Read idoma AYISÁYA 28 Bible Online

AYISÁYA 28 - idoma bible

AYISÁYA 28

¹Ajɔ̄ɔ̄cɛ́ kú Ísrɛ̄lu le jī ɛɛ́. Ɛgahi mɛ́mla ofu kú nū yɔ̄ ī je cá ŋmá ajɛ bɛ̄ɛka ɔfulā kú ododó, nōo kwu ɛyí kú aótrɛ̄yí kú nū nɛ̄ ejé le kwú ā. É lɛ ɔtulali kpó tū ɛyí kú ɔbɔ́ɔ́cɛ kú uwá ā, amáŋ ejé lɛ uwá kwú bá ajɛ bɛ̄ɛka ɔdā nēé le pɛ́kwú ā.

²Óndú ā lɛ ɔ̄cɛ éyi nōo lɔfú klla lɛ ɔfú iyē tútū gáā kpɛfú tá Ísrɛ̄lu ɛɛ́. Ɔ̄cɛ ɔ́ɔmā géē yā klá uwá bɛ̄ɛka ɛcɔ̄ɔwɔ ā mɛ́mla ɔwɔ nɛ̄hi ā. Ó klla í kpó uwā kwūūū bɛ̄ɛka éŋkpɔ̄ nōo ī cēnyi nɛ̄hi ī kpó ɔlɛ́ ā.

³É géē lɛ ikpó da ɔdā nɛ̄ aótrɛ̄yí ogwéjé kú Ísrɛ̄lu gē yɔ́bɔ́ɔ́cɛ́ kú nū ā bá ajɛ.

⁴Ɛgahi kú ɔfulā kú aótrɛ̄yí oyɔ́bɔ́ɔ́cɛ ɔ́ɔmā nōo yɔ̄ ī cá ā, gē bī tāajɛ. Ó géē lɛbɛ̄ɛka īkpō kú ɔcí ufígi nēe gwá kú aflɛ́yí nēé gē je hɛ́ lé bōōbū, eko nēe le pīya ā.

⁵Amáŋ eko gē wā nɛ̄ Óndú ā abɔ̄yī nū géē je ojīlīmā lɛ ācɛ ɔlɛ́ nū nēe géē hile ā bɛ̄ɛka ɛ́nɛ́nɛ̄ ɔfulā kú ododó ā klá uwā ɛyí.

⁶Ó géē yá ka aɔ́cɛ́ nēe géē hɛ́pɔ̄ ā kéē hɛ́pɔ̄ ɔwɛ okpaakpa. Ó klla í je ɔfú mɛ́mla ɔtūolɛ lɛ ācɛ nēe gē gbō okómpīinu kú igá kú igelī ā. Cɛ́ɛ́ ka ɔ̄cɛ dúúmā kóō bēhé wā ipú igelī ā gaá kpɛfú tú uwá ŋ́.

⁷Ācomɛ́ɛbɛ mɛ́mla ācogwɛ́ɛya kú uwá ā dúú lɛ ejé gwá, ó lɛ uwá kwú nɛ̄hi, anɔ́ɔ é bá ī ga ɔwɛ ga ácí á. Ejé lɛ uwá kwú nɛ̄hi, anɔ́ɔ é jé ɔdā nēé bá ī yá ā gɛ ŋ́ mā. Abɔ̄ ejé lɛ ācomɛ́ɛbɛ ā kwú ā, é klla jɛ́ɛyí ɛbɛ dúúmā nōo ŋmá ɛgīyī Óndú ā gɛ ŋ́. Abɔ̄ ejé kē lɛ ācogwɛ́ɛya kwú nɛ̄hi ā, é klla kɛpɔ̄ hɛ́pɔ̄ kpaakpa lɛ ācɛ nēe gē kpó ɛpɔ̄ wā ɛgiyí uwā ā gɛ ŋ́.

⁸É le gba klá odúúdú utéblu dóódu nēé cīce pīyeyī fu ā. Ó kē lɛ ɛga dóódu nōo le péee ŋ́.

⁹É bá í ka iŋini tá um kahíníī, “Ɔdí nɛ̄ ɔ̄cɛ ɔ́ɔmā gbɛlá ka anúɔ ɔ́ɔ yɔ̄ í nwū āa? Ɔnyɛ cɛgbá olɛhɔ̄ kú nū, nōó yɔ̄ ī cɛ̄ ā? Olɛhɔ̄ kú nū ā lɔhi lɛ ayí obene nēe hɛ́ amɛ̄ bōōbū.

¹⁰Ó yɔ̄ í tíne kóō nwū alɔ ikpɛ̄lā éyééye, ɔgbɔɔgba ɔgbɔɔgba mɛ́mla īkpɛ̄yí ɛlā īkpɛ̄yí ɛlā.”

¹¹Amáŋ, ɔ́dāŋ ka aá jāhɔ̄ ga um ŋ́, Óndú ā géē bī aéwɔhá, nōo gē ka ucē ɔhá le kɛlā lɛ aá klla le nwū aá ɛlā.

¹²Óndú ā tíne ō je omlɛ́nyɔ́ mɛ́mla ɛbɔ́ lɛ aá, amáŋ aá tá ō jāhɔ̄ lɛ ɔ́.

¹³Ɔdā ɔ́ɔmā yá ɛɛ́ nɛ̄ Óndú ā géē nwū aá ɛla īkpɛ̄lā éyééye éyééye, ɔgbɔɔbga ɔgbɔɔbga mɛ́mla īkpɛ̄yí ɛla īkpɛ̄yí ɛla á. Cɛ́ɛ́ ka aá gwōnū. Ká aá géē lɛ ágbe. Cɛ́ɛ́ ka ukpa kóō lɛ aá kwú, klla lɛ aá kpó pīya aálagbá.

¹⁴Aá jāhɔ̄, aá nēe gē gbō ācɛ kú Ujerúsālɛm ā. Aá gē je ɛlā kú Óndú ā ka ɛflɛ́ɛfu eko dóódu. Óndú ā gē ka ka

¹⁵aá gē gwō ka aá mɛ́mla ikwū ɔ́ɔ lɛ ɛka gwá ɛɛ́. Ka aá mɛ́mla ɔlékwū ɔ́ɔ kē lɛ okónu ce lɛ īyī aá ɛɛ́. Aá bá ī gbɛlá ka eko nɛ̄ ámíyā nōo ī yíífi nɛ̄hi ā ɔ́ɔ géē wā ā, ɔ́ɔ gáā lɛ abɔ̄ kwu aá ŋ́. Ohígbū ka aá lɛ ɔtū kpóce ɛ̄kɛ̄mgbɛ̄ mɛ́mla ɛpla ka ɛ́ɛ géē lɛ aá tū ɛbɔ́.

¹⁶Ohígbū ɛ́gɔ́ɔmā Óndú ā nōo wɛ Ɔwɔicō ā kahíníī, “Áá mɔ́ɔ̄. N kwú ikpíinu olɔfú nɛ̄hi í tá ajɛ Usáyɔn ɛɛ́. Ɛcɔ̄ nōo kē gáā kwajɛ kpɔ́cíí kú ikpíinu ā kē wɛ ɛ́nɛ́nɛ̄ ɛcɔ̄ nēé le jámá, nōo kē tōō kpɔ́tūce. Ɔ̄cɛ dúúmā nōo lɔtūce ɔɔ́, uwēyī gáā kwú ɔ̄ɔ̄ ŋ́.

¹⁷Okpaakpa mɛ́mla ɔkwɔ̄ɔ̄kwɛ̄yi géē wɛ ɔŋgbá obī le miya odée kú ikpíinu ā á.” Ɛcɔ̄ ɔwɔ géē je ɛ̄kɛ̄mgbɛ̄ nɛ̄ aá kpɔtūce ɔ́ɔmā kpó gwubónū. Éŋkpɔ̄ ocēenyi nɛ̄hi klla í je ɔdā nɛ̄ aá gbɛlá ká ɔ́ɔ ī gbō aá catāajɛ.

¹⁸Ɛka nɛ̄ aá gwá mɛ́mla ikwū ā géē je bīya. Okónu nɛ̄ aá mɛ́mla ɔlékwū ce ā í je ŋmónyí. Eko nɛ̄ ámíyā nōo ī yíífi nɛ̄hi ā géē wā í yɛ ā, ó géē fīyɛ̄ aá bá ajɛ.

¹⁹Ó géē fīyɛ̄ aá kpɔ̄kpɔ̄kpɔ̄ igbalɛwa, ɔ̄cɔ̄ɔ̄cī dóódu. Unwalu ā géē yɔ̄ ī yá aá kwu otú kwu ɔlɛ́ɛnɔ. Olɛhɔ̄ nōo géē ŋmá ɛgiyí Óndú ā géē wɛ ɔdōōtūufi nɛ̄hi lɛ aá.

²⁰Āhɔ̄ kú aá géē lɛbɛ̄ɛka ákú ɔ̄cɛ kú ipú acīije nēé tá ā. Ó tíne ō gbo ɛyí agōdō nōó jɛ̄ ɔ̄ɔ̄ ŋ́. Ó klla tíne ō bī átu nōo le nyɛ́ lɛ ɔ̄ɔ̄ le klá iyē.

²¹Óndú ā géē nuunu ɛ́gɛ́nɛ̄ ó kpɛ́fú ɛyí ɛfu kú Upérāsim mɛ́mla ipú ɔpɛ́ kú Ugíbiyɔn ā. Ó géē yá ɔdā nōo tíne ō yá ā nōo kē í yá eyījii nɛ̄hi. Ó kē í yúklɔ́ kú nū nɛ̄ ācɛ í kē lɛ eyī cē ŋ́ mā ā.

²²Aá híī je ahɔ̄ nɛ̄ n gē pi aá anú nyā yá ɔdā ɛhɛ ŋ́. Ɔ́dāŋ ka aá kwú ɛlā ú yɛhɛ, unwalu nɛ̄ aá bá anú ā klla í nwuné tū aá iyē fíyɛ́. N pó abɔ̄ Óndú ā je ɔ́da kéē je odúúdú ajɛ ā yíífi ā.

²³Aá jāhɔ̄ ka aá pó ɛlā nɛ̄ n gē ka lɛ aá ā.

²⁴Ɔgɛɛjí dúúmā í tá ipú úbɛ̄ ōtū piyóo nōó nyī īkpɔ̄dɛ̄hɔ̄ tū ɔ̄ɔ̄ ŋ́ nɛɛ ŋ́.

²⁵Ɔ́dāŋ koó lɛ úbɛ̄ ā tū kwɛyí, ó gē nyi īkpɔ̄dɛ̄hɔ̄ tū ɔ̄ɔ̄. Ó lɔfú nyi ɛdɔ ɛyɛ́ɛ́yɛ́yí tū ɔgbɔɔgba. Ó lɔfú nyi ēpū ɛdɔ ɛyɛ́ɛ́yɛ́yí tū ɔ̄ɔ̄. Ó kē lɔfú nyi īkpɔ̄dɛ̄hɔ̄ nēé hī ka uwíti ámāŋ ka ɛdɔ ɛ̄nɛ̄ é hī ka ubáli ā tū ɔ̄ ɔgbɔɔgba ɛga nōo cíkā ā. Ó klla kē lɔfú nyi īkpɔ̄dɛ̄hɔ̄ ɔhá tū áklō kú ɛhɔ̄ ā.

²⁶Ó jé ɛ́gɛ́nɛ̄ ó gē yúklɔ́ kú nū lɛ ā ohígbū ka Ɔwɔicō le nwū ɔ̄ ɛɛ́.

²⁷Eko nōó lɛ ēpū nēé hī ka Udili ce, ó gē bī ogbló nɛ̄ŋcɛ́ le fīyɛ̄ ɔ̄. Ó wɛ ígbɔ́cí ŋ́. Ogbló nɛ̄hi nōó ī le fīyɛ̄ ɛ̄pū nēé hī ka Ukumín ā á. Ó wɛ akā kú ugbɔ́ɔnya ŋ́.

²⁸Ó gē wú ikpɔ̄dɛ̄hɔ̄ nēé ī le yá igbō ā mla igbóngbō piyóo ŋ́. Oyá kóō híī kpó ca ŋ́. Ó jé ɛ́gɛ́nɛ̄ ó ī lɛ aka kú úgbɔ́ɔnya yɛ ɔ́ nōó gáā je ikpó nū ā kpó ca bónū ŋ́ mā.

²⁹Odúúdú íjééyī nɛ̄ ɔglɛ̄ɛjí ɔ́ɔmā lɛ ā ŋmá ɛgiyí Óndú ā, nōo lɔfú fíyɛ́ dúú ā. Ohílīpú kú Óndú ā nwuné nɛ̄hi. Íjééyī kú nū kē í fíyɛ́ abɔ̄.