Read idoma AYISÁYA 27 Bible Online

AYISÁYA 27 - idoma bible

AYISÁYA 27

¹Ɛ̄cī ɔ́ɔmā, Ulebīyatan nōo wɛ ɛgwā obɔ̄bí nɛ̄hi ā géē yɔ̄ ī nya kpánákpáná, í yɔ̄ ī pīya klikli kóō kwu. Amáŋ Óndú ā géē bī ɔkpacaŋ́gelī kú nū olɔfú nɛ̄hi mɛ́mla otūufi nɛ̄hi ā í yá italā ɛbɛ́ obɔ̄bí kú ipú ísu ɔ́ɔmā italā. Ó í ŋmó ɔɔ̄.

²Eko ɔ́ɔmā, gwíijē lɛyíkwu ɛ́nɛ́nɛ̄ ɛhɔ̄ kú ɔcí ufáyin.

³“Ami nōo wɛ Óndú ā géē gbō ɛhɔ̄ kú ɔcí ufáyin ā abɔ̄yī um eko dóódu á. N klla í kpó éŋkpɔ̄ tū ɔ̄ abɔ̄yī um eko dóódu. N géē gbō ɔ̄ɔ̄ kwu otú kwu ɛnɔ cɛ́ɛ́ ka ɔ̄cɛ dúúmā kóō lɛ abɔ̄ kwu ɔ́ bīya ɔ́ glá ŋ́.

⁴Ń klla cɔ̄nū mɛ́mla ɛhɔ̄ kú ɔcí ufáyin ā ɛɛ́ gɛ ŋ́. Ɔ́dāŋ ka ácí mɛ́mla ujē dúúmā yɔ̄, nōo gē bɛ̄yíkwu um nɛɛ, n géē nuunu tú ujē mɛ́mla ácí ɔ́ɔmā ā í kpó uwā yɔlá ŋmá anú bōōbū.

⁵Amáŋ, ɔ́dāŋ ka aólɛlā kú ācɛ ɔlɛ́ um tíne ká n̄ gbō uwá dúú nɛ̄, ayíka ē wā í lɛ ɛbɔ́ yá mɛ́mla um. Īī, ē wā í yá ɛbɔ́ mla um.”

⁶Ipú ɛ̄cī nōo géē wā ā, ācɛ kú Ísrɛ̄lu, ayááyí kú Ujékɔ̄pu géē tá ɛgba kwú ajɛ bɛ̄ɛka ɔcí ā. É klla í lu, í héēpū bɛ̄ɛka alemú ā. É ī gwá ikpō klá ɛcɛ ɛga dóódu.

⁷Óndú ā í yá Ísrɛ̄lu italā nɛ̄hi bɛ̄ɛka aólɛlā kú uwá jéjée ɛ́ ŋ́, ɛ́ɛ́ nɛ̄ ācɛ kú Ísrɛ̄lu gē kwú bɛ̄ɛka ákú aólɛlā kú uwá ā ɛ́ ŋ́.

⁸Óndú ā lɛ italā yá ācɛ ɔlɛ nū ŋmá lɛ o je uwá kpó ga ajɛ kú aéwɔhá. Ó lɛ owu okwɔ́lá nɛ̄hi nōo ŋmá ɛnɔ̄ɔ̄cī ā tū gaá kwú uwā í kpó nyɔ̄.

⁹Amáŋ ɔdā ofōōfūnū nōo yá nɛ̄ Óndú géē je ɔbíipú kú ācɛ kú Ísrɛ̄lu yá ɛhi ā wɛ eko nēé kwu aíkpɛ́cí ā kpó ca ŋmá ajɛ ɔlɛ́ uwā munumunu. Nēé klla cɛ̄ lɛ aéde oyi ɔtulalī ɔlá anú lɛ ɛcí mɛ́mla ojibó kú ɛcí, nēé hī ka Assɛ̄ra ā í yɔ̄ ajɛ ɔlɛ́ uwā gɛ ŋ́.

¹⁰Igelī nēé ce igá kú ɔdɔ tū ɔ̄ ā tá alácɛ̄. Ācɛ kwú pɛ́ kwu ŋmá anú bɛ̄ɛka ígbíli ā. Ó kwú pīya ɛga olúlé mɛ́mla ɛga omlɛ́nyɔ̄ kú aɛ́na mɛ́mla aálá.

¹¹Ɔ́dāŋ nɛ̄ ābɔ̄ kú ɔcí kwú ŋmó kwú cē wā ajɛ, ācɛnyā gē kpó uwā le kwu ɔlá. Ohígbū íla kú ācɛ nyā ā, nēé jé ɔdā dúúmā ŋ́ mā, Ɔwɔicō nōo yá uwá ā, í gāa méyīnyinyi uwá ɛ́ɛ́, nōo gē yá olɔhi dúúmā lɛ uwá ŋ́.

¹²Eko éyi géē wā nɛ̄ Óndú ā géē jíla ajɛ nōo yɔ̄ ɔtāhɛ̄ ísu kú Uyúfarētīisi mɛ́mla ɔkpá nōo kwu ɛjī kú Íjīpiti ā iyē. Cɛ́ɛ́ ó lɛ ācɛ ɔlɛ́ nū yā kékeké bɛ̄ɛka ɛ́gɛ́nɛ̄ ɔ̄cɛ ī tá igwu owu ŋmá igbóngbō ā.

¹³Ɛ̄cī nɛ̄ eko ā le yá ā, é géē tá opo gbōō hī ācɛ kú Ísrɛ̄lu igwú ŋmá Asírīya mɛ́mla Íjīpiti, ɛga nēé kpó uwā nyɔ̄ abɔ̄fú ā. Uwá í wā í gbā Óndú ɛ̄gbā Ujerúsālɛm, ɛyí ɛfu kú Óndū ā.