Read idoma AYISÁYA 19 Bible Online

AYISÁYA 19 - idoma bible

AYISÁYA 19

¹Ɛhɔ̄ nɛ̄ Óndú ātū um fu Íjīpiti a, “Ondū a ce ɛyí ojuja yɔ̄ ī wā Íjīpiti kwūūū ɛɛ́. Ó yɔ̄ ī wā fíyaa, ɛcí kú Íjīpiti gēe fīyégbúlú iyeɔbū nū. Ɔtū kú ācɛ kú Íjīpiti kwú gbogodo.

²Óndú āka, “N gēe tū ɛfú la ācɛ Íjīpiti mla īyī wā. Ɔyínɛ́ gēe bū ɛyí kwu ɔyinɛ́ nū. Aóladógbe gēe bū ɛyí kwu īyī wā. Ipɔ́ɔ́lɛ́ kú Íjīpiti éyi gē kpó ɛfú tá ipɔ́lɛ́ kú Íjīpiti ɔhá. Aɔ́cɛ́ kú uwá gē ba ī yá ikpóɛlá ohígbū ɔcɛ́ oolé.

³N gēe je ojuju mla ujɔ kú uwá dóódu a bīya, klá í je uwá ɔtū gbenyi. Uwá gēe ba í da ɛcí kú uwá ka ɔɔ tá aá abɔ̄, klá í ba í nyɔ̄ ga ɛga īyī ācɛ ācogwɛ́bā mla anjɛnū ka ɛɛ ka ɛlā la ācɛ nɛ e gekwú ɛɛ́ mā la aá, cɛ́ɛ́ ka alelékwū kú uwa a ka ɛɛ da aá ɔdā nɛ̄ aá gēe yá a.

⁴N gēe jē ācɛ kú Íjīpiti kpó la ācɛ oobíɔbíipú nɛ̄hi, a, cɛ́ɛ́ kéē gbó uwá. Ami Óndú ānɛ̄ o nwuné fíyɛ́ dúu a lɛ ɛlā ka ɛɛ́.”

⁵Isu kú Unáyilu mla ísu kú aá ɔhá dóódu a gé je kpó ŋmó.

⁶Ɔtū ɔkpá a gēe gbo ɔɔ ōoná ipí abɔ̄ ó yɔ̄ í ŋmó ŋmá ajɛ a. Ácí mla ujē í gbo ɔɔ oōbū ɔtūɔkpá a.

⁷Ɔdā ɛhɔ̄ nēé nyi okónu isu kú Unáyilu a gēe pɛ́ kwú klá í je ŋmóɔlá ŋmá ajɛ, owu klá í je ɔ gwu bónū.

⁸Ācɛ ookwú ɛbɛ́ enyi a gēe ba ī je ikwū ipu ɔtū nōbi mla oōhīla humm; ohígbū ka ɛya mla uwɔ kú uwá ī lɛ ile dúúmā ɛɛ́ gɛ ŋ́.

⁹Ɔtū gēe bīya la ācɛ otá īlī a.

¹⁰Ɔtū kú ācɛ opi owú a, mla ācɛ úklɔ́ abɔ̄ ɔhá a, gēe je gbenyi ipú ɔtūnōbí.

¹¹Aótrɛ̄yí kú ipɔ́lɛ́ kú Isóan wɛ aólíla. Ācɛ nēé ge nwū Íjīpiti íjééyī fíyɛ́ dúu a géē je pīya aólíla. Abɔ̄ ó yá lɛ ɛɛ́ nēé gēe da ɔcɛ́ ka aá, Uféro ka ɔɔ mīyɛ ɔkwu kú ācɛ o jé ɔdā kú íkée a gɛ?

¹²Ɔcɛ́ kú Íjīpiti, aójéeyī kú ɔlɛ́ uwɔ nēe gē nwū uwɔ ɛlā a bá iní? Ekōōhī uwá gēe da uwɔ ojuju nɛ̄ Óndú ānɛ̄ onwuné fíyɛ́ dúu a lɛ, a ɛyí kwu Íjīpiti a.

¹³Aótrɛ̄yí kú Isóan mla Uméfis wɛ aólíla. Uwá cíkā o bī éwo a tá a; Amáŋ é lɛ aá bī nyīla eyī ɛɛ́.

¹⁴Óndú ācɛ̄ la uwá lɛ ɛlā ogbájí nwū aá ɛɛ́, ohígbū ɔ́ɔmā, ɔdā dóódu nɛ̄ Íjīpiti yɔ̄ ī yá a wɛ ɔdā obɔ̄bí, yɔ̄ ī ga ɔwɛ ga ácí bɛ̄ɛka ɔ̄cɛ nɛ̄ ejé lɛ ɔɔ kwú a.

¹⁵Ɔcɛ dúúmā í yɔ̄ Íjīpiti nōó gē tá abɔ̄ glá ɛɛ́ gɛ ŋ́, kwu ɔcɛ́ kwu ofulajɛ, aólɔdu kwu aólɛhá, kwu ācɛ dúu nēe ce ɛgbá a, í tá abɔ̄ glá ɛɛ́ gɛ ŋ́.

¹⁶Eko gēe wā nɛ̄ ācɛ kú Íjīpiti gēe ba í yá ufi klá í fīyégbúlú bɛ̄ɛka ācɛnyā a. Eko nēé le má ka Óndú ānɛ̄ o nwuné fíyɛ́ dúu a ɔɔ lɛ abɔ̄ nandaa gāa je ōwē la uwá a, é kwu gbogodo klá ajɛ ipu ufi.

¹⁷Eko dúúmā nɛ̄ ācɛ kú Íjīpiti gbo ɛlá kwu ɔdā nɛ̄ Óndú ānɛ̄ o nwuné fíyɛ́ dúu a tútū la Ujúda a, uwá gēe ba ī yá ufi kú Ujúda pióo.

¹⁸Ɛ̄cī nɛ̄ eko ɔ́ɔmā le yá, é gē ka ucē kú ācɛ kú Uhíbru a ipú ɔlɛ́ nɛ̄hi, ɛhɔ̄ kú Íjīpiti a. Ācɛ kú abɔ́ɔ a gēe ba í gbo ɛka klá í gwá ɔkpá kú uwá dóódu, ipú iyē kú Óndú ānɛ̄ o nwuné fíyɛ́ dúu a. Éyi kú ipú ɔlɛ́ ɔ́ɔmā, é gēe hī iyē nū kahíníī, “Ipú ɔlɛ́ kú ɛnɔ.”

¹⁹Eko, nɛ̄ ɛ̄cī ɔ́ɔmā ga, é gēe gwó ede oogba ɔkɔ la Óndú āipú ajɛ kú Íjīpiti; klá í lɛ ɛcɔ̄ kú Óndú ākwu ajɛ ɛyí ajɛ kú Íjīpiti.

²⁰Oocēabɔ̄ kú Óndú ā nōo nwuné fíyɛ́ dúu a, gēe yɔ̄ Íjīpiti. Eko dúúmā nēé gēe yá ācɛ kú abɔ́ɔ ŋmó, nēé lɛ ikwú je klá Óndú ā ka ó ta uwá abɔ̄, ó gēe wā í tá uwá abɔ̄, í hɛ́ uwá tá.

²¹Óndú ā gē ma īyī nū fu la ācɛ kú Íjīpiti, uwá kē í jé Óndú ā klá í gba ɔkɔ la ɔɔ, klá í bī ɛya oogwo mla ɛgba gē la ɔɔ. Uwá gēe ce okónu la Óndú ā klá í yá okónu nēe ce la Óndú ā jīla.

²²Óndú ā gēe je ōwē la Íjīpiti, amáŋ ó gēe nya uwá tá uwá gēe pīya ɛyí wā ɛga īyī Óndú a, Óndú ā í pó ɔkɔ oogbā kú uwá klá í nya uwá tá.

²³Eko ɔ́ɔmā, ɔwɛ nɛ̄hi gēe tá ŋmá Íjīpiti ga Asírīya. Ācɛ kú ɔlɛ́ nɛ̄hi ɛpa ɔ́ɔmā í ba í yɛ fu īyī uwa; aéwo ɛpa ɔ́ɔmā í gbā ɔkɔ la Óndú ā tɔ̄há.

²⁴Eko ɔ́ɔmā Ísrɛ̄lu mla Íjīpiti mɛ́mla Asírīya gēe je pīya tɔ̄há. Aéwo ɛtá nyā ī wɛ ɔhā nɛ̄hi la Odúúdú aéwo dóódu kú ɛcɛ a.

²⁵Óndú ā nōo nwuné fíyɛ́ dúu a, gēe hɛ́ ɔhā ce uwá kahíníī, “N gēe hɛ́ ɔhā ce uwɔ Íjīpiti, ācɛ ɔlɛ́ um; Awɔ, Asírīya nɛ̄ n yá a; mla Awɔ Ísrɛ̄lu, ācɛ ɔlɛ́ um nɛ̄ n fu a. Ɔhā ka o yɔ̄ la aá.”