Read idoma AYISÁYA 13 Bible Online

AYISÁYA 13 - idoma bible

AYISÁYA 13

¹Ɛnya wɛ ɛbɛ nɛ̄ Ayisáya, ɔyí kú Émɔ̄si má lɛyíkwu Ubábīlɔn a.

²“Ɛyí ɛfu áncā a, aa je otúta ga icɔ̄, aá dɛ̄gba gbōm gbōm, cɛ́ɛ́ ka aá hī aícɔ́ɔja igwú cɛ́ɛ́ ka aá jé abɔ̄ kú aá gā icō ka ō wɛ ɔdā oōceabɔ̄ kú ookpó ācɛ okpo a ɛfú wā ípu igá kú ipɔ́lɛ́ kú ācɛ ooya ɔbɔ́ɔ́cɛ a.

³Óndú ālɛ aícɔ́ɔja oōgɔ̄ mla oolɛɔtū nɛ̄hi kú nū a kpó hīīgwú wɛ̄ɛcɛ, ka e wā í kpó ɛfú otīihɔ ta ācɛ nɛ̄ Óndú āle cɔ̄nū mla uwá a ɛɛ́.

⁴Aá jāhɔ̄ la uya kú ācɛ, ɛyí ɛfu a, uya kú ɛwa nɛ̄hi kú ācɛ mla aéwo dóódu nēe ba ī wā í túbá tɔ̄há kú ɛfu ookpo abɔ́ɔ ā. Óndú kú ɛfú a yɔ̄ ī tá aícɔ́ɔja kú nū tū kú ɛfú ookpó.

⁵Uwá gēe wā ŋmá ɛga olɛigbó nɛ̄hi kú ooŋmáɛyí kú ɛcɛ a. Ipú íwúɔtū mla ánya a, Óndú āgēe wā í jē odúúdú ewo kú aá kpó yá ífi, je uwa wúla tū ajɛ.

⁶Aá je ikwu hɔ́ɔnɔ, ka aá hīla humm, ohígbū ka ɛ̄cī kú Óndú āle bá ajaajɛ ɛɛ́, ɛ̄cī nɛ̄ Anú nōo nwuné fíyɛ́ dúu a gē bī ífi wā a.

⁷Abɔ̄ kú ɔ̄cɛ dóódu gēe je kpó ŋmó bá ɔtū; ɔtū kē í je gbenyi la ɔ̄cɛ dóódu.

⁸Ufi mla ɔnɔ gēe je uwá ipú gbogodo; bɛ̄ɛka, ɔnɔ kú ɔnyā nɛ̄ ɔma lɛ ɔɔ kwú a. Ipú ufi mla ooga kpaakpa a, é gēe kpó eyī kwu īyī wā eyī ipú uwēyī.

⁹Ɛ̄cī kú ondū a gē wā. Ɛ̄cī obɔ̄bí kú íwúɔtū nɛ̄hi kú Óndú āɔ́ɔmā. Ó gēe je ɛcɛ pīya ígbíli, klla í jē odúúdú ācɛ ooyá oyábīya mla ācɛ obíɔbíipú a kpó yá ífi.

¹⁰Ɛdɔ ínyíláɔwɔ dóódu kú ɔkpáncō a í gāa fíyajɛ ɛɛ́ gɛ ŋ́, ɛnɔ géē je du obū, ɔyā í klá gāa fíyajɛ ɛɛ́ gɛ ŋ́.

¹¹Óndú āka, “N gēe bī ámíyā mla ákanya mla ōwē wɛ̄ɛcɛ; klá í je ōwē la ācɛ o bɔ̄bíipú dóódu, ohígbū oyábīya kú uwá. Ācɛ ooyá ɔbɔ́ɔ́cɛ dóódu a, n gēe tá uwá wā ajɛ, klá í je ōwē la ācɛ oogɔ̄ mla ācɛ ɔ́bíipú dóódu.

¹²Ācɛ nēé gāa hile ŋma ipú uwá a gēe ŋá fíyɛ́ ije ɔdɔ á.

¹³Ɔkpáncō mla ɛcɛ gē jīlaiyē, klá í jīlaiyē jāa kwu etikpa kú uwá, ɛ̄cī ɔ́ɔmā, eko nɛ̄ ami Óndú ānɛ̄ o nwuné fíyɛ́ dúu a gēe ma iwúɔtū kú um fú a.

¹⁴Aéwo ɔhá nēe lā ajɛ kú Ubábīlɔn a, gēe ba ī kwu inya ga ɔlɛ uwá ɛ̄cī ɔ́ɔmā; ɛ́gɛ́nɛ̄ ɛbɛ gē kwu inya ŋmá ɛga īyī ɔ̄cɛ ootáɔtɛ́ a; é ba, le fíyákátā túuu klá ɛga dóódu bɛ̄ɛka álá nēé lɛ Óndú ŋ ma, ba ī dɛ̄, ‘Ɛnɛm oo, Ádām éyi, ɔyí um oo!’

¹⁵Ɔcɛ dúúmā nōo le kwú, é gēe gwu ɔ ɛ̄wā.

¹⁶Uwá gee leyīkwu cɔɔɔ áncā lɛ a, é gēe kpó ayí obene ca klá ɛyí ɛcɔ̄ piɛɛlɛ. É gēe je iyó kú uwá kpó wu ŋ́má inu, klá í ba i hɛ́ anyā uwá bá ajɛ, i ce ikpó uwá abɔ̄ ɔfú ipúeyī uwā; é ke gāa yá ɔdā dúúmā glá ŋ́.”

¹⁷Óndú āka, “N gēe tá ācɛ kú Umedes abɔ̄ la ɛyí kwu aá, cɛ́ɛ́ ka e wā í kpó ɛfu gwó Ubábīlɔn. Ācɛ Umédes a í kē lɛ ɛlá uwɔ ije nɛhɛ́, amáŋ ije ɔdɔ mla udɔ ŋ́, ɛɛ́ nēe gāa hɛ́ uwá eyī fuú ŋ́.

¹⁸E gēe bī ɔyī mla ɔta kú uwá je aóklóbīya kú Ubábīlɔn kpó ŋmó, uwá í gāa méyīnyinyi kú ayípɛ̄, amáŋ ayí obene ŋ́,

¹⁹Ubábīlɔn kē lɔhi fíyɛ́ Odúúdú éwɔhá dóódu a, O kē wɛ ikpó ɔlɛ́ nɛ̄ ācɛ gēe yá ɔbɔ́ɔ́cɛ kú nū á, amáŋ, ami nōo wɛ Óndú a, gēe je Ubábīlɔn wúla tū ajɛ, je ɔɔ yá ífi, ɛ́gɛ́nɛ̄ n yá Usɔ́dɔm mla Ugomóra a.

²⁰Ɔcɛ dúúmā í klá gāa lā alácɛ̄ kú nū gbóógbóō glá ɛɛ́ gɛ ŋ; ācɛ oonyīla eyī kú v a i gāa lɛ áklɔ̄kpɛ kú uwa kwu ajɛ abɔ́ɔ glá ɛɛ́ gɛ ŋ́. Ɛ́ɛ́ nɛ̄ ɔ̄cɛ oogboalá dúúmā gēe kpó álá kú nū nyɔ̄ abɔ́ɔ í la ŋ́.

²¹Ó gēe je pīya ɔlɛ́ kú aɛ́bɛ́ obɔ̄bí kú ipúací a, mla ɔlɛ ogwugwu; oko okonfiló. Ɔwá mla ɔblá gēe lā abɔ̄ mɛɛ á. Klá ba ī yɛ alácɛ̄ kú nū jila mɛɛ á.

²²Aínɔɔ̄da mɛ́mla aágblɔ̄cɛ́ kú ɔlɛ́ ā, ɔgwú mla odumú gēe ba í je ikwū ŋmá ipú nū wɛ̄ɛcɛ mɛɛ á. Ɛ̄cī kú Ubábīlɔn a ga ɛɛ́; ɛ̄cī kú nū le bá oomɛ ŋmá ipú ɛcɛ ɛɛ́.”