Read idoma AYISÁYA 35 Bible Online

AYISÁYA 35 - idoma bible

AYISÁYA 35

¹Eko ɔ́ɔmā ígbíli mɛ́mla ajɛ íkpākplā ā géē bū éŋkpɔ̄, í bū ɔcí mɛ́mla ácí ɛ̄mɛ̄mɛ̄. Ígbíli ā kē í bū ododó ɛbɛɛbɛ kpúmm.

²Ígbíli ā géē yá ɔdɛ̄hɔ̄ nɛ̄hi, klla í bū ácí mɛ́mla ɔcí. Ajɛ ikpākplā kú ígbíli ā í je bū aɔ́cí lɛwa lɛwa lɛbɛ̄ɛka ūpū ohéyīfuú kú ɛyí aɛ́fu kú Ulɛ́bānɔn ā. Ó klla í je bū ácí ɛ̄mɛ̄mɛ̄ lɔɔlɔhi bɛ̄ɛ̄ka ɛfu kú Ukámɛ̄lu mɛ́mla ajɛ olɔhi kú ɔpɛ́ kú Ussárɔn ā. Odúúdú ācɛ géē má ɛgahi kú Óndū ā, mɛ́mla ɔfú mɛ́mla ojīlīmā kú Ɔwɔicō nɛ̄ alɔ ī gbā ɛ̄gbā ā.

³Lɛ ɔfú tū ācɛ nɛ̄ abɔ̄ kú uwá í lɔfú ŋ́ mā iyē, ká a klla lɛ ācɛ nēe ikpó kú uwā ā bā ī fīyégbúlú lɛ uwá ā ikpó tú kwajɛ lɔɔlɔhi.

⁴Da odúúdú ācɛ nɛ̄ ɔtū kú uwá gbenyi ā ka ɛ́ɛ lɛ ɔtū lɛ, ka ɛ́ɛ klla lɔfú tū īyī uwā iyē. Ka ɛ́ɛ híī yúúfi gɛ ŋ́ ohígbū ka Ɔwɔicō gē wā í hɛ́ uwā tá ɛɛ́. Ó klla í wā í gwū aólɛlā kú uwā ɔ́ci.

⁵Aópeyī géē mɛ́ɛbɛ, aódahɔ̄ kē í páhɔ̄.

⁶Aócīkpó géē tóombli gicō gajɛ bɛ̄ɛka īkpɛ̄ɛnū ā. Aódokónu klla í tɔ́ɔga ohígbū éeyē. Éŋkpɔ̄ géē cēenyi klá ɛbɛɛbɛ ipú ígbíli, aɔ́kpá klla í pɛ́ bū ipú ajɛ ikpakpla ā.

⁷Ajɛ úmúlá nōo ī kwɔ́lá bɔɔɔ ā géē je pīya ókpoó. Ajɛ nōo le ŋmóklīklī ā géē je bū njɔlɔ ɛbɛɛbɛ. Ɛga nɛ̄ aéwō ipácí tɛtɛ lā ā géē je pīya ajɛ ɔ́tɔ́ɔ́tɔ nɛ̄ ácí mɛ́mla igwɛ̄bɛ́ mɛ́mla ekpo géē bū anú.

⁸Ɔwɛ nɛ̄hi géē tá abɔ́ɔ, nēé géē hī ɔ̄ɔ̄ ka, “Ɔwɛ īkpāndrā kú Ɔwɔicō abɔ̄yī nū.” Ɔ̄cɛ dúúmā nōo ī yá ɔdōbɔ̄bí ā í gáā yɛ ɔwɛ ɔ́ɔmā glá ŋ́. Ɔwɛ ā géē wɛ ákú ācɛ nēe ī yɛ ɔwɛ kú Ɔwɔicō ā. Olíla dúúmā í gáā nyīleyī gaá yɛ ɔwɛ ɔ́ɔmā glá ŋ́.

⁹Ágábá dúúmā í gāa yɔ̄ ɔwɛ ɔ́ɔmā ŋ́, ɛ́ɛ́ nɛ̄ ɛbɛ obɔ̄bí dúúmā géē yɛ ɔwɛ ɔ́ɔmā ŋ́. Ācɛ nɛ̄ Óndú ā le nyatá ɛɛ́ mā ōfōōfūnū géē yɛ ɔwɛ ɔ́ɔmā ga ɔlɛ́ á.

¹⁰É géē wā ajɛ Usáyɔn bá ī gwéeyē. Ɔtū géē yɔ̄ ī he uwá piyóó. É í bá ī gwíijē klla bá ī tɔ́ɔga ohígbū éeyē, ohígbū ka ɔtūnōbí mɛ́mla unwalu í klla gáā yá uwá gbóógbóō ɛ́ɛ́ gɛ ŋ́.