Read idoma AYISÁYA 30 Bible Online

AYISÁYA 30 - idoma bible

AYISÁYA 30

¹Óndú ā ka ācɛ ɔlɛ́ nū nēe ī yíkpɛ̄yí olɔfú ā le jī ɛɛ́. Ó ka uwá ɛ́ɛ gē tū ujɔ̄ klla yá ojuju nɛ̄ ɔ́ɔ ŋmá ɔtū kú anúɔ ŋ́. Ka ée gē lɛ abɔ̄ tá ɔkpá, gē cɛ̄ tɔ̄há mɛ́mla aéwɔhá nɛ̄ ɔ́ɔ wɛ ɔda nɛ̄ anúɔ í tíne ŋ́ mā. Anɔ́ɔ ée bá ī yá ɔdōobɔ̄bí éyi ga ɔhá á.

²Óndú ka ée gē nyɔ̄ ga Íjīpiti gaá tíne otábɔ̄, ée kē da anúɔ ɔ̄kā ŋ́. Ée klla lɛ ɔtū kpóce ɔcɛ́ kú Íjīpiti ka ɔ́ɔ gbō uwá ɛyí.

³Amáŋ Óndú ā ka ɔtū nɛ̄ ɛ́ɛ kpóce ɔcɛ́ kú Íjīpiti ā í gáā gbō uwā glá ŋ́. Otábɔ̄ kú Íjīpiti ā ɔ́ɔ géē je pīya uwēyī lɛ uwá.

⁴Ó ka ācokwɛyí ɔcɛ́ ā bá igelī nēé hī ka Usówan. Ācotɛ̄hɔ̄ kú nū ā kē yɛ jāā gajɛ igelī nēé hī ka Uhéns ipú ajɛ kú Íjīpiti.

⁵Amáŋ uwēyī ɔ́ɔ géē kwú ācɛ kú Ujúda kú ɔtū nēé kpó ce aéwo nɛ̄ ɔ̄cɛ í cíkā ō kpɔ́tūce uwá ŋ́ mā. Ó gáā tá uwā abɔ̄ dúúmā glá ŋ́.

⁶Ɛnyā wɛ olɛhɔ̄ lɛyíkwu aɛ́bɛ́ nēe bá ígbíli nōo yɔ̄ ajɛ ɛhícō kú ajɛ Ísrɛ̄lu ā á. Óndú ā kahíníī, “Ācokwɛyí uwā nēé tɛ̄hɔ̄ ā lɛ iyó agbénú mɛ́mla aɔ́dā otīile kpó ce aíjakī mɛ́mla aínyankūlūmī igbīhi. É le bū ipú ajɛ obɔ̄bí, ɛga nɛ̄ aágábá mɛ́mla ogwiji mɛ́mla aɛ́bɛ́ obɔ̄bí bá ā. É gē kpó aíyó ā gē lɛ ācɛ nēé tū uwā abɔ̄ dúúmā glá ŋ́ mā.

⁷Otábɔ̄ dóódu nɛ̄ Íjīpiti gē yá ā í tīile dúúmā ŋ́. Ohígbū ɔ́ɔmā nɛ̄ n gē hī Íjīpiti ka, ɛbɛ obɔ̄bí nōó yá ɔdā dúúmā glá ŋ́ mā á.”

⁸Ɔwɔicō da um ka, āmíyɔ̄ nyɔ̄ í lɛ ɛ́gɛ́nɛ̄ ācɛ ā lɛ ā tá tū ɔkpá, cɛ́ɛ́ kóō géē wɛ ijáalí tá ajɛ piyóó.

⁹Ó ka uwá bá ī yá īkpɛ́yī olɔfú tá anúɔ piyóo, í klla tōō lɔtūce ŋ́. Ka ée klla tá ō pó ɛlā nɛ̄ Óndú ā gē nwū uwá ā.

¹⁰É gē da ācomɛ́ɛbɛ ā kahíníī, “Áá mā alɔ ɛbɛ gɛ ŋ́, ɛɛ́ nɛ̄ aá gē da alɔ ɔdā nōo le kpaakpa á ɛɛ́ gɛ ŋ́. Ɛdɔ kú ɛlā nōo gē he alɔ ɔtū ō pó ā, nɛ̄ aá géē ka lɛ alɔ á. Ó kōō wɛ ɛ̄kɛ̄mgbɛ̄ nááná.

¹¹Aá nyɛ̄ɛ̄ ŋmá ɔwɛ. Aá hayi ɔwɛ kú alɔ ŋ́. Aá da alɔ ɔdā dúúmā lɛyíkwu Ɔwɔicō kú Ísrɛ̄lu nɛ̄ ɔ̄cɛ dúú í tōō le gbla ɔ́ ŋ mā ɛɛ́ gɛ ŋ́.”

¹²Ohígbū ɔ́ɔmā Ɔwɔicō kú Ísrɛ̄lu nɛ̄ ɔdā dúú í tōō le gbla ɔ́ ŋ́ mā, tá uwá ohi kahíníī, “Aá lɛ eyī gwū ɛlā kú um bónū, anɔ́ɔ aá bá ī lɔnɔɔtū lɛ ācɛ klla ī kɛ̄mgbɛ̄ ī plla ācɛ á.

¹³Aá lɛ ɛpɔ̄bí lé ɛɛ́. Ɔbíipú kú aá ā lɛbɛ̄ɛka ohɛ́kɔ kú ɔdɔ olicō nɛ̄hi nōo le fō playi i tútū ō wúla wāajɛ ā. Ó kē ī wúlatāajɛ acígilí igbeékpónú. Ɛ́gɔ́ɔmā nɛ̄ aá géē je yíífi acígilí igbeékpónú ā.

¹⁴Aá géē je catāajɛ bɛ̄ɛka ɛtɛ́ nōo ī ca klá ajɛ nyɛŋɛnyɛŋɛ, nɛ̄ ákánjɔ̄ kú nū dúúmā í gē hile, nēe gē bī le fú ɔlá ŋ́, ámāŋ nēé gē bī le hɛ́ éŋkpɔ̄ ŋ́ mā.”

¹⁵Óndú ā nōo wɛ Ɔwɔicō kú Ísrɛ̄lu nɛ̄ ɔdā dúú í tōō le gbla ɔ́ ŋ́ mā kahíníī, “N géē nya aá tá ɔ́dāŋ nɛ̄ aá kwúcē wā ɛgiyí um. N géē lɛ ɔfú tū aá iyē ɔ́dāŋ nɛ̄ aá lɛ ɔtū kpóce um bá cíí. Amáŋ aá tá ō yá ɔ́ɔmā.

¹⁶Ikɔkɔ ɔ́ɔmā, aá ka aá ɔ́ɔ géē ce aɔ́nya nēe ī kwinya nɛ̄hi í le kwu ŋmá ɛgiyí aólɛlā kú aá. Aá kwu mɛ́ɛ́nɛ. Aá gbɛlá ka aɔ́nya kú aá gē kwinya nɛ̄hi. Amáŋ aɔ́nya kú ācɛ nēe gē nū aá inya ā géē kwinya fíyɛ́ ákú aá ā.

¹⁷Ícɔ́ɔ́ja ékpónú kú aólɛlā kú aá géē nū ācɛ úlā ɛpa cofigwó (1,000) kú aá inya. Aícɔ́ɔja ɛhɔ̄ kú uwā piyóo jɛ̄ nēe gē nū odúúdú aá inya behé ɔlɛ́ aá. Ɛwa kú aá géē gaá hile lígíí lɛbɛ̄ɛka otúta nōo kwu ɔcí nū kwu ɛyí ɛfu cééé ā.

¹⁸Nááná ā Óndú ā le tútū yɔ̄ ī gbēyī ka aá wā ɛgiyí nū kóō méyīnyinyi aá kpɔ́. Ó lɛ ā ohígbū ka Óndú ā gē yá ɔdā okpaakpa eko dóódu. Éeyē yɔ̄ lɛ ācɛ dúúmā nēe kwu ɔtū kú uwá u kpó ce Óndú ā.”

¹⁹Aá nēe lā Ujerúsālɛm ā, aá klla gáā jikwū ɔhá ɛ́ gɛ ŋ́. Óndú ā gbonɛnɛ. Eko dúú nɛ̄ aá lɛ ikwū je klá anú, kóō tá aá abɔ̄, ó géē tá aá ohi.

²⁰Óndú ā cɛ̄ lɛ aá bá ī móōwē mɛ́mla ɔtūnōbí eko dóódu lɛbɛ̄ɛka ɛ́gɛ́nɛ̄ ɔ̄cɛ géē lé ɔdōlé. Amáŋ anú abɔ̄yī nū géē yɔ̄ mɛ́mlá aá yɔ̄ ī nwū aá ɛlā. Aá géē má ɔ̄ɔ̄. Aá klla gáā bá ī tíne nū ɛɛ́ gɛ ŋ́.

²¹Ɔ́dāŋ ka aá gebí ŋ́má ɔwɛ kú nū ga abɔ̄lɔ́ná ámāŋ ga abɔ̄lúfīyē, aá géē pó ɔkɔ kú nū igbīhi aá, yɔ̄ ī da aá kahíníī, “Ɔwɛ ā yɔ̄ ā, yɛ anú mɛ́ɛnɛ.”

²²Aá géē je aɛ́cí kú aá nɛ̄ aá ma oje nɛ̄hɛ́ plá uwá iyē ā mɛ́mla aɛ́nɛ̄ aá ma oje ɔdɔ (ugóolu) pla uwá iyē ā kpó bónū ŋmá ɛgiyí aá lɛbɛ̄ɛka īmū ā. Aá klla í dɛ̄gba kahíníī, “Nyɛ̄ɛ̄ ŋmá eyī um.”

²³Eko dúúmā nɛ̄ aá lɛ ɔdɛ̄hɔ̄ kú aá nyi, Óndú ā géē yá ka ɔwɔ kóō yā tū ɔ̄ɔ̄. Ɔdɛ̄hɔ̄ kú aá í yá lɔɔlɔhi nɛ̄ aá géē cē ɔdɛ̄hɔ̄ nɛ̄hi. Aɛ́na mɛ́mla aálá kú aá kē í má ácí nɛ̄ɛ̄nɛ̄hi í lé.

²⁴Aɛ́na mɛ́mla aíjakī nɛ̄ aá lɛ ɛnū playi uwá ɔkɔ gē hɛ́hɔ̄ lɛ aá ā géē lé ɛ́nɛ́ɛ́nɛ̄ ikpɔ̄dɛ̄hɔ̄ nēé lɛ ɔ́ tóowu ā.

²⁵Eko nɛ̄ aá géē mīyɛ ɛga olɔfú kú aólɛlā kú aá, kllá í ŋmó aólɛlā kú aá ā, ɔkpá í cēenyi klá ajɛ kú aá ɛyí ɛfu mɛ́mla ɔpɛ́ dóódu.

²⁶Ɔyā géē fíyajɛ ŋmɛ́ɛ̄ɛ̄ɛ̄ bɛ̄ɛka ɛnɔ ā. ɛnɔ klla géē fíyajɛ pée igbo ahāapa fíyɛ́ ɛ́gɛ́nɛ̄ ó tɛtɛ gē fíyajɛ lɛ ā. Ɔdānyā géē yá eko nɛ̄ Óndú ā í yɔ̄ ī tá ágbɛ nōó yá ācɛ ɔlɛ́ nū ā klla í yɔ̄ ī hɛ́ uwā tá ā.

²⁷Mɔ́ɔ̄, Óndú ā yɔ̄ ī wā ŋmá ɛga oligbó. Ó yɔ̄ ī cɔ̄nū nɛ̄hi. Ɔlá mɛ́mla ódūdū nɛ̄hi kē le yɛ ɔ́ jīla tá. Ó yɔ̄ ī kɛlā ícɔ̄nū nɛ̄hi, ɛlā kú nū ā kē ī yi odée tāajɛ bɛ̄ɛka ɔlá ā.

²⁸Owu nōó gē fu ā lɛbɛ̄ɛka éŋkpɔ̄ nōo ī cēenyi nɛ̄hi, nōo gē kpó ɔdā dóódu ī je ācɛ mlɛ gaá kwu ɔkɔ ā. Ó géē fō aéwɔhá ɛyɛ́ɛ́yí í kpó uwā yíífi ŋmá ajɛ. Ó klla ī pi odúúdú uwā nyɔ̄ í pɛ́ bí.

²⁹Amáŋ ɔtū géē he aá nēe wɛ ācɛ kú Ɔwɔicō ā, nɛ̄ aá klla í gwéeyē. Aá géē bá ī gwíjē bɛ̄ɛka ɛ́gɛ́nɛ̄ a gē yá otú kú ɛ̄cī kú ucɛ kú aá ā. Ɔtū géē he aá bɛ̄ɛka ācɛ nēe bá ī yāwu ce ɛ́mla nēé ī tá ā ga ipú Agblīihɔ-nɛ̄hi kú Óndú ā. Óndú ā gē gbō Ísrɛ̄lu á.

³⁰Óndú ā géē cɔ̄nū í cɛ̄ lɛ odúúdú ācɛ pó ɔkɔ kú nū. Ó klla í mafú lɛ uwā ka anúɔ le tūtú ō lɛ abɔ̄ fīyɛ̄ ācɛ ɛɛ́. Abɔ̄ kú nū kē í kpó ígblɛ́nyī ɔlá nɛ̄hi nōo ī yi odée tāajɛ mɛ́mla ofúlutu mɛ́mla ojuja kwunúú mɛ́mla ɔwɔ o gbakpáabana, klla mɛ́mla ɛcɔ̄ɔwɔ nɛ̄hi wā.

³¹Ufi géē kwú ācɛ kú Asírīya nɛ̄hi abɔ̄ é í pó ɔkɔ kú Óndú ā, nɛ̄ uwá klla í mɔ́ɔ̄ yɔ̄ ī yá uwā ōwē nɛ̄hi ā.

³²Óndú ā géē yɔ̄ ī kpɛ́fú tú ācɛ Asírīya ā. Abɔ̄ dóódu nōó í le fīyɛ̄ uwā ā, ó géē wɛ eko nɛ̄ ācɛ ɔlɛ́ Óndú ā géē bá í gwíijē mla uba mɛ́mla ɛ̄ngwū ā.

³³Ŋmá íkííkée ā, é lɛ ɛga éyi tútū nēé géē gwɔ́ɔ́lá nɛ̄hi nɛ̄ ɔcɛ́ kú Asírīya í yɔlá. É lɛ ɔ̄gɔ̄ ā bū lipú nɛ̄hi, ó klla lɔwá nɛ̄hi, cɛ́ɛ́ é lɛ ɛfú pla tū jāā kwɛ̄ɛcɛ licō gónóó ā. Óndú ā abɔ̄yī nū géē mu ígblɛ́nyī ɔlā fuuu klá ɔ̄, í hɛ́ ɔlá kwu ɔ́ á.