Read idoma AYISÁYA 18 Bible Online

AYISÁYA 18 - idoma bible

AYISÁYA 18

¹Ɛhɛ́ɛ! Ogbeé kú ísu kú Ukúss a, Ajɛ éyi yɔ̄ abɔ́ɔ nēé ba ī pó uya kú owu.

²Oŋmá ajɛ abɔ́ɔ a, ācɛ ookwuɛyí ācɛ gēe wā ŋmá abɔ̄ wā ísu kú Unáyilu ipú úgbéenyi nēé bī ɔcí mla ɔŋma gwo a. Aócɛ̄hɔ̄, aá kwúcē ga ɔlɛ́ aá fíyaa, Aá lɛ ɛhɔ̄ a kwúcē nyɔ̄ í cɛ̄ la ācɛ ajɛ kú aá, nɛ̄ ísu lɛ ɔɔ kpó kɔ̄ a. Aá nyɔ̄ í cɛ̄ ɛhɔ̄ a la ewo oolɛɔfú nɛ̄hi kú aá a, mla aɔ́báagwu kú ācɛ kú ɔlɛ́ aá nēe jɛ̄ nɛ̄hi a, uwá nɛ̄ odúúdú ācɛ kú ɛcɛ gē yá ufi uwá a.

³Aá je ahɔ̄, Odúúdú ācɛ kú ɛcɛ. Aá lɛ eyī tá ajɛ kú otúta kú ɔdā oocēabɔ̄, nēé gāa je ga icō ɛyí ɛfu a. Aá jāhɔ̄ la ofulutu, nōo gē tá wā kwūūū á.

⁴Óndú āda um kahíníī, “N gēe pīya eyī ŋmá ɔkpáncō má ɛcɛ bɛ̄ɛka ébú, nōo gē cē klá ɔdɛ̄ɛhɔ̄ otu eko oōcē ɔdɛ̄hɔ̄ a; N klá í kwú uwá iyē bɛ̄ɛka ɛnɔ ooyɔɛyí a.

⁵Ɛ́ɛ́ ka aá gē cē oōgwá kú ɔci Ufáyin dúu a; ɛɛ́ ka ɔci Ufáyin ka o wúla ēpū, nōó hɛ́ bónū dúu a, ɛɛ́ ko ó gēe pīya a, Aólɛlā a gēe wā, í je Isudán kpó, je uwá kpó yá ífi kló, bɛ̄ɛka ɛ̄wā nōo gē gwó abɔ̄ kú ɔci Ufáyin tónū a.

⁶Epu mla aɛ́bɛ́ kú ipú ácí a gēe ba í kpó okwū kú aícɔ́ɔja kú Isudán lé a. Kwu ɔnɔ̄ kwu ɔgwā, aígbáanɔ, ēpū mla aɛ́bɛ́ gēe ba í lé okwū kú aícɔ́ɔja kú Isudán pióo.”

⁷Eko gēe wā, nɛ̄ Óndú a, Ɔwɔicō nōo nwuné fíyɛ́ dúu a gēe mīyɛ ɛhi mla ɔda oogwo ɛya, ŋmá ɛga īyī ācɛ nɛ̄ ísu lɛ ajɛ kú uwá kpó kɔ̄ a, ācɛ oolɛɔfú nɛ̄hi ɔ́ɔmā, aɔ́báagwu, nēé jɛ̄ nɛ̄hi nɛ̄ ācɛ dóódu kú ɛcɛ gē yá ufi uwá ɔ́ɔmā; uwá gēe wā ɛyí ɛfu kú Usáyɔn, ɛga nɛ̄ Óndú ānɛ̄ o nwuné fíyɛ́ dúu a yɔ̄ a, gaa gbā ɔkɔ la Óndú a.