Read idoma AYISÁYA 33 Bible Online

AYISÁYA 33 - idoma bible

AYISÁYA 33

¹A le jī ɛɛ́, awɔ nōo gē kpó ācɛ ɔhá yíífi, nēé je awɔ abɔ̄yī uwɔ yíífi ɛɛ́ ŋ́ mā. A le jī ɛɛ́, awɔ nōo gē yíbīyajɛ tū ācɛ ɔhá nɛ̄ ācɛ ɔhá í yíbīyajɛ tū uwɔ ɛ́ɛ́ ŋ́ mā. Eko kú uwɔ géē wā, eko nɛ̄ a mā ō kpó ācɛ yíífi klla yá ācɛ ibīyajɛ, é géē je uwɔ yíífi klla í yá uwɔ ibīyajɛ.

²Óndú, méyīnyinyi alɔ ohígbū ka awɔ nɛ̄ alɔ kpéyīce á. Lɛ ɔfú tū alɔ iyē ɛ̄cī dóódu, ká a kē nya alɔ tá eko nɛ̄ alɔ yɔ̄ ipú unwalu.

³Eko nɛ̄ a jegicō lɛ ɛgba dɛ̄ gbɔɔ́ ō nuunu lɛ alɔ, aéwɔhá ā géē pɛ́ kwu í kpó fíyákátā.

⁴Cɛ́ɛ́ ɛ́gɛ́nɛ̄ ayí efūma mɛ́mla aéfūma gē tīkwū klá aɔ́dɛ̄hɔ̄ í kpó ēpū uwā lé dúúdú ā, ɛ́gɔ́ɔmā nɛ̄ ācɛ géē tīkwu klá iyó kú uwā í je uwā kpó wu ā.

⁵Óndú, a lɔfú nɛ̄hi fíyɛ́ ɔdā dóódu, a kē lā ɔkpáncō. A kē í bī ɛpɔ̄ okpaakpa mɛ́mla ucē okpaakpa wā Ujerúsālɛm.

⁶Awɔ kē í bī alɔ hayi kpaakpa kli eko dóódu kú alɔ á. Óndú, a gē nya alɔ tá eko dóódu, klla í je ɔdōōjé mɛ́mla íjééyī lɛ alɔ. Agbénú kú alɔ nōo tīile fíyɛ́ dúú ā wɛ ojīlīma ō le ce uwɔ nōo wɛ Óndú ā.

⁷Ācɛ olɔtū nɛ̄hi ā bá í dɛ̄gba ī tíne otábɔ̄. Ācokwɛyí alɔ nēe bá ī tíne ō yá ɛbɔ́ ā bá ī jikwū nɛ̄ɛ̄nɛ̄hi.

⁸Ɔwɛ kú uwá nɛ̄hi ā kwú pīya ɔda ufi nɛ̄hi, nɛ̄ ɔ̄cɛ dúúmā í lɛ ɔtū yɛ anú glá ɛ́ɛ́ gɛ ŋ́. Ācɛ lɛ ɛka nēé gbo ā mɛ́mla okónu nēé ce ā kpó bīya dúúdú ɛɛ́. É kē lɛ ojīlīma ce ɔ̄cɛ dúúmā ɛ́ gɛ ŋ́.

⁹Ajɛ ā tá áncā klla le ŋmó klōklō. ūpū kú Ulɛ́bānɔn ā kwú ŋmɔ́lá ɛɛ́. Ajɛ kú ɔpɛ́ kú Ussárɔn nōo lɔhi nɛ̄hi ā, kwú ŋmókókó bɛ̄ɛka ígbíli ā ɛɛ́. Ēpū kwu wúla wāajɛ ŋmá aɔ́cí ipú ajɛ kú Ubássan mɛ́mla ɛfu kú Ukámɛlu ɛɛ́.

¹⁰Óndú ā da aéwɔhá ā kahíníī, “Abālɔbányā ā, n gáā jegicō ká n̄ yá odée ɛɛ́. N géē mafu lɛ aá ɛ́gɛ́nɛ̄ n lɔfú lɛ ā. Ācɛ kē í cɛ̄tra um.

¹¹Ojuju nɛ̄ aá gē yá ā í tīile ŋ́ lɛbɛ̄ɛka igbóŋgbō ā. Ɔdā dóódu nɛ̄ aá gē yá ā wɛ áncā lɛbɛ̄ɛka ácí nōo le ŋmó ā. Owu kú aá piií géē lɛbɛ̄ɛka ɔlá ā nōo géē je aá yi ŋmá ajɛ.

¹²Aá géē je catāajɛ lɛbɛ̄ɛka ɔdā nēé le tá ɔlá nōo yi jāā ī je gbo umu, klla í je gbo ewo ā.

¹³Odúúdú aá nēe kwu ajaajɛ ā mɛ́mla aá nēe bá ligbó ā, aá gaá má ɔdā nɛ̄ n yá ā, ká aá kē cɛ̄ ka amíyɔ lɛ ɔfú.

¹⁴Ācobɔ̄bíipú nēe bá Usáyɔn ā bá ī fīyégbúlú kpákpákpá ipu ufi. É bá ī dɔɔ̄kā kahíníī, “Ɛpɔ̄ kú Ɔwɔicō lɛbɛ̄ɛka ɔlá nōo gē yi piyóo ā. Ɔ̄nyɛ ipú alɔ í wi ŋmá ipú ɛdɔ ɔlá nyā glá āa?”

¹⁵Aá géē wi ŋmá ipú ɔlá kú ícɔ̄nū kú Ɔwɔicō ā ɔ́daŋ ka aá gē kɛlā klla ī yá ucē okpaakpa. Aá híī bī abɔ̄ kú aá le pīya ācɛ tū mīyɛ uwā ije, ɛ́ɛ́ nɛ̄ aá gē mīyɛ omíci lé ŋ́. Aá híī cɛ̄ tɔ̄há mɛ́mla ācɛ nēe ī tū ujɔ̄ ō nyɔ̄ í ŋmó ɔ̄cɛ ámāŋ o nyɔ̄ í yá ɛdɔ ɔdōbɔ̄bí dúúmā ŋ́.

¹⁶Ɔ̄cɛ dóódu nōo ī yá lɛ ā géē lā ɛga nɛ̄ abɔ̄ dúúmā í gāa kwu ɔ́ ŋ́. Ó géē lā ɛbɔ́ lɛbɛ̄ɛka ɔdā nōó lā ɔlɛ́ olɔfú nēé gwó kwu ɛplá kú ɛyí ɛfu ā. Ó kē í má lé, klla ī má gwá eko dóódu.

¹⁷Īkpēyī kú aá géē má ɔcɛ́ kú aá mla ɛgahi nɛ̄hi yɔ̄ ī gbō ajɛ nōo tá kpátáā nwuné nɛ̄hi.

¹⁸Aá klla géē gbɛlá kwu otɛtɛ nɛ̄ aá ī yúúfi ācɛ nēe ī miyɛ ije ɔlɛ́ nɛ̄ aá gē da lɛ aéwɔhá ā. Amáŋ é kē gáā bá ɛɛ́ gɛ ŋ́ ohígbū ka ɔ́ɔmā le yá gaá i yɛ ɛɛ́.

¹⁹Aá klla gáā má aéwɔhá nōo ī yɔ́bɔ́ɔ̄cɛ klla ī ka ucē nɛ̄ aá pó glá ŋ́ mā ɛ́ɛ́ gɛ ŋ́.

²⁰Aá má Usáyɔn, igelī nɛ̄ alɔ gē yá ucɛ nɛ̄hi kú alɔ ā. Ujerúsālɛm kē í wɛ igelī nɛ̄ ācɛ géē lā anú ɛbɔ́. Ujerúsālɛm lɛbɛ̄ɛka áklɔ́kpɛ nēé bī oje pi kwu ajɛ, nɛ̄ ɔdā dúúmā í fu ɔ́ ŋmá ajɛ glá ŋ́ mā.

²¹Óndú ā géē yɔ̄ pi alɔ abɔ́ɔ mla ɔfú mɛ́mla ojīlīma kú nū. Abɔ́ɔ géē wɛ ɛga nɛ̄ aísu mɛ́mla aɔ́kpá olɔwá nɛ̄hi í yɛ alɔ jīla tá. Amáŋ aúgbéenyi obī kpɛ́fú nɛ̄hi kú aólɛlā ā í kē gáā yɛ uwá bēhé wā ɛgiyí alɔ glá ŋ́.

²²Ohígbū ka Óndú ā wɛ ɔ̄cɛ nōo ī gbō alɔ, anú kē wɛ ɔcóhɛ́pɔ̄ kú alɔ á. Óndú ā wɛ ɔcɛ́ kú alɔ á, ó kē ī nya alɔ tá.

²³Ohígbū ɔ́ɔmā odúúdú ɔ́ŋgbá mɛ́mla agbá nēé ī le gbō īlī nēé ī le pla ɛhícō úgbéenyi kú owu kóō pɛ́ tɔ̄ɔ̄ kóō kwu úgbéenyi gɔbū ā wɛ áncā. Īlī ɔ́ɔmā kú úgbéenyi kú aólɛlā í gáā nwūla glá ŋ́. Alɔ géē mīyɛ̄ odúúdú aíyó agbénú kú aólɛlā kú alɔ abɔ̄fú. Aíyó agbénú ā kē í nwuné nɛ̄hi nēé í kɔ̄, nɛ̄ ācɛ oŋmíkpó nááná géē lɛ ukpɛ̄ ŋmá anú dúú.

²⁴Ɔ̄cɛ dúúmā nōo lā ipú ajɛ kú alɔ ā í gáā ka ka anúɔ ī dōōcē ɛ́ gɛ ŋ́. Ohígbū ka Óndú ā géē kwú odúúdú ɔ́bíipú kú alɔ í yá alɔ ɛhi ɛɛ́.