Read idoma AYISÁYA 25 Bible Online

AYISÁYA 25 - idoma bible

AYISÁYA 25

¹Woó Óndú, awɔ wɛ Ɔwɔicō kú um á. N géē je ojīlīmā lɛ iyē kú uwɔ, klla í cɛ̄tra awɔ. Ohígbū ka a le ɔdā idáagó nɛ̄hi yá. Aɔ́dā ɔ́ɔmā wɛ ɔdā nɛ̄ a miya ŋmá íkée, a kē lɛ uwá yá jīla ɛ́gɛ́nɛ̄ a miya lɛ ā.

²A kwú ɛjɛ̄ɛ̄jī aígelī kú aéwɔhá í wúlatāajɛ klla lɛ aɛ́ga olɔfú nēé ī kwu tayínū ā catāajɛ. Aɔ́lɛ́ nɛ̄hi kú aɔ́cɛ́ kú aéwɔhá ā í klla yɔ̄ ɛɛ́ gɛ ŋ́. É klla gáā tá uwā gwó gbóógbóō ɛɛ́ gɛ ŋ́.

³Ohígbū ɔ́ɔmā, aéwo olɔfú nɛ̄hi géē cɛ̄tra awɔ. ācɛ kú aéwo obɔ̄bíipú nɛ̄hi géē yúufi uwɔ í lɛ ojīlīmā ce uwɔ.

⁴Awɔ húmáyī wɛ ɛga otayínū olɔfú kú aólɛhɔ́ɔ̄cɛ á. Awɔ wɛ ɛga otayínū kú ācɛ nɛ̄ ɛgbá ī ce uwá eko kú ákanya kú uwá á. Awɔ kē wɛ ɛga omlɛnyɔ̄ kú uwā ŋmá ipú ɔwɔ mɛ́mla ɛnɔ á. Ācobɔ̄bíipú ā gē nuunu tú alɔ ɛ́gɛ́nɛ̄ ɔwɔ otá owu nɛ̄hi gē yā klá ɔdɔ ā.

⁵É gē wā kwūūū gaá klá ɔ̄cɛ bɛ̄ɛka owu okwɔ́lá nōo ī tá nɛ̄hi ɔnɔ̄ ā. A lɛ uya kú ācɛ éwɔhá ā kwú klá ɛɛ́, ɛ́gɛ́nɛ̄ ojuja gē kwú idɔlá kú ɛnɔ klá ā. Ohígbū ɔ́ɔmā, ācobɔ̄bíipú ā í gwíijē ka aá lɛ alɔ yálé glá ɛɛ́ gɛ ŋ́.

⁶Ɛyí ɛfu kú usáyɔn nyā, Óndū ā, nōo lɔfú fíyɛ́ dúú ā géē yá ucɛ ɛ́nɛ́nɛ̄ lɛ odúúdú ācɛ nēe bá ipú ɛcɛ ā. Ucɛ ā géē wɛ ucɛ nɛ̄ ācɛ í lɛ ɛ́nɛ́nɛ̄ ɔdólé, ɛ́nɛ́nɛ̄ ejé mɛ́mla ɛ́nɛ́nɛ̄ ɛbɛ́ olɔnyɛ.

⁷Ɛyí ɛfu nyā, ó géē je ɔdā nēé le klá odúúdú aéwo ɛyí mɛ́mla īlī ekwu nōo húmáyī klá odúúdú ācɛ eyī ā kpó híla bónū.

⁸Ó géē je ikwū yíífi piyóo. Óndú ā ī nyā agīje ŋmá eyī kú ācɛ dóódu. Ó kē í je uwēyī nōo kwú odúúdú ācɛ ɔlɛ́ nū ipéyī odúúdú ācɛ ɛcɛ ā kpó ŋmá uwā ɛyí. Óndū ā le ka ɛɛ́.

⁹É géē ka ɛ̄cī ɔ́ɔmā kahíníī, “Ɔwɔicō kú alɔ ā yɔ̄ á. Alɔ húmáyī kpɔ́tūce ɔ́, yɔ̄ ī kpéyīce ɔ́, ó kē lɛ alɔ nyatá ɛɛ́. Anú wɛ Óndú ā nɛ̄ alɔ kpɔ́tūce á. Alɔ gwéeyē mla ɔtūnɛ̄hɛ́ ohígbū onyatá nɛ̄ Óndú ā nya alɔ tá ā.”

¹⁰Óndú ā abɔ̄yī nū géē bī ɔfú nɛ̄hi kú nū le gbō ɛyí ɛfu kú usáyɔn ā. Amáŋ é géē je Umówābu wúlatāajɛ lɛ ikpó da ɔ́ tāajɛ, bɛ̄ɛka ɛ́gɛ́nɛ̄ é ī lɛ ikpó da ácí bá ajɛ ā.

¹¹É gēe nā abɔ̄ kú uwá daa bɛ̄ɛka ɔ̄cɛ nōo nā abɔ̄ daa gáā tágwā ā, yɔ̄ í tíne ɔwɛ nēé í kwu. Amáŋ Óndú ā géē je uwēyī lɛ uwá, nɛ̄ abɔ̄ kú uwá ɔ́ɔmā géē wāajɛ. Óndú ā géē tū ɔbɔ́ɔ́cɛ wā ajɛ.

¹²Óndú ā géē je ɔdɔ kú aɛ́ga olɔfú nɛ̄hi kú Umówābu catāajɛ í je uwā gbā munuu le pīya úmúlá.