Read idoma AYISÁYA 36 Bible Online

AYISÁYA 36 - idoma bible

AYISÁYA 36

¹Ɔdānyā yá ipú iháyí ɔ́migwɛ́ɛnɛ nɛ̄ Uhɛsɛkíya wɛ ɔcɛ́ kú Ujúda ā. Eko ɔ́ɔmā ɔcɛ́nɛ̄hi kú Asírīya nōo lé ka Usenakérīibu ā lɛ aícɔ́ɔja kú nū kpó gā Ujúda. É gaá le ɛfú kpó tú ācɛ nēe lā aígelī nēé lɛ igá hɛ́ tū uwā ā. É klla lɛ uwá kpó kwú.

²Anɔ́ɔ ó lɛ aótrɛ̄yí kú aícɔ́ɔja kú nū ōhī fu kéē lɛ ɛwá kú aícɔ́ɔja ā kpó ŋmá ɛga nēé kwu aáklɔ̄kpɛ kú ɛfú Ulákiss ā, ga Ujerúsālɛm gaá da Uhɛsɛkíya ka ɔ̄ɔ̄ cɔ̄nyā lɛ aá. Aícɔ́ɔja ā gaá mīyɛ ɔwɛ ɛga nɛ̄ ācɛ nēe ī na īlī ā gē bá ɛgiyí ɔ́glɔ́ nēé na nōo ī bī éŋkpɔ̄ wā okpóo kú ɛhíícō ā.

³Ācɛ kú Ujúda ɛtá, nēe pɛ́ wɛ̄ɛcɛ gaá jīla mla uwá ɔwɛ ā wɛ: Ɛlíyākim, ɔyí kú Uhilkíya. Anú gē leyīkwu agblɔ̄cɛ́ á. Ussɛ́bina, nōo wɛ ɔmálɛ otɔ́kpa kú agblɔ̄cɛ́ ā. Mɛ́mla Ujówa, ɔyí kú Ásāfu. Anú gē leyīkwu ɔdōōtátāajɛ dóódu kú ɔlɛ́ ɔcɛ́ á.

⁴Otrɛ̄yí kú aícɔ́ɔja kú Asírīya ā da uwá ka ɔcɛ́nɛ̄hi kú Asírīya ā ɔ́ɔ tíne ō jé ɔdā nɛ̄ Uhɛsɛkíya lɔtūce ɔ́ lɛ ā, ɛ́ nōó cɔ̄nyā ŋ́ mā.

⁵Ó klla da uwá kéē da Uhɛsɛkíya ka ɔ́ɔ gbɛlá ka ɛlā kú okónu áncā gē kwɛyí ula mɛ́mla ɔfú nɛ̄ ɔ̄cɛ ɔ́ɔ gē bī le kpɛ́fú ā glá nɛɛɛ? Ka ɔnyɛ nɛ̄ ɔ́ɔ gbɛlá ka ɔ́ɔ géē tá anúɔ abɔ̄ glá ɛɛ́, nōo gē yá īkpɛ̄yí olɔfú tá ɔcɛ́nɛ̄hi kú Asírīya āa?

⁶Ó ka Uhɛsɛkíya ɔ́ɔ gē kpɔ́tūce Íjīpiti. Amáŋ ɔ́ɔmā ɔ́ɔ lɛbɛ̄ɛka ɔ̄cɛ nɛ̄ ɔ́ɔ lɛ ɔcí ekpo kwajɛ gē hī ɔ̄ɔ̄ ka ɔkpá ole kwajɛ ā. Ɔ́ɔ kē í je cē, kllá í bū tū ɔ̄ɔ̄ ɔtābɔ̄. Ka ɛ́gɔ́ɔmā nɛ̄ ɔcɛ́ kú Íjīpiti ɔ́ɔ lɛ lɛ odúúdú ācɛ nēe kpɔ́tūcɛ ɔ́ ā á.

⁷Ó klla ka ācɛ Ujerúsālɛm ɛ́ɛ lɔfú da anúɔ ka aá ɔ́ɔ gē kpɔ́tūce Óndú ā nōo wɛ Ɔwɔicō kú aá ā. Amāŋ ka óo wɛ aíkpɛ́cí kú Óndú ā nɛ̄ Uhɛsɛkíya ɔ́ɔ je kpó ca bónū ŋmá ipú ajɛ ā, klla da ācɛ kú Ujúda mɛ́mla Ujerúsālɛm ka ɛ́ɛ gaá gbā Óndú ā ɛ̄gbā ɛyí ede ékpónú ōfōōfūnū ā ŋ́ nɛɛ?

⁸Ó ka anúɔ géē bī iyē kú ɔcɛ́nɛ̄hi kú Asírīya ā ká anúɔ le cogwo mɛ́mla uwá. Ka anúɔ géē kpó aɔ́nya obī kpɛ́fú úlā ɛhɔ̄ (2,000) lɛ uwá, ɔ́dāŋ ka ɛ́ɛ géē má ācɛ lɛwa ɔlɛ́ uwā nēe í ce aɔ́nya ā glá.

⁹Ó ka ɔ́dāŋ nɛ̄ ɔ́ɔ lɛ ā, ka ɔdí yá nɛ̄ ɛ́ɛ gbɛlá ka aá ɔ́ɔ géē kweyī mɛ́mla otrɛ̄yi kú ɛwa kú aícɔ́ɔja kú Asírīya nēe nyɛ fíyɛ́ dúú ā, nɛ̄ uwá ɔ́ɔ bá ī kpɔ́tūce ācɛ Íjīpiti ka ɛ́ɛ kpó aúgbɔ́ɔnya mɛ́mla aɔ́nya wā í tá uwā abɔ̄ ā.

¹⁰Ó ka ɔcɛ́nɛ̄hi kú Asírīya ā ɔ́ɔ ka ɛ́ɛ híī gbɛlá ka anúɔ ɔ́ɔ wā í kpɛ́fú tú ajɛ ɔlɛ́ uwā icííci ŋ́. Amáŋ ka Óndú ā abɔ̄yī nū ɔ́ɔ tū anúɔ ɛhɔ̄ ka anúɔ gaá kpɛ́fú tú uwā, ka anúɔ kwú ajɛ ɔlɛ́ uwā í yíífi á.

¹¹Anɔ́ɔ Ɛlíyākim, Ussɛ́bina mɛ́mla Ujówa da igabɔ̄ kú Usenakérīibu ā ka ɔ́ɔ ka ucē kú Aramáyīki ā lɛ aá, ka aá pó ucē ɔ́ɔmā. É da ɔ́ ka ɔ́ɔ híī ka ucē Uhíbru lɛ aá gɛ ŋ́, ohígbū nɛ̄ ācɛ nēe hayi ɛyí ɔdɔ kú igelī ā géē pó ɛlā nɛ̄ ɔ́ɔ yɔ̄ ī ka lɛ aá ā.

¹²Amáŋ otrɛ̄yí kú aícɔ́ɔja kú Asírīya ā da uwá ka ɛ́ɛ gbɛlá ka ɔcɛ́ kú uwā mɛ́mla uwá nɛ̄ ɔ́ɔ wɛ aígabɔ̄ ā ōfōofū uwā, nɛ̄ ɔkpani anúɔ tū anúɔ ɛhɔ̄ nyā fu uwá ā nɛɛ? Ó kóō lɛ ā ŋ́, amáŋ ka anúɔ yɔ̄ ī kɛlā lɛ ācɛ nēe cīce ɛyí ɔdɔ ā dúú nɛ. Ohígbū ka ācɛ ā ɛ́ɛ géē kpó emī kú īyī uwā le, klla í gwá encílé kú īyī uwā ɛ́gɛ́nɛ̄ uwá nɛ̄ ɛ́ɛ wɛ aígabɔ̄ ā géē yá dúú ā.

¹³Anɔ́ɔ otrɛ̄yí kú aícɔ́ɔja kú Asírīya ā tú hayi je ɔkɔ gicō lɛ ɛgba dɛ̄ hī ācɛ nēe bá ɛyí ɔdɔ ā á. Ó da uwá ka ɛ́ɛ jāhɔ̄ ka ɛ́ɛ pó ɛlā nɛ̄ ɔcɛ́ kú Asírīya ɔ́ɔ gē da uwá ā.

¹⁴Ó da uwā ka ɔcɛ́nɛ̄hi ā ɔ́ɔ gē pī uwá ahɔ̄ ka ɛ́ɛ cɛ̄ lɛ Uhɛsɛkíya, ɔcɛ́ kú uwá ā, pla uwá ŋ́. Ka Uhɛsɛkíya ɔ́ɔ gáā nya uwá tá glá ŋ́.

¹⁵Ó da uwá ka ɛ́ɛ cɛ lɛ ɔ́ yá uwá ka ɛ́ɛ kpɔ́tūce Óndú ā ka Óndú ā ɔ́ɔ géē nya aá tá ŋ́. Ámāŋ ka Óndú ā ɔ́ɔ géē ci aícɔ́ɔja kú Asírīya o wā ī yá igelī nyā lé ŋ́.

¹⁶Ó ka ɛ́ɛ pó ɛlā kú Uhɛsɛkíya ŋ́. Ka ɔcɛ́nɛ̄hi kú Asírīya ɔ́ɔ kéē cɔ̄nyā lɛ anúɔ ka odúúdú uwā ɛ́ɛ le pɛ́ wɛ̄ɛcɛ ŋmá ipú igelī wā ɛgiyí anúɔ. Ka ɔ́dāŋ ka ɛ́ɛ cɔ̄nyā lɛ ɔ́, ɔ́ɔ géē je ɛga lɛ uwá ka ɛ́ɛ lé ikpo ufáyin mɛ́mla ikpó ólīifu ŋmá ɔcí ufáyin mɛ́mla ɔcí ólīifu kú īyī uwá. Ɔ́ɔ klla í cɛ̄ ka ɛ́ɛ gwá éŋkpɔ̄ ŋmá obugā kú īyī uwā.

¹⁷Ka ɔ́ɔmā ɔ́ɔ géē lɛ ā jāā gbéeko nɛ̄ ɔcɛ́nɛ̄hi kú Asírīya ā ɔ́ɔ gaá lɛ uwá kpó nyɔ̄ í lā ajɛ ɔhá, nɛ̄ ɔ́ɔ lɛbɛ̄ɛka ákú uwā ā. Ka ipú ajɛ ɔ́ɔmā, ɛ́ɛ géē má īkpɔ̄cí ufáyin le yá ejé, klla í má īkpɔ̄dɛ̄hɔ̄ í le yá igbō.

¹⁸Ó klla da uwá ka ɛ́ɛ híī cɛ̄ lɛ Uhɛsɛkíya pla uwá ka Óndú ā ɔ́ɔ géē hɛ́ uwá tá ŋ́. Ka aɛ́cí kú aéwɔhá dóódu nyá ɔ́ɔ nya ajɛ ɔlɛ́ nū tá ŋmá abɔ̄ kú ɔcɛ́nɛ̄hi kú Asírīya ka ɛ́ɛ pó jéjée ɛɛ́?

¹⁹Ó klla da uwá ɔ̄kā ka iní nɛ̄ aɛ́cí kú Uhamáti, Ápāadi, mɛ́mla Uséfābeyim ɛ́ɛ bá āa? Ka aɛ́cí kú Usamérīya ɛ́ɛ lɛ Usamérīya nyatá ŋmá abɔ̄ kú ɔcɛ́nɛ̄hi kú Asírīya ā āa?

²⁰Ka eko nyā nɛ̄ odúumā kú aɛ́cí kú aéwo ɔ́ɔmā ɛ́ɛ nya ajɛ ɔlɛ́ uwá tá ŋmá abɔ̄ kú ɔcɛ́nɛ̄hi kú Asírīya ā ā? Ka ɔ́ɔ ī lɛ ā, ɔdí yá ɛɛ́ nɛ̄ uwá ɔ́ɔ gē gbɛlá ká Óndú ā ɔ́ɔ géē nya aá tá glá ā?

²¹Amáŋ ó le ka kwɛyí ā, odúúdú ācɛ ā lɛ okónu kú uwá klá hímm, ɛ́gɛ́nɛ̄ Uhɛsɛkíya, ɔcɛ́ kú uwá ā da uwá ka ɛɛ́ yá ā. Ācɛ ā í kē tá ohi dúúmā ŋ́.

²²Anɔ́ɔ Ɛlíyākim, Ussɛ́bina mɛ́mla Ujówa lɛ īlī kú uwá kpó híla ipú íwɔ́tū gaá lɛ odúúdú ɛlā nɛ̄ otrɛ̄yí kú aícɔ́ɔja kú Asírīya wā gaá ka ā kpó ka lɛ Uhɛsɛkíya, ɔcɛ́ ā á.