Read idoma AYISÁYA 41 Bible Online

AYISÁYA 41 - idoma bible

AYISÁYA 41

¹Ɔwɔicō kahíníī, “Ācɛ kú aájɛ nēe bá ɛga oligbó okónu ísu ā, áa lɛ okónu klá hímm, ka aá jāhɔ̄ gā um. Aá le tútū ka aá ī wā í ka ɔkɔ kú aá. Aá wā í kɔɔkɔ kú aá. Cɛ́ɛ́ ká alɔ kɛpɔ̄ ka alɔ má ɔ̄cɛ nɛ̄ ákú nū le kpaakpa ā.

²Ɔ̄nyɛ bī ɔcɛ́ olɔfú nɛ̄hi nōo yɔ̄ ī yá ɛfú dóódu lé ā wā ŋmá ɛnɔ̄ɔ̄cī āa? Ɔ̄nyɛ ī cɛ̄ lɛ ɔ́ ī yá aájɔ̄cɛ́ alɛwa lé ā? Ɔ̄nyɛ gē kpó aɔ́cɛ́ kú aájɔ̄ɔ̄cɛ́ ɔ́ɔmā tū ipú abɔ̄ kú nū āa? Ɔkpacaŋ́gelī kú ɔcɛ́ ā gē kpó uwá ŋmó bá ajɛ bɛ̄ɛka umlá ā. Ɔyī kú nū gē ŋmó uwá tuúú bɛ̄ɛka igbóŋgbō nɛ̄ owu gē kpó ā.

³Ó gē nū aólɛlā kú nū inya fíyafíya lɛbɛ̄ɛka ɔdā nɛ̄ ikpó kú nū ī kwu ajɛ ŋ́ mā. Ɔdā dóódu í kē yá ɔ̄ ŋ́.

⁴Ɔ̄nyɛ yá ɛ́ nɛ̄ ɛnyā yá ā? Ɔ̄nyɛ yá ɛ́ɛ́ nɛ̄ aɔ́dā nōo húmáyī yá ŋmá eko éyi ga eko ɔhá ā gē yá āa? Ami nōo wɛ Óndú ā nɛ. N yɔ̄ abɔ́ɔ ŋmá ohútu ā, n kē í yɔ̄ abɔ́ɔ eko nōó í ŋmɛ́yí ā.

⁵Ācɛ kú aájɛ éwɔhá ā mɛ́mla aájɛ nēe bá ɛga oligbó ā lɛ ɔdā nɛ̄ n yá ā má ɛɛ́. Ufi nɛ̄hi kē lɛ uwá kwú, é kē bá ī fīyégbúlú. Ohígbū ɔ́ɔmā, odúúdú uwá le jīla klla gē wā ɛɛ́.

⁶Ɔnyɔɔnyɛ kú uwā yɔ̄ ī tú ɔ́mpa uwā īyī uwā abɔ̄ klla ī tá īyī uwā ɔtū kwu ɔtū.

⁷Ɔ̄cogbɔ̄cí ā da onɔwá ā kahíníī, “Ahínyá úklɔ́, úklɔ́ ā lɔhi íbi.” Cɛ́ɛ́ é bī ukúsa lɛ ojibó kú ɛcí hɛ́ tū odée nōó gáā míya gwonū ŋ́.

⁸Amáŋ Ísrɛ̄lu, awɔ wɛ ɔ̄cocɛ̄hɔ̄ kú um á. Ugbɛ kú Ébrahām, nōo wɛ oklóbīya um ā, nɛ̄ um fu a.

⁹N bī uwɔ ŋmá abɔ̄ ánáánūmā kú ɛcɛ, klla hī uwɔ igwú ŋmá ɛga nɛ̄ oligbó fíyɛ́ dúú kú ɛcɛ a. N da uwɔ kahíníī, “A wɛ ákú um. Ń tá uwɔ tónū ŋ́ ohígbū ka n lɛ uwɔ fu ká ā wɛ ákú um.”

¹⁰A yúúfi ŋ́, n yɔ̄ pi uwɔ. Ami wɛ Ɔwɔicō kú aá á, ɔdā dúúmā kóō tū uwɔ ufí ŋ́. N géē lɛ ɔfú tū uwɔ iyē klla í tá uwɔ abɔ̄. N géē bī ɔfú kú um le gbō uwɔ klla í cɛ̄ ga uwɔ yálé.

¹¹Ācɛ nōo gē wɔ́tū uwɔ ā, uwēyī géē kwú uwá nɛ̄ɛ̄nɛ̄hi fíyɛ́ abɔ̄. Odúúdú ācɛ nēe gē nuunu tú uwɔ ā, géē pɛ́ kwú bɛ̄ɛka ɔdā nēé yɔ̄ gɛ ŋ́ mā.

¹²A géē tíne ācɛ nēe ī nuunu tú uwɔ ā, amáŋ á gáā má uwā glá gɛ ŋ́. Ohígbū ka odúúmā kú uwá í yɔ̄ gɛ ŋ́.

¹³Ami, Óndú ā, nōo wɛ Ɔwɔicō kú uwɔ ā, lɛ abɔ̄ tū uwɔ abɔ̄ yɔ̄ ī lɛ ɔfú tū uwɔ iyē. N gē da uwɔ ka a yúúfi ŋ́, ka n géē tá uwɔ abɔ̄.”

¹⁴Óndú ā klla kahíníī, “Ācɛ Ísrɛ̄lu, ɛ́gɛ́ dúú nɛ̄ aá lɛ ɛwa ŋ́ lɛ klla í lɔfú ŋ́ lɛ ā nááná ā, aá yúúfi ɔdā dúúmā ŋ́. Ami nōo wɛ Óndú ā ka n géē tá aá abɔ̄. Ami nōo wɛ Ɔwɔicō kú Ísrɛ̄lu, nɛ̄ ɔ̄cɛ dúú í tōō le gbla um ā, gē nya aá tá á.

¹⁵N géē yá aá bɛ̄ɛka ɛgɔ̄ ogbā ɔdā ā ɛyīpɛ̄ nɛ̄ ayīnu nū gē lulé ā. Aá géē gbā aɛ́fu nɛ̄hi wā ajɛ klla í je uwá kpó yíífi. Aá géē je aɛ́fu nɛ̄ŋcɛ́[2] catāajɛ nēé í lɛbɛ̄ɛka úmúlá ā.

¹⁶Aá géē tá uwá owu, owu kē ī je uwá kpó nyɔ̄. Owu nɛ̄hi géē je uwá pahīla bónū. Cɛ́ɛ́ aá géē gwéeyē ohígbū um. Aá klla ī cɛ̄tra ami, nōo wɛ Ɔwɔicō kú Ísrɛ̄lu nɛ̄ ɔ̄cɛ dúú í tōō le gbla um ā.

¹⁷Eko dúúmā nɛ̄ ijēnyi gē ŋmó ācɛ ɔlɛ́ um nēé bá ī tíne ɔdōgwá, amáŋ nēé má ɔdā dúúmā gwá ŋ́, ami nōo wɛ Óndú ā géē pó ɔkɔ kú uwá. Ami nōo wɛ Ɔwɔicō kú Ísrɛ̄lu ā í gáā cīgbīhi kwu uwá ŋ́.

¹⁸N géē yá ka aísu kéē cēenyi lɛ uwá ɛyí aɛ́fu. Njɔlɔ alɛwa kē í pɛ́ klá aɔ́pɛ́ lɛ uwá. Ígbíli ā géē je pīya aókpoó kú éŋkpɔ̄ ɛbɛɛbɛ. Ajɛ íkpākplā kē í je bū njɔlɔ ɛbɛɛbɛ.

¹⁹N géē tū ɛdɔ ɔcí ɛyɛ́ɛyɛ́yí ipú ígbíli. Kwu aɔ́cí nēé ī hī ka usɛ́da, akésīya, umɛ́tu mɛ́mla ólīifu ā. Ajɛ ikpākplā ɔ́ɔmā géē je pīya ūpū, nɛ̄ aɔ́cí nēé hī ka usáyīprɛsi, ujúnīpa mɛ́mla upáyin ā géē jɛ̄ abɔ́ɔ dúú.

²⁰Odúúdú ācɛ géē má ɔ̄ɔ̄, é í lɛ eyī yɛ ɔɔ́, cɛ́ɛ́ é le jé ka amīyɔ̄, nōo wɛ Ɔwɔicō kú Ísrɛ̄lu nɛ̄ ɔ̄cɛ dúú í tōō le gbla um ā, yá ɔ̄ɔ̄ á.

²¹Óndú ā nōo wɛ ɔcɛ́ kú Ísrɛ̄lu ā kahíníī, “Aɛ́cí kú aéwɔhá ā, aá lɛ ɔkɔ kú aá ka ká áá. Aá lɛ ɔdā ole cījáalí kú ɛpɔ̄ kú aá dóódu ā kpó wā í mafú.

²²Aá wā amānyā ka aá gaá ka ɔdā nōo géē yá ɛcɔ̄bū ā, cɛ́ɛ́ ka alɔ le jé eko nōó gáā yá ā. Aá lɛ ɛyí kú ɔdā nōo tɛtɛ yá íkée ā ka lɛ alɔ, cɛ́ɛ́ ka alɔ kē lɛ eyī yɛ ɔdā nɛ̄ ɛyí nū wɛ ā.

²³Aá le ɔdā nōo géē yá oócí ā ka lɛ alɔ, cɛ́ɛ́ ka alɔ le jé ɔ́dāŋ ka aá wɛ aɔ́wɔ ɔkwɛ̄yi. Aá lɛ ɔdā olɔhi éyi ámāŋ ɔdā obɔ̄bí éyi yá, cɛ́ɛ́ ka alɔ mɔ́ɔ̄. Eko nɛ̄ alɔ lɛ ɔ́ má cɛ́ɛ́ okónu í hɛ́ alɔ ŋ́, ufi nɛ̄hi kē lɛ ālɔ̄ kwú.

²⁴Amáŋ aɛ́cí, aá mɛ́mla ɔdā dóódu nɛ̄ a gēe yá ā wɛ áncā. Ɔ̄cɛ dóódu nōo ka anúɔ gē gbā aá ā, gē tīihilɛ bɛ̄ɛka aá.

²⁵N lɛ ɔ̄cɛ éyi nōo lā ɛhíícō ā fu ɛɛ́. N géē bī ɔ̄ wā í kpɛ́fú tá aéwo ā ŋmá ɛnɔ̄ɔ̄cī. Ó kē í lɛ ojīlīmā ce iyē um. Ó géē lɛ ikpó da aɔ́cɛ́ ɛyí tāajɛ bɛ̄ɛka ɔ́tɔ̄ ā, klla í da uwá piyɔ́piyɔ́ bɛ̄ɛka ɛ́gɛ́nɛ̄ ɔ̄cɛ omɔmɛ gē lɛ ikpó da ɔmɛ ā.

²⁶Ɔnyɛ kú ipú aá ka gbɔbū ka ɔdānyā ɔ́ɔ géē yá ā? Cɛ́ɛ́ ka alɔ jé ka ɛlā kú aá le kpaakpa ā. Odúúmā kú aá í kɛlā lɛyíkwu ɔ́ gbɔbū ŋ́ má, aá yá fiíi ŋ́, ɛ́ɛ́ nɛ̄ aá gē ka ɔdā dúúmā ŋ́.

²⁷Ami Óndú ā wɛ ɔ̄cɛ aflɛ́yí nōo da ācɛ Ujerúsālɛm kahíníī, ‘Má ɔ̄ɔ̄, ācɛ ɔlɛ́ uwɔ ī wā ɔlɛ́ ɛɛ́!’ á. Ami wɛ ɔ̄cɛ nōo tū ɔ̄cotɛ̄hɔ̄ ɛhɔ̄ gāá cɛ̄ olɛhɔ̄ kú ɔdōōlɔhi lɛ Ujerúsālɛm á.

²⁸Eko nɛ̄ n pīyeyī má aɛ́cí ā, ɔ̄cɛ dúúmā kú uwá í nwū ācɛ ɛlā dúúmā glá ŋ́. Ɔ̄cɛ dúúmā kú uwá í kē cīla ɔ̄kā nɛ̄ n da uwá ā glá ŋ́.

²⁹Odúúdú aɛ́cí wɛ áncā, ɔdā dúúmā nēé ī yá ā kē wɛ ɔdā ɛflɛ́ɛ́fu. Aójibó kú aɛ́cí ā í lɔfú dúúmā ŋ́, í klla tīile dúúmā ŋ́ lɛbɛ̄ɛka owu áncā ā.