Read idoma AYISÁYA 10 Bible Online

AYISÁYA 10 - idoma bible

AYISÁYA 10

¹Aá le jí ɛɛ́, aá nēe gē tū íne obɔ̄bí, mɛ́mla aá nēe klla tū íne nēe ī bī le pīya ācɛ tū ā.

²Ɔwɛ ɛ́gɔ́ɔmā nɛ̄ aá gē le pīya aólɛhá ɔ̄cɛ tū, klla mīyɛ anyōkwū mɛ́mla ayókwu ɔdā nōo cíkā ō wɛ ákú uwá á.

³Ɔdí nɛ̄ aá géē yá ɛ̄cī nɛ̄ Óndú ā géē yá aá italā ā ŋmá lɛ ámíyā nɛ̄hi nōo géē wā ŋmá ɛga oligbó bɛ̄ɛka owu nɛ̄hi ā? Ɔnyɛ nɛ̄ aá géē kwu ga ɛgiyí nū kóō tá aá abɔ̄ ā? Iní nɛ̄ aá gáā kpó agbénú kú aá ā tayínū ā?

⁴Ó lɛ ɔdā dúúmā ɔhá ŋ́, aá géē tá ipú aálagbá, yɔ̄ ī gwonū tá ɔwɔɔwɛ. ámāŋ é géē kpó aá ŋmó mɛ́mla ācɛ nēé géē ŋmó ā. Náaná Óndú ā í yɔ̄ ī cɔ̄nū kpɔ́, ó kē le tútū ō yá uwá italā kpɔ́.

⁵Óndú ā kahíníī, “N géē bī Asírīya le je ōwē lɛ ācɛ nɛ̄ n yɔ̄ í cɔ̄nū mɛ́mla uwá ā.

⁶N géē tū Asírīya ɛhɔ̄ wā í kpɛ́fú tá ācɛ ɔlɛ́ um, nēe ī yá ucē tú um ɔtū ŋ́, klla ī yá um cɔ̄nū ā. N tū ɔ̄ wā í wúla uwa tāajɛ, kóō klla kpó agbénú kú uwā wu klla wī uwā uwī. Ó géē yá ōwē bɛ̄ɛka ɛ́gɛ́nɛ̄ ɔ̄cɛ gē le ikpó da ɔtɔ úláyi ā.

⁷Amáŋ ɔcɛ́ kú Asírīya ā, lɛ ojuju obɔ̄bí nɛ̄hi kú abɔ̄yī nū ipú ɔtū kú nū dúú. Ó le tútū ō kpó aéwo alɛwa yíifi.

⁸Ó gē gwō kahíníī, “Otrɛ̄yí kú aícɔ́ɔja kú ɔlɛ́ um dóódu wɛ ɔcɛ́.

⁹N lɛ igelī kú Ukálno catāajɛ ɛ́gɛ́nɛ̄ n yá ajɛ kú Ukákēmiss ā. N le ajɛ kú Uhámāti yálé ɛ́gɛ́nɛ̄ n yá mla Ápāadi ā. N lɛ Usamérīya yálé ɛ́gɛ́nɛ̄ n yá Udamáskɔ̄s lé ā dúu.

¹⁰N le aéwo ɔhá alɛwa nēe gē pá aɛ́cí nēe fíyɛ́ ákú Ujerúsālɛm mɛ́mla Usamérīya yálé ɛɛ́.

¹¹N lɛ Usamérīya yíifi mɛ́mla odúúdú aɛ́cí kú nū ɛɛ́, n kē í yá Ujerúsālɛm mɛ́mla aɛ́cí nēé gē pā ā ɔdā ékpónú ɔ́ɔmā dúú.”

¹²Amáŋ eko nɛ̄ Óndú le ɔdā nōó yɔ̄ í yá ɛyí ɛfu kú Usáyɔn mɛ́mla Ujerúsālɛm ā yá mɛ, ó géē yá ɔcɛ́ kú Asírīya italā ohígbū ɛ́gɛ́nɛ̄ ó ī gwō klla yɔ̄ ī yá ɔbɔ́ɔ́cɛ ā.

¹³Ɔcɛ́ kú Asírīya ā gē gwō kahíníī, “Ami yá odúúdú nū abɔ̄yī um á. N lɔfú, jééyī klla lɛ ula. N lɛ aéwo yálé, mīyɛ uwā ajɛ dúúdú, klla kwú odúúdú iyó mɛ́mla agbénú nēé kpó tū ā í kpó. Bɛ̄ɛka ɔbá ɛna ā, n kwú aɔ́cɛ́ kú uwā í kpó yíifi ɛɛ́.

¹⁴Aéwɔhá kú ɛcɛ ā, lɛbɛ̄ɛka ayi nēé bá ipu ɔlígbánɔ̄ ā. N kwú agbénú kú uwá kpó ɛbɔ́, bɛ̄ɛka ayi kú ugwū nɛ̄ ɔ̄cɛ ī kpó á, nɛ̄ ugwū ā í gē tɔ́kɔ́ ŋ́ mā. Ɔ̄cɛ dúúmā í kē kwu um ɔkɔ glá ŋ́.”

¹⁵Amáŋ Óndú ā kahíníī, “Āgā lɔfú fíyɛ́ ɔ̄cɛ, nōo bī āgā gē yúklɔ́ ā glá ā? Kɛɛ ka ɛ̄wā lɔfú fíyɛ́ ɔ̄cɛ, nōo bī ɔɔ yɔ̄ í hɛ́ ɔcí a? Lɛbɛ̄ɛka ɔda nɛ ɔci ge je ɔ̄cɛ ga icō gla. O lɛ a gla ŋ.”

¹⁶Óndú ānɛ̄ o nwuné fíyɛ́ dúu a, gēe tū ōcē klá ācɛ nēé bá ī lé ɔdōlé ɛbɔ́ ícɛ nyā. Ɔlá gēe yɔ iyē kú uwá yɔ i yi piyóó.

¹⁷Ɔwɔicō, ɛbɛ kú Ísrɛ̄lu, gēe je pīya ɔla; Ɔwɔicō otīihɔ kú Israɛl a gēe je pía ígblɛ́nyī ɔlá, nōo gēe je ɔdā dóódu kpó yi ŋmá ajɛ ɛ̄cī ékpónú, kwu ácí kwu ujē a.

¹⁸Ajɛ ɛhɔ̄ oolɛɔhi a mla ūpū a gēe je kpó yá ífi dúúdú, ɔwɛ ékpónú ɔ́ɔmā nɛ̄ ōcē ooŋmó ɔ̄cɛ ɔ́ɔmā gē je ɔ̄cɛ yá ífi a.

¹⁹Ɔcí nēe gāa hile ipú ajɛ a gē le téteté a, nɛ̄ ɔyípɛ̄ éyi gēe gbo uwá Áluka glá.

²⁰Eko gēe wā, nɛ ācɛ kú Israɛl nēe hile a í gāa gbɛnú ce aéwo nēe je uwá yá ífi a gɛ ŋ́, amáŋ, é gēe lɛ ɔtū ce Óndú a, Ɔwɔicō ká uwá, Ɔwɔicō otīihɔ kú Ísrɛ̄lu a.

²¹Oohile kú ācɛ kú Ísrɛ̄lu lígíii a, gēe kwúcē wā ɛga īyī Ɔwɔicō kú uwá, nōo nwuné fíyɛ́ dúu a píii.

²²Náaná nɛ ɛwa kú Ísrɛ̄lu lɛbɛ̄ɛka ikpō ɔcá ícɛ a, ācɛ nēe gēe hile a, í kwúcē wā ɔlɛ́ a, í gāa lɛ ɛwa ŋ́. É lɛwa bɛ̄ɛka ɔjɛ kú ísu a, náaná ícɛ a, ífi mla ikwū ba ī gbēyī uwā, uwá kē cíkā la ōwē ɔ́ɔmā.

²³Ipú odúúdú ajɛ kú Ísrɛ̄lu a, Óndú āgēe bī ífi gē la uwá, ɛ́gɛ́nɛ̄ Óndú nōo nwuné fíyɛ́ dúú a, lɛ íkwu mla ɔ́da dóódu a ka lɛ a.

²⁴Óndú ānɛ̄ o lɛ ikwú dóódu, nōo nwuné fíyɛ́ dúu a, da ācɛ nēé lā Usáyɔn a kahíníī, “Áá yá ufi kú ācɛ kú Asírīya a ŋ́, uwá ka ō yá aá ōwē bɛ̄ɛka ācɛ kú Íjīpiti a náaná.

²⁵Eko kpíii, nɛ̄ n lɛ ōwē je la aá mɛ ɛɛ, n gēe je uwá kpó yá ífi ŋmá ajɛ.

²⁶Ami abɔ̄ īyī um gēe lɛ itali kú um gɔ uwá, ɛ́gɛ́nɛ̄ ami, Óndú ānɛ̄ o nwuné fíyɛ́ dúu a, le gɔ́ ācɛ kú Umídiyan, ɛyí ápátɛ́cɔ̄ kú Orebu á. N gēe je ōwē la Asírīya ɛ́gɛ́nɛ̄ n je ōwē la Íjīpiti a.

²⁷Eko nɛ̄, eko a le yá, n gēe hɛ́ aá tá ŋmá ipú abɔ̄ mla ɔfú kú Asírīya; é klá gāa lɛ agbá mla ákanya kú uwá uwɔ aá ɔkɔ ɛɛ́ gɛ ŋ́.

²⁸Aícɔ́ɔja kú Aólɛlā a lɛ Ái yálé ɛɛ́, é le bū Umígrɔn ɛɛ́! E ma abɔ̄ ɔdōlé mla iyó kú uwá tá Umíkmās.

²⁹Uwá le bēhé ɛjī ga ba í gbo iyēɔlā Ugɛ́ba. Ācɛ kú ipɔ́ɔ́lɛ́ kú Iráma a kwú gbogodo ipu ufi ɛɛ́. Ācɛ kú ipɔ́lɛ́ kú Ugíbɛ̄-a, ɔlɛ kú Usɔ́ɔlu ɔcɛ́ a kwú pɛ́ kwu ɛɛ́.

³⁰Aá dɛ̄ íbá, ācɛ kú Ugálim; aa jāhɔ, ācɛ kú Iláisa, Aá tá ohi, ācɛ kú Ánatɔ̄ɔtu!

³¹Ācɛ kú Umadmena mla Ugɛ́bim, ba ī kwu inya kú oyēeyī kú uwá ɛɛ́.

³²Ícɛ a, Aólɛlā a bá ipú ɔlɛ́ kú Unób, é kē ba í jīla ɔfú kú uwá iyē lígíi, ɛyí ɛfú kú Usáyɔn, ipú ɔlɛ́ kú Ujerúsālɛm.

³³Óndú āgēe bī uwá wā í klá ajɛ wuu bɛ̄ɛka abɔ̄ ɔcí nɛ o fā ŋmá icō wā ajɛ a. Ɔcɛ nōo gē yá ɔbɔ́ɔ́cɛ kú uwá fíyɛ́ dúu a, Óndú ānɛ̄ o nwuné fíyɛ́ dúu a, gēe gɔ̄, klá ajɛ ipú uwēyī.

³⁴Óndú āgēe hɛ́ uwá klá ajɛ ɛ́gɛ́nɛ̄ ɔ̄cɛ gē bī ɛwa gēe je ūpū wúla tū ajɛ a. Ɔci Uloko nōo jɛ fíyɛ́ dúu a gēe gwōnū.