Read idoma AYISÁYA 11 Bible Online

AYISÁYA 11 - idoma bible

AYISÁYA 11

¹Ipɔ́ɔma kú Udéfīdi, ɔyí Ijesi a, lɛbɛ̄ɛka ikpankini ɔci nōo le gwó ɛyí kwu ajɛ gē lu ɛ̄pɛ̄pɛ̄ bɛ̄cɛ a, ɛ́gɔ́ɔmā nɛ ɔcɛ́ ɛ̄pɛ̄pɛ̄ gēe bɛ̄cɛ ŋmá ipɔ́ɔma kú Ujɛ́si, ádā kú Udéfīdi a.

²Alelékwū ihɔ kú Óndú āgē í yɔ̄ īkpōɛyí kú nū, Ó í je íjééyī mla ɔdā o jé la ɔɔ mla Alelékwū kú ɔtu otūle mla ɔfú mla íkwu; ɔdā oōjé mla ufi kú Óndú āmla ojīlīmā ooje la Óndú a.

³Ɔdā nōo gēe wɛ Ihɔtū kú nū a, wɛ ō yá ufi Óndú āmla ɛyí oōtá ajɛ la Óndú a.

⁴O gē bī ookpaakpa le ka ɛpɔ̄ kú aólɛhɔ́cɛ, ó gēe ka ɛpɔ̄ ookpaakpa, kú ācɛ nēé lɛ ɔ̄cɛ ootá uwá abɔ̄ ŋ ma. Ɛlā okónu kú nū ofuōofūnū gēe ŋmó ācɛ kú ɛcɛ ɛpɔ̄bí, klá í je odúúdú ācɛ obɔ̄bíipú a kpó ya ífi.

⁵Ó gēe gbō ācɛ kú nū mla ooyēŋēē mla ookpaakpa.

⁶Ipú ajɛ oōgbō kú nū a, aólɛlā ɛga dóódu ge la tɔ̄há bɛ́gɛ́nɛ̄ o gee wɛ ɔda idáagó ka, Odúumu mla álá kā e lā tɔ̄há ɛbɔ́ ka ɛjɛ ka ɔ gwutá pīɛ ɔyí ɛwū obene cíí, ka ágábá mla ɛna kā e ba ī lé ule tɔ̄há ɔyí obene kā e bī odúúdú uwá ga ɔnu ulé oōlé á.

⁷Bɛ̄ɛka eko nɛ ɛna mla ɔgwú gēe ba í lé úlé tɔ̄há, nɛ ayí uwā kē í gwutá tɔ̄há ɛga ékpónú ɛbɔ́ a. Nɛ ágábá kē ī gbo ɔɔ oolé ácí bɛ̄ɛka ɛna a.

⁸Nɛ ɛgwā í gāa yá ɔyí obene ɔdā dúúmā ŋ́, ɔɔ̄daŋ ka ɔyí obene a lɛ abɔ̄ wu ogwiji okónu, yɔ̄ ī hi ijā mla anú náaná, o gaa kwu ɔɔ ayīnu ŋ.

⁹Usáyɔn, ɛyí ɛfu otīihɔ kú Ɔwɔicō a, ɔdā ooŋmó ɔ̄cɛ mla ɔdā oobɔ̄bí dúúmā í gāa yɔ̄ abɔ́ɔ gɛ ŋ́. Íjééyī kú Óndú āoōjé, mla Óndú āoōjé kú ācɛ a gēe wɛ omuōomu kú ɛcɛ ɛ́gɛ́nɛ̄, ísu gē cēenyi mu ɔgba kú nū lɛ a.

¹⁰ɛ̄cī ɔ́ɔmā a, ɔcɛ́ nōo ŋmá ipɔ́ɔma kú Ujɛ́si ɔ́ɔmā gēe ma ɔdā oocēabɔ̄ fu la odúúdú éwo kú ɛcɛ. Ācɛ gēe ŋmá ɛga dóódu wā í tíne nū, ɛga oolā ipɔ́lɛ́ a kéē jē ojīlīma mla oocɛ̄tla la ɔɔ.

¹¹Eko ɔ́ɔmā, Óndú āgēe nā abɔ̄ kú nu daa gāa je ohile kú ācɛ ɔlɛ nū, Ísrɛ̄lu a kpó ŋmá ajɛ kú Asírīya, Íjīpiti, Ipátros, Itiópīa, Ɛlam, Isína, Uhamát mla odúúdú ajɛ kú okónu ísu a.

¹²Óndú āgēe je otúta kú ɔdā ocēabɔ̄ kú nū ga icō ka o mafu la odúúdú ɛcɛ, ka anúɔ gēe tá aóhile kú ācɛ ɔlɛ́ anúɔ, Ísrɛ̄lu a bá ŋmá ɛga dóódu, nɛ̄ ācɛ kú Ísrɛ̄lu mla Ujúda a pahīla nyɔ̄ a kpɔ ɛɛ́; klá í kpó uwá cīgbīhi ga ɔlɛ́ uwá ŋmá ɔ́kíkā kú ɛcɛ ɛnɛ a.

¹³Ísrɛ̄lu í klá gāa má ímálānyī kú Ujúda ɛɛ́ gɛ ŋ́, ɛɛ́, nɛ̄ Ujúda gē bī ɛlā mla Ísrɛ̄lu ɛɛ́ gɛ ŋ́.

¹⁴Uwá gēe pīya tɔ̄há, kpó ɛfú tá ācɛ Ufilístiya, ɛnɔ̄ɔ̄nɛ̄ a, klá í je ācɛ nēe lā ɛnɔ̄ɔ̄cī a wúla tū ajɛ. Uwá gēe yá ācɛ kú Ɛ́dɔm, mla Umówābu lé. Ācɛ kú Ámɔ̄ri gēe je pīya aɔ́fiyɛ kú uwá klá í lɛyítáajɛ la uwá.

¹⁵Óndú āgēe je ísu kú Íjīpiti, a ŋ́mó ŋmá ajɛ, klá í tū owu gāa je ísu kú Iyufarétīs a kpó ŋmó ŋmá ajɛ, klá ije aóhile kú nu í kɔ̄ áyɔ́kpá ahāapa fílɛ́fílɛ́, cɛ́ɛ́ ɔ̄cɛ dóódu lɔfú bū ipú ísu a ɛyí ɔjɛ áncā glá.

¹⁶Ɔwɛ nɛ̄hi kē ī wɛ ootá gbóóló bɛ̄cɛ ŋmá Asírīya la aóhile kú ācɛ kú Ísrɛ̄lu nēe bá abɔ́ɔ a, kéē bɛ̄cɛ, ɛ́gɛ́nɛ̄ ɔwɛ a tɛtɛ tá la uwá gbóóló ŋmá Íjīpiti, eko nēé būɛcɛ ŋmá abɔ́ɔ a.