Read idoma AYISÁYA 31 Bible Online

AYISÁYA 31 - idoma bible

AYISÁYA 31

¹Ācɛ nēe gē ga Íjīpiti nyɔ̄ í tíne otábɔ̄ ā le jī ɛɛ́. Ācɛ ɔ́ɔmā gē kpɔ́tūce ɔnya mɛ́mla úgbɔ́ɔ́nya obī kpɛ́fú, mɛ́mla aícɔ́ɔja okpɛ́fú ɔnya kú Íjīpiti. Amáŋ é gbɛnú ce Ɔwɔicō kú Ísrɛ̄lu nɛ̄ ɔ̄cɛ dúú í tōō le gbla anú ŋ́ mā, ɛ́ɛ́ nēé gē da Óndú ā ka ɔ́ɔ tá aá abɔ̄ ŋ́.

²Amáŋ Óndú ā jé ɔdā nōó gē yá ā. Ó kē ī bī ámíyā gé lɛ ācɛ. Óndú ā le ka ka anúɔ géē je ōwē lɛ ācobɔ̄bíipú mɛ́mla odúúdú ācɛ nēe gē tá uwá abɔ̄ ā ɛɛ́. Ó kē ī yá ɔdā nōó ka ā.

³Ācɛ kú Íjīpiti í wɛ Ɔwɔicō ŋ́, ācɛ ɔlamu nēé wɛ á. Aɔ́nya obī kpɛ́fú kú uwá kē wɛ ɛbɛ́ ɔlamu, é kē wɛ aálelékwū ŋ́ má. Eko nɛ̄ Óndú géē yá odée kóō ma ɔfú kú nū fú ā, éwo olɔfú nōo ī tá éwo ɔhá abɔ̄ ā géē wúlatāajɛ, éwo nōó lɔfú ŋ́ nēé gē tábɔ̄ ā kē ī je catāajɛ dúú. Uwá ɛplɛ́ɛ́pa géē je yíífi ŋmá ajɛ.

⁴Óndú ā da um ka, ɛ́gɛ́nɛ̄ ágábá í wā gaá kwú álá nōó ī yúúfi ámāŋ lɛ ɛlá wu ɛgba nɛ̄ ígwu kú ācogbāálá ī dɛ̄ mɛ́mla uya kú uwā ŋ́ mā, ɛ́gɔ́ɔmā nɛ̄ anúɔ géē wā í kpɛ́fú ɛyí ɛfu kú Usáyɔn á.

⁵Ka ɛ́gɛ́nɛ̄ ígbáanɔ gē wu jīla ɔlɛ́ nū tá kóō gbō ayí nū nōó hɛ́ tū ɔ̄ ā, ɛ́gɔ́ɔmā nɛ̄ anúɔ nōo wɛ Óndú ā nōo lɔfú fíyɛ́ dúú ā géē gbō Ujerúsālɛm á.

⁶Óndú ā kahíníī, “Ācɛ kú Ísrɛ̄lu, aá lɛ ɔ́bíipú bī lɛ īkpɛ̄yī olɔfú yá tá um ɛɛ́. Amáŋ abālɔbányā, aá kwúcē igbīhi wā ɛgiyí um.

⁷Eko gē wā nɛ̄ odúúdú aá géē je aɛ́cí nɛ̄ aá bī abɔ̄ ɔ́bíipú kú aá yá ŋmá oje nɛ̄hɛ́ mɛ́mla oje ɔdɔ (ugóolu) lɛ īyī aá ā kpó bónū.

⁸É gē je ācɛ Asírīya kpó ŋmó klla í kpó uwā yíifi ɔgbɛ́fú, amáŋ ó wɛ ɔkpacaŋ́gelī kú ɔlɛɛcɛ gáā ŋmó uwā ā ŋ́. Ācɛ kú Asírīya géē kwinya ŋmá ɔgbɛ́fú, é kllá í je ayípōklóbīya kú ɔlɛ́ uwā kpó pīya aɔ́fiyɛ.

⁹Ɔcɛ́nɛ̄hi kú uwá nēé gbɛlá kóō ī gbō aá bɛ̄ɛka ápátɛ́cɔ̄ ā géē kwu ipú ufi. Ufi nɛ̄hi géē kwú aótrɛ̄yí kú aícɔ́ɔja kú uwá ā, nēé géē pɛ́ kwu hɛ̄ otúta kú ɛfú kú uwá, nēé le kwu ajɛ ā tá.” Óndú ā nɛ̄ ɔlá kú nū yɔ̄ ī yi ɛfu kú Usáyɔn, nɛ̄ útuló kú nū kē yɔ̄ Ujerúsālɛm ā, lɛ ɛlā ka ɛɛ́.