɔcí ápu ā, n lɛ uwɔ héyī ŋmá iyɔ̄lā, abɔ́ɔ ā nɛ̄ ɛ́nɛ́ uwɔ ma uwɔ á.

⁶Kwú ɔtū kú uwɔ ú ŋmá ihɔtū kú ɔnyā ɔhá dóódu, ayíka ákú um ōfōōfūnū. Ā klla bī ɔnyā ɔhá dúúmā bɔ́ɔ̄tū gɛ ŋ́, ayíka ami ofōōfūnū um. Ihɔtū lɔfú bɛ̄ɛka ikwū ō ŋmó ɔ̄cɛ ā. Ɔbɔ́nyā ō yá kē lɔnɔɔtū lɛbɛ̄ɛka ikwū abɔ̄yī nū, mɛ́mla únóji ā. Ó gē hɛ́ wulu bɛ̄ɛka ígblɛ́nyī ɔlá, nōo gē yi bɛ̄ɛka ɔlá owu ā.

⁷Éŋkpɔ̄ í nyí ɔlá kú ihɔtū glá ŋ́, ɛ́ɛ́ nɛ̄ éŋkpɔ̄ o cēenyi í lɔfú gwu ɔ́ bónū glá ŋ́. Ɔ́dāŋ ka ɔ̄cɛ kwú agbénú kú nū í kpó tū ihɔtū, o jɛ̄ ɔ̄ ŋ́ kpɔ́.

⁸“Alɔ lɛ ɔyínɛ́ nɔ̄nyā nɛ̄ncɛ́ éyi, nōo yɔ̄ ī hɛ́ ikpō amɛ̄ kpiíkpií abāābɔ̄ Ɔdí nɛ̄ alɔ géē yá lɛ ɔ́, eko nɛ̄ ayípɛ̄ óklóbīya í wā í táaha nū ā?

⁹Ɔ́dāŋ koó wɛ ɔdɔ nɛɛ alɔ géē yɛ í lɛ inɔɔ̄da kú oje nɛ̄hɛ́ gwó kwu ɔ́. Ɔ́dāŋ koó kē wɛ odūngwɔ̄wɛ nɛɛ, alɔ í yɛ í lɛ ápɔ́tɔ́cí kú ɔcí usɛ́da gbā gwū ɔ̄.”

¹⁰“N lɛbɛ̄ɛka ɔdɔ ā, amɛ̄ kú um kē lɛbɛ̄ɛka inɔɔ̄da kú ɔdɔ ɔ́ɔmā ā. Ipú um nɛ̄ ohumɔtū ā lɛ ɔdā dóódu nōo ce ɔ́ ɛgbá ā á.”

¹¹“Usólōmɔn lɛ ɛhɔ̄ kú ufáyin, nōo kwu ɛga nēé hī ka, Ubaalu Uhámɔn ā. Ó kwú ɛhɔ̄ ā tá olufa lɛ aɔ́glɛ́ɛjí. Ɔnyɔɔnyɛ kú uwá gē cílá īkpīije úlā ɛpa cofigwó kú oje nɛ̄hɛ́ lɛ ɔ́.

¹²É cílá Usólōmɔn īkpīije kú oje nɛ̄hɛ́ úlā ɛpa cofigwó, aɔ́glɛ́ɛjí ā kē le īkpīije kú oje nɛ̄hɛ́ ofigwó nōo wɛ ukpɛ̄ kú ūwā. Amáŋ n lɛ ɛhɔ̄ ufáyin nōo wɛ ákú abɔ̄yī um.

¹³Ká n pó ɔkɔ kú uwɔ ŋmá ipú ɛhɔ̄ ā, ohumɔtū, aɔ́mpa um bā ī gbēeyī kéē pó ɔkɛ̄lā kú uwɔ, ká ā kɛlā.

¹⁴Wā ɛgiyí um ohumɔtū, wā fíyaa bɛ̄ɛka ɔblá, bɛ̄ɛka ɔyí ɔblá nōo gē wāajɛ ŋmá ɛyí ɛfu, wā ɛga nɛ̄ ácí gē jɛ̄ ā.