Read idoma AYISÁYA 40 Bible Online

AYISÁYA 40 - idoma bible

AYISÁYA 40

¹Ɔwɔicō kú alɔ kahíníī, “Aá tū ācɛ ɔlɛ́ um ɔtūlé! Aá tú uwā ɔtū lé!

²Kɛlā mɛnɛɛ lɛ ācɛ Ujerúsālɛm, cɛ́ɛ́ ka aá tá uwā ɔtū kwu ɔtū ká á ka tɛ́ɛcɛ lɛ uwá ka úklɔ́ ōwē nɛ̄ ɛ́ɛ húmáyī yá ā ɔ́ɔ jɛ̄ ɛɛ́. Kɛ́ɛ kwú ɔ́bíipú kú uwā í yá uwa ɛhi ɛɛ́. Ka n kē lɛ ulé kú ɔdōbɔ̄bí nēé yá ā cílā uwā fíyɛ́ abɔ̄ ɛ́ɛ.

³Ɔkɔ kú ɔ̄cɛ éyi yɔ̄ ī tɔ́ɔna ipú ígbíli. Ó kahíníī, “Aá lɛ ɔwɛ kú Óndú ā gllágwó ipú ígbíli. Aá lɛ íkpáŋdrā na kpaakpa tá lɛ Ɔwɔicō kú alɔ.

⁴Lɛ ajɛ kpó tū ɛjɛ̄ɛ̄jī aɔ́pɛ́, kóō le mu, kéē lɛ uwá jétū. Lɛ ɛjɛ̄ɛ̄jī aɛ́fu nɛ̄hi mɛ́mla aɛ́fu nɛ́ncɛ́ cílatū jonjilɛ mɛ́ɛ́lɛ́. Ajɛ nōo le kpɔ́gɔ̄kɔ́gɔ̄, klla le kplúkūkplukū ā, é gēe cíla nū tū mɛ́ɛlɛ́.

⁵Cɛ́ɛ́ Óndú ā lɛ ɛgahi nɛ̄hi ofíyajɛ kú nū ā mafú. Odúúdú ācɛ ā kē ī má ɔ̄ tɔ̄há. Óndú ā bī okónu abɔ̄yī nū le ka ɛɛ́.”

⁶Ɔkɔ éyi da um ka amíyɔ̄ tɔ́ɔna gbōmgbōm. Anɔ́ɔ n dɔɔ̄kā kahíníī, “Ɔna kú ɔdí nɛ̄ n géē tá āa?” Ɔkɔ ā kahíníī, “Tɔ́ɔna ka odúúdú alɛɛcɛ ɛ́ɛ lɛbɛ̄ɛka ácí nōo ī gbojī ō kwú ŋ́ mā. Ɔhi kú ɔlɛɛcɛ dóódu kē lɛbɛ̄ɛka ododó kú ácí nōó gē lɛ́ɛcɛ ŋ́ mā.

⁷Eko dúúmā nɛ̄ Óndú ā lɛ owu tū le tá klá uwá, ácí ā gē je ŋmó, ododó ā kē ī wúla. Abɔ̄ ɔlɛɛcɛ dóódu kē lɛ ā á.

⁸Īī, ácí gē ŋmó, ododó kē ī cá, amáŋ ɛlā nɛ̄ Óndú ka ā í géē pīyabɔ̄ gbógbóōō ŋ́.”

⁹Aá nēe ī tɔ́ɔna ɔ̄kā olɔhi lɛ Ujerúsālɛm ā, aá tīcō nyɔ̄ ga ɛyí ɛfu nōo licō fíyɛ́ dúú ā. Cɛ́ɛ́ ka aá tɔ́ɔna kú ɔ̄kā olɔhi ā mla odúúdú ɔfú kú aá. Aá hī ācɛ Usáyɔn igwú gbōmgbōm, Aá yúúfi ŋ́, aá ka tɛ́ɛcɛ gbōmgbōm lɛ ācɛ aígelī nɛ̄ŋcɛ́ kú Ujúda ā kahíníī, “Áá mɔ́ɔ̄, Óndú kú aá gē wā ɛɛ́.”

¹⁰Óndú ā nōo lɔfú fíyɛ́ dúú ā gē wā ka ɔ́ɔ wā í bī ɔfú nɛ̄hi kú nū ā le gbō ajɛ. Ó gē bī ɔdā nōó mīyɛ ŋmá ɔnɛ̄fú ā, ó kē í wā í cíla ācɛ ɔlɛ́ nū ulé kú uwā.

¹¹Ó géē leyīkwu ācɛ ɔlɛ́ nū bɛ̄ɛka ɛ́gɛ́nɛ̄ ɔ̄cogbāálá gē leyīkwu kwu aálá kú nū ā. Ó gē tú ayí aálá kú nū bá, kllá í kpó uwá ce abɔ̄ kú nū. Ó klla ī kpó aɛ́nɛ́ nēe bī ayí ā trɛ̄yí ɛmɛɛma.

¹²Ɔ̄cɛ dúúmā bī ɔtābɔ̄ kú nū le miya odúúdú éŋkpɔ̄ kú itekwú glá āa? Ɛ́ɛ́ nɛ̄ ɔ̄cɛ dúúmā ī lɛ ayíkābɔ̄ kú nū miya ɔkpáncō glá āa? Ɔ̄cɛ dúúmā je umla kú odúúdú ajɛ kú ɛcɛ nyā kpó tū ipú íkókwū ékpónú glá ā. Ámāŋ ka ɔ̄cɛ dúúmā je aɛ́fu nɛ̄ŋcɛ́ mɛ́mla ɛnɛ̄hi kpó ce ɔdā ole mīya ɔdā le miya ogbɛnú kú uwā glá āā?

¹³Ɔ̄cɛ dúúmā da Óndú ā ɔdā nōó cíkā ō yá ā glá āa? Ɔnyɛ kē nwū Óndú ā ɛlā glá āa?

¹⁴Ɔnyɛ nɛ̄ Óndú ā gē da ɔ́ ɔ̄kā ɛ́ɛ́ kóō jéeyī āa? Ɔnyɛ gē nwū ɔ̄ odée ɛ́ɛ́ kóō jé ɔdā okpaakpa āa? Ɔnyɛ kē gē nwū ɔ̄ ɔwɛ nōó gē le yá ɔdā ɔkwɔ̄ɔ̄kwɛ̄yi āa?

¹⁵Odúúdú aéwo nōo yɔ̄ ipú ɛcɛ nyā í wɛ ɔdā dúúmā tū Óndú ā ŋ́. É lɛbɛ̄ɛka o wúla té kú éŋkpɔ̄ ā nɛ̄. Odúúdú aájɛ idɔ kú ɛcɛ nyā ā í gbɛnú ŋ́ lɛbɛ̄ɛka úmlá ā tū ɔ̄.

¹⁶Odúúdú aɛ́bɛ́ nēe bá ipú ūpū kú Ulɛ́banɔn ā í jɛ̄ ō le gwɛ́ɛya lɛ Óndú alɔ ŋ́. Odúúdú aɔ́cí kú ūpū kú Ulɛ́bānɔn ā le nyɛ́ ō bī gwó ɔlá kú ɛya ɔ́ɔmā.

¹⁷Odúúdú aéwo kú ɛcɛ ā í wɛ ɔdā dúúmā tū Óndú ā ŋ́. Ó je uwā kéē wɛ áncā, é wɛ ɔdā dóódu tū ɔ̄ ŋ́.

¹⁸Ɔnyɛ nɛ̄ ɔ̄cɛ géē lɛ Ɔwɔicō gbla anú glá āa? Ɔdí nɛ̄ a géē ka ka Ɔwɔicō ɔ́ɔ lɛbɛ̄ɛka anú ā?

¹⁹Ó lɛbɛ̄ɛka ɛcí nɛ̄ ācɛ ī pā ā ŋ́. Ācɛ ī yá ojíbó kú ɛcí á. É kē ī ma ɔ́ ŋmá oje udɔ, cɛ́ɛ́ ɔ̄cɛ nōo ī na oje ā le oje ɔdɔ (ugóolu) na plla ɔ́ klla lɛ oje nɛ̄hɛ́ bī yá ɔ̄ ifa plla anú iyē.

²⁰Ɔ̄cɛ nōó má ije lá oje nɛ̄hɛ́ ámāŋ ka ugóolu ŋ́ mā, kwú ɔcí nōó gáā wā ŋ́ mā ú, cɛ́ɛ́ ɔ̄coyúklábɔ̄ lɛ ojibó nōó gáā mīya gwōnū glá ŋ́ mā gbā lɛ ɔ́.

²¹Á jé ŋ́ nɛɛ? É tɛtɛ da uwɔ ŋmá íkée ŋ́ nɛɛ? Á pó ɛ́gɛ́nɛ̄ ɛcɛ hɛ́ ɔkwu lɛ ā ŋ́ nɛɛ?

²²Anú nōo cīce ɛyí akpa ɔcɛ́ ā ɛhícō kú oyoolo kú ɛcɛ, ɔkpáncō ā, yá ɛcɛ á. Ó kē ī má odúúdú ācɛ nēe bá ipú ɛcɛ ā nɛ̄ŋcɛ̄ lɛbɛ̄ɛka íkpangā ā. Ó lɛ ɔkpáncō nāŋdaa klá ɛhícō ɛcɛ bɛ̄ɛka ipoto ā, ámāŋ ka ɛpɛ̄ nēé ī tá ī le fīyɛ̄ áklɔ́kpɛ nēé ī lā anú ā.

²³Ɔwɔicō gē kpó aɔ́cɛ́ bá ajɛ klla ī je uwá pīya áncā.

²⁴Ɛ́gɛ́nɛ̄ é ī nyi ɔdɛ̄hɔ̄ bōōbū, nōo gbɔbū ɛ́ɛ́ kóō gbɔɔ́ ō bū ɛ́ɛ́ kóō tá ɛgba kwu ajɛ lɔfú dúú, nɛ̄ owu olɔfú gē tá ī je ɔ́ fu tónū ā. Ɛ́gɔ́ɔ́mā nɛ̄ eko nɛ̄ Ɔwɔicō lɛ owu mu uwá nēé gē je kpó yíífi dúú á.

²⁵Ɔwɔicō nɛ̄ ɔ̄cɛ dóódu í tōō le gbla anú ŋ́ mā kahíníī, “Ɔnyɛ nɛ̄ a géē le gbla um āa? Ɔ̄cɛ dúúmā ɔhá klla yɔ̄ lɛbɛ̄ɛka ami ā kɛ̄ɛɛ?

²⁶Pīyeyī má ɔkpáncō ka á má ɔ̄. Ɔnyɛ yá aínyílɔ́wɔ āa? Anú gē kpó uwá trɛ̄yí wā ɛcɛ bɛ̄ɛka aícɔ́ɔja ā á. Ó jé aluka kú uwá, ó kē jé iyē ɔnyɔɔnyɛ kú uwa. Óndú ā lɔfú nɛ̄ɛ̄nɛ̄hi, nɛ̄ odúúmā kú uwa í kē ī bī gbógbóōō ŋ́.

²⁷Ísrɛ̄lu, ó le lɛ ā, ɔdí yá nɛ̄ aá gē ka iŋini ka Óndú ā ɔ́ɔ jé ɛgbá mɛ́mla unwalu kú aá ŋ́ māa? Ɛ́ɛ́ nɛ̄ ɔ́ɔ gē lɛ ɛlá wu aá eko nēé gē pīya aá tū ī yá aá ōwē áncā ŋ́ māa?

²⁸Aá jé ŋ́ nɛɛ? Aá kē pó ŋ́ nɛɛ? Óndú ā wɛ Ɔwɔicō nōo yɔ̄ piyóó á. Anú yá odúúdú ɛcɛ á. Ɛ̄jɛ̄ í gē jɛ̄ ɔ̄, ɛ́ɛ́ nɛ̄ abɔ̄ gē gbogwú lɛ ɔ́ ŋ́. Ɔ̄cɛ dúúmā í kē jɛ́yí odúúdú ɔdā nɛ̄ Óndú ā jé ā glá ŋ́.

²⁹Ó gē lɔfú tū ācɛ okwáahi mɛ́mla ācɛ nɛ̄ ɛ̄jɛ̄ le jɛ̄ uwá ā iyē.

³⁰Aɛ́drɔ́ nááná, ɛ̄jɛ̄ gē jɛ̄ uwā. Abɔ̄ kē ī hɛ́ ayípōklóbīya iyē dúú.

³¹Amáŋ, ācɛ nēe kpéyīce Óndú ā, ó gē lɔfú ɛyīpɛ̄ tū uwá iyē eko dóódu. É géē wu bɛ̄ɛka idu ā. É géē kwinya, ɛ̄jɛ̄ í gāa jɛ̄ uwá ŋ́. É géē yāwu, ikpó í gāa gbogbwú lɛ uwá ŋ́.