Read idoma AYISÁYA 37 Bible Online

AYISÁYA 37 - idoma bible

AYISÁYA 37

¹Obōōbū nēé lɛ ɛhɔ̄ nyā cɛ̄ lɛ Uhɛsɛkíya nōo wɛ ɔcɛ́ ā kwɛyí ā, ó lɛ īlī kú nū kpó híla ŋmá iyē kóō mafú ka ɛ́gɛ́nɛ̄ ɛlā ā kwú ɔ̄ iyē lɛ ā. Anɔ́ɔ ó kwú īlī ekwu ú kpó wiyē, anɔ́ɔ ó le tá ipú Agblīihɔ-nɛ̄hi kú Óndú ā á.

²Ó gaá le Ɛlíyākim nōo ī leyīkwu agblɔ̄cɛ́ ā mɛ́mla Ussɛ́bina nōo wɛ ɔmálɛ otɔ́kpá kú agblɔ̄cɛ́ ā mɛ́mla anyākwɔ́ɔ̄cɛ kú ācogwɛ́ɛya ā, kpó tɛ̄hɔ̄ ga ɛgiyí Ayisáya, ɔ̄comɛ́ɛbɛ nōo wɛ ɔyí kú Ámɔ̄si ā. Odúúdú uwá lɛ īlī ekwu kpó wiyē dúú.

³Uhɛsɛkíya da uwá kéē nyɔ̄ í da Ayisáya ka, ícííci ɔ́ɔmā ɔ́ɔ wɛ ɛ̄cī nɛ̄ ákanya yɔ̄ ī yá aá, ɔ́ɔ klla wɛ ɛ̄cī nēé bá ī yá aá italā. É ka uwēyī ɔ́ɔ lɛ aá kpó kwú. É ka éwo kú ɔlɛ́ aá ɔ́ɔ lɛbɛ̄ɛka ɔnyā oyīpú nɛ̄ ɔma lɛ ɔ́ kwú, nōó kē lɔfú gbōkwicii nōó gē mɔyí ā glá ŋ́ mā.

⁴Ó ka ɛ́ɛ da Ayisáya ka ɔcɛ́ kú Asírīya ɔ́ɔ lɛ otrɛ̄yí kú aícɔ́ɔja kú nū tɛ̄hɔ̄ gaá lɛ ɛcá cá Ɔwɔicō nōo yēeyī ā ɛɛ́. Ka ɔ́ɔ gbɔ̄ɔkɔ lɛ Óndú ā, nōo wɛ Ɔwɔicō nɛ̄ ɔ́ɔ ī gbā ā, cɛ́ɛ́ ka ɔ́ɔ̄ lɛ ɛcá ā pó, cɛ́ɛ́ ka ɔ́ɔ lɛ italā yá ācɛ kú Asírīya ohígbū ɛcá nēé cá ɔ̄ ā. Ká ɔ̄ klla gbɔ̄ɔkɔ lɛ Ɔwɔicō ohígbū ācɛ ɔlɛ́ aá nɛ̄ ɔ́ɔ hile ā.

⁵Eko nēé gaá lɛ ɛhɔ̄ kú Uhɛsɛkíya cɛ̄ lɛ Ayisáya ā,

⁶Ayisáya lɛ ɛhɔ̄ tū uwā kwúcē fu ɔɔ́. Ó ká ɛ́ɛ da ɔkpani uwā ka Óndú ā ɔ́ɔ gē da ɔ́ kahíníī, “Ā cɛ̄ lɛ ɛcá nɛ̄ ɔcɛ́ kú Asírīya ā tū ācocɛ̄hɔ̄ kú nū wā í cá um ā je unwalu gā uwɔ ŋ́.

⁷N géē yá ka ɔcɛ́ kú Asírīya kóō pó ɔ̄kā éyi, nōo géē cɛ̄ lɛ ɔ́ cīgbīhi ga ajɛ ɔlɛ́ nū. Cɛ́ɛ́ n cɛ̄ lɛ uwā bī ɔkpacaŋ́gelī lɛ ɔ́ ŋmó abɔ́ɔ.”

⁸Otrɛ̄yí kú aícɔ́ɔja kú Asírīya ā le pó ka ɔcɛ́ kú Asírīya ɔ́ɔ nyɛ̄ɛ̄ ŋmá Ulákiss nyɔ̄ í yɔ̄ ī kpɛ́fú tú igelī nɛ̄hi nēé hī ka Ulíbīna, nōo kwu ɔ́ ajaajɛ ā ɛɛ́. Anɔ́ɔ otrɛ̄yí kú aícɔ́ɔja ā le tá abɔ́ɔ nyɔ̄ gáā le ɔ̄kā da ɔ́ á.

⁹Ɛ́pléeko ékpónú ɔ́ɔmā, ɔcɛ́ kú Asírīya klla le pó ka Utɛháka, ɔcɛ́ kú Itiyópīya, ɔ́ɔ lɛ aícɔ́ɔja kú ɔlɛ́ nū kpó yɔ̄ ī wā gaá kpɛ́fú tú ɔ̄ ɛɛ́. Eko nōó le ɛ̄nyā pó ā, ó lɛ ɔkpá tá fu Uhɛsɛkíya, ɔcɛ́ kú Ujúda.

¹⁰Ó tá tū ipú ɔkpá ā ka Uhɛsɛkíya ka ɔ́ɔ híī cɛ̄ lɛ Ɔwɔicō nɛ̄ ɔ́ɔ gē kpɔ́tūce ā plla anú cokónu lɛ ɔ́ ka anúɔ ɔcɛ́ kú Asírīya ɔ́ɔ yá ācɛ Ujerúsālɛm lé glá ŋ́.

¹¹Ó ka ɔ́ɔ kē pó ɔdā nɛ̄ ɔcɛ́nɛ̄hi kú Asírīya dóódu gē yá éwo dúúmā nɛ̄ ɔ́ɔ le abɔ̄ nū kwu ɔtū ka anúɔ géē je ɔ́ yíífi ā. Ó da ɔ́ ka ɔdíyá nɛ̄ anú nōo wɛ Uhɛsɛkíya ā ɔ́ɔ gbɛlá ka anúɔ géē wi ŋmá abɔ̄ kú ɔcɛ́ kú Asírīya glá ā?

¹²Ó ka aádáádā anúɔ ɛ́ɛ kpó aígelī nɛ̄hi nēé hī ka Ugósan, Uháran, mɛ́mla Urésēfu mɛ́mla ācɛ kú Ídɛn nēe lā Utɛlása ā yíífi ŋmá ajɛ á. Ó ka aɛ́cí kú odúúmā kú aéwo ɔ́ɔmā í hɛ́ uwā tá ŋmá abɔ̄ kú aɔ́cɛ́ otɛtɛ kú Asírīya ɔ́ɔmā glá ŋ́.

¹³Ó da ɔ́ ɔ̄kā ka iní nɛ̄ ɔcɛ́ kú Uhamáti, ɔcɛ́ kú Ápāadi, ɔcɛ́ kú Uséfabeyim, ɔcɛ́ kú Uhɛ́na mɛ́mla ɔcɛ́ kú Ífa nɛ̄ ɛ́ɛ kpó yíífi ā bá āa?

¹⁴Uhɛsɛkíya mīyɛ ɔkpá ā ŋmá ɛgiyí ācɛ nōó tɛ̄hɔ̄ ā. Anɔ́ɔ ó lɛ ɔ́ jé á. Ó le tá ipú Agblīihɔ-nɛ̄hi kú Óndú ā gaá kwú ɔkpá ā í nwūla ce ɛga nɛ̄ Óndú ā yɔ̄ ā kóō mɔ́ɔ̄.

¹⁵Uhɛsɛkíya lɛ inalegwu tá lɛ Óndú ā kahíníī,

¹⁶“Óndú, awɔ nōo lɔfú fíyɛ́ dúú ā. Awɔ nōo wɛ Ɔwɔicō nɛ̄ ācɛ Ísrɛ̄lu gē gbā ā. Awɔ nōo cīce ɔtāhɛ̄ kú aúcɛ́rōbim ā, awɔ ōfōōfū uwɔ wɛ Ɔwɔicō nōo kē ī gbō odúúdú aájɔ̄cɛ́ kú ɛcɛ á. Awɔ kē yá ɔkpāncō mɛ́mla ɛcɛ á.

¹⁷Woó, Óndú, jāhɔ̄ ká ā pó, klla má ɔdā nōo yɔ̄ ī yá ā. A pó odúúdú ɔdā nɛ̄ Usenakérīibu, ɔcɛ́ kú Asírīya, yɔ̄ ī ka, ī cá awɔ nōo wɛ Ɔwɔicō nōo yēeyī ā ɛcá ā.

¹⁸Alɔ jé dúú ka aɔ́cɛ́ kú Asírīya le aéwɔhá alɛwa kpó yíífi, klla kwú aájɛ ɔlɛ́ uwā í ta alácɛ̄ ɔkwɛ̄yi.

¹⁹É lɛ aɛ́cí kú aéwɔhá ɔ́ɔmā kpó tɔ̄lá. Ohígbū kéē wɛ Ɔwɔicō ŋ́ mā. Ɔcí mɛ́mla ɛcɔ̄ nɛ̄ ācɛ bī abɔ̄ kú uwā yá nēé wɛ á.

²⁰Óndú, awɔ wɛ Ɔwɔicō nɛ̄ alɔ gē gbā á. Ó lɛ ā, lɛ alɔ hɛ́tá ŋmá abɔ̄ kú ɔcɛ́nɛ̄hi kú Asírīya ā, cɛ́ɛ́ ka odúúdú aéwo kú ipú ɛcɛ ā kéē le jé ka awɔ ōfōōfūnū ɔ́ɔ wɛ Ɔwɔicō á.”

²¹Anɔ́ɔ Ayisáya, ɔ̄comɛ́ɛbɛ ā le ɛhɔ̄ tū fu Uhɛsɛkíya, ɔcɛ́ ā ka Óndú ā ɔ́ɔ kahíníī, “Abɔ̄ a lɛ inalegwu tá ga um lɛyíkwu Usenakérīibu, ɔcɛ́ kú Asírīya ā,

²²ɔ́dā nɛ̄ n ka lɛyíkwu ɔ́ ā yɔ̄ á. ‘Usenakérīibu, ācɛ kú Ujerúsālɛm yɔ̄ ī lɛ eyī gwū uwɔ bónū, kllá yɔ̄ ī yá uwɔ okónu.

²³Ɔnyɛ nɛ̄ a gbɛlá ka anúɔ húmáyī cɛ́ɛ́cá klla ī yókónu lɛ ā āa? Ami kɛ̄ɛɛ? Ami nōo wɛ Ɔwɔicō nɛ̄ ācɛ Ísrɛ̄lu ī gbā nɛ̄ ɔ̄cɛ dúú í tōō lɛ gbla um ŋ́ mā nɛ̄ a lɔtū nwūla okónu gē yá um aflūmā á kɛ̄ɛɛ?

²⁴A le ācocɛ̄hɔ̄ kú uwɔ tɛ̄hɔ̄ kéē gaá yá um okónu. A klla gwō tá um, ka anúɔ kpó aúgbɔ́ɔ́nya alɛwa kú anúɔ le Ulɛ́bānɔn yálé klla mīyɛ odúúdú aɛ́fu kú uwā tāabɔ̄. Ka anúɔ klla le yɛ ga ipíípú kú ūpū kú nū gaá lɛ aɔ́cí usɛ́da nēe jɛ̄ licō fíyɛ́ dúú ā mɛ́mla aɔ́cí Usáyíprɛsi nēe lɔhi fíyɛ́ dúú ā kpó hɛ́ klá ajɛ ɛɛ́.

²⁵A klla gwō ka anúɔ bū aóbugā klla gwá éŋkpɔ̄ ŋmá uwá ipú ajɛ kú aéwɔhá alɛwa. A ka ka ikpó kú aícɔ́ɔja kú ɔlɛ́ anúɔ ɛ́ɛ klla kwú ɛjɛ̄ɛ̄jī ɔkpá dóódu kú Unáyilu nōo yɔ̄ Íjīpiti ā ú ŋmó ŋmá ajɛ.

²⁶Á tɛtɛ pó ka ami nōo wɛ Óndú ā ɔ́ɔ tɛtɛ miya ɔ́ tū lɛ ā ŋmá íkée ā ŋ́ nɛɛ? N kē lɛ ɔdā nɛ̄ n miya ɔ́ɔmā yá ɛɛ́. Ami je ɔfú gā uwɔ ká ā lɛ aígelī nɛ̄hi alɛwa nēé cē igá tū uwā ā wúlatāajɛ klla lɛ uwá pīya alácɛ̄ á.

²⁷Ɔdā nōo yá nɛ̄ ācɛ nēe kē lā aígelī nɛ̄hi nēe bá ɔ́ɔmā í lɔfú gɛ ŋ́, klla le gbájí nɛ̄ɛ̄nɛ̄hi ā yɔ̄ abɔ́ɔ á. É kwú yá lɛbɛ̄ɛka ácí nōo ī bū kwu ɛyí inu ā. Ámāŋ ka aɔ́dɛ̄hɔ̄ nōo yɔ̄ ī bū ɛ̄yīpɛ̄ ipú ɛhɔ̄ nɛ̄ ɛnɔ gē je nmɔ́lá gbɔbū ɛ́ɛ́ kóō jɛ̄ ā.

²⁸Amáŋ n jé ɔdā dóódu lɛyíkwu uwɔ. N jé ɔdā dóódu nɛ̄ a gē yá mɛ́mla ɛga dóódu nɛ̄ a gē nyɔ̄ ā. N kē jé ɛ́gɛ́nɛ̄ ɔtū wú uwɔ nɛ̄ɛ̄nɛ̄hi lɛyíkwu ami nōo wɛ Óndú ā lɛ ā ā.

²⁹N má íwɔ́tū nɛ̄hi nɛ̄ a lɛ lɛyíkwu um ā. N kē lɛ ɔbɔ́ɔ́cɛ nɛ̄ a ka lɛyíkwu um ā pó ɛɛ́. Ohígbū ɔ́ɔmā ā, n géē je uwɔ o bī kwú ɛbéenyi wu uwɔ ɛnwū. N klla í kpó agbá wū uwɔ okónu. N géē je uwɔ kwúcē bū ɔwɛ nɛ̄ a yɛ wā piíí ɔ́ɔmā.’”

³⁰Anɔ́ɔ Ayisáya da Uhɛsɛkíya ka, “Ɔdōōcābɔ̄ kú ɔdā nōo gáā yá ā yɔ̄ á. Ɛyímā mɛ́mla ɛyí ɔ́há, aá géē cē klla í lé īkpɔ̄dɛ̄hɔ̄ nēe bū klla jé tá ipácí abɔ̄yī uwā. Amáŋ iháyí ɔmɛtá ā, aá géē nyi īkpɔ̄dɛ̄hɔ̄ kú aá nɛ̄ aá géē cē klla í lé mɛ́ɛ̄ á.

³¹Ācɛ nēe géē hile ipú Ujúda ā géē tíikpó kwajɛ, lɛbɛ̄ɛka ɔcí nōo gē tá ɛgba ga ajɛ lipú lipú, klla ī gwá īkpō nɛ̄hi ā.

³²Ācɛ ōhī nēe lā Ujerúsālɛm ā géē hile, ācɛ kē í wi ŋmá ipú ācɛ kú Ujerúsālɛm piíí. Ohígbū ka Óndú ā, nōo wɛ Ɔwɔicō nōo lɔfú fíyɛ́ dúú ā, kwú abɔ̄ ú kwu ɔtū kóō lɛ ɔ́ yá piíí.

³³Ɛlā nɛ̄ Óndú ā ka lɛyíkwu ɔcɛ́nɛ̄hi kú Asírīya ā yɔ̄ á. ‘Ó kōō gáā bēhé wā ipú Ujerúsālɛm dɛ̄ɛ̄ ɛ́ɛ́ nōó gē tá ɔyī ékpónú wā ipú igelī nɛ̄hi ā ŋ́. Aícɔ́ɔja kú uwá dúúmā í gáā bī ɔkplɛ́fú túblá igelī nɛ̄hi ā ɛ́ɛ́, nōó gē ma úbɔ́ kú íbɔm bá igá kú nū biílí ŋ́.

³⁴Ɔwɛ nɛ̄ ɔcɛ́nɛ̄hi kú Asírīya bū wā ā, nōó gáā bū nyɔ̄ á. Ó gáā bēhé wā ipú igelī nɛ̄hi nyā glá gbóógbóō ŋ́. Ami nōo wɛ Óndū ā le ka ɛɛ́.

³⁵N géē gbo igelī nɛ̄hi nyā klla ī cɛ̄pɔ̄ nū, ohígbū ojīlīma kú um mɛ́mla ohígbū okónu nɛ̄ n ce lɛ Udéfīdi, ɔ̄cocɛ̄hɔ̄ kú um ā.’”

³⁶Otú kú ícíícī ɔ́ɔmā alelékwū-ōtɛ̄hɔ̄ kú Óndú ā le tá ɛga nɛ̄ ācɛ kú Asírīya kwu aáklɔ̄kpɛ kú ɛfú ā gaá le aícɔ́ɔja kú uwá úlā bá ɛga úlá éyi cofɛtá cɛpa, cofigwó (185,000) kpó ŋmó. Eko nɛ̄ eyī le nyā ā, é má úlúúlā kú okwū kú aícɔ́ɔja kú uwā klá ajɛ bɛɛ́ɛ̄.

³⁷Anɔ́ɔ Usenakérīibu, ɔcɛ́ kú Asírīya ā kwú yɛ ɔkwɔɔkwu kwúcē ga Unínīfɛ á.

³⁸Ɛ̄cī éyi, Usenakérīibu yɔ̄ ī pā ɛcí ipú ikpɛ́cí kú nū nēe hī ka, Unisrɔ̄ku ā. Ayí abɔ̄yī nū ɛpa, nēe le ka Adramɛ́lɛ̄ki mɛ́mla Usarésa bī ɔkpacaŋ́gelī gaá kwú ádā uwā nōo wɛ ɔcɛ́ ā ú ŋmó tá abɔ́ɔ. Anɔ́ɔ é kwú pɛ́ kwu ga ajɛ kú Árārati á. Ɔyí Usenakérīibu ɔhá nōo lé ka Esarhádɔn ā lɛ ɔcɛ́ lé kwɛyí ádā nū.