Read idoma AYISÁYA 44 Bible Online

AYISÁYA 44 - idoma bible

AYISÁYA 44

¹Óndú ā klla kɛlā gɔbū kahíníī, “Aá jāhɔ̄, ugbɛ kú Ujékɔ̄pu, ɔ̄cocɛ̄hɔ̄ kú um, mɛ́mla ācɛ Ísrɛ̄lu nɛ̄ n fu ā.

²Ami wɛ Óndú ā nōo yá aá ā á. Ami húmáyí tá aá abɔ̄ ŋmíīfī nɛ̄ ɛ́nɛ́ ma aá ā. Aá yúúfi ŋ́, ayí Ujékɔ̄pu ɔ̄cocɛ̄hɔ̄ kú um. Aá nēe he um ɔtū nɛ̄ n fu ā.

³Ohígbū ka n géē pīya éŋkpɔ̄ klá ajɛ nōo le ŋmó ā. Aɔ́kpá klla í cēenyi ipú ajɛ íkpākplā. N géē cē ɔfú kú um mɛ́mla ɔhā kú um klá ayí aá, mɛ́mla ayááyí aá.

⁴É í jɛ̄ gicō lɔɔlɔhi bɛ̄ɛka ácí kú ɔgwā ā. Ámāŋ bɛ̄ɛka ɔcí nōo bū kwu okónu ɔkpá ā.

⁵Ācɛ alɛwa géē ka ka aá ɔ́ɔ wɛ ákú Óndú ā. Aóhī kú uwā géē ka ka aá ɔ́ɔ ŋmá ugbɛ kú Ujékɔ̄pu. Aóhī kú uwā géē tá iyē tū abɔ̄ kú īyī uwā ka aá ɔ́ɔ wɛ ákú Óndú ā. É klla í lé iyē nōo í cābɔ̄ ka uwá ɛ́ɛ wɛ éyi ipú ācɛ kú Ɔwɔicō ā.

⁶Ami wɛ Óndú ā nōo lɔfú fíyɛ́ dúú á. Ācɛ Ísrɛ̄lu, ami kē wɛ ɔcɛ́ kú aá nōo ī hɛ́ aá tá á. Ami wɛ aflɛ́yí mɛ́mla ámōōmɛ á. Ɔwɔ ɔhá dúúmā í yɔ̄ gwū um tá ŋ́.

⁷Ɔ̄nyɛ ɔhá yɔ̄ bɛ̄ɛka ami ā? Ɔ̄cɛ ɔ́ɔmā kóō le ka péee ipéyī um abālɔbányā. Ɔ̄nyɛ ka odúúdú ɔdā nōó géē yá ŋmá ohútu yɛ jāā ga ámōōmɛ ā glá ā?

⁸Aá yúúfi ɛ́ nɛ̄ ɔtū gē hɛ́ aá ko ŋ́. N tɛtɛ le ka tɛ́ɛcɛ lɛ aá ŋmá íkée ɔdā nōo géē yá ā ɛɛ́. Aá kē wɛ ijáalí kú um á. Ɔwɔicō ɔhá yɔ̄ gwū um tá ɛɛ́? Ɔwɔ dúúmā ɔhá í yɔ̄ nōo lɔfú klla ī yɔ̄ piyóó bɛ̄ɛka ápátɛ̄cɔ̄ nɛ̄hi ā ŋ́. N jé odúúmā ɔhá gwū īyī um tá ŋ́.

⁹Odúúdú ācɛ nēe gē yá aɛ́cí klla ī pá ɛcí ā wɛ ɛflɛ́ɛ́fu. Aɛ́cí nēe kē he uwá ɔtū ō yá ɔ́ɔmā í kē tīile dúúmā ŋ́. Odúúdú ācɛ nēe gē pā ɛcí nyā, wɛ aópeyī mɛ́mla aógwuda. Uwēyī kē í kwú uwā piíí.

¹⁰Ó cɛgbá ka ɔ̄cɛ kóō bī oje le yá ojibó ámāŋ ma ɛcí nōó tīile dúúmā ŋ́ mā ŋ́?

¹¹Ɔ̄cɛ nōo ī gbā ɛcí ā mɛ́mla odúúdú ācɛ nēe gē pā ɛcí ɔ́ɔmā ā, uwēyī géē kwú uwā. Ohígbū ka ācɛ nēe ma aójibó kú ɛcí ā wɛ alɛɛcɛ áncā nɛ̄. Odúúdú uwá kéē wā í háyi mɛ́mla anú ɔnū ɛpɔ̄. Ufi nɛ̄hi mɛ́mla uwēyī kē géē kwú uwá ŋmá abɔ́ɔ piíí.

¹²Onɔwá ā gē je oje tá ɔlá. Eko nōó le kwú ɔlá yōō, ó kwú omútāgā ú cɛ́ɛ́ ó bī odúúdú ɔfú kú abɔ̄ kú nū lɛ ɔ́ na ɛdɔ ɔdā nōó tíne kóō wɛ ā. Abɔ̄ ó gē yɔ̄ ī na ɔwá nyā ā, ɛmiyɛ mɛ́mla ijēēnyi gē ŋmó ɔ̄. Ɛ̄jɛ̄ kē ī jɛ̄ ɔ̄.

¹³Ɔ̄cogbɔ̄cí ā lɛ ɔcí hɛ́, lɛ ɔ́ miya klla lɛ ɔgba pi yɛ ɔ́ ɛ́gɛ́nɛ̄ ó tíne ō gbā ɔ̄ lɛ ā. Cɛ́ɛ́ ó lɛ ɔ́ gbā ojibó kú ɔ̄cɛ lɛbɛ̄ɛka ɔ̄cɛ ohéyīfuú ā. Cɛ́ɛ́ é klla kwú ɔ̄ ú hayi ipú inu ikpɛ́cí.

¹⁴Ɔ̄cɛ lɔfú hɛ́ ɔcí kú Usɛ́da, ámāŋ uloko, ámāŋ Usáyíprɛ̄si, ŋmá ipácí glá. Ámāŋ ó lɔfú lɛ ɔcí nēé hī ka Upáyin ā tū, gbēyī eko nɛ̄ ɔwɔ lɛ ɔ́ jɛ̄ nōó le jɛ̄ ɛ́ɛ́ kóō hɛ́ ɔ̄.

¹⁵Ɔcí nēé hɛ́ ɔ́ɔmā, ācɛ gē lɛ ōhī kú nū kpó gwɔ́ɔ́lá kéē jɛ̄ ámāŋ kéē le yá ɔdōlé. Cɛ́ɛ́ é kwú ōhī kú ɔcí ɔ́ɔmā piíí ú le ɛcí gbā klla gbɔɔ́ ō pā ɔ̄. É bī ɔcí ā le ojíbó gbā, cɛ́ɛ́ é túkpɛɛ́ gē gbā ɔ̄ ɛ̄gbā.

¹⁶Ɔ̄cɛ bī ōhī kú ɔcí ā gē le gwɔ́ɔ́lá, ī le pá ɛbɛ́ lé, klla gē jɛ̄. Cɛ́ɛ́ ó gē kahíníī, “Aháa! Ofū kú um mɛ ɛɛ́. Ɔlá ā lɔhi ō má íbí.”

¹⁷Cɛ́ɛ́ ohile kú ɔcí ā, ó kē kwú ɔ̄ɔ̄ ú gbā ojíbó, klla gē túkpɛɛ́ ī gbā ɔ̄ɔ̄ ɛ̄gbā. Ó gē gbā ɔ̄ ɛ̄gbā lɛ ɔ́ kahíníī, “Awɔ wɛ ɔwɔ kú um á, lɛ um nyatá.”

¹⁸Íla mɛ́mla ogwuda í cɛ̄ lɛ ācɛ ā jé ɔdā nēé bá ī yá ā ŋ́. Eyī kú uwá le gwū, ohílīpú kē le nyɛ́ lɛ uwá ō jé ɔkwɛ̄yi ā.

¹⁹Ɔ̄cɛ nōo gē gbā ɛcí ɔ́ɔmā í lɛ ohílīpú dúúmā ŋ́. Óō lɛ nɛ̄, ó yɛ í da īyī nū kahíníī, “N kwu ōhī kú ɔcí nyā ú kpó ce kwu ɔlá, kē lɛ igbō yá ɛyí ɔlá ā. N klla le ɔlá ā pá ɛbɛ́ le lé. Ohile kú ɔcí ā nɛ̄ n je gbā ɛcí yɔ̄ á. Abɔ̄ ó lɛ ɛ́ɛ́ nɛ̄ n yɔ̄ ī tukpɛɛ́, yɔ̄ ī gbā ígbɔ̄cí ɛ̄gbā ā.”

²⁰Ucē kú nū nyā í lɛ ɛyí ŋ́ lɛbɛ̄ɛka ɔ́dāŋ nɛ̄ ɔ̄cɛ yɔ̄ ī fú ewo lé ā. Ɔ̄cɛ nōo ī pā ɛcí ā líla nɛ̄hi, nɛ̄ íla kú nū ā cɛ̄ lɛ ɔ́ le nyíleyī nɛ̄ɛ̄nɛ̄hi. Ó kē hɛ́ īyī nū tá glá ɛ́ nōó gē cɛ̄ gbóógbóō ka ɛcí nɛ̄ anúɔ bī abɔ̄ ā ɔ́ɔ wɛ Ɔwɔicō ŋ́ nɛɛ ŋ́.

²¹Óndú ā klla gbɔɔ́ ō kɛlā lɛ Ísrɛ̄lu kpɔ́. Ó kahíníī, “Ísrɛ̄lu, blakwu ɔdā nēe bá nyā. A wɛ ɔ̄cocɛ̄hɔ̄ kú um nɛ. Ami yá uwɔ ka wɛ ɔ̄cocɛ̄hɔ̄ kú um á. N kē gáā mlanyi uwɔ gbóógbóō ŋ́.

²²N lɛ ínoōbīya kú uwɔ kpó bónu ŋmá ɛgiyí uwɔ bɛ̄ɛka ɛ́gɛ́nɛ̄ owu gē kpó ojuja nyɔ̄ ā. N kē kwú ɔ́bíipú kú uwɔ í mlányi bɛ̄ɛka ɛ́gɛ́nɛ̄ ébú gē bítāajɛ ā. Kwúcē wā ɛgiyí um, ohígbū ka n lɛ uwɔ fūla ká ā le hɛ́tá ɛɛ́.

²³Anɔ́ɔ Ayisáya kahíníī, Ɔkpáncō, gwéeyē, ohígbū ka Óndú ā lɛ ɔ́ yá ɛɛ́. Ajɛ, tɔ́ɔga gbōmgbōm. Aɛ́fu mɛ́mla ɛjɛ̄ɛ̄jī aɔ́cí nōo bá ipú ūpū ā, ijē kóō kwu aá okónu dúú. Ohígbū kú Óndú ā lɛ ācɛ Ísrɛ̄lu hɛ́tá ɛɛ́, é klla géē cɛ̄tra anú ipú ajɛ kú Ísrɛ̄lu.”

²⁴Ɛlā nɛ̄ Óndú ā, nōo gē hɛ́ aá tá ā, nōo kē yá aá ā ka ā yɔ̄ á. Ó kahíníī, “Ami wɛ Óndú ā, nōo yá ɔdā dóódu á. Ami ofōōfū um nā ɔkpáncō daa klá ɛyí ɛcɛ á. Ɔ̄cɛ dóódu í kē tá um abɔ̄ yá ɛcɛ nōo tá kpátáá nyā ŋ́.

²⁵Ami je abajá kú ācomáabajá pīya ɛ̄kɛ̄mgbɛ̄, klla ī je ācogwɛ́bā ā yá olíla á. Ami ī tá ɛlā kú ācojéeyī, klla yá ka íjééyī kú uwá kɔ́ɔ wɛ íla á.

²⁶Amáŋ eko nɛ̄ ɔ̄cocɛ̄hɔ̄ kú um lɛ ɛlā ka kɔ́ɔ í yá, n géē yá kóo le cɛ̄ ɛ́gɛ́nɛ̄ ó ka ā. Eko nɛ̄ n lɛ ɔ̄cotɛ̄hɔ̄ kú um dúúmā tū lɛ ojuju kú um ka tɛ́ɛcɛ, n gē yá ka ojuju kú um ɔ́ɔmā kóō le yá jīla. Ami ā piíí gē ka lɛ Ujerúsālɛm ka ācɛ géē lā ipú nū kpɔ́ ɛɛ́ á. Ami klla gē da aígelī kú ajɛ Ujúda ké kllá í tū uwā gwó igbɔhá kpɔ́ ɛɛ́ á. Ka n klla ī tū aígelī nēe wúlatāajɛ ɔ́ɔmā gllayá á.

²⁷Ami je ɔ́da lɛ ísu nɛ̄hi kóō je ŋmó ŋmá ajɛ, ka n klla í je aísu nēe ī pɛ́ tū ɔ̄ ā ŋmó ŋmá ajɛ á.

²⁸Ami wɛ ɔ̄cɛ nōo da Usáyīrɔsi kahíníī, anú géē wɛ ɔcɛ́ nōo géē gbō ajɛ ga um á. Ka ɔ́ɔ kē í yá ɔdā nɛ̄ n tíne ka ɔ́ɔ yá ā á. Ami kē da ɔ́ kóō kē je ɔ́da kéē lɛ Ujerúsālɛm túgwó igbɔhá á, cɛ́ɛ́ kéē kwú ikpó kú Agblīihɔ-nɛ̄hi kú Óndú ā ú táajɛ igbɔhá kpɔ́ á.”