Read idoma AYISÁYA 26 Bible Online

AYISÁYA 26 - idoma bible

AYISÁYA 26

¹Ɛ̄cī éyi gē wā nēé géē gwó ijē nyā ipú ajɛ kú Ujúda: Igelī kú ɔlɛ́ alɔ lɔfú nɛ̄hi, Ɔwɔicō abɔ̄yī nū ī gbō alɔ ɛyí, klla ī cɛ̄ lɛ alɔ yálé á, bɛ̄ɛka ɛ́gɛ́nɛ̄ ɔdɔ kú igá gē gbō igelī ā.

²Aá lɛ odūngwɔ̄wɛ kú igelī ā nwūla, cɛ́ɛ́ ka éwo nōo ī yá ucē okpaakpa, nɛ̄ ācɛ kú nū kē háyi kpaakpa ā kéē le bēhé.

³Óndú, a gē lɛ ācɛ nēe lɛ ɔtū kú uwā yá ékpónú lɛ ɔtū kpóce uwɔ ā tū ɛbɔ́.

⁴Ó lɛ ā, lɛ ɔtū ce Óndú ā piyóo, ohígbū ka Óndú ā nōo wɛ Ɔwɔicō ā gē gbō alɔ bɛ̄ɛka ápátɛ́cɔ̄ nōo yɔ̄ piyóó á.

⁵Óndú ā lɛ ācɛ oyá ɔbɔ́ɔ́cɛ ā tú wāajɛ ɛɛ́. Ó lɛ igelī olɔfú nɛ̄hi nēé lā anú ā yíífi ɛɛ́. Ó klla kwú ɔdɔ kú nū ú wúla klá ajɛ, lɛ ɔ́ gbā munuu ɛɛ́.

⁶Aólɛhá mɛ́mla ācɛ nēé lɛ abɔ̄ da uwá ɛyí tāajɛ ā bá í lɛ ikpó da umúlá kú igelī ā tāajɛ.

⁷Amáŋ Óndú, awɔ nōo le kpaakpa ā, ī yá ka ɔwɛ kú ācɛ nēé ī yá ucē okpaakpa ā kóō le yá kpaakpa mɛ́ɛ́lɛ́.

⁸Óndú, alɔ yɔ̄ ī lɛyítáajɛ ga awɔ klla leyī kpóce uwɔ. Óndú, ɔdā nɛ̄ alɔ tíne ofōōfūnū ā wɛ owóofu kú iyē uwɔ.

⁹Otú gbɔ́ɔcī abɔ̄ uwɔ yɔ̄ ī kwū um, odo kú um kē yɔ̄ ī tíne uwɔ nɛ̄hi. Ohígbū ka eko dúúmā nɛ̄ a lɛ ɛpɔ̄ ka tū ɛcɛ nɛ̄ ācɛ géē jé ɔdā nōo i kpaakpa á.

¹⁰Ɔ́dāŋ ka a lɛ eyīnyinyi kú ɔ̄cobɔ̄bíipú má lɛ olɔhi yá lɛ ɔ́ nááná, ó gáā kllɔcɛ́ ō jé okpaakpa ō yá ŋ́ kpɔ́. Ó kōō yɔ̄ ipú ajɛ nɛ̄ ācɛ ī yá okpaakpa nááná, ó í yɔ̄ gē yá ɔdōbɔ̄bí kpɔ́. Ó kōō gáā jé ojīlīmā kú awɔ, Óndú ā, nōo wɛ ɔcɛ́ ā ŋ́.

¹¹Óndú, a lɛ abɔ̄ kú uwɔ je gicō gáā yá mla uwá ɛɛ́, amáŋ é má ɔ̄ ŋ́. Óndú, le mafú ɛ́gɛ́nɛ̄ a lɛ ɛlá wu alɔ lɛ ā. Yá ká uwēyī kóō lɛ uwá kwú. Ɔlá nɛ̄ a tútū tá ajɛ lɛ aólɛlā kú uwɔ ā kóō lɛ uwá yi.

¹²Óndú, a géē je ɛbɔ́ lɛ ajɛ alɔ piií ohígbū ka odúúdú úklɔ́ nɛ̄ alɔ yá ā, awɔ yá ɔ̄ɔ̄ lɛ alɔ á.

¹³Óndú, Ɔwɔicō kú alɔ, ācɛ ɔhá tɛtɛ gbō alɔ ɛɛ́, amáŋ, awɔ ofōōfū uwɔ nɛ̄ alɔ cɛ̄ ka a wɛ Óndú alɔ á.

¹⁴Ācɛ nɛ̄ alɔ gbɛ̄gbā ɔ́ɔmā gekwú ɛɛ́, é kē gáā yēeyī gɛ ŋ́. Uwá le pīya okwúmá ɛɛ́, é kē gáā héyī gɛ ŋ́. Ohígbū ka a lɛ ɛpɔ̄ ka tú uwā lɛ uwá kpó yíífi ɛɛ́. Ɔ̄cɛ dúú í klla blakwu uwá ɛ́ɛ́ gɛ ŋ́.

¹⁵Amáŋ Óndú, a cɛ̄ lɛ éwo kú alɔ le nyīla ɛɛ́. A lɛ ɛjī kú ajɛ kú alɔ nyīla tōōtɔ̄ɔ̄ āyā dóódu. Ɔ́ɔmā ā kē lɛ ojīlīma bī gé lɛ alɔ ɛɛ́.

¹⁶Óndú, a lɛ italā yá ācɛ kú uwɔ. Anɔ́ɔ abɔ̄ é bá ipú ɔnɔ ā, é gbɔ̄ɔkɔ klla jikwū klá awɔ á.

¹⁷Óndú, a yá alɔ ka alɔ nya klla dɛ̄gba bɛ̄ɛka ɔnyā nɛ̄ ɔma lɛ ɔ́ kwú ā.

¹⁸Ɛ́gɔ́ɔmā nɛ̄ alɔ bá ipú ɔnɔ bá ī dɛ̄ bɛ̄ɛka ɔnyā o yá ɔma ā, Amáŋ alɔ í ma ɔdā dúúmā ŋmá ipú ŋ́. Alɔ ī bī oyálé dúúmā gé lɛ ācɛ ɛcɛ ŋ́ māaa, alɔ í kē ma ācɛ dúúmā kéē mīyɛ ɛcɛ tābɔ̄ ŋ́.

¹⁹Amáŋ ācɛ ɔlɛ Óndú ā nēe kwú ā, gēe héyī, í yēeyī igbɔhá kpɔ́ ɛɛ́. Ɔkpíyē kú uwā kllá í je héyī igbɔhá kpó ɛɛ́. Da odúúdú ācɛ nēe bá ī gbiyɔ̄lā ipu únóji ā, kéē le kpó héyī, kéē gwíijē kú éeyē. Óndú ā géē ce klá ɔlékwū lɛbɛ̄ɛka ébú nōo ī ce klá ácí eyīoonyā ā. Cɛ́ɛ́ ācɛ ɔlɛ́ nū nēe tɛtɛ kwú gbojīgbojī ɛɛ́ mā, géē je héyī kpɔ́.

²⁰Ācɛ ɔlɛ́ um, eko kpíii nyā, aá le pɛ́ kwu ga ipú inū ɔlɛ́ aá ka aá gaá lɛ ɔwɛ gwū tū īyī aá. Aá kwú īyī aá í tayínū jāā gbéeko nɛ̄ ɔnū kú Óndú ā gaá le gla.

²¹Óndú ā géē wā ajɛ ŋmá ɔkpancō, ɛga nōó lā ā. Ó í gaá je ōwē lɛ ācɛ kú ɛcɛ ohígbū ɔbíipú kú uwā. Ācɛ nēé ŋmó tayínū ipú ɛcɛ ā kpɛ́mm ā, Óndú ā géē je ɔkwu nū tɛ́ɛcɛ. Ajɛ í klla gáā je ācɛ nēé kpó ŋmó wɛɛlɛ ā tayínū glá ɛɛ́ gɛ ŋ́.