Read idoma AYISÁYA 43 Bible Online

AYISÁYA 43 - idoma bible

AYISÁYA 43

¹Ísrɛ̄lu, ɔdā nɛ̄ Óndú ā nōo yá uwɔ klla yá ɔ́na kú uwɔ ā ka ā yɔ̄ á. Ó kahíníī, “A yúúfi ŋ́, ohígbū ka n lɛ uwɔ fūla klla lɛ uwɔ hɛ́tá ɛɛ́. Ami lɛ iyē ce uwɔ á. A wɛ ákú um nɛ.

²Eko nɛ̄ a yɔ̄ ī bū ipú itekwú nɛ̄hi ā, n géē yɔ̄ pi uwɔ. Ísu ā í gáā fíyɛ́ uwɔ abɔ̄ klla je uwɔ bí glá ŋ́. Eko nɛ̄ a yɔ̄ ī yāwu bū ɔtāhɛ̄ ɔlá náaná, ɔlá ā í gáā yi uwɔ ŋ́. Ɛ́ɛ́ nɛ̄ ígblɛ́nyī ɔlá ā gē yá uwɔ ɔdā dúúmā ŋ́.

³Ó lɛ a ohígbū ka ami, Óndú ā, nōo wɛ Ɔwɔicō kú Ísrɛ̄lu nɛ̄ ɔ̄cɛ dúú í tōō le gbla um ŋ́ mā, wɛ Ɔwɔicō kú uwɔ, nōo gē nya uwɔ tá á. N le ācɛ kú Íjīpiti kwɛyí uwɔ, ká n̄ lɛ uwɔ fūla. N kē le ācɛ kú Itiyópīya mɛ́mla Usɛ́ba ā kpó fūla oyēeyī kú uwɔ.

⁴A ce um ɛgbá nɛ̄hi, a lɛ ojīlīma ɛgiyí um nɛ̄hi, n klla yíhɔtū uwɔ. Ohígbū ɔ́ɔmā, n géē je odúúdú ācɛ kú aéwo kwɛyí uwɔ, ká n̄ le fūla oyēeyī kú uwɔ.

⁵Aá yúúfi ŋ́, ohígbū ka n yɔ̄ pi aá. N gēe kpó ayí aá wā ɔlɛ́ ŋmá ɛnɔ̄ɔ̄cī. N klla í tá uwá bá ŋmá ɛnɔ̄ɔ̄nɛ̄.

⁶N géē da ācɛ kú ɛhícō ā kéē mā ayí uwā tá. N klla í da ācɛ ɛháajɛ kéē bī uwá háyi abɔ́ɔ ŋ́. Kéē lɛ ayí um nɔ̄nyīlɔ mɛ́mla ayí um nɔ̄nyā kpó kwúcē wā ɔlɛ́ ŋmá ɛbɛɛbɛ ipú ɛcɛ.

⁷Odúúdú uwā nēe lé iyē kwu um ā wɛ ācɛ ɔlɛ́ um. N kē yá uwā kéē yá ká ācɛ kéē cɛ̄tra um. Ami bī abɔ̄ kú um yá ɔ́na kú uwā á.

⁸Aá lɛ ācɛ ɔlɛ́ um kpó bɛ̄cɛ wā. É lɛ īkpēyī amáŋ é wɛ opeyī kpɔ́. É lɛ ahɔ̄ amáŋ é wɛ odahɔ̄ kpɔ́.

⁹Lɛ odúúdú aéwo ā hīgwú ká odúúdú ācɛ kéē le jīla. Ɛ̄nyá a kú aɛ́cí kú uwā ā ka ɔdā nōo í yá ɛcɔ̄bū glá ā, klla ka ɔdā nōo tɛtɛ yá ā tɛ́ɛcɛ lɛ alɔ glá ā? Kéē lɛ aíjáalí kú uwá kpó wā, kéē wā í cījáalí lɛ uwá kɛ́ɛ ka lɛ ā ɔkwɛ̄yi.

¹⁰Ācɛ Ísrɛ̄lu, aá ā wɛ aíjáalí kú um á. Aá wɛ ɔ̄cocɛ̄hɔ̄ kú um nɛ̄ n fu á, cɛ́ɛ́ ka aá lɛ um jé, lɛ ɔtū kpó ce um, klla le jé ka ami ōfōōfū um wɛ Ɔwɔicō á. Ɔwɔ ɔhá dúúmā í yɔ̄ gbɔbū ga um, ɛ́ɛ́ nɛ̄ ɔwɔ ɔhá dúúmā gē yɔ̄ igbīhi kú um.

¹¹Ami ōfōōfū um wɛ Óndú ā á. Ohɔ́ɔnyɛtá dóódú í kē yɔ̄ gwū um tá ɛ́ɛ́ gɛ ŋ́.

¹²N le ka ka n géē nya aá tá, n kē le yá lɛ ā. N lɛ aá nyatá. Aɛ́cí kú aéwɔhá dúúmā í kē yá ɔdā nyā ipú aá jééjéē ɛ́ɛ́ ŋ́. Aá wɛ aíjáalí kú um mɛɛ́ á. Ami nōo wɛ Óndú ā ka lɛ a á.

¹³Ami wɛ Ɔwɔicō á, n kē wɛ Ɔwɔicō piyóo. Ɔ̄cɛ dúúmā í yɔ̄ nōó géē hɛ́ ɔ̄cɛ tá ŋmá abɔ̄ kú um glá ŋ́. Ɔ̄cɛ dúúmā í kē ci um úklɔ́, nɛ̄ n gē yá ā glá ŋ́.

¹⁴Ayisáya klla ka gɔbū ka Óndú ā ɔ́ɔ wɛ Ɔwɔicō kú Ísrɛ̄lu, nɛ̄ ɔ̄cɛ dúú í tōō le gbla ɔɔ́ ŋ́ mā á. Ka anú nɛ̄ ɔ́ɔ hɛ́ uwā tá ā ɔ́ɔ da uwá kahíníī, “Ohígbū aá ā, n géē tɛ̄hɔ̄ í je Ubábīlɔn wúlatāajɛ. Ɔga ōtá kú ācɛ kú Ubábīlɔn ā géē je pīya íbáa ōdɛ mɛ́mla ikwú ōje.

¹⁵Ami wɛ Óndú ā, nōo wɛ Ɔwɔicō kú aá nɛ̄ ɔ̄cɛ dúú í tōō le gbla um á. Ami yá aá á, Ísrɛ̄lu. Ami kē wɛ ɔcɛ́ kú aá á.

¹⁶Ami nōo wɛ Óndú ā tá ɔwɛ yɛ ipú ísu, klla hɛ́ ɔwɛ bū éŋkpɔ̄ nɛ̄hi ā á.

¹⁷Ami kpó aícɔ́ɔja mɛ́mla aɔ́nya mɛ́mla aúgbɔ́ɔ́nya kú ɛfú wā í nū aá inya á. Amáŋ n lɛ uwá kpó pi tū ɛháajɛ éŋkpɔ̄ ā. É má gwōnū, é kē cāŋjɛ glá gɛ ŋ́. É le pɛ́ gekwū bɛ̄ɛka ɛ́gɛ́nɛ̄ ígblɛ́nyī ɔlá gē nyí ā.

¹⁸Amáŋ aá blakwu ɔdā nōo tɛtɛ le yá gaá le yɛ ɛɛ́ mā ŋ́. Ɛ́ɛ́ nɛ̄ aá gē gbohílīpú tū ɔdā nōo yá íkée ā gɛ ŋ́.

¹⁹Mɔ́ɔ̄, n yɔ̄ ī yá ɔdā ɛ̄pīpɛ̄ ɛɛ́. Ɔdā ɔ́ɔmā kōō yɔ̄ ī yá ɛɛ́. Aá mɔ́ɔ̄ ŋ́ nɛɛ? N géē tá īkpāŋdrā bū ipú ígbíli, klla í yá ka ísu kóō pɛ́ ipú ígbíli.

²⁰Aɛ́bɛ́ kú ipácí ā nááná kōō gē ce um ojīlīma. Kwu aógbo mɛ́mla aókokoŋkofí géē cɛ̄tra um ohígbū ka ami gē je éŋkpɔ̄ lɛ uwá ipu ígbíli á. Ami klla yá nɛ̄ ísu gē cēenyi ipú ajɛ íkpakplā ká n̄ je éŋkpɔ̄ ōgwá lɛ ācɛ ɔlɛ́ um nɛ̄ n fu ā á.

²¹Uwá wɛ ācɛ nɛ̄ n yá lɛ īyī um á, é kē í gwíijē í cɛ̄tra um.

²²Amáŋ, ɛ̄jɛ̄ kú um le jɛ̄ aá, ācɛ Ísrɛ̄lu. Aá kē gbā um ɛ̄gbā ŋ́.

²³Aá bī aálá kú ɛya o yɔlá dúúdú kú aá, gé um ŋ́. Ɛ́ɛ́ nɛ̄ aá gē bī ɛya ōgwo kú aá le ojīlīma ce um ŋ́. Ń kē je unwalu lɛ aá, ŋmá lɛ ō da aá ka aá kpó aɔ́da ɛ̄gbā gé um ŋ́. Ɛ́ɛ́ nɛ̄ n gē je unwalu kú ɔtulalī otu ɔlá lɛ aá ŋ́.

²⁴Aá kē bī ɔtulalī gé um, ɛ́ɛ́ nɛ̄ aá gē lɛ ijē kú aɛ́bɛ́ kú ɛya gbā um ɛ̄gbā ŋ́. Okɔkɔ ɔ́ɔmā, aá bá ī je unwalu gā um, mla ínoōbīya kú aá. Ɛ̄jɛ̄ kú ɔ́bíipí kú aá ā le jɛ̄ um bɛ̄ɛka iyó ā ɛɛ́.

²⁵Nááná ā, ami kē wɛ Ɔwɔicō nōo gē je ɔ́bíipú kú aá yá aá ɛhi á. N kē í yá ɛ̄nyā ohígbū ɔ̄cɛ nɛ̄ n wɛ ā. Ń gáā bī ɔ́biipú kú aá ɔtū lɛyíkwu aá ɛ́ gɛ ŋ́.

²⁶Aá lɛ ɔdā nōo tɛtɛ yá ā blatū um. Aá wā ka alɔ ga ɔnū ɛpɔ̄. Aá lɛ ɔkɔ kú aá ka, cɛ́ɛ́ ka aá le mafú ka aá ɔ́ɔ lé ɛpɔ̄hi á.

²⁷Ádáádā aá kú aflɛ́yí ā le ɔ́bíipú bī. Aótrɛ̄yí kú aa kē lɛ íne kú um bīya.

²⁸Anú yá ɛ́ɛ́ nɛ̄ n je uwēyī lɛ aótrɛ̄yí kú ɛga otīihɔ kú um ā á. N klla kwu ācɛ Ísrɛ̄lu í tá kéē lɛ uwá kpó yíífi, kéē klla je uwēyī lɛ uwá.”