Read idoma AYISÁYA 24 Bible Online

AYISÁYA 24 - idoma bible

AYISÁYA 24

¹Óndú ā géē je ɛcɛ yíífi, í je ɔ́ tá alácɛ̄. Ó géē je ajɛ kú ɛcɛ bīya kpɔ́gɔ̄kpɔgɔ̄, géē je ācɛ nēe lā anú ā kpó fíyákátā.

²Ɔdā ékpónú ɔ́ɔmā géē yá odúúdú ācɛ á. Ɛ́gɛ́nɛ̄ ó géē yá ācɛ ā nōó í yá ācogwɛ́ɛya ā á. Ɛ́gɛ́nɛ̄ ó géē yá aɔ́fiyɛ ā nōó í yá aóndú uwā á. Ɛ́gɛ́nɛ̄ ó géē yá ayíyɔlɛ́ nɔ̄nyā ā nōó í yá ɛ́nɔ́lɛ́ á. Ɛ́gɛ́nɛ̄ ó géē yá ācojɔlálá ā nōó í yá ācolɔ́lá á. Ɛ́gɛ́nɛ̄ ó géē yá ācɛ o lɛ ijē kplá ācɛ ā nōó í yá ācɛ nōo ī kplá ɛ́kplá á. Ɛ́gɛ́nɛ̄ ó géē yá aólɔdu ā nōó í yá aólɛhá á.

³Odúúdú ɛcɛ gēe je yíífi klla í pīya alácɛ̄. Óndú ā le ka ɛɛ́.

⁴Ɛcɛ kwú ŋmókókó klla kwu ŋmɔ́lá ŋmá ajɛ ɛɛ́. Kwu ɛcɛ mɛ́mla ɔkpáncō le ŋmó dúúdú.

⁵Ācɛ kwú ɛcɛ ú bīya ohígbū kéē tá ō lɛyítáajɛ lɛ íne kú Óndú ā, le íne ā tá nyílá. É klla le ɛka nɛ̄ Óndú ā gbo mla uwá kóō yɔ̄ piyóo ā tá nyílá ɛɛ́.

⁶Ohígbū ɔ́ɔmā, Óndú ā lɛ okónu tá lɛ ɛcɛ ɛɛ́. Ācɛ kú ɛcɛ ā bá ī móōwē kú ɔ̄dā nɛ̄ uwá yá ā. Ācɛ le pɛ́ kwú kwɛyí gaá hile lígíí ɛɛ́.

⁷Aɔ́cí ufáyin le ŋmɔ́lá ɛɛ́. Ohígbū ɔ́ɔmā ejé kē gbɔɔ́ ō ŋá ɛɛ́. Ɔtū í klla he ɔ̄cɛ dóódu nɛ̄ ɔtū tɛtɛ he ɔ̄ ā gɛ ŋ́.

⁸Ije kú éeyē kú uwá nēé bī uba mɛ́mla ɛ̄ngwū gē gwó ā mɛ ɛɛ́.

⁹Ācɛ í klla ī wīyā ejé, ī gwíjē ɛɛ́ gɛ ŋ́. Ejé ā kwú mákáká tū uwá okónu ɛɛ́.

¹⁰Ācɛ le gbájí ipú igelī ā, igelī ā klla kwú catāajɛ. Ācɛ le pɛ́ kwu gaá tayínū inu ɔlɛ́ uwā, lɛ ɔwɛ kpó gwū tū īyī uwā.

¹¹Ācɛ bá ī dīíbá ipú igelī ā ohígbū ka ejé ī yɔ̄ ɛɛ́ gɛ ŋ́. Ɔtū í gáā he ācɛ kú ajɛ ā gɛ ŋ́ piyóó. É kē má éeyē gwó ipú ajɛ ā gɛ ŋ́.

¹²Igelī ā tá alácɛ̄, é kē kwú odūngwɔ̄wɛ kú igá kú nū ú ca bónū ɛɛ́.

¹³Ɔdā ékpónú ɔ́ɔmā géē yá ipú aéwo dóódu kú ɛcɛ ā á. Ó géē lɛbɛ̄ɛka eko ō cē ɔdɛ̄hɔ̄, nēé kwú ɔdɛ̄hɔ̄ í kpó gwō ŋmá ɔcí kú olīifu dúúdú, nɛ̄ īkpɔ̄cí kú ɔcí ufáyin dúúmā í hile kwu ɔ́ gɛ ŋ́ mā.

¹⁴Amáŋ ācɛ nēe géē hile ā géē gwéeyē klla gwíjē kú éeyē. Ācɛ kú ɛnɔ̄ɔ̄nɛ̄ géē cɛ̄tra ɛ́gɛ́nɛ̄ Óndú ā lɔfú nɛ̄hi lɛ ā ā.

¹⁵Ācɛ nēe lā ɛnɔ̄ɔ̄cī ā mɛ́mla ācɛ nēe kē lā okónu kú ísu ā, kéē cɛ̄tra Óndú ā nōo wɛ Ɔwɔicō kú Ísrɛ̄lu ā.

¹⁶Alɔ bá ī pó ijē kú ocɛ̄tra ŋmá ɛga oligbó yɔ̄ ī cɛ̄tra Ísrɛ̄lu ka ɔ́ɔ le kpaakpa. Amáŋ, ami ā í lɛ eyīyōce dúúmā ŋ́. N le jī ɛɛ́. Ācoyíbīyajɛ ā bá ī yíbīyājɛ gɔbū kpɔ́. Ibīyājɛ kú uwá kē yɔ̄ ī bɔ̄bí nɛ̄hi tōōtɔ̄ɔ̄.

¹⁷Odúúdú alɛɛcɛ, aá jāhɔ̄ gā um. Ɔdōtūufi mɛ́mla ɔ̄gɔ̄ klla mɛ́mla ukpa bá ī gbēyī aá kóō yá aá odée.

¹⁸Ɔ̄cɛ dúúmā nōo yá kóō kwu ŋmá ɛgiyí ɔdōtūufi ā, géē míya tá ipú ɔ̄gɔ̄ ā. Ɔ̄cɛ dúúmā nōo kē ī kwu ŋmá ɛgiyí ɔ̄gɔ̄ ā, ukpa ā kē í kwú ɔ̄. Ɔkpáncō le nwūla bɛ̄ɛka uwíndo ā ɛɛ́ nɛ̄ ɔwɔ kē í yā klá ɛcɛ ŋmá anú á. Ɛcɛ kē í jīliyē jāā kwu etikpa kú nū.

¹⁹Ɛcɛ í hɛ́ kɔ, kllá í je yíla kátáāā.

²⁰Ɛcɛ abɔ̄yī nū géē yɔ̄ í túgagá bɛ̄ɛka ɛ́gɛ́nɛ̄ ɔ̄cɛ nɛ̄ ejé lɛ ɔ́ kwú ā gē ga ɔwɛ ga ácí ā. Ó kē í jíliyē bɛ̄ɛka inu ácí nɛ̄ ofulútu yɔ̄ ī kpó gajɛ gicō ā. Ɔbíipú kú alɛɛcɛ yɔ̄ ī pi ɛcɛ wā ajɛ á. Ɛcɛ géē wūlatāajɛ nēé kē gáā kpó ɔ̄ gicō gbóógbóō glá ɛɛ́ gɛ ŋ́.

²¹Eko gē wā, nɛ̄ Óndú ā géē yá aólɔfú nēe bá ɔkpāncō ā mɛ́mla aɔ́cɛ́ nēe ī gbāājɛ ɛcɛ ā italā.

²²Óndú ā géē kwú uwā í kpó uwā, tɔ̄há ipú ɔ̄gɔ̄ bɛ̄ɛka aálagbá ā. Ó géē gwū ɔwɛ tū uwá ipú agbá abɔ́ɔ jāā gbéeko nɛ̄ eko nōó ī yá uwā italā ā gā.

²³Ɔyā géē je dobū, ɛnɔ í kē gáā cɛ̄ glá gɛ ŋ́ ohígbū ofíyajɛ kú ɛgahi nɛ̄hi kú Óndú ā, nōo lɔfú fíyɛ́ dúú ā. Óndú ā géē cɔcɛ́. Ó géē gbāajɛ ɛyí ɛfú kú usáyɔn, Ujerúsālɛm. Aótrɛ̄yí kú ācɛ ɔlɛ́ nū ā géē má ofíyajɛ kú ɛgahi nɛ̄hi kú Óndú ā.