Read idoma AYISÁYA 38 Bible Online

AYISÁYA 38 - idoma bible

AYISÁYA 38

¹Ɛpléeko ɔ́ɔmā, anɔ́ɔ Uhɛsɛkíya gbɔɔ́ ō doōcē á. Anɔ́ɔ Ayisáya, ɔ̄comɛ́ɛ́bɛ nōo wɛ ɔyí kú Ámɔ̄ɔsi ā wā gaá má ɔ̄ á. Anɔ́ɔ ó da ɔ́ ka Óndú ā ɔ́ɔ ka anúɔ da ɔ́ ka ɔ́ɔ lɛ ɔlɛ́ nū tútū lɔhi lɔhi ohígbū ka ɔ́ɔ gáā bū ōcē ā glá ŋ́, amáŋ ɔ́ɔ géē kwú.

²Uhɛsɛkíya gwutá anɔ́ɔ ó kwú eyī í pīya tá ɔdɔ kwú igbīhi ú cē kwu ɛcɛ á, anɔ́ɔ ó gbɔɔ́ ō gbɔ̄ɔkɔ lɛ Óndú ā á.

³Ó kahíníī, “Woó! Óndú, blakwu ɛ́gɛ́nɛ̄ n gbā uwɔ ɛgbá klla yɛce ɔwɛ kú uwɔ kpaakpa mɛ́mla ɔtū ékpónú lɛ ā ā. Ɔdā dóódu nōo he uwɔ ɔtū ā anú nɛ̄ n kē ī yá ā.”

⁴Anɔ́ɔ Óndú ā gaá lɛ ɛlā ka lɛ Ayisáya á.

⁵Ó da ɔ́ kahíníī, “Nyɔ̄ ka á gaá da Uhɛsɛkíya ka ami, Óndú ā, nōo wɛ Ɔwɔicō kú aádáádā uwɔ, Udéfīdi ā, lɛ ɔkɔ nɛ̄ a gbā ā pó ɛɛ́. N klla lɛ agīje kú uwɔ má dúú ɛɛ́. N gēe yá ka ā klla yēeyī iháyí igwɛ́ɛhɔ̄ ɔhá kpɔ́ ɛɛ́.

⁶N géē hɛ́ uwɔ mɛ́mla igelī nēé hī ka Ujerúsālɛm nyā tá ŋmá abɔ̄ kú ɔcɛ́nɛ̄hi kú Asírīya. N gē yɔ̄ ī gbō igelī nyā eko dóódu.”

⁷Anɔ́ɔ Ayisáya tá ɔ̄ ohi ka Óndú ā abɔ̄yī nū ɔ́ɔ ka anúɔ géē je ɔdōōcābɔ̄ lɛ ɔ́, nōo géē mafú lɛ ɔ́ ka anúɔ géē yá ɔdā nɛ̄ anúɔ cokónu nū ā.

⁸Ó da ɔ́ ka Óndú ā ɔ́ɔ ka anúɔ géē yá ka ojiji nɛ̄ ɛnɔ ɔ́ɔ tá ce agidigbé nɛ̄ Áhās, nōo tɛtɛ wɛ ɔcɛ́ īkée ā gwó ā, kóo yɛ ɔkwɔɔkwu ga igbīhi ikpó igwó. Anɔ́ɔ ojiji ā kē le yɛ ɔkwɔɔkwu ga igbīhi ikpó igwó ɔkwɔ̄ɔ̄kwɛ̄yi á.

⁹Eko nɛ̄ ōcē kú Uhɛsɛkíya, ɔcɛ́ ā mɛ ā, anɔ́ɔ o lɛ ijē nyā tá kóō cɛ̄tra Óndú ā á.

¹⁰Ijē ā kahíníī, “N gbɛlá ka n géē kwú eko ɔyípōklóbīya kú um nyā nɛmm. Cɛ́ɛ́ n le tá ɔlékwū, ká n lā oyēeyī ohile ā gɛ ŋ́.

¹¹N gbɛlá ka ń klla gáā má Óndú ā ipú ɛcɛ nyā nɛ̄ ācɛ oyēeyī lā ā ɛ́ɛ́ gɛ ŋ́ nɛ. Ka n klla gáā yɔ̄ pi ācɛ oyēeyī, má uwā ipú ɛcɛ ɔhá gɛ ŋ́ nɛ.

¹²É lɛ um oyēeyī hɛ́ kpá, lɛ ɔ́ ŋmɛ́yí lɛbɛ̄ɛka áklɔ́kpɛ nɛ̄ ɔ̄cogbāálá géē fu ŋmá ajɛ ī nyɛ̄ɛ̄ ā. Ó klla lɛbɛ̄ɛka ɛ́gɛ́nɛ̄ é gē hɛ́ īlī kló ŋmá ɔcí nēé ī bī le tá īlī ā. N gbɛlá ka Óndú ā yɔ̄ ī je oyēeyī kú um ŋmɛ́yí nɛ.

¹³N yɔ̄ ī dɛ̄ tɛ́ɛcɛ ohígbū ɔnɔ otú gbɔ́ɔ̄cī. Ó lɛbɛ̄ɛka ɔdā nɛ̄ ágábá yɔ̄ ī kpó um ikpokwú ca ā. N gbɛlá ka Óndú ā yɔ̄ ī je oyēeyī kú um ŋmɛ́yí á nɛ.

¹⁴Ɔkɔ kú um kwú du anɔ́ɔ n yɔ̄ ī jikwū tɛ́ɛcɛ bɛ̄ɛka ákpáŋdēde ā. N kē yɔ̄ ī jikwū tū ɔkɔ humhum bɛ̄ɛka okóohō ā. Eyī le gbɛnú ga um ohígbū eyī nɛ̄ n le tíicō piyóó yɔ̄ ī tíne otábɔ̄ ŋmá ɛgiyí Óndú ā. Óndú, n yɔ̄ ipú unwalu nɛ̄hi. Lɛ um hɛ́tá.

¹⁵Óndú um, n lɛ ɔdā nɛ̄ n géē ka ŋ́. Ohígbū ka awɔ yá um ɔdānyā á. N géē yɔ̄ ī yɛ cécécé jāā gbéeko nɛ̄ n kwú mɛ́ɛnɛ, ohígbū ɔnɔ nɛ̄ n má ā.

¹⁶Óndú, oŋmá lɛ ɛlā kú uwɔ mɛ́mla ɔdā nɛ̄ a gē yá ā nɛ̄ ācɛ gē lā oyēeyī á. Oŋmá lɛ ɔ́ɔmā nɛ̄ n kē í lɛ oyēeyī dúú á. Ohígbū ka awɔ ōfōōfū uwɔ hɛ́ um tá ŋmá ōcē klla cɛ̄ gā um yēeyī á.

¹⁷Oyá kóō le lɔhi ga um ā, nɛ̄ n je ɔnɔ nɛ̄hi ɔ́ɔmā á. Amáŋ ohígbū ihɔtū nɛ̄ a lɛ ga um ā, a cɛ̄ ga um bí ga ɔlékwū ŋ́. Ohígbū ka a klla kwú ɔ́bíipú kú um yá um ɛhi klla kwú mlanyī.

¹⁸Ɔ̄cɛ dúúmā nōo le tá ɔlékwū í klla cɛ̄tra awɔ, ɛ́ɛ́ nōó ī tá uwɔ ahínyá glá ɛɛ́ gɛ ŋ́ má. Okwū í klla kpɔ́tūce okpaakpa kú uwɔ̄ glá ŋ́.

¹⁹Ācɛ nēe yēeyī ā ōfōōfū uwā gē cɛ̄tra awɔ á, ɛ́gɛ́nɛ̄ n yɔ̄ í cɛ̄tra uwɔ nyā ā. Aádā gē ka ayí uwā ɔ̄kā ɛ́gɛ́nɛ̄ a le kpaakpa lɛ ā ā.

²⁰Óndú, a lɛ um hɛ́tá ŋmá ōcē ɛɛ́. Alɔ géē bī ɛ̄ngwū kú um le gwíijē bá ī cɛtra uwɔ. ipú Agblīihɔ-nɛ̄hi kú uwɔ jāā gbéeko nɛ̄ alɔ gé kwú.

²¹Ayisáya da ācocɛ̄hɔ̄ kú Uhɛsɛkíya, ɔcɛ́ ā, ka ɛ́ɛ lɛ īkpɔ̄cí ufígi da pitɛpitɛ ka ɛ́ɛ kwú bá ínálēgbé nōo yɔ̄ ī yá ɔ̄ ā. Cɛ́ɛ́ ínálēgbé kú nū ā géē mɛ, nɛ̄ iyē géē lɔfú lɛ ɔ́.

²²Anɔ́ɔ Uhɛsɛkíya da ɔ́ ɔ̄kā ka ɔdí géē wɛ ɔdōōcābɔ̄ nōo géē mafu ka anúɔ géē lɔfú iyē klla géē ga ipú Agblīihɔ-nɛ̄hi kú Óndū ā kpɔ́ ɛ́ɛ́ mā?”