Read idoma AYISÁYA 15 Bible Online

AYISÁYA 15 - idoma bible

AYISÁYA 15

¹Ɛ̄nyā wɛ ɔlɛɛhɔ̄ kú ɛbɛ oōmá ohígbū Umówābu á. É kwú ipɔ́lɛ́ kú Ár mla Ikɛr u yá ífi ŋmá ajɛ, otú ékpó. odúúdú ajɛ kú Umówābu tá hímm.

²Ācɛ kú Udíbɔn gēe tū icō ɛfu nyɔ̄ í je ikwū ipú inu ɛcí kú uwá a. Ācɛ kú Umówābu ba ī tū ɛgíkwū klá alácɛ̄ kú ipɔ́ɔ́lɛ́ kú Inébo, mla Umédēba; é lɛ ɛyí kú uwá mla ɔnwū agba kú uwá plá ipú ɔtūnōbí.

³odúúdú ācɛ lɛ īlī ekwu kpó wiyē ipu ɔlɛ a, ɔpu dóódu, mla ajīlɛ̄yí inu dóódu a, ācɛ ba i je ikwu okwū.

⁴Ācɛ kú Uhɛ́sbɔn mla Ɛlíle ba í je ikwū, ācɛ pó ikwū ooje kú uwá a jāa ga Ujáhās. Kwú aícɔ́ɔja a gbo ɔɔ ooyá ufi klá fīyégbúlú, ɔtū kú uwá kwú gbenyi.

⁵N yɔ̄ ī je ikwū la ācɛ kú Umówābu! Ācɛ kú Umówābu kwú pɛ́ kwu ga ipɔ́lɛ́ kú Isoar, mla Eglat-sselísya ɛɛ́. Ācɛ ōhī kú uwá lɛ icō ɛfu tū gā ɔwɛ kú Ilúhit, lɛ abɔ̄ pīya klá ɛyí ba ī je ikwū abɔ̄ é ba ī nyɔ̄ ɔwɛ a; Ācɛ ōhī le kwu ga Uhoronéim lɛ abɔ̄ pīya klá ɛyí ba ī tū ɛgá okwū gbōmgbōm.

⁶Ɔkpá kú Inímrim kwú ŋmó ɛɛ́, ácí kú nū kwú ŋmó ŋmá ajɛ dúu ɛɛ́. Ɔdā dúúmā í wɛ ɛ̄mɛ̄ɛ̄mɛ̄ abɔ̄ ɛɛ́ gɛ ŋ́.

⁷Ācɛ a lɛ Odúúdú iyó kú uwá kpo ba í pɛ́ kwu bū ɔpɛ́ kú ígbíli a,

⁸Ɛjī kú ajɛ kú Umówābu dóódu a, ācɛ ba i dɛ̄ íbá. É ba í pó íbá mla eléélelé kú uwá a ga ipɔ́ɔ́lɛ́ kú Églem mla Ubéerēlim.

⁹Ipɔ́ɔ́lɛ́ kú Udíbɔn a, ísu kú uwá kwú pīya oyī, náaná, Ɔwɔicō lɛ ɔdā obɔ̄bí nɛ̄hi nōo fíyɛ́ ɛnya a tútū yɔ̄ ī gbēyī uwa kpɔ́. Ācɛ dúúmā nēe hile Umówābu a, é gēe je uwá kpó ŋmó bónū.