Read idoma AYISÁYA 47 Bible Online

AYISÁYA 47 - idoma bible

AYISÁYA 47

¹Óndú ā kahíníī, “Ubábīlɔn, ga ajɛ ŋmá akpa kú ɔcɛ́ kú uwɔ, cɛ́ɛ́ ká ā gaá cīce ajɛ pɛtɛɛ ipú úmlá. A tɛtɛ lɔhi lɛbɛ̄ɛka ɔyípɔ́ncɛ́nyā nōó jé ɔ̄cɛnyilɔ ŋ́ mā. A wɛ igelī nɛ̄ ɔ̄cɛ dúúmā í yálé jéjée ɛɛ́ ŋ́. Amáŋ á le mlɔ́mlɔ́ klla lɔhi iyē lɛ ā ɛ́ɛ́ gɛ ŋ́. Ohígbū ka a kwú pīya ɔfiyɛ abālɔbányā ɛɛ́.

²Kwú ɛgɔ̄ ú ká ā gbɔɔ́ ō gbā umu mɛ́ɛnɛ. Kwú īlī ōkléeyī mɛ́mla īlī ifa kú uwɔ lɔhilɔhi ā ú kpó plla ŋmá iyē. Lɛ áca kpó ká ā bēhé aísu ā mɛ́ɛnɛ.

³Ācɛ géē má ohɛ́ɛwa kú uwɔ uwēyī kē í kwú uwɔ ipéyī uwā. Ohígbū ka n géē gwū uwɔ ɔ́ci piíí, ɔ̄cɛ dúúmā í kē gáā ci um anú ŋ́.

⁴Ami nōo wɛ Óndú ā nōo lɔfú fíyɛ́ dúú ā wɛ Ɔwɔicō kú Ísrɛ̄lu, nɛ̄ ɔ̄cɛ ámāŋ ka ɔdā dóódu í gbla um ŋ́ mā. Ami gē nya ācɛ Ísrɛ̄lu tá á.

⁵Ubábīlɔn, cīce ipú obū cíí. É klla gáā hi uwɔ ka ɔcányā kú aéwɔhá ā ɛ́ɛ́ gɛ ŋ́.

⁶N le cɔ̄nū mɛ́mla ācɛ ɔlɛ́ um, N yá uwá bɛ̄ɛka ɔdā nēé wɛ ákú um ɛ́ɛ́ gɛ ŋ́ mā. Anɔ́ɔ n le uwá kpó tá ipú abɔ̄ kú uwɔ. Á kē méyīnyinyi uwá ŋ́. Kwu aókplícī kú uwá ā nááná, a yá uwā ōwē lɔfú lɔfú.

⁷A gbɛlá ka anúɔ géē wɛ ɔcányā ā piyóo. Á kē gbɛlá lɛyíkwu aɔ́dā nēe bá nyā, ɛ́ɛ́ nɛ̄ a gē gbɛlá ɛ́gɛ́nɛ̄ odúúdú nū gáā ŋmɛ́yí lɛ ā ŋ́.

⁸Jāhɔ̄ ká ā pó ɛnyā, awɔ nɛ̄ abahi he uwɔ ɔtū nɛ̄hi ā. A gbɛlá ka abɔ̄ ɔ́ɔ gáā kwu anúɔ glá ŋ́, ka anúɔ ɔ́ɔ lā ɛbɔ́. A gbɛlá ka anúɔ lɔfú bɛ̄ɛka Ɔwɔicō ā nɛ. Ka ɔ̄cɛ ɔhá dúúmā ɔ́ɔ klla yɔ̄ bɛ̄ɛka anúɔ ā ɛ́ɛ́ gɛ ŋ́. A gbɛlá ka anúɔ ɔ́ɔ gáā cice ɔnyōkwū glá ŋ́. Ayí anúɔ í kē gáā pɛ́ kwú hɛ̄ anúɔ abɔ̄ tá ɛ́ɛ́ gɛ ŋ́.

⁹Amáŋ, imabɔ̄ nɛ̄hi nɛ̄ a ī yá ā géē je nyílá ɛ̄cī éyi. Cɛ́ɛ́ eko kpiíí, ipú ɛ̄cī ékpónú, a kwú pīya ɔnyōkwū, ayí uwɔ kē í pɛ́ kwú.

¹⁰Awɔ abɔ̄yi uwɔ gē gbɛlá ka abɔ̄ ɔ kwu anúɔ glá ŋ́, nááná nɛ̄ a yɔ̄ ī yá ɔdōbɔ̄bí ā. A kē gbɛlá ka ɔ̄cɛ dúúmā ɔ́ɔ má anúɔ glá ŋ́. Ɔdōōjé mɛ́mla íjééyī kú uwɔ ā lɛ uwɔ bī nyɔ̄ í gebí ɛɛ́. A gē da īyī uwɔ kahíníī, “Ami lɔfú fíyɛ́ dúú á. Ɔ̄cɛ ɔhá dúúmā í lɛbɛ̄ɛka ami ā ɛ́ɛ́ gɛ ŋ́.”

¹¹Ámíyā géē yá uwɔ, nɛ̄ imabɔ̄ kú uwɔ ā í kē gáā ci ɔ̄ ō wā glá ŋ́. Ámíyā nɛ̄hi géē yá uwɔ acígilí. Ó gáā le ɛdɔ imabɔ̄ dúú nɛ̄ a í yá nōo lɔfú ci ɔ́ glá ŋ́.

¹²Lɔfú tīīyē ká ā yɔ̄ ī yá odúúdú imabɔ̄ mɛ́mla o pā aɛ́cí kú uwɔ mɛ́ɛnɛ. A kē húmáyī bī uwá yúklɔ́ ŋmá eko ɔyípɛ̄ kú uwɔ ā. Ekōōhī, é lɔfú tá uwɔ abɔ̄, nɛ̄ a géē lɔfú tū aólɛlā kú uwɔ ufi kpɔ́ ɛ́ɛ́.

¹³Odúúdú ɛlā nēé gē nwū uwɔ ā, í tú uwɔ abɔ̄ dúúmā ŋ́. Ká ācɛ nēe jé odée lɛyíkwu aínyílɔ́wɔ ɔlɛ́ uwɔ ā, nēe klla gē miya ɔkpáncō ígwíígwu, gē da uwɔ ŋmá ɔyā ga ɔyā ɔdā nōo gáā yá uwɔ ā, kéē wā í lɛ uwɔ nyatá mɛ́ɛnɛ.

¹⁴Ācɛ ɔ́ɔmā géē lɛbɛ̄ɛka aúkwū ácí nēe le ŋmó nɛ̄ ɔlá gē je yi dúúdú ā. É kōō gáā nya īyī uwā tá glá ɛ́ɛ́ ŋ́. Ígblɛ́nyī ɔlá ā géē nwuné tū uwá iyē fíyɛ́ abɔ̄. Ó wɛ ɛdɔ kú ɔlá nɛ̄ ɔ̄cɛ gē gwó, í lɛ abɔ̄ nwūla anú, ī jɛ̄ ā ŋ́.

¹⁵Odúúdú ɔdā nɛ̄ ācɛ nēe bá ā lɔfú yá gā uwɔ glá ā yɔ̄ abɔ́ɔ á. Ācɛ nɛ̄ a húmáyī nyɔ̄ ī má piyóó ipu odúúdú oyēēyī kú uwɔ ā, odúúdú uwá géē nyɛ̄ɛ̄ gwū uwɔ tá, ga ɔwɛ kú ɔnyɔɔnyɛ kú uwā. Odúúmā kú uwā í gáā hile nōo géē nya uwɔ tá ŋ́.”