Read idoma AYISÁYA 34 Bible Online

AYISÁYA 34 - idoma bible

AYISÁYA 34

¹Odúúdú aéwo kú ɛcɛ, aá jāhɔ̄! Odúúdú ɛcɛ mɛ́mla ācɛ kú ɛcɛ, mɛ́mla aɔ́dā nēe bá ipú ɛcɛ ā, aá wā í jīla amānyā ka aá jāhɔ̄.

²Óndú ā le cɔ̄nū ɛ́dɔ obɔ̄bí ā mla odúúdú ācɛ aéwo kú ɛcɛ klla mɛ́mla odúúdú aícɔ́ɔja kú uwā ɛɛ́. Ó lɛ uwá ŋmɛ́pɔ̄bí kéē je uwá kpó yíífi ɛɛ́.

³É gáā kpó okwū uwā nyí ŋ́, amáŋ é géē kpó wā bá ɛcɛ bá ī nípī fiyúu. Oyī kú uwā í pɛ́ klá aɛ́fu ā yōō ɛbɛɛbɛ.

⁴Ɛnɔ, ɔyā mɛ́mla aínyílɔ́ɔ́wɔ géē je kpó wā í mɛ tāajɛ. Ɔkpáncō géē je hā ŋ́má icō bɛ̄ɛka ɛ́gɛ́nɛ̄ é ī hā ipoto ā. Aínyílɔ́ɔwɔ ī bá í fō wā ajɛ bɛ̄ɛka ēpū oŋmó nēe gē wúla ŋmá icō ɔcí wā ajɛ ā.

⁵Óndú ā ka eko nɛ̄ ɔkpacaŋ́gelī kú anúɔ ɔ́ɔ lɛ ɔdā nɛ̄ ɔ́ɔ tíne ō yá ā yá ɔkpáncō kwɛ́yí, anúɔ géē pīya ɔkpacaŋ́gelī ā kwu Ɛ́dɔm mɛ́ɛnɛ. Ó ka ācɛ Ɛ́dɔm ɛ́ɛ wɛ ācɛ nɛ̄ anúɔ lɛ uwá ŋmɛ́pɔ̄bí ō jē kpó yíífi piií ɛɛ́.

⁶Oyī mɛ́mla ijē kú uwá í klá ɔkpacaŋ́gelī kú Óndú ā cɔkpɔɔɔ, lɛbɛ̄ɛka oyī kú aálá mɛ́mla aɛ́wū ā, klla mɛ́mla ijē nōo ī klá íkplí kú aómlede nēé ī je kpó gwɛ́ɛya ā. Óndú ā géē ŋmó ācɛ ipú igelī nēé hí ka Ubósra ā lɛbɛ̄ɛka ɔdā nōó yɔ̄ ī gwɛ́ɛya ā. Ó kē í ŋ́mó ācɛ nɛ̄hi nyā ipú odúúdú ajɛ kú Ɛ́dɔm.

⁷Aólɔfú kú uwā nōo lɔfú bɛ̄ɛka ɛyī ā, kwu ayípōklóbīya mɛ́mla anyākwɔ́ɔ̄cɛ, géē pɛ́ kwú mɛ́mla ācɛ ohile ā dúú. Oyī géē kwú ajɛ kú ɔlɛ́ uwā yōōō, ijē kē ī kwú ajɛ ā cɔkpɔɔɔ.

⁸Ɛko ɔ́ɔmā wɛ eko nɛ̄ Óndú ā géē cɛ̄pɔ̄ ācɛ kú Usáyɔn, klla í gwō aólɛlā kú ācɛ Usáyɔn ɔ́ci ā.

⁹Aɔ́kpá kú Ɛ́dɔm géē je pīya unɛ nōbí nēé ī le yá ɔwɛ uklotā ā. Ajɛ kú Ɛ́dɔm géē je pīya úmlá kú ōwō. Cɛ́ɛ́ odúúdú ajɛ ɔlɛ́ uwā gē je gbɔlá ohígbū unɛ ā.

¹⁰Ó kē í yɔ̄ ī yi ɔlá kwu otú kwu ɛnɔ. Ódūdū kú ajɛ Ɛ́dɔm gē yɔ̄ ī tá piyóó. Ajɛ ā géē tá alácɛ̄ iháyí alɛwa, nɛ̄ ɔ̄cɛ dúúmā í gāa lɛ ɔtū bū ipú nū ɛ́ gɛ ŋ́.

¹¹Aúcē mɛ́mla aógwugwu mɛ́mla aɔ́tágláma, klla mɛ́mla aɛ́bɛ ipácí ɔhá géē lā anú mɛ́ɛ ā. Óndú ā géē je ɔɔ́ fíyákátā, klla í je ɔɔ́ tá alácɛ̄.

¹²Ɔcɛ́ dúúmā í gāa yɔ̄ nōo gē gbo ajɛ kú Ɛ́dɔm ā ɛɛ́ gɛ ŋ́. Odúúdú aígabɔ̄ kú nū kē géē pɛ́ kwú.

¹³Ujē mɛ́mla ácí gē je bū tū odúúdú aágblɔ̄cɛ́ mɛ́mla aɔ́lɛ́ olɔfú kú uwá ā. Aéwō ipácí mɛ́mla aógwugwu gáā lā ipú aágblɔ̄cɛ́ kú Ɛ́dɔm á.

¹⁴Aɛ́bɛ́ ipácí géē bá ī lúlé tɔ̄há abɔ́ɔ. Aébilíi géē bá ī hī īyī uwā igwú abɔ́ɔ. Ekinibí géē yɔ̄ ī tíne ɛga ō gáā mlɛ́nyɔ́ abɔ́ɔ.

¹⁵Aógwugwu géē gwó ɔlɛ́ uwā, í tá ayi, í hɛ́ ayí, klla í bī ayí uwa jɛ̄ abɔ́ɔ. Aɔ́ɔgɔ géē bā ī jīla abɔ́ɔ. Ɔnyɔɔnyɛ kē lɛ ɔbá nū ámāŋ ka ɔnyā nū.

¹⁶Tíne ɔkpá kú Óndú ā, ká ā jé ɔ̄ ká ā má ɔ̄. Odúúdú uwā í bá abɔ́ɔ piií. Ɔnyɔɔnyɛ kú uwā kē í lɛ ɔbá ámāŋ ka ɔnyā uwā piií. Óndú ā lɛ ɔ́da je ka ɔ́ɔ lɛ á ɛɛ́, Óndú ā abɔ̄yī nū je ɔ́da á, alelékwū kú nū kē kpó uwá wā í bá tɔ̄há abɔ́ɔ á.

¹⁷Óndú ā lɛ ajɛ kú Ɛ́dɔm ā kɔ̄, lɛ ukpɛ̄ kú ajɛ ā je lɛ ɔnyɔɔnyɛ kú uwá ɛɛ́. É í lā ipú ajɛ ā gbógbóó, ó kē í je pīya ákú uwá piyóó.