Read idoma AYISÁYA 3 Bible Online

AYISÁYA 3 - idoma bible

AYISÁYA 3

¹Abālɔbányā, Óndú um, Ɔwɔicō nōo lɔfú fíyɛ́ dúú ā, gáā kpó ɔdā dóódu mɛ́mla odúúdú ācɛ nɛ̄ ācɛ ā kpɔtūce ā, ŋmá Ujerúsālɛm mɛ́mla Ujúda ɛɛ́. Ó klla í kpó ɔdōlé mɛ́mla éŋkpɔ̄ kú uwá dúú.

²Óndú ā klla géē kpó aógbēnjūwā mɛ́mla aícɔ́ɔja, mɛ́mla ācohɛ́pɔ̄ mɛ́mla ācomɛ́ɛbɛ mɛ́mla ācogwɛ́ɛya mɛ́mla anyākwɔ́cɛ kú uwá dúú.

³Ó klla í kpó aótrɛ̄yí kú aícɔ́ɔja o leyīkwu aícɔ́ɔja ofɛpa cigwó mɛ́mla aígabɔ̄ kú uwā mɛ́mla ācɛ dóódu nēe gē bī imabɔ̄ le yá ɔdā dóódu, mɛ́mla ācɛ nēe wɛ ɔka kú ɛcí ō tū ācɛ ā.

⁴Óndú ā ka anúɔ klla í kpó ayípɔ̄nɔ̄nyīlɔ nɛ̄ŋcɛ́ pīya otrɛ̄yí kú uwā. Ó ka anúɔ í kpó ayípɛ̄ obene pīya aɔ́cɛ́ nōo í gbō uwā dúú.

⁵Ɔnyɔɔnyɛ kú ācɛ kú Ujúda géē yɔ̄ ī yá ɔmpanū ŋmó klla í pīya anú tū. Ayípōklóbīya í gáā lɛ ojīlīma ce anyākwɔ́cɛ ɛ́ɛ́ gɛ ŋ́. Ayípɛ̄ ɛflɛ́ɛfu ā géē leyīgwū aɔ́kpani uwā bónū.

⁶Eko géē wā, nɛ̄ ācɛ ipɔ́ɔma éyi géē da ɔ̄cɛ éyi nōo lɛ ɔdōtōhí ka ɔ́ɔ̄ kwú pīya otrɛ̄yí kú aá. Cɛ́ɛ́ kú odúúdu unwalu kú ɔlɛ́ ā kóō má ce ɔ́ ɛyí.

⁷Amáŋ ó géē tá uwā ohi kahíníī, ‘N gáā hɛ́ aá tá glá nóó. Ohígbū ka ami abɔ̄yī um, í kē lɛ́ ɔdōlé ámāŋ ka īlī ŋ́ dúú. Aá kóō híī je um yá otrɛ̄yí kú aá ŋ́.’

⁸Ācɛ Ujerúsālɛm le nyíleyī, Ujúda kē yɔ̄ ī je yíífi ɛɛ́. Ohígbū ka ɛlā dúúmā nēé gē ka ā, mɛ́mla ucē nēé ī yá ā gē bɛ́yíkwu Óndú ā. É klla ī yá Ɔwɔicō atufú ipéyī nū.

⁹O má éyi kú uwá gē ŋmó uwā ɛpɔ̄bí cāā. É gē bɔ̄bíipú kú uwā tɛ́ɛcɛ péee bɛ̄ɛka ācɛ Usɔ́dɔm ā. É yá ɔdā dúúmā tayínū ŋ́. É le jī ɛɛ́, uwá kē pla unwalu nyā klá iyī uwā á.

¹⁰Da ācɛ nēe ī yá ɔdā okpaakpa nɛ̄ Ɔwɔicō gē dɔ̄ɔ̄ka ā, koó géē lɔhi lɛ uwá piyóó. É géē lé īkpō kú ɔdōlɔhi nēé ī yá ā piíí.

¹¹Ācobɔ̄bíipú ā, le jī ɛɛ́. É géē yá uwā ɔdā nēé yá ɔ̄cɛ ɔhá ā piíí.

¹²Ayípɛ̄nɛ̄ŋ́cɛ́ gē pīya ācɛ ɔlɛ́ um tū. Ācɛnyā kē wɛ aótrɛ̄yí kú aá nēe ī gbō aá á. Ācɛ ɔlɛ́ um, aótrɛ̄yí kú aá le aá bī bí ɛɛ́. É lɛ aá gbájí, nɛ̄ aá jé ɔwɛ nɛ̄ aá gáā nyɔ̄ ā ɛ́ɛ́ gɛ ŋ́.

¹³Óndú ā le tútū ō kɛpɔ̄ ɛɛ́. Ó kē le tútū ō kɛpɔ̄ tū ācɛ ɔlɛ́ nū ɛɛ́.

¹⁴Ɔwɔicō le tútū ō kɛpɔ̄ tū aótrɛ̄yí mɛ́mla anyākwɔ́cɛ kú ācɛ ɔlɛ́ nū. Ó kpɛ́lācē uwá kahíníī, “Aá je ɛhɔ̄ kú ɔcí ufáyin kú um yíífi á. Aá klla le ɔlɛ́ aá tū mu mɛ́mla aíyó nɛ̄ aá kpó wu ŋmá ɔlɛ́ aógbɛhá ā.

¹⁵Aá cíkā ō yá ācɛ ɔlɛ́ um ŋmó ɛ́ nɛ̄ aá gē pīya aógbɛhá tū ŋ́.” Abɔ̄ Óndú ā nōo wɛ Ɔwɔicō nōo lɔfú fíyɛ́ dúú ā ka lɛ ā á.

¹⁶Ɔwɔicō kahíníī, “Ācɛnyā kú Ujerúsālɛm gē gɔ̄ nɛ̄hi. É gē yāwu lɛ ɔkɔ mɛ́mla ɛnwū kwu icō gɛ̄mm, klla ī yá eyī bɛ̄ɛka ɔnyā nōo ī gbajā ā. É klla bá ī hɛ́ ɔkwu tá ɔwɔɔwɛ, cɛ́ɛ́ ɔká nēé le tū ikpó ā bá ī yúuya jēgējēgē ā.

¹⁷Amáŋ Ɔwɔicō ka anúɔ géē yá uwā italā. Ó ka anúɔ gēe plla ācɛnyā kú Usáyɔn ɛyí, klla gēe je uwá tóohɛ́ɛwa piií.

¹⁸Eko gēe wā nɛ̄ Óndú ā gēe je odúúdú ɔdā ifa kú áncɛ́nyā kú Ujerúsālɛm ā nēé bī gē yá ɔbɔ́ɔ́cɛ ā kpó. Ó géē kpó aɔ́dōtīikpó, aɔ́dōgbɛ̄ɛyí mɛ́mla aɔ́dōtɔ̄ɔkɔ kú uwā.

¹⁹Ó géē kpó aɔ́dōtāabɔ̄ mɛ́mla aɔ́dā ole klá ɛyí kú uwā.

²⁰Ó géē kpó aófulá nēé ī le wu ɛyí ā, mɛ́mla aɔ́kpɔwu nēé ī le wu abɔ̄, klla ī le gbɛ̄ɛnyɔ̄ ā.

²¹Ó géē kpó aéliká kú uwā nēé gē le wū ayíkābɔ̄ ā, mɛ́mla aɛ́nɛ̄ é gē le wu ɛnwū ā.

²²Ó géē kpó odúúdú awulú ohéyīfuú mɛ́mla úwé okwajɛ, mɛ́mla uwé kpií, mɛ́mla ɛkpa o pla acá kú uwá ā.

²³Ó klla í kpó īlī kú uwá flēflē nɛ̄ ɔ̄cɛ gē má iyē kú uwā bū ɔ̄ɔ̄ ā, mɛ́mla adíko o le bī abɔ̄ kú uwá, mɛ́mla īlī o le gbō onyígōgōlō mɛ́mla adíko ōlīkpō kú uwá nēé gē le klá eyī ā.

²⁴Okɔkɔ nēé géē lɛ ɔtūlali tū iyē ā, é géē bá í ná ipī. Okɔkɔ nēé géē lɛ ɔkpá ohéyīfuú kwú ɛ́nyɔ́ ā, é géē lɛ ɔ́ŋgbá gbō uwā ɛ́nyɔ́. Okɔkɔ nēé géē bū inyilɛyí olikpō ā, é géē pla ɛyí kú uwā. Okɔkɔ nēé géē bī īlī olɔhi yíifa ā, áhingílí nēé gáā le wiyē á. Ɔhi kú uwā géē mɛ. Uwēyī kē í kwú uwā.

²⁵Ācɛnyīlɔ kú Ujerúsālɛm ā, kwu aɛ́nɛ̄ e lɔfú fíyɛ́ dúú ā, géē pɛ́ kwú ɔgbɛ́fú.

²⁶Odūngwɔ̄ɔwɛ kú igá kú igelī ā géē je ca tɔ́ɔtɛ́ kōtōō ā. Igelī ā abɔ̄yī nū géē lɛbɛ̄ɛka ɔ̄cɛnyā nēé lɛ ɔ́ ŋmíjē, ma ɔ̄ tá tá ohɛ́ɛwa, nōo yājɛ ajɛ yɔ̄ ī jikwū, klla ī yá ɔtūnōbí ā.