Read idoma AYISÁYA 14 Bible Online

AYISÁYA 14 - idoma bible

AYISÁYA 14

¹Óndú ā gēe méyīnyinyi kú ācɛ ɔlɛ́ nū, Ísrɛ̄lu ɔhá kpɔ́ ɛɛ́, nōó klá gēe fu uwá, ācɛ kú nu kpɔ́ ɛɛ́. Ó gēe yá ka uwá ka e lā ipú ajɛ kú uwá ɔhá kpɔ́ ɛɛ̄, nɛ̄ aéwo ɔhá gēe wā ipú ajɛ kú uwá í lā mla uwá ɔhá kpɔ́ ɛɛ́.

²Ācɛ alɛwa gēe tá ācɛ kú Ísrɛ̄lu abɔ̄ ka e kwúcē wā ipú ajɛ nɛ̄ Óndú āje la uwá a. Abɔ́ɔ á aéwo ɔhá kē í wɛ aɔ́fiyɛ kú Ísrɛ̄lu, kē í ba i gbā Ísrɛ̄lu ɛ̄gbā. Ācɛ nēe tɛtɛ kwú ācɛ kú Ísrɛ̄lu aɔ́fiyɛ a, Ísrɛ̄lu gēe kwú ācɛ ɔ́ɔmā aɔ́fiyɛ kú uwá dúu. Cɛ́ɛ́ ācɛ kú Ísrɛ̄lu kē í wɛ ɔcɛ́, klá í gbō ācɛ nēe tɛtɛ yá uwá lé, klá ya uwá ŋmó a.

³Óndú āgēe hɛ́ ācɛ kú Ísrɛ̄lu tá ŋmá ōwē mla ɔnɔ mla ákanya kú uwá, mla úklɔ́ oolɛɔfú kú abɔ̄ kú ɔfiɛ́ nēé kwu uwá bá ɔɔ, yá abɔ́ɔ ɔfú a.

⁴Eko nɛ̄ Óndú ālɛ ɛ̄nyā yá la uwá a, é gēe yá ɔcɛ́ kú Ubábīlɔn okónu klá í yá ɔɔ ɛbɛ́ kahíníī, “Ɔcɛ́ kú ɔ́bíipú a má gwōnū ɛɛ́, ó klá gāa yá ɔ̄cɛ dúúmā ŋmó glá ɛɛ́ gɛ ŋ.”

⁵Óndú ālɔfú kú ɔ̄cɛ obɔ̄bíipú a bī wā ooŋmóɛyí ɛɛ́,

⁶Anú nōo bī íwúɔtū gēe yá ācɛ ŋmó, klá í je ōwē nɛ̄hi la éwo dúúmā nōo le yálé a.

⁷Igbīhi ajɛ kú ɛnyā, oōgwōnū kú nū a, odúúdú ɛcɛ i bá ī mlɛ́nyɔ́ ipú ɛbɔ́, klá í gwó ijē kú éeyē.

⁸Aɔ́cí kú Ulɛ́bānɔn ba í gwéeyē ohígbū oōgwōnū kú ɔcɛ́ kú Ubábīlɔn a dúu, ohígbū ka ɔ̄cɛ dúúmā í yɔ̄ nōo gē hɛ́ uwá wā ajɛ ɛɛ́ gɛ ŋ́.

⁹E ba i tútū kéē yá ɔcɛ́ kú Ubábīlɔn omáaba. Alelékwū kú ācɛ nēe tɛtɛ lɔfú ipú ɛcɛ nɛ̄hi a ba ī tútū ooya ɔɔ omaaba dúu. Aálelékwū a ba ī cāŋjɛ ŋmá akpa ɔcɛ́ kú uwá!

¹⁰odúúdú uwá ba ī ka ɔnɔ ɔtu tū ɔcɛ́ kú Ubábīlɔn a kahíníī, “Á i kwú v bɛ̄ɛka éyi kú alɔ a ɛɛ́, á kwú pīya éyi kú alɔ ɛɛ́.

¹¹Ācɛ tɛtɛ gēe gwō ɛ̄ngwū gēe gwó ijē kú ojīlīma ga uwɔ, ícɛ a, a gaa v ɛɛ́; nyɔ̄ gāa gwutá agōdō kú ɛkɔ̄ mla inyílɔ́, ká a lɛ īlī kú inyílɔ́ mla íkplɛ́ klá iyē.’

¹²Ma “ɛ́gɛ́nɛ̄ a gwōnū ŋmá ɔkpáncō lɛ āa? Ɔtaɛ́bɛ́ Ínyíláɔuwɔ kú ɔciɔcī nōo gē fíyɛ́ ajɛ nɛ̄hi a, Awɔ nōo tɛtɛ gēe yá aéwoɔhá ŋmó a, é lɛ uwɔ hɛ́ wā í klá ajɛ gblugudu ícɛ ɛɛ́.

¹³Á gēe ka ipúɔtū kú uwɔ ka, ‘N gēe tū icō ga ɔkpáncō, ɛhícō kú aínyílɔ́wɔ kú Ɔwɔicō a, N gēe je akpa ɔcɛ́ kú um kwu icoicō abɔ́ɔ, klá í cīce bɛ̄ɛka ɔcɛ́ a, ɛyí ɛfu kú ɛhíícō, ɛga nɛ̄ aɔ́wɔ ɔhá gē jīla ā.

¹⁴Á ka anúɔ gēe tīcō ga ɛhícō bū ojuja aā ipú, cɛ́ɛ́ ka anúɔ lɛ īyī anúɔ yá bɛ̄ɛka Ɔwɔicō, nōo nwuné klá lɛicō fíyɛ́ dúu a nɛ.’

¹⁵Amáŋ é lɛ uwɔ bī wā ɔlɛekwu, ɛga nōo lipú klá du obu fíyɛ́ dúu kú ɔlékwū a ɛɛ́.

¹⁶Ācɛ nēe gēe má uwɔ v abɔ́ɔ a, gēe kpééyī kwu uwɔ klá ī hɛ́ idáagó kú uwɔ, ka; ‘Ɔcɛ nōo jīla ɛcɛ iyē, mla ajɔ̄ɔcɛ́ dóódu, klá yá ka ɛcɛ kéē fīyégbúlú a yɔ̄ a?’

¹⁷“Ɔ̄cɛ nōo je ipɔ́lɛ kú éwo dóódu kpó yá ífi, je ɔlɛ́ uwá pīya alácɛ̄, í klá cɛ̄ la alagbá kú aéwoɔhá a ga ɔlɛ́ uwá ŋ mā yɔ̄ á?

¹⁸Odúúdú aɔ́cɛ́ kú ɛcɛ a gwutá ɔlɛekwu ipú abahi mla ɔcɛ́ kú uwá ɛbɔ́,

¹⁹Amáŋ awɔ á í lɛ ɛga ogwuta dúúmā ŋ́, é kwú okwū kú uwɔ u tá ɛcɛ ka ó kwú wā bónū. É lɛ okwū kú aícɔ́ɔja nēé ŋmó ɛfú a tū ikwū klá okwū kú uwɔ ɛyí, ipú ɔ̄gɔ̄ ɛcɔ̄.

²⁰É gāa nyi uwɔ okwū-ɔcɛ́ ŋ́ má, ohígbū ka a kwú ɔlɛ́ uwɔ u tá alácɛ̄ mla ífi, klá kwú ācɛ ɔcɛ́ ɔlɛ uwɔ u kpó ŋmó. Ācɛ ō bɔ̄bíipú kú ipú inu kú uwɔ a dúúmā í gāa hile ŋ́.

²¹Aá gbɔɔ́ ō ŋmó ayí nū mɛ́ɛ́nɛ, ohígbū oyábīya kú ádā uwá, ohígbū nɛ̄ uwá klá ī cāŋjɛ klá í nyīla igbɔhá klá ɛcɛ mla ɔ́bíipú kú aádáádā uwá a.

²²Óndú āka, “N gee cāŋjɛ la ɛyi kwu uwa, ka n lɛ iye kú Ubábīlɔn mla ɛdɛɛdɔ kú uwa, mla ooga ɔbu kú wā u hɛ ŋma ipu ɛcɛ pioo.”

²³N gee ya abɔ́ɔ ka o kwu pīya ajɛ kú ɛbɛ lɛbɛ̄ɛka ɛgbɛ́ a, klla i je ajɛ a pīya ōkpoō kú éŋkpɔ̄ nɛ̄hi. N gēe je uwā ya ífi bónū. Abɔ̄ Óndú āka lɛ a.

²⁴Óndú ālɛ ɔkpá ce īyī nū klla lɛ ɛka gbo lɛ a ɛɛ, “Ɔdā nɛ̄ n mia a, gēe yá píii; ɔdā nɛ̄ n lɛ abɔ̄ nū kwu ɔtū a gēe yá píii.

²⁵N gēe je ācɛ kú Asírīya kpó ŋmó, je uwá kpó yá ífi ipú ajɛ kú Ísrɛ̄lu. N klá í lɛ ikpō da uwá ɛyí bá ajɛ, ɛyí ɛfú kú um. N gēe hɛ́ ācɛ ɔlɛ́ um tá ŋmá agbá mla iyó mla ákanya nɛ̄ ācɛ kú Asírīya gbō ce uwá a.

²⁶Ɛnyā wɛ ɔdā nɛ̄ n mia nɛ n gāa yá ipu ɛcɛ á, N lɛ abɔ̄ kú um nandaa, gāa je ōwē lɛ odúúdú aéwo kú ɛcɛ a ɛɛ́.”

²⁷Óndú ānɛ̄ o nwuné fíyɛ́ dúu a, kwú abɔ̄ kú ɛ̄nyā u kwu ɔtū ɛɛ́; ó lɛ abɔ̄ kú nū nāndaa gāa je ōwē la uwá ɛɛ́; ɔ̄cɛ dúúmā í kē ci ɔɔ anú glá ŋ́”

²⁸Ɛ̄nyā wɛ olɛɛhɔ̄ mla ɛhɔ̄ nēé bī tá ɔna, eko nɛ̄ ɔcɛ́ Áhās kwú a a,

²⁹“Ācɛ kú Ufilīstiya, itali nēe gē gɔ̄ aá a kwúcē ɛɛ́, amáŋ, aá lɛ ɔdā dúúmā nɛ̄ aá cíkā oogwéeyē nū ɛɛ́ ŋ́. Eko nɛ̄ ɛgwā éyi gekwú, ɛgwā ɔhá nōo lɛ ɔnɔ fíyɛ́ ɔ́ɔmā gēe bɛ̄cɛ kwɛyí nū. v kú ɛdɔ ɛgwā ékpónú a gēe hɛ́ ɛdɔ ɛgwā obɔ̄bí alɛwa.

³⁰Óndú āgēe je pīya ɔ̄cɛ oogbō álá kú ācɛ mla ɔcɛ́ ɔlɛ nū á, uwá kē ī lā ɛbɔ́. Amáŋ Óndú āgēe tū ɔkpɛtā obɔ̄bí nɛ̄hi klá aá, Ufilístiya. Ó kē gāa mā abɔ̄ Odúúmā kú aá tá oyēeyī ŋ́.

³¹Aá dɛ̄ íbá, cɛ́ɛ́ ka aá je ikwū kú ɔ̄cɛ ootá aá abɔ̄, aá, Odúúdú ipɔ́lɛ́ kú ajɛ kú Ufilístiya a. Aá yá ufi, Ofulutu mla ojuja kpímm gēe wā ŋmá ɛhíícō í klá aá ɛɛ́. Uwá wɛ aícɔ́ɔja nɛ ɔ̄cɛ ooyá ufi dúúmā í yɔ̄ ipú uwá ŋ́.

³²Aócɛ̄hɔ̄ nēé gēe wā ɛgiyí alɔ ŋmá Ufilístiya a, abɔ̄ alɔ gēe tá uwá ohi lɛ a? Alɔ gēe da uwá ka Óndú ākwú Usáyɔn u kwu ajɛ ɛɛ́ kɛɛ, ka, ācɛ kú nū nēe hímáyī móōwē a má la ɛbɔ́ ɛɛ́?”