Read idoma AYISÁYA 29 Bible Online

AYISÁYA 29 - idoma bible

AYISÁYA 29

¹Woó! Ujerúsālɛm, ɛga nɛ̄ ede kú Óndú ā yɔ̄ ā le jī ɛɛ́! Ɛga nɛ̄ Udéfīdi tɛtɛ lā á le jī ɛɛ́. Ká iháyí ɔhá ámāŋ ka iháyí ɔ́mpa kú ucɛ nɛ̄ aá gē lé iháyí iháyí ā kóō wā í le yɛ,

²cɛ́ɛ́ eko ɔ́ɔmā, Óndú ā cɛ̄ lɛ igelī nɛ̄hi nēé hī ka ‘Ede kú Ɔwɔicō’ ā í je gblífi. Ācɛ géē bá yɔ̄ ī tɛ̄gíkwū klla géē yɔ̄ ī jikwū dududu. Cɛ́ɛ́ odúúdú igelī nɛ̄hi ā géē wɛ oyōōyī bɛ̄ɛka ede nēé gē pīya oyī klá ɛyí nū ā.”

³Óndú ā ka anúɔ géē kpɛ́fú gaá gwū Ujerúsālɛm. Ó ka anúɔ géē yɛ ɔ́ jīla tá klla í cīíbɔm tū ɔ̄. Ó ka anúɔ í ce ɔda bá ɔdɔ kú igá kú igelī ā iyē gicō.

⁴Cɛ́ɛ́ ācɛ kú Ujerúsālɛm géē yɔ̄ ī kɛlā nwunu nwunu wɛ̄ɛcɛ ŋmá ipú ajɛ. Aá géē yɔ̄ ī kɛlā ŋmá ipú úmúlá wulɛwulɛ bɛ̄ɛka ɔkɛ̄lā kú inanbɔ ā.

⁵Óndú ā kahíníī, “Amáŋ acígilí é géē kpó aólɛlā kú aá nēe wā í kpɛ́fú tá aá gwu bónū ɛ́gɛ́nɛ̄ owu gē kpó úmúlá bónū ā. É klla í kpó aícɔ́ɔja o lɔnɔɔtū nɛ̄hi kú uwā ɔ́ɔmā gwu bónū ɛ́gɛ́nɛ̄ owu gē gwu igbóngbō kú ocikāpā bónū ā. Ó í yá acígilí mla eko nɛ̄ aá leyīce ɔ́ ŋ́ mā.

⁶Óndú ā nōo lɔfú fíyɛ́ dúú ā géē bī akpáabana mɛ́mla ajɛ ojīliyē nɛ̄hi le hɛ́ aá tá. Ó klla gē tū oflúutu mɛ́mla ɔlá nōo géē yɔ̄ ī yi nɛ̄hi ā gaá hɛ́ aá tá.

⁷Cɛ́ɛ́ Odúúdú aéwɔhá mɛ́mla aícɔ́ɔja kú uwá nēe gē kpɛ́fú tá igelī nɛ̄ ede kú Ɔwɔicō yɔ̄ ā mɛ́mla ɛga olɔfú nɛ̄hi kú nū ā géē bítāajɛ bɛ̄ɛka ɔdā kú ɔ̄na ámāŋ ka obócádēde ō je ɔ̄cɛ otú ā.

⁸Odúúdú aéwɔhá nēe túbá tɔ̄há bá ī kpɛ́fú tá ācɛ kú Ujerúsālɛm ā géē lɛbɛ̄ɛka ɔ̄cɛ nɛ̄ ɛmiyɛ yɔ̄ í ŋmó ɔ́, nōo nɔ̄ɔna, abɔ̄ ó yɔ̄ í lé ɔdōlé, nōo kwú héyī ŋmá iyɔ̄la nɛ̄ ɛmiyɛ yɔ̄ ī ŋmó ɔ̄ kpɔ́ ā. Ámāŋ bɛ̄ɛka ɔ̄cɛ nɛ̄ ijēēnyi yɔ̄ ī ŋmó ɔ̄, nōo nɔ̄ɔnā yɔ̄ í gwá énkpɔ̄, nōó kwú héyī nɛ̄ ijēēnyi ā yɔ̄ í ŋmó ɔ̄ nɛ̄hi kpɔ́ ā.

⁹Aá yá iyī aá ɛbɛ́ ká aá le líla. Aá lɛ īyī aá eyī gbō ká aá le peyī. Aá wīyējé kú aá túgagá bɛ̄ɛka ɔdā nɛ̄ ejé le aá kwú ā, nááná nɛ̄ aá gwá ejé ɔlamu ámāŋ ka ejé olɔfú ŋ́ mā.

¹⁰Óndú ā cɛ̄ lɛ iyɔ̄lā lɛ aá eyī kwú nɛ̄hi ɛɛ́. Ó lɛ ācomɛ́ɛbɛ nēe cíkā ō wɛ eyī ōmɛ́ɛbɛ́ kú aá, eyī kpó gbō ɛɛ́.

¹¹Óndú ā í gáā cɛ̄ lɛ aá jɛ́ɛ́yí kú ɔdā nōo gáā yá ɛ̄cɔ̄bū nɛ̄ ācomɛ́ɛbɛ ka tɛ́ɛcɛ lɛ aá ā ŋ́. Ó géē lɛbɛ̄ɛka ɔkpá nēé lɛ ɔ́ gwū le ɔja hɛ́ klá anú ā. Ɔ́dāŋ ka aá le bī gē lɛ ɔ̄cɛ dúúmā nōo jɔ́ɔ́kpá cɛ́ɛ́ kóō lɛ ɔ́ jé cɛ́ɛ́ kóō lɛyí nū ka lɛ aá, ó í ka ka anúɔ í jé ɔ̄ glá ŋ́ ohígbū kéē le ɔja ja klá anú.

¹²Eko nɛ̄ aá kwú ɔ̄ ú lɛ ɔ̄cɛ nōó jɔ́ɔ́kpá ŋ́ kóō lɛ ɔ́ jé lɛ aá, ó géē da aá ka anúɔ í jɔ́ɔ́kpá ŋ́.

¹³ Anɔ́ɔ Óndú ā kahíníī, “Ācɛ nēe bá nyā gē kokónu áncā ka aá wɛ ācɛ ɔlɛ́ um. É gē bī okónu kú uwā le gbā um ɛ̄gbā. Amáŋ ɔtū kú uwā tá ɛga ɔhá kpánáaa hɛ um tá. Ɛ̄gbā nēé gē gbā um tū īyī uwā ā wɛ íne nɛ̄ alɛɛcɛ tū ā, nēé jé tɛ̄yí, bá ī ka tɛ́ɛcɛ icííci á.

¹⁴ Óndú ā klla ka kpɔ́ kahíníī, “Ohígbū ɔ́ɔmā, n géē yá aɔ́dā nēe ī yá uwā eyījii cɔhɔ́ɔ́há. Ācɛ nēe gbɛlá ka aá jíjééyī ā géē je pīya aólíla. Ɔdā nēé jé ā í je pīya áncā.”

¹⁵Ācɛ nēe gē je ojuju kú uwá tayínū ŋmá ɛgiyí Óndú ā le jī ɛɛ́! É lɛyí bá ajɛ bá ī yá ɔdā nēé miya tayínū ā wɛɛlɛ. É klla bá ī gbɛlá ka ɔ̄cɛ dúúmā ɔ́ má aá ɛ́ɛ́ nōó gē jé ɔdā nɛ̄ aá bá ī yá ā ŋ́.

¹⁶N da aá ka aá gbɛlá kpaakpa ŋ́. Ɛ̄nyá cɛgbá fíyɛ́ āa? Ɔ̄cɛ nōo gē ma ɛtɛ́ ā kɛ̄ɛ ka ɛtɛ́ nōó gē ma āa? Ó tɔ́ɔtɛ́ kú ɔdā nēé bī ɔmɛ ma ā kóō lɔfú da ɔ̄cɛ nōo ma ɔ́ ā kahíníī, “Ó wɛ awɔ bī abɔ̄ kú uwɔ ma um ā ŋ́” glá āā? Kɛ̄ɛ ka ɛtɛ́ géē lɔfú da ɔ̄cɛ nōo má ɔ́ ā ka “Á jé ɔdā nɛ̄ a yɔ̄ ī yá ā ŋ́”

¹⁷É gē kwu ita kahíníī, “Eko kpií ā, ipú ūpū kú Ulɛ́bānɔn géē je pīya ajɛ ɔlamu ohɛ́hɔ̄ anú. Ajɛ ɔlamu ohɛ́hɔ̄ anú ā kē í je pīya ipú ūpū nɛ̄hi.”

¹⁸Eko nɛ̄ eyī ɔ́ɔmā le nyā, aódahɔ̄ géē pó ɔkpá nɛ̄ ācɛ í jé tɛ́ɛcɛ ā péee. Aópeyī nōo húmáyī lā ipú obū ā kē í nwūla eyī kú uwā í mɛ́ɛbɛ péee.

¹⁹Ayisáya klla yɔ̄ ī kɛlā gɔbū kpɔ́ kahíníī, “Ācɛ nɛ̄ abɔ̄ nyɛ́ lɛ uwá ā mɛ́mla aólɛhɔ́ɔ̄cɛ ā géē gwéeyē igbɔhá kpɔ́, ohígbū ɔdā nɛ̄ Ɔwɔicō kú Ísrɛ̄lu nɛ̄ ɔ̄cɛ dúú í tōō le gbla ɔ́ ŋ́ mā yá lɛ uwá ā.

²⁰Eko ɔ́ɔmā ācɛ nēe ī lɔnɔɔtū mɛ́mla ācɛ nēé je Ɔwɔicō ka ɔdā dúúmā ŋ́ mā géē pɛ́ kwú. É géē je odúúdú ācɛ nēe ī tíne ō yá ɔdōbɔ̄bí kpó ŋmó.

²¹Odúúdú ācɛ nēe kpɛ́lā ɛ̄kɛ̄mgbɛ̄ ce ɔ́mpa uwā mɛ́mla ācɛ nēe ī bī ula le ɛpɔ̄ gbájí lɛ ācɛ nēe ī yá ɔdōbɔ̄bí ā géē je kpó yíífi. Ācɛ nēe gē cījáalí ɛ̄kɛ̄mgbɛ̄ cɛ́ɛ́ kú ācɛ ɔkwɛ̄yi kéē híī le ɛpɔ̄hi ŋ́ mā, géē je kpó yíífi ŋmá ajɛ dúú.

²²Abālɔbányā Óndú ā, nōo nya Ébrahām tá ā lɛ ɛlā nōó ī ka lɛyíkwu ācɛ Ísrɛ̄lu. Ó kahíníī, “Uwēyī í klla gáā kwú ācɛ ɔlɛ́ um igbɔhá ɛ́ɛ́ gɛ ŋ́. Ɛ́ɛ́ nēé gē lɛ ɛyí kwajɛ ipú uwēyī ɛ́ɛ́ gɛ ŋ́.

²³Eko nēé lɛ ɛ́gɛ́nɛ̄ n gáā kpó ayí alɛwa nɛ̄hi lɛ uwá lɛ ā jé, é géē cɛ̄ ka ami, Óndú ā ɔ́ɔ wɛ Ɔwɔicō kú Ísrɛ̄lu nɛ̄ ɔ̄cɛ dúú í tōō le gbla um ŋ́ má. É géē lɛ ojīlīma ce um, kllá í yúúfi um.

²⁴Ācɛ nēe jɛ́ɛ́yí odée kpaakpa glá ŋ́ mā, géē gbɔɔ́ ō jɛ́ɛ́yí odée eko ɔ́ɔmā. Ācɛ nēe kē bá ī ka iŋini eko dóódu ā géē gbɔɔ́ ō pó ɛlā nēé ī nwū uwā ā.”