Read idoma AYISÁYA 39 Bible Online

AYISÁYA 39 - idoma bible

AYISÁYA 39

¹Ɛpléeko nɛ̄ ōcē kú Uhɛsɛkíya mɛ ɔ́ɔmā, ɔcɛ́ kú Ubábīlɔn nōo lé ka Umérōdaki Ubaládan, ɔyí kú Ubaládan ā le pó ka Uhɛsɛkíya, ɔcɛ́ kú Ujúda ɔ́ɔ doōcē, iyē kú nū ɔ́ɔ kē i lɔhi ɛɛ́. Anɔ́ɔ ó lɛ ɔkpá tá, kwú ɔkpá ā ú tɛ̄hɔ̄ mɛ́mla aodée kú ɛhi gé lɛ Uhɛsɛkíya á.

²Uhɛsɛkíya mīyɛ ācɛ nōo tɛ̄hɔ̄ fu ɔ́ ɔ́ɔmā lɔɔlɔhi. Anɔ́ɔ ó lɛ odúúdú agbénú kú nū dóódu ā kpó mafú lɛ uwá á. Kwu oje nɛ̄hɛ́ mɛ́mla ugóolu, kwú aɔ́dā nōo ī kpóocu mɛ́mla ɔtulalī, klla mɛ́mla aíyɛ́fú kú nū dóódu nēe bá aɛ́ga nēé kpó iyó kú nū tū ā. Ó tū ɔdā dúúmā kú agblɔ̄cɛ́ mɛ́mla ajɔ̄ɔ̄cɛ́ kú nū a nōó mafú lɛ uwá ŋ́ nɛɛ ŋ́.

³Anɔ́ɔ Ayisáya ga gaá da Uhɛsɛkíya ɔ̄kā kahíníī, “Iní nɛ̄ ācɛ nēe bá nyā ŋmá wā āa? Ɛlā nyá nɛ̄ uwá kē wā í ka ga uwɔ āa?” Uhɛsɛkíya tá ɔ̄ ohi kahíníī, “É ŋmá ɛga oligbó nēé hī ka Ubábīlɔn ā wā.”

⁴Ayisáya da ɔcɛ́ ā kahíníī, “Ɔdí nēé má ipú agblɔ̄cɛ́ kú uwɔ ā?” Anɔ́ɔ Uhɛsɛkíya tá ɔ̄ ohi kahíníī, “É lɛ ɔdā dóódu kpó má ɛɛ́. Ó tū ɔdā dúúmā nōo yɔ̄ ipú aɛ́ga okpíyó tū kú um nɛ̄ n mafú lɛ uwá ŋ́ nɛɛ ŋ́.”

⁵Anɔ́ɔ Ayisáya da ɔcɛ́ ā kahíníī, “Óndú ā nōo wɛ Ɔwɔicō nōo lɔfú fíyɛ́ dúú ā ka,

⁶‘Eko gē wā, nɛ̄ ɔdā dóódu kú ipú agblɔ̄cɛ́ kú uwɔ ā, mɛ́mla ɔdā dóódu nɛ̄ aádáádā uwɔ tɛtɛ kpó tū ā, mɛ́mla ɔdā dóódu nēé bī eyī kú uwá má ā, é géē je uwa kpó ga ajɛ kú Ubábīlɔn.

⁷Ayááyí kú abɔ̄yī uwɔ ā, é géē je ōhī kú uwá kpó ga ajɛ kú Ubábīlɔn abɔ̄fú klla í je uwá kpó búdá, cɛ́ɛ́ kéē cɛ̄ ɔcɛ́ kú Ubábīlɔn ɛhɔ̄.’”

⁸Amáŋ Uhɛsɛkíya tóohi ka ɛlā nɛ̄ Óndú ā ɔ́ɔ ka ā ɔ́ɔ lɔhi ohígbū koó gbɛlā ka ɛyí kú olɛhɔ̄ ā ɔ́ɔ wɛ ka ɛbɔ́ ɔ́ɔ géē yɔ̄ eko nɛ̄ anúɔ í cɔcɛ́ gaá kwu ā.