Read idoma AYISÁYA 23 Bible Online

AYISÁYA 23 - idoma bible

AYISÁYA 23

¹Olɛhɔ̄ kú ɛbɛ nēé má nyā lɛyíkwu igelī nēé hī ka Utáya ā. Áá tū ɛgíkwū ipú ɔtūnōbí, aá nēe gē yɛ ipú úgbéenyi eyī ísu ā. Utáya nōo wɛ ɔlɛ́ aá nɛ̄ úgbéenyi gē wū ajɛ ā kwú yíífi ɛɛ́. Inú dóódu mɛ́mla ɛga nɛ̄ úgbéenyi gē wū ajɛ kú igelī ā kwú yíífi má tá alácɛ̄ ɛɛ́. Abɔ̄ aúgbéenyi kú aá bá ī pīyɛyí ŋmá Usáyíprɔs ā, aá lɛ ɔ̄kā ā pó.

²Aá dīíbáā, ācotɔ́su kú Usídɔn. Aá gē tū ācɛ ɛhɔ̄

³ga ogbeé kú ísu kéē nyɔ̄ í tɔ́sú kú īkpɔ̄dɛ̄hɔ̄, nōo gē jɛ̄ ajɛ kú Íjīpiti ā, cɛ́ɛ́ ka aá tɔ́sú mɛ́mla éwo dóódu.

⁴Ācɛ igelī nēé hī ka Usídɔn nēé gwó lɔfú kwu okónu ísu nɛ̄hi ā, uwēyī lɛ aá kwú ɛɛ́. Ísu nɛ̄hi nōo lipú nɛ̄hi ā híhó aá klla kahíníī, “Ń yá ɔma mɔyí dúúmā jéjéē ɛ́ɛ́ ŋ́. Ń kē bī ayínɔ̄nyīlɔ amáŋ ka ayínɔ̄nyā jɛ̄ jéjéē ɛ́ ŋ́.”

⁵Eko dúúmā nɛ̄ ācɛ kú Íjīpiti le pó kēé kwú Utáya ú yífi ā, ó géē kwu uwá iyē, klla í hɛ́ uwá ohí nɛ̄hi.

⁶Aá tū ɛgíkwū ka aá dīíbá, aá nēe lā okónu ísu ā. Aá kóō yá ka aá le kwu ga ajɛ nēé hī ka Utássīssi ā!

⁷Utáya nōo le mu mla éeyē nēé le kwu ajɛ ŋmá íkée ā yɔ̄ ā kɛ̄ɛɛ? Igelī nōo gē fu ācɛ kú nū nyɔ̄ í lā ipú ajɛ kú éwɔhá cɛ́ɛ́ kéē mīyɛ aéwɔhá ɔ́ɔmā ajɛ ā yɔ̄ ā ā?

⁸Ɔnyɛ yá ojuju klla bī odúúdú ámíyā nyā wā í klá Utáya, nōo gē gbō aéwo alɛwa āa? Ɔnyɛ miya ɛnyā tū Utáya nōo ācotɔ́sú kú nū le ojīlīma fíyɛ́ dúú ipú ɛcɛ āā?

⁹Óndú ā nōo lɔfú fíyɛ́ dúú ā miya ɛ̄nyā á. Ó miya cɛ́ɛ́ kóō lɛ ɔbɔ́ɔ́cɛ kú uwá bī wā oŋmɛ́yí ipú ɔdā nɛ̄ uwá yá ā. Ó yá kóō klla lɛ uwēyī je lɛ ācɛ nɛ̄ ācɛ gē lɛ ojīlīma ce uwā ipú odúúdú ɛcɛ ā.

¹⁰Ācɛ kú Utássīss, aá nyɔ̄ gaá mīyɛ ajɛ kú Utáya tū abɔ̄ ɛ́gɛ́nɛ̄ ísu nēé hī ka Unáyilu ā gē cēnyi ī mīyɛ okónu nū tū abɔ̄ ā. Ohígbū ka ɔ̄cɛ dúúmā í yɔ̄ nōo ge ci aá anú ɛ́ gɛ ŋ́.

¹¹Óndú ā lɛ abɔ̄ kú nū nāŋdaa ga eyī ísu ā, lɛ abɔ̄ jíla aájɔ̄ɔ̄cɛ́ ā iyē ɛɛ́. Ó lɛ ɔ́da je kéē kwu aígelī olɔfú nɛ̄hi kú Ukénan ā í yíífi ŋ́má ajɛ ɛɛ́.

¹²Óndú ā le da ācɛ kú Usídɔn ka ɔtūnɛ̄hɛ́ kú uwā ā mɛ ɛɛ́. É klla bá ī yá ācɛ ɔlɛ uwɔ ŋmó. Ɔ́dāŋ ka uwá le kwu ga Usáyiprɔs nááná, uwá í gáā lā ɛbɔ́ ŋ́ kpɔ́.

¹³Ācɛ kú Ubábīlɔn je Utáya tá alácɛ̄ je ɔ́ pīya ɔlɛ́ kú ɛbɛ́ ipácí á. Ó wɛ ācɛ Asírīya yá Utáya ífi ā ŋ́. Ācɛ Ubábīlɔn cīíbɔm tū uwā mla inɔ̄ɔda klla ca ɔlɛ́ olɔfú nɛ̄hi kú igelī ā tāajɛ á. Uwā kē je igelī ā wúlatāajɛ, je ɔ́ tá alácɛ̄ á.

¹⁴Ācotɔ́sú kú Utássīss nōo ī yɛ ipú aúgbéenyi ā, aá jikwū. Ohígbū ka Utáya nōo wɛ ɛga olɔfú nɛ̄hi nɛ̄ aá kpɔ́tūce ā, kwú yíífi ɛɛ́.

¹⁵Eko géē wā nēé géē je mlanyī Utáya iháyí ofɛtá cigwó. Iháyí ofɛtá cigwó wɛ eko nɛ̄ ɔcɛ́ gē yēeyī gaá kwu ā á. Eko nɛ̄ iháyí ɔ́ɔmā gaá le gla, ahɔ̄ kú Utáya géē lɛbɛ̄ɛka akwuna nēé le tū ije ā kahíníī,

¹⁶“Awɔ akwuna nēé kwu mlanyī uwɔ ɛɛ́ mā, kwú ɛ̄ngwū kú uwɔ ú ka aá yɛ jīla igelī ā tá biílí. Gwō ɛ̄ngwū kú ā gwííjē, o yá ká ācɛ kóō kwú bla kwu uwɔ igbɔhá kpɔ́.”

¹⁷Eko nɛ̄ iháyí ofɛtá cigwó ā gaá le gla, Óndú ā í cɛ̄ lɛ Utáya klla í kwúcē ga ipú ɔsú otá kú nū ā igbɔhá kpɔ́ ɛɛ́. Igelī ā klla í gbɔɔ́ ō tɔ́su mɛ́mla odúúdú aéwo kú ɛcɛ ā lɛbɛ̄ɛka ɔnyā nōo ī je īyī nū lá lɛ ācɛnyīlɔ kéē gbo mɛ́mla anú ā.

¹⁸Ije nōó géē lɛ ŋmá ɔ́sú kú nū ā, géē je kpó pīya ákú Óndú ā. Ó gáā kpó ije kú nū ā tayínū ŋ́, amáŋ ācɛ nōo gē gbā Óndú ā ɛ̄gbā ā géē kpó ije ɔ́ɔmā le lá ɔdōlé mɛ́mla īlī cabácabá lɛ īyī uwā.