Read idoma AYISÁYA 45 Bible Online

AYISÁYA 45 - idoma bible

AYISÁYA 45

¹Ayisáya klla kɛlā gɔbū kpɔ́ ka Óndú ā ɔ́ɔ kɛlā lɛ Usáyīrɔsi, nɛ̄ ɔ́ɔ fu kú ɔ̄ wɛ ɔcɛ́ ā kahíníī, “Usáyīrɔs, n kwú ɔfú ú gā uwɔ cɛ́ɛ́ ká ā yá aéwɔhá alɛwa lé. N gē tū uwɔ ɛhɔ̄ nyɔ̄ í nū aɔ́cɛ́ alɛwa ŋmá akpa kú ɔcɛ́ kú uwā. Kú ā klla mīyɛ ɔfú mɛ́mla ɔfulā kú aɔ́cɛ́ alɛwa. Ami nōo wɛ Óndú ā géē nwūla odūngwɔ̄wɛ kú aígelī dóódu ga awɔ. Nɛ̄ ɔ̄cɛ dúúmā í gaá gwū ɔwɛ tū uwɔ glá ŋ́.

²Ami abɔ̄yī um géē nyɔ̄ gbɔbū uwɔ ká n̄ yɔ̄ ī bī uwɔ jé ɔwɛ. N géē cīla aɛ́fu dóódu tū mɛ́ɛ́lɛ́ ŋmá iyɔ̄bū uwɔ. N géē ca aódūngwɔ̄ɔwɛ kú oje udɔ ā bónū. N klla í je oje ogblógbló nēé le gwū aódūngwɔ̄ɔwɛ ā kpó hɛ́ kpɛɛ́kpɛɛ́ bónū.

³N géē kpó aɔ́dā ku aágbénú otīile nēe bá eyepiipu ɛga odobu mɛ́mla aɛ́nɛ̄ é kpó tayínū ā ga uwɔ. Cɛ́ɛ́ ká ā le jé ka ami nōo wɛ Ɔwɔicō nōo wɛ Óndú ā, nɛ̄ ācɛ kú Ísrɛ̄lu gē gbɛ̄ɛ̄gbā ā hī uwɔ iyē abɔ̄yī uwɔ á.

⁴Nááná nɛ̄ á jé um ŋ́ mā, n lɛ ojīlīma nɛ̄hi ce uwɔ. N fu uwɔ ce, cɛ́ɛ́ ká ā tá ācɛ kú Ísrɛ̄lu, nēe wɛ ɔ̄cocɛ̄hɔ̄ kú um ā abɔ̄. É wɛ ācɛ nɛ̄ n fu kéē wɛ ákú um nɛ.

⁵Ami ōfōōfū um wɛ Ɔwɔicō á, ɔwɔ ɔhá dúúmā í yɔ̄ gwū um tá gɛ ŋ́. Nááná nɛ̄ á jé um ŋ́ mā, odúúdú ɔfú nɛ̄ a cɛgbá ā, n géē je gā uwɔ̄.

⁶N yá ɔdā nyā cɛ́ɛ́ ka odúúdú ācɛ kú ɛcɛ nyā, o ŋmá ɛnɔ̄ɔ̄nɛ̄ ga ɛnɔ̄ɔ̄cī kéē le jé ka ɔwɔ ɔhá dúú í yɔ̄ gwū um tá ɛ́ɛ́ gɛ ŋ́.

⁷Ami yá ɔlá ofíyajɛ mɛ́mla obū á. Ami gē ce abahi klá ɔ̄cɛ á, ami klla kē ī bī ífi gé lɛ ɔ̄cɛ á. Ami nōo wɛ Óndú ā yá odúúdú aɔ́dā nēe bá nyā á.

⁸N géē yá kú ācɛ ɔlɛ́ um kéē gbɔɔ́ ō yá aólɛlā kú uwā lé cɔcɔcɔ bɛ̄ɛka ɔwɔ nōo gē yā ŋmá ɔkpáncō wāajɛ ā. Cɛ́ɛ́ ká ɛjɛ̄ɛ̄jī ācɛ kéē gbɔɔ́ ō yá ɔdā nɛ̄ n je kóō le kpaakpa ā.

⁹“Ɔ̄cɛ dúúmā nōo gē kwu ɔ̄cɛ nōo yá ɔ̄ ā ɔkɔ géē je yíífi Aá má ɛ̄nyā mla um ɛ́ɛ́, ó lɛ ɛga dúú nɛ̄ ɛtɛ́ nɛ̄ ɔ̄cɛ bī abɔ̄ kú nū ma ā gē kwu ɔ́ ɔkɔ jéjéē ɛɛ́? Ɛtɛ́ ā lɔfú da ɔ̄cɛ nōo ma ɔ́ ā ka ɔdí nɛ̄ ɔ́ɔ yá ā glá āā? Ámāŋ ka ɔ́ jé ɔdā nɛ̄ ɔ́ɔ gē ma ā ŋ́. Ámāŋ ka ɔdíya nɛ̄ ɔ́ɔ ma ɛga nēé gē lɛ abɔ̄ bī anúɔ kwu anúɔ ŋ́ mā ā a?

¹⁰Ó gáā lɔhi lɛ ɔyí dúúmā nōo lɔtū da ádā mɛ́mla ɛ́nɛ́ nū ka ɔdíyá nēe ma anúɔ ɛdɔ ɔ̄cɛ nɛ̄ anúɔ wɛ nyā āa? Ɔdíyá nēé kōō ma anúɔ dɛ̄ɛ̄ āa ŋ?

¹¹Ɛlā nɛ̄ Ɔwɔicō, nōo wɛ Óndú ā, kú Ísrɛ̄lu nɛ̄ ɔ̄cɛ dúú í tōō le gbla anú ŋ́ mā, nōo klla yá Ísrɛ̄lu ā ka ā yɔ̄ á. “Aá lɛ íkwu o da um ɔ̄kā lɛyíkwu ayípɛ̄ ɔlɛ́ um, ɛ́ɛ́ nɛ̄ aá kōō ī da um ɔdā nɛ̄ n cíkā ō yá ŋ́. Kɛ̄ɛ ka aá gē je ɔ́da ga um ohígbū úklɔ́ abɔ̄ kú um glá?

¹²Ami yá ɛcɛ, klla yá alɛɛcɛ bá ipú nū á. Ami bī abɔ̄ kú um le nā ɔkpáncō daa klá ɛyí ɛcɛ á. Ami lɛ íkwu klla gē je ɔ́da lɛ ɛnɔ, ɔyā mɛ́mla odúúdú aínyílɔ́ɔwɔ ā kéē wā ɛcɛ á.

¹³N lɛ Usáyírɔsi je gicō kóō lɛ ɔdā okpaakpa kú ɔtū kú um ā yá. N klla géē yá ka ɔwɛ dóódu nōó ī yɛ ā kóō tɔ́ɔtɛ́ lɛ ɔ́. Ó géē tú igelī kú ɔlɛ́ um nōo lé ka Ujerúsālɛm ā gwó. Ó klla í hɛ́ ācɛ ɔlɛ́ um nēe wɛ aɔ́fiyɛ ajɛ aéwɔhá ā tá, ó gáā mīyɛ ije ámāŋ ɔdā dúúmā ŋ́.” Ami nōo wɛ Óndú ā, nōo lɔfú fíyɛ́ dúú ā kɛlā nyā á.”

¹⁴Ayisáya klla ka gɔbū ka Óndú ā ɔ́ɔ kahíníī, “Agbénú kú Íjīpiti mɛ́mla Itiyópīya géē je kpó pīya ákú uwɔ. Ācɛ Usɛ́ba nēe wɛ aágwu nɛ̄hi ā géē wɛ aɔ́fiyɛ kú uwɔ. A géē kpó agbá kwu uwá abɔ̄, nēé géē yɛ tá uwɔ igbīhi. É géē tūkpɛɛ́ ga uwɔ, klla í lɛ okónu ce ɔ̄ ga awɔ ka, Ɔwɔicō ɔ́ɔ yɔ̄ pi awɔ̄. Ka anú ofōōfūnū ɔ́ɔ kē wɛ Ɔwɔicō á.”

¹⁵Anɔ́ɔ Ayisáya klla kahíníī, “Ɔwɔicō kú Ísrɛ̄lu, awɔ nōo gē nyā ācɛ ɔlɛ́ uwɔ tá ā, wɛ Ɔwɔicō nōo ī je īyī nū tayínū.”

¹⁶Ó klla kahíníī, “É géē je uwēyī lɛ odúúdú ācɛ nēe gē pā ɛcí ā, é klla í yá kú ɔtū kú uwā kóō kwú gbájí. Uwēyī kē í kwú odúúdú uwā.

¹⁷Amáŋ Óndú ā le ācɛ Ísrɛ̄lu nyatá. Ó kē í nya uwá tá piyóo. Uwēyī í klla gáā kwú uwā gbógbóō igbɔhá ɛ́ɛ́ gɛ ŋ́”

¹⁸Ɔwɔicō ā nōo yá ɔkpáncō ā, anú wɛ Óndú á. Anú yá ɛcɛ, yá ɔ́na kú nū klla je ɔ́ kwu kli á. Ó yá ɛcɛ kóō tá áncā ŋ́, amáŋ ó yá ɔ̄ kú ācɛ kéē lā anú. Anú ā wɛ ɔ̄cɛ nōo ka kahíníī, “Ami wɛ Óndú ā á. Ɔwɔ ɔhá dúúmā í yɔ̄ gwū um tá ŋ́ má.”

¹⁹Ayisáya klla ka ka Óndú ā ɔ́ɔ kahíníī, “Ń kɛlā wɛɛlɛ tayínū ŋ́, ɛ́ɛ́ nɛ̄ n gē je īyī um tayínū ŋ́. N je ɔ́da lɛ ācɛ kú Ísrɛ̄lu kéē wā í dɔɔ̄kā um nēé gáā má um nɛɛ ŋ́. Ami nōo wɛ Óndú ā gē kɛlā ɔkwɛ̄yi. N klla ī ka ɔdā nōo le kpaakpa ā tɛ́ɛcɛ.”

²⁰Ó klla ka Óndú ā ɔ́ɔ kahíníī, “Aá túbá tɔ̄há, ācɛ kú aéwɔhá ā. Odúúdú aá nēe hile ŋmá ipú aéwɔhá ā. Aá lɛ īyī aá kpó wā, odúúdú ācɛ nēé ī kpó aojibo kú ɛ̄cí kú uwā ŋmá ɛga éyi ga ɛga ɔhá ā, nēé klla í gbɔ̄ɔkɔ lɛ ɛcí nōó nya uwá tá glá ŋ́ mā. Ācɛ ɛ́gɔ́ɔ́mā wɛ aólíla nēé jé ɔdā dúúmā ŋ́.

²¹Aá lɛ ɛpɔ̄ kú aá kpó wā, odúúdú aá kóō kpó ɛyí kwɔhá ka aá ga ojuju. Ɔ̄nyɛ ka ɔdā nōo yá nyā tɛ́ɛcɛ īkée āa? O wɛ ami Óndú ā ŋ́ nɛɛ? Ami, Ɔwɔicō nōo ī yá ɔdā okpaakpa, klla gē nya ācɛ ɔlɛ́ nū tá á. Ɔwɔicō ɔhá dúúmā í yɔ̄ gwū um tá ŋ́.

²²N hi odúúdú ācɛ kú ɛcɛ igwú ka, aá pɛ́ wā ɛgiyí um cɛ́ɛ́ ka aá le nyatá. Ami ōfōōfū um wɛ Ɔwɔicō nōo yɔ̄ á.

²³Okónu nɛ̄ um ce ā wɛ ɔkwɛ̄yi, ó gē pīyabɔ̄ ŋ́. N bī odúúdú ɔdā nɛ̄ n wɛ ā le ɔkpá gbo ɛɛ́. Ka odúúdú ācɛ géē wā í lɛ okwúukwu kwaajɛ iyɔ̄bū um klla géē gbo ɔkpá ka aá ɔ́ɔ géē lɛyítáajɛ ga um piíí.

²⁴É géē ka ka ami, Ɔwɔicō, ōfōōfūnū um gē yá ɔda nōo le kpaakpa klla ī le ɔfú tū ɔ̄cɛ iyē á. Amáŋ uwēyī géē kwú odúúdú ācɛ nēe ī wɔ́tū um ā.

²⁵Ami nōo wɛ Óndú ā géē nya odúúdú ayááyí kú ipɔ́ɔma kú Ujékɔ̄pu tá. É kē í bī um gwō klla í cɛ̄tra um.”