Read idoma AYISÁYA 22 Bible Online

AYISÁYA 22 - idoma bible

AYISÁYA 22

¹Olɛhɔ̄ nyā lɛyíkwu ɔpɛ́ kú ɛbɛ ōomá. Ɔdí yɔ̄ ī yá ā? Ɔdí nɛ̄ aá bá ī yá ogwéeyé nū ɛyí inu kú ɔlɛ́ aá ā?

²Odúúdú igelī ā kwú hútú ɛɛ́. Ācɛ bá ī dīíbáā, ācɛ ōhī klla bá ī tɔ́ɔga. Ācɛ ɔlɛ aá nēe kwú ā, í bá ī nuunu ɛ́ nēé kwú ɔgbɛ́fú ā ŋ!

³Nááná nɛ̄ odúúdú aótrɛ̄yí kú aá le pɛ́ kwu ā, aólɛlā ā í kōō tá ɔyī ékpónú ɛ́ nēé kpó aótrɛ̄yí kú aá kwú ā ŋ.

⁴Anɔ́ɔ n ka, “Mā um tá cííí, ká n jikwū ohígbū odúúdú ācɛ ɔlɛ́ um, nēe pɛ́ kwú ā. Á hii tá um ɔtūlé ŋ́.

⁵Óndú ā nōo wɛ Ɔwɔicō nōo lɔfú fíyɛ́ dúú ā lɛ eko éyi tū nɛ̄ ufi í yá ācɛ, nēé ī yá uwā lé, nɛ̄ ācɛ klla ī gbájí ipú ɔpɛ́ kú ɛbɛ ōomá ā. É kwú ɔdɔ kú Ujerúsālɛm ú wúlatāajɛ ɛɛ́. Ācɛ kē bá ī dɛ̄gba ī gbɔ̄ɔkɔ lɛ aɛ́fu ā kú otábɔ̄.

⁶Aícɔ́ɔja cɔnya ŋmá ajɛ kú Ɛlam bī ɔyī mɛ́mla ɔtā kú uwá wā. Aícɔ́ɔja klá wā ŋmá ajɛ kú Ukɛ́ɛ lɛ ɔ́kplɛ́fú kú uwā tútū dúú.

⁷Aúgbɔ́ɔnya bá ajɛ olɔhi oyá ɔdɛ̄hɔ̄ kú ɔpɛ́ kú Ujúda ā lɛwa láyí. Aícɔ́ɔja ce ɛyí ɔnya kú uwá lɛ eyī pīya kwu okónɔɔwɛ kú igelī kú Ujerúsālɛm ā.

⁸Odúúdú aɔ́dā nēe ī gbō ajɛ kú Ujúda ā le catāajɛ. Eko ɔ́ɔmā, aá kpó eyī kwu aíyɛ́fú nēé kpó tayínū ipú agblɔ̄cɛ́ kú ipú upū ā.

⁹Aá má ka ɔdɔ kú Ujerúsālɛm le ca aɛ́ga alɛwa. Aá kē le éŋkpɔ̄ kpó tayínū ɔ̄gɔ̄ ō kpó éŋkpɔ̄ tū nōo yɔ̄ ɛháajɛ ā.

¹⁰Aá le alūka aínu kú Ujerúsālɛm ā ka, anɔ́ɔ aá kwú ōhī kú uwā í kpó catāajɛ, cɛ́ɛ́ ka aá bī aɛ́cɔ̄ kú uwā le gwó aɛ́ga nēe catāajɛ kú ɔdɔ ā á.

¹¹Aá le ɛga ō kpó éŋkpɔ̄ tū gwó tá ɛpá nōo tá ɔtāhɛ̄ aɔ́dɔ ɛpa ā, nɛ̄ éŋkpɔ̄ nōo gē pɛ́ ŋmá ipú ɔ̄gɔ̄ éŋkpɔ̄ nɛ̄ŋcɛ̄ ā ī wā í pɛ́ tū. Amáŋ, aá lɛ ɛlá wu Ɔwɔicō nōo tɛtɛ miya ɔdānyā tá ajɛ ŋmá íkée, nōo yá kóō kē le yá ā ŋ́.

¹²Eko ɔ́ɔmā, Óndú ā, nōo wɛ Ɔwɔicō nōo lɔfú fíyɛ́ dúú ā yɔ̄ ī hī aá igwú ka aá wā í jikwū, ka aá yɔ̄ ekwu, ká aá lɛ ɛyí pla, cɛ́ɛ́ ká aá lɛ īlī ekwu kpo wiyē.

¹³Ikɔkɔ nɛ̄ aá ī yá ɔ́ɔmā ā, aá bá í yɛhɛ, bá ī yá ucɛ. Aá ŋmó aɛ́na mɛ́mla aálá. Aá bá í lé, ī gwá, gē ka kahíníī, “Alɔ lé, ka alɔ gwá! Ohígbū ka oócí ā, alɔ géē pɛ́ kwú.”

¹⁴Óndú ā, nōo wɛ Ɔwɔicō nōo lɔfú fíyɛ́ dúú ā, da um ka anúɔ í gáā je ɔbíipú kú aá nyā yá aá ɛhi gbóógbóō ŋ́ jāā gbēeko nɛ̄ aá kwú.

¹⁵Óndú ā nōo wɛ Ɔwɔicō nōo lɔfú fíyɛ́ dúú ā, da um ka amīɔɔ ga ɛgiyí Ussɛ́bna, ɔ̄cɛ nōo leyīkwu Agblɔ̄cɛ́ ā, gāa da ɔ́ ɔ̄kā nyā.

¹⁶“Ɔnyɛ nɛ̄ a gbɛlá ka anúɔ wɛ ā? Íkwu nyā nɛ̄ a lɛ ō bu únóji lɛ īyī uwɔ tá ipú ápátɛ́cɔ̄ kú áklō kú ɛfu ā?

¹⁷A lɔfú je īyī uwɔ ka anúɔ lɔfú nɛ̄hi glá, amáŋ Óndú ā gáā kpákli bī uwɔ je uwɔ tá ɛcɔ̄ tónū ɛɛ́.

¹⁸Ó géē tá uwɔ ɛcɔ̄ ga ipú ajɛ ɔhá nōo lɔwá nɛ̄hi. A géē kwú abɔ́ɔ pi aúgbɔ́ɔ́nya ohéyīfuú nɛ̄hi kú uwɔ nēé í kpó bīya ā. A gē je uwēyī lɛ ipɔ́nū kú ɔlɛ ɔcɛ́, ɔkpani uwɔ ā.

¹⁹Óndú ā géē fu uwɔ ɔkwu ŋmá ɛga kú úklɔ́ nɛ̄ a cīce ā, klla í bī uwɔ wā ajɛ ŋmá āhɔ̄ nɛ̄hi nɛ̄ a ce ɔ́ɔmā.”

²⁰Óndú ā klla da awɔ nōo wɛ Ussɛ́bna ā ka eko nɛ̄ anúɔ kwú uwɔ í tá ajɛ ā, ka anúɔ géē tɛ̄hɔ̄ fu Ɛlíyākim nōo wɛ ɔ̄cocɛ̄hɔ̄ kú anúɔ, ɔyí kú Uhilkíya ā.

²¹Ó ka anúɔ géē kpó awulú kú úklɔ́ kú uwɔ ā wu ɔ́ iyē, géē gbō ɔ̄ ɛ́nyɔ́, klla í je íkwu nɛ̄ a tɛtɛ lɛ ā lɛ ɔ́. Ó gē lɛbɛ̄ɛka ádā ā lɛ ācɛ kú Ujerúsālɛm mɛ́mla Ujúda.

²²N géē je odúúdú íkwu dóódu lɛ ɔ́ ɛháajɛ kú ɔcɛ́ nōo ŋmá ipɔ́nū kú Udéfīdi ā. Ó géē bī ayíigodo kú ahɔ̄ kú nū ā. Ɔdā dúúmā nōó le nwūla, ɔ̄cɛ dúúmā í gáā gwū ɔɔ glá ŋ́. ɔdā dúúmā nōó kē le gwū, ɔ̄cɛ dúúmā í kē gáā nwūla anú glá ŋ́.

²³N gēe bū ɔ̄ tū ajɛ ká bɛ̄ɛka ɔcí nēé ī hɛ́ tū ajɛ ā. Ó kē í bī ojīlīmā gé lɛ odúúdú ipɔ́nū kú ɔlɛ́ nū.

²⁴Amáŋ odúúdú aɔ́máapú nū mɛ́mla ayí nū géē gbolóce ɔ́. É géē playi anú ɔkɔ bɛ̄ɛka aíkókwū mɛ́mla aógo mɛ́mla aɛ́hi nēe ī playi ɔcí pílópíló nēé ī hɛ́ tū ɔdɔ kéē lɛ odée playi anú ā.

²⁵Eko nɛ̄ ɔ́ɔmā le yá ā, cɛ́ɛ́ ɔcí pílópíló nōo tɛtɛ kwu ɔdɔ kli ā í jíliyē klla í je fu táajɛ. Eko nɛ̄ ɔcí pílópíló ā kwú fu táajɛ ɛɛ́, ɔdā dóódu nōo playi anú ā géē je yíífi? Óndú ā ka anúɔ le ka ɛɛ́.