Read idoma AYISÁYA 21 Bible Online

AYISÁYA 21 - idoma bible

AYISÁYA 21

¹Olɛhɔ̄ nyā lɛyíkwu ɛbɛ nēé má lɛyíkwu ígbíli éyi nōo kwu pī ísu nɛ̄hi.[1] Aólɛlā bá ī wā í kpɛ́fú aá lɛbɛ̄ɛka ofúlutu nōo gē kpó wā kwūūū ŋmá ipú ígbíli kú Unégebu ā.

²N lɛ ɛbɛ kú ɔdōbɔ̄bí nɛ̄hi má ɛɛ́. Ó wɛ ɛbɛ kú ibīyāajɛ nēe í yá tū uwɔ, mɛ́mla ɛ́gɛ́nɛ̄ é géē je uwɔ yíifi ā. Aícɔ́ɔja kú Ɛlam, aá gaá kpɛ́fú tú ɔ̄, aícɔ́ɔja kú Umɛ́dīya, aá lɛ íbɔm cē tū ɔ̄ kú aá kpɛ́fú tá uwá. Aá mīyɛ igelī kú uwá ā, cɛ́ɛ́ kú Ɔwɔicō kóō lɛ odúúdú ōwē nɛ̄ Ubábīlɔn tū klá ācɛ ā ŋmɛ́yí.

³Ɛlā nɛ̄ n pó ipú ɛbɛ ā cɛ̄ lɛ iyē yɔ̄ ī lɔnɔ tū um nɛ̄hi. Iyē yɔ̄ ī lɔnɔ tū um bɛ̄ɛka ɔnyā nōo yíipú ā.

⁴Eyī yá um dúú, n klá yɔ̄ ī yúufi nɛ̄hi. N hímáyī gbēyī ɔ̄nɔ̄ɔ̄nɛ̄ kóō yá, amáŋ ó klla le pīya ɔdā otūufi nɛ̄hi ga um ɛɛ́.

⁵Ipú ɛbɛ́ nɛ̄ n má ā, aígabɔ̄ kú abɔ́ɔ lɛ ikápɛ̄ti luwɔluwɔ ā ná klá ajɛ, le ɔdōlé kpó ce ɛyí utéblu abɔ́ɔ bá í lé, klla bá ī gwá. Abɔ́ɔ é bá ī lé ucɛ ā, anɔ́ɔ acígilí, n pó ɔ̄cɛ éyi dɛɛ̄gba kahíníī, “Aótrɛ̄yí kú aícɔ́ɔjā, aá cāŋjɛ, kú aá lɛ aɔ́kplɛ́fú kú aá tútū.”

⁶Anɔ́ɔ Óndú ā da um kahíníī, “Lɛ ɔ̄cogbāajɛ tɛ̄hɔ̄ nyɔ̄ gaá hayi ɛyí inɔɔ̄da kú okónu igá kú igelī ā, kóō ka ɔdā nōó má ā tɛ́ɛcɛ.

⁷Ɔ́dāŋ koó má ācɛ ce aɔ́nya bá ī wā ɛpɛɛpa, mɛ́mla ācɛ nēe ce ɛyí aíjakī mɛ́mla ācɛ nēe ce ɛyí aínyankwūlūmī, ayíka ó lɛ ɔna tá ka ācɛ ā kéē le tútū lɔɔlɔhi.”

⁸Anɔ́ɔ ɔ̄cogbāajɛ tɔ́ɔna kahíníī, “Ɔkpani, ami mahayi yɔ̄ ī gbāajɛ amānyā ŋmá ɔ̄cɔ̄ɔ̄cī jāā gbó otú, kwu eyōōnyā yɔ̄ á.

⁹Anɔ́ɔ acígilí, n má ācɛ ā bá ī wā ce ɛyí aɔ́nya ɛpɛɛpa, anɔ́ɔ ɔ̄cogbāajɛ ā lɛ ɛgba dɛ̄ tɛ́ɛcɛ gbōmgbōm kahíníī, “É kwú Ubábīlɔn ú yálé ɛɛ́. É le odúúdú aójibó kú ɛ̄cī kú nū ā ca bónu ɛɛ́.”

¹⁰Ísrɛ̄lu, ācɛ ɔlɛ́ um, é hímáyī yá aá ōwē bɛ̄ɛka ɛ́gɛ́nɛ̄ é gē wú igwu mla ogbló ā, amáŋ ícɛ ā, n le ɔ̄kā olɔhi nɛ̄ n pó ŋmá ɛgiyí Óndú ā, nōo wɛ Ɔwɔicō kú Ísrɛ̄lu, nōo lɔfú fíyɛ́ dúú ā ka tɛ́ɛcɛ lɛ aá ɛɛ́.

¹¹Olɛhɔ̄ nyā lɛyíkwu ɛbɛ nɛ̄ n má lɛyíkwu Ɛ́dɔm. Ɔ̄cɛ éyi yɔ̄ ī dɛ̄gbá hī um ŋmá Ɛ́dɔm, yɔ̄ ī da um ɔ̄kā kahíníī, “Ɔ̄cogbāājɛ, eko nyā nɛ̄ otú ā gáā mɛ ā? Eko nyā nɛ̄ eyī gáā nya ā?”

¹²Anɔ́ɔ ɔ̄cogbāājɛ ā tóohi kahíníī, “Eyī gē nyā ānāānā, amáŋ otú kē í bī kpɔ́. Ɔ́dāŋ ka a tíne ō dɔɔ̄kā kpɔ́, ayíka a kwúcē wā igbīhāajɛ.”

¹³Olɛhɔ̄ nyā lɛyíkwu ɛbɛ nɛ̄ n má lɛyíkwu ajɛ ācɛ Árābu. Ācɛ kú Udɛ́dan, aá nēe ī kpó aínyankūlūmī okpíyó kú aá gáā lā ajɛ ikpakpla kú Arébīya ā.

¹⁴Aá je éŋkpɔ̄ lɛ ācɛ nɛ̄ ijēnyi gē ŋmó uwá, nēe kwu wā ɛgiyí aá a. Ācɛ kú ajɛ kú Utéma ā, aá je ɔdōlé lɛ ācɛ nēe kwinya ɛfú, nɛ̄ ɛmiyɛ gē ŋmó uwā ā.

¹⁵Ācɛ ā kwu ŋmá ɛgiyí ɛfú, abɔ̄ é bī ɔkpacaŋ́gelī mɛ́mla ɔtā gáā ŋmó uwā ā, mɛ́mla ɔdōtūufi kú ɛfú ā.

¹⁶Óndú ā da um kahíníī, Ipú iháyí ékpónú piyóo, ɛgahi nɛ̄hi kú Ukɛ́da ā géē mɛ ŋmá ipú ɛcɛ.

¹⁷Ācotɔ́ɔtā nɛ̄hi kú uwá nēe lɔtū fíyɛ́ dúú ā, é géē pɛ́ kwú ŋmá ajɛ ā gáā hile kɛ́tɛ̄kɛ̄tɛ̄. Ami, Óndú ā, nōo wɛ Ɔwɔicō kú Isrɛ̄lu ā lɛ ɛlā ka ɛɛ́.”