Read idoma AYISÁYA 2 Bible Online

AYISÁYA 2 - idoma bible

AYISÁYA 2

¹Olɛhɔ̄ nyā nɛ̄ Ɔwɔicō je lɛ Ayisáya, ɔyí kú Ámɔ̄si lɛyíkwu Ujúda mɛ́mla Ujerúsālɛm á.

²Eko géē wā ɛ̄cɔ̄bū, nɛ̄ ɛfu ɛga nɛ̄ Agblīihɔ-nɛ̄hi kú Óndú ā kwu ā, géē cɛgbá klla í lɛ ojīlīmā fíyɛ́ dúú á. Ó géē lɛ ojīlīmā fíyɛ́ odúúdú aɛ́fu nɛ̄ŋcɛ́ ā. Ācɛ kú odúúdú aéwo gē pɛ́ kwūū bɛ̄ɛka ɔkpá ā, wā abɔ́ɔ ɛyí nū.

³Ācɛ aéwo alɛwa géē bá ī ka kahíníī, “Aá wā kú ālɔ̄ ga ɛfu kú Ɔwɔicō, kú ālɔ̄ ga Agblīihɔ-nɛ̄hi kú Ɔwɔicō nɛ̄ Ísrɛ̄lu gē gbɛ̄ɛ̄gbā ā. Ó géē nwū alɔ ɔdá nōó tíne kú alɔ yɔ̄ ī yá ā. O yá ɛ́ɛ́ kú aá lɛyítáajɛ lɛ ɔ́. Ohígbū ka ɛlā kú Ɔwɔicō géē wā ŋmá Ujerúsālɛm”.

⁴Ó géē kɛpɔ̄, klla í ka aéwo nɛ̄hi alɛwa gwó. É géē kpó aɔ́kpacaŋ́gelī o bī kpɛ́fú kú uwā kpó na aɛ́nū ō bī hɛ́ɛ̄hɔ̄. É klla í je aóbō kú uwá kpó na aɛ́wā ō bī cē ɔdɛ̄hɔ̄. Aéwo í klla gáā kpɛ́fú tú ɔ́mpā uwā ɛ́ɛ́ gɛ ŋ́. É klla gáā kllɔcɛ́ ɛfú ō kpó ɛ́ɛ́ gɛ ŋ́.

⁵Ācɛ Ísrɛ̄lu, nēe wɛ ayááyí kú Ujékɔ̄pu ā, aá wā kú ālɔ̄ lā ŋmá lɛ ofíyajɛ nɛ̄ Óndú je lɛ alɔ ā.

⁶Ɛhɛ́ɛ! Ɔwɔicō, a kwú igbīhi ú cē kwu ācɛ Ísrɛ̄lu nēe wɛ ācɛ ɔlɛ́ uwɔ ā ɛɛ́. Ohígbū kéē gē yá ucē kú imabɔ̄ mɛ́mla ɛbā ō gwó kú ācɛ aéwo nēe ŋmá ɛnɔ̄ɔ̄cī mɛ́mla Ufilístiya ā.

⁷Ācɛ kú Ísrɛ̄lu lɛ agbénú kú oje ɔdɔ (ugóolu) mɛ́mla oje nɛ̄hɛ́ nēé tōō gbaálūka mɛ ŋ́. Aɔ́nya mɛ́mla aúgbɔ́ɔnya o bī kpɛ́fú nēé lɛ ā í tōō gbaáluka ŋ́ dúú.

⁸Aɛ́cí bá láyíí ɛbɛɛbɛ ipú ajɛ kú ɔlɛ́ uwā. É klla bá gē pā aɛ́cí nēé bī abɔ̄ kú uwā yá ā.

⁹Ohígbū ɔdā nēé yá nyā, é géē kpó uwēyī tū odúúdú uwā ɛyí, klla ī tá uwā wāajɛ. Ɔwɔicō, ā híī je yá uwā ɛhi ŋ́.

¹⁰Aá kwu ga ipú aɔ́gɛ̄cɔ̄, ámāŋ ka aá bū ɔ̄gɔ̄ ga ipú ajɛ kú aá tayínū ohígbū ka Ɔwɔicō le cɔ̄nū ɛɛ́. Ó kē í wā mla ɔfú mɛ́mla ɛgahi nɛ̄hi

¹¹Ɛ̄cī éyi géē wā nɛ̄ é géē tú ācɛ nēe ī yɔ́ɔ́bɔ́ɔcɛ ɛyí wāajɛ. É klla kē í bī oōgɔ̄ kú alɛɛcɛ wā oŋmɛ́yí piíí. Óndú ā ofōōfūnū nēé gáā lɛ ojīlīmā ce ɔ́ eko ɔ́ɔmā.

¹²Ɛ̄cī ɔ́ɔmā, Ɔwɔicō nōo lɔfú fíyɛ́ dúú ā géē je uwēyī lɛ odúúdú ācɛ nēe ī yɔ́bɔ́ɔcɛ nɛ̄hi ā mɛ́mla ācɛ nēe ī je īyī uwā gicō ā. Ó klla í tá uwā wāajɛ cɛ́ɛ́ kéē híī gbla ɔdā dúúmā ŋ́.

¹³Ó géē kpó odúúdú aɔ́cí usɛ́da kú Ulɛ́bānɔn nēe jɛ̄ nɛ̄hi ā yíífi ŋmáajɛ. Ó klla géē kpó aɔ́cí nēé hī ka óoku kú Ubássan nēe lɔfú nɛ̄hi ā yíífi dúú.

¹⁴Ó í je ɛfu nɛ̄hi mɛ́mla ɛnɛ̄ŋcɛ́ ā kpó cīla tū.

¹⁵Ó klla ī kpó ɔdɔ nēé hɛ́ tū igelī ā mɛ́mla inɔ̄ɔda ɛga gbāajɛ kú uwā ā kpó wúlatāajɛ dúú.

¹⁶Ó géē kpó aúgbéenyī nɛ̄hi nēé ī le tɔ́ɔ́sú kú Utássissi, mɛ́mla aɛ́nɛ̄ e héyīfuú ā ca tū enyi ipú ísu.

¹⁷É géē tá ɛjɛ̄ɛ̄jī ācɛ nēe ī yɔ́bɔ́ɔcɛ, nēe klla gē gɔ̄ ā, wāajɛ eko nɛ̄ ɛ̄cī ɔ́ɔmā le yá. Óndú ā ōfōōfūnū nēé gáā lɛ ojīlīma ce ɔ́ eko ɔ́ɔmā á.

¹⁸É géē kpó odúúdú aɛ́cí kú uwá yíífi dúúdú ŋmáajɛ.

¹⁹Ācɛ gē kwu ga aɔ́gɛcɔ̄, klla í bū ɔgɔ ipú ajɛ nyɔ̄ í kwu tayínū eko nɛ̄ Óndú géē wā í jīla ɛcɛ iyē ā. É klla í kwu ohígbū ka Ɔwɔicō le cɔ̄nū, klla gē wā mla ɛgahi kú nū.

²⁰Ɛ̄cī ɔ́ɔmā, ācɛ géē kpó aɛ́cí nēé bī oje ɔdɔ (ugóolu) mɛ́mla oje nɛ̄hɛ́ yá gē gbā uwā ɛ̄gbā ā bónū lɛ aífú mɛ́mla aúdɔ́.

²¹Ācɛ klla í kwu nyɔ̄ í tayínū ipú ɔ̄gɔ̄ kú ipú ajɛ mɛ́mla aɔ́gɛ̄cɔ̄, ohígbū ícɔ̄nū mɛ́mla ojīlīma mɛ́mla ɛgahi kú Óndú ā, eko nōó géē cāŋjɛ wā í jīla ɛcɛ iyē ā.

²²Ā kpɔtūcē ɔ̄cɛ ɔlamu ŋ́. Ó kē í kwú. Ó lɛ ā, abɔ̄ yá lɛ ɛ́ɛ́ nōo géē tá ɔ̄cɛ abɔ̄ glá ā.