Read idoma AYISÁYA 32 Bible Online

AYISÁYA 32 - idoma bible

AYISÁYA 32

¹Eko éyi géē wā nɛ̄ ɔcɛ́ éyi géē lé, nōo géē gbō ajɛ ipú okpaakpa. Aígabɔ̄ kú nū kē í gbō ajɛ í bá ī kɛpɔ̄ okpaakpa.

²Ɔcɛ́ ā mɛ́mla aígabɔ̄ kú nū géē gbō ācɛ ā ɛyí lɛbɛ̄ɛka ɛga otayínū ŋmá ɛgiyí owu mɛ́mla owu nɛ̄hi ā. É géē yá ɛgbá kú ācɛ ā lɛbɛ̄ɛka ɔkpá nōo gē pɛ́ ipú ígbíli ā. É kē í tú ācɛ ā ɔtū lé lɛbɛ̄ɛka obobowú kú ápátɛ́cɔ̄ nɛ̄hi ipú ajɛ nɛ̄ ɔcí dóódu í kwu ŋ́ mā.

³Eyī kú ācɛ nōo lɛ eyī ā géē nwūla anú í mɛ́ɛbɛ. Ācɛ nōo lɛ ahɔ̄ ā kē í jāhɔ̄ ā í pó ɛlā.

⁴Ācɛ nēe gbeyīcíí ŋ́ mā í gbɔɔ́ ō gbɛlá cíí ɛ́ kéē yá ɔdá dúúmā. Ācɛ nēe ī hɔ́gwū ohígbū ké jé ɔdā ō ka ŋ́ mā, géē gbɔɔ́ ō kɛlā fléflé tɛ́ɛcɛ pélúū.

⁵Ɔ̄cɛ dúúmā í klla gáā jé olíla ka ɔ́ɔ wɛ ɔ̄cɛ nɛ̄hi, ɛ́ɛ́ nɛ̄ ɔ̄cɛ ikpala géē wɛ ɔ̄cɛ ojīlīmā ŋ́.

⁶Olíla gē ka ɛlā íla klla ī gbɛlá obɔ̄bí kóō yá ɔdā nōó he Ɔwɔicō ɔtū ŋ́ mā. Ó ī kɛ̄mgbɛ̄ lɛyíkwu Óndú ā. Ó ī je ɔdōlé lɛ ācɛ nɛ̄ ɛmiyɛ gē ŋmó uwā ā ŋ, ɛ́ɛ́ nōó gē je ɔdōgwá lɛ ācɛ nɛ̄ ijēnyi gē ŋmó uwá ā gwá ŋ́.

⁷Ucē kú ɔ̄cɛ ikpala ā bɔ̄bí nɛ̄hi, ó kē í gbojuju obɔ̄bí eko dóódu. Ó gē tū ujɔ̄ kóō lɛ ācogbɛhá bīyatāajɛ mla ɛ̄kɛ̄mgbɛ̄ nōó ī kā ā kéē híī hɛ́ epɔ̄hi lɛ uwá ŋ́, nááná nɛ̄ uwá yɔ̄ okpaakpa ā.

⁸Amáŋ ɔ̄cɛ ojīlīma ā géē yá ucē ojīlīma. Ó kē ī cɛ̄pɔ̄ ɛlā okpaakpa eko dóódu.

⁹Aá, anyā nēe cīce ipú abahi gɔdɔgbɔɔ í lɛ ɛlá wu ɔdā dúúmā ŋ́ mā, ɛ́ɛ́ nɛ̄ ɔdā dúúmā í kwú aá iyē ŋ́ mā, aá jegicō ka aá jāhɔ̄ lɛ ɛlā nɛ̄ n gáā ka ā.

¹⁰Aá lɔfú í lɛ unwalu dúúmā ícɛ nyā ɛɛ́ ŋ́, amáŋ eko kpiií gbɔbū ka iháyí éyi kóō mɛ́, aá géē bá ī fīyēgbúlú ohígbū ka ɔcí ufáyin í gáā gwá, ɛ́ɛ́ nɛ̄ aá gē hɛ́ īkpɔ̄cí lé ɛɛ́ gɛ ŋ́.

¹¹Aá húmáyī lā ipú abahi gɔdɔgbɔɔ í lɛ ɛlá wu ɔdā dúúmā, ɛ́ɛ́ nɛ̄ ɔdā dúúmā í kwú aá iyē ŋ́. Amáŋ ufi kóō gbɔɔ́ ō yá aá, ka aá gbɔɔ́ ō fīyɛ̄gbúlú. Aá lɛ īlī kú aá kpó plla ŋmá iyē cɛ́ɛ́ ka aá lɛ īlī ekwu kpó wiyē.

¹²Aá lɛ abɔ̄ fíyɛ́ amɛ̄ kú aá gbáyígbáyí ka aá jikwū ohígbū ɔdā nōo géē yá ajɛ ɛhɔ̄ olɔhi mɛ́mla ɛhɔ̄ ufáyin kú aá ā.

¹³Ujē mɛ́mla ácí kwú bū tū ajɛ ɛhɔ̄ kú aá nēe wɛ ācɛ ɔlɛ́ um ā ɛɛ́. Aá jikwū ohígbū ka aínu nɛ̄ ācɛ gē gwéeyē ipú nū ipú igelī nɛ̄ ācɛ tɛtɛ wɛ omōōmū nū bá ī gwéeyē ā, kwú tá alácɛ̄ ɛɛ́.

¹⁴É í je agblɔ̄cɛ́ ā tá alácɛ̄. Ācɛ géē je pɛ́ kwu ŋmá igelī kú ɔlɛ́ aá nɛ̄ ācɛ tɛtɛ wɛ omōōmū nū ā. Aɔ́lɛ́ nɛ̄hi nēé gwó inɔ̄ɔda tū uwā nɛ̄ aícɔ́ɔja gē ce ī gbāajɛ ā, géē je pīya alácɛ̄ piyóó. Aíjakī géē bá ī hijā abɔ́ɔ, aálá kē ī bá ī lúlé abɔ́ɔ dúú.

¹⁵Amáŋ, Ɔwɔicō géē tū alelékwū kú nū ɛhɔ̄ fu alɔ igbīhāajɛ. Ígbíli ā géē je pīya ajɛ ɛhɔ̄ olɔhi, ajɛ ɛhɔ̄ ā kē í yá ɔdɛ̄hɔ̄ kpúmm bɛ̄ɛka ipú ūpū ā.

¹⁶Ɛga dóódu ipú ajɛ ā, ācɛ géē bá ī yá ucē okpaakpa klla í bá ī kɛpɔ̄ kpaakpa.

¹⁷Ohígbū ka ācɛ dóódu géē bá ī yá ɔdā okpaakpa ā, ācɛ kē ī lā ɛbɔ́ ipú ajɛ ā nɛ̄ ɔdā dúú í gáā tū uwā ufi ŋ́ piyóó.

¹⁸Óndú ā ka ācɛ ɔlɛ́ anúɔ géē lā ɛbɔ́. É kē ī bá cíí nɛ̄ ɔdā dúúmā í klla gáā kwú uwá iyē ɛɛ́ gɛ ŋ́.

¹⁹Nááná nɛ̄ ɛcɔ̄ɔwɔ géē yā klá ūpū ā, nɛ̄ igelī ā kē ī je catāajɛ gbɔbū ā.

²⁰Aá géē gwéeyē nɛ̄hi ohígbū ka éŋkpɔ̄ géē yɔ̄ lɛ aá nɛ̄hi nɛ̄ aá í nyi īkpɔ̄dɛ̄hɔ̄ kú aá nōó géē yá. Ácí kē í yɔ̄ lɔɔlɔhi nɛ̄ aíjakī mɛ́mla aɛ́na mɛ́mla aálá kú aá í bá ī lúlé abɔ̄yī uwā ī yɛ.