Read idoma AYISÁYA 4 Bible Online

AYISÁYA 4 - idoma bible

AYISÁYA 4

¹Eko nɛ̄ eko ɔ́ɔmā ga ā, ācɛnyā ahāapa gēe híla abɔ̄ tū ɔ̄cɛnyílɔ́ ékpónú, í da ɔ́ kāhíníīī, “Alɔ gē je ɔdōlé lɛ īyī alɔ klla í lɛ īlī tū īyī alɔ ohí. Amáŋ, kóocōō, cɛ̄ ka alɔ lé iyē kú uwɔ káā a wɛ ɔbá alɔ á ōfōōfūnū. Cɛ́ɛ́ ka uwēyī ka á má ɔbá lɛ ŋ́ mā kóō kwú alɔ ŋ́.”

²Eko géē wā nɛ̄ Ɔwɔicō géē yá ka ácí mɛ́mla ɔcí dóódu kóō jɛ̄ nɛ̄ɛ̄nɛ̄hi, klla jɛ̄ héyīfuú ipú ajɛ kú ɔlɛ́ nū kpɔ́ ɛɛ́. Odúúdú ācɛ nēe hile ā, géē gwéeyē klla í gɔ̄ ohígbu īkpɔ̄dɛ̄hɔ̄ nɛ̄ ajɛ kú uwá géē yá ā.

³É géē hī ɔ̄cɛ dúúmā nóō géē hile Ujerúsālɛm, nɛ̄ Ɔwɔicō fu kóō wi ā, ka ɔ́ɔ wɛ ákú Ɔwɔicō abɔ̄yī nū.

⁴Óndú ā géē bī ɔfú kú nū géē hɛ́pɔ̄, klla í na ācɛ kú Ujerúsālɛm ā yēŋēē bɛ̄ɛka ɛ́gɛ́nɛ̄ ɔlá gē na oje ā. Ó klla í na ɛpɔ̄bí nɛ̄ Ujerúsālɛm lé ohígbu oyí kú ācɛ nēé ŋmó ipú nū ā bónū.

⁵Cɛ́ɛ́ Ɔwɔicō géē tū ojuja gaá klá ɛyí ɛfu kú Usáyɔn ā, mɛ́mla ɛyí kú odúúdú ācɛ nēe géē jīla abɔ́ɔ ā, ɔlɛ́ɛnɔ. Ó klla géē tū ódūdū mɛ́mla ígblɛ́nyī ɔlá nōo géē yɔ̄ ī cɛ̄ klá uwá otú. Ɛgahi kú Ɔwɔicō géē klá odúúdú igelī ā géē yɔ̄ ī gbō uwā.

⁶Ɛgahi kú nū ā géē klá igelī ā ŋmá idɔlá kú ɔlɛ́ɛnɔ. Ɛgahi ā klla í je igelī ā pīya ɛga nɛ̄ ācɛ í lā ɛbɔ́. Ó géē wɛ ɛga nɛ̄ ɔ̄cɛ géē kwu tayínū nɛ̄ ɔwɔ mɛ́mla owu nɛ̄hi í gáā je unwalu lɛ ɔ́ ŋ́. Ujerúsālɛm í lɛ ɛbɔ́.