Read idoma AYISÁYA 48 Bible Online

AYISÁYA 48 - idoma bible

AYISÁYA 48

¹Ācɛ Ísrɛ̄lu, aá nēe ŋmá ipíinu kú Ujékɔ̄pu ā, mɛ́mla ācɛ ipɔ́ɔma kú Ujúda, aá jāhɔ̄ ka aá pó ɛlā nyā. Aá ī bī iyē kú Óndú ā gbɛka, klla ī ka ka aá ɔ́ɔ ī gbā Ɔwɔicō nɛ̄ Ísrɛ̄lu ī gbā ā. Amáŋ ɛlā nɛ̄ aá ka ā wɛ ɛ̄kɛ̄mgbɛ̄, í klla le kpaakpa ŋ́.

²Aá bá ī gwō ka aá ɔ́ɔ wɛ ayí ajɛ kú Ujerúsālɛm, igelī kú Ɔwɔicō ā. Ka aá ɔ́ɔ klla gbɛnúce Uyáwe nōo wɛ Ɔwɔicō kú Ísrɛ̄lu, anú nōo lɔfú fíyɛ́ dúú ā.

³Ɔwɔicō da Ísrɛ̄lu kahíníī, “N tɛtɛ le aɔ́dā nēe gáā yá ā ka tɛ́ɛ́cɛ ɛ́ɛ. Anɔ́ɔ igbeékpónú n cɛ̄ le odée ā kwu yá eko nɛ̄ acɛ̄ í leyīce ŋ́ mā.

⁴N jé ká aá lɛ īkpɛ́yí olɔfú nɛ̄hi, ka ɔtū kú aá klla lɔfú nɛ̄hi.

⁵Ohígbū ɔ́ɔmā anɔ́ɔ n le aɔ́dā ɔ́ɔmā nēe gáā yá ā ka lɛ aá táajɛ gbojī gbojī gbɔbū ɛ́ɛ́ kéē yá á. N yá ɔ́ɔmā lɛ ā cɛ́ɛ́ kú aá má okónu ō ka tɛ́ɛ́cɛ ka aɛ́cí kú aá ɛ́ɛ yá aódée ā lɛ aá ŋ́. Ohigbu nɛ̄ aá géē ka ka aójibó kú aá nēé yá ŋmá ɔcí mɛ́mla aɛ́nɛ̄ é yá ŋmá oje ā ɛ́ɛ yá uwā á.

⁶Odúúdú ɔdā nɛ̄ n ka ā, le kpó yá ɛɛ́. Aá cíkā ō cɛ̄ ka ɛlā nɛ̄ um ka ā ɔ́ɔ le yá ɔkwɛ̄yi mɛ́ ŋ́? Oŋmá abālɔbányā, n géē da aá aɔ́dā ɛ̄yīpɛ̄ nēe gáā yá ā. Aɔ́dā ɔ́ɔmā wɛ ɔdā nɛ̄ aá tɛtɛ jé gbɔbū ŋ́.

⁷N yɔ̄ ī yá aɔ́dā ɛ̄yīpɛ̄ nyā abalɔbányā. É kē wɛ ɔdā nɛ̄ aá lɔfú ka ka aá jé ɔdā dúú lɛyíkwu uwá jééjé ɛ́ɛ́ ŋ́. Ɔ́dāŋ koó lɛ ā nɛɛ, aá géē yɛ í ka ka aá jé odée lɛyíkwu ɔ̄ tɛtɛ.

⁸N jé ka aá wɛ ācɛ nɛ̄ ɔ̄cɛ dúú í lɔtū ce aá glá ŋ́. Aá klla kē húmáyī yá ikpɛ̄yí olɔfú ŋmífi nēé má aá ā. Ɔdā ɔ́ɔmā yá ɛɛ́ nɛ̄ aá pó ɔdā dúúma lɛyíkwu ɔdā nyā fúlufúlu, ɛ́ɛ́ nɛ̄ aá kōō ī jé ɔ́ ŋ́ má. Ɔ́ɔmā kē yá ɛ́ɛ́ nɛ̄ ɔ̄kā kú nū dúúmā í wā ipú ahɔ̄ kú aá ŋ́ má.

⁹Ohígbū ka abɔ̄ nɛ̄ n gē yá ɔdā okpaakpa ā, yá nɛ̄ ń cɔ̄nū tū aá ɛ́ɛ́ ŋ́ má. N klla kē yɔ̄ ī yá kú ācɛ kéē cɛ̄tra um ā nɛ̄ um gē kwú ícɔ̄nū kú um tū cíí, o yá ɛ́ɛ́ kú n kpó aá yífi ŋmá ajɛ dúúdú ŋ́ má.

¹⁰N bī ōwē nɛ̄ n je lɛ aá ā le aá jámá ɛɛ́, ɛ́gɛ́nɛ̄ é gē na oje nɛ̄hɛ́ ipú ɔlá kú útuló ā. Amáŋ aá kē lɛbɛ̄ɛka oje nɛ̄hɛ́ nōó ī tīile eko nēé le ɔ́ na ā ŋ́ mā.

¹¹N gē yá ɔdā nɛ̄ n gē yá ā, ohígbū ɛdɔ ɔ̄cɛ nɛ̄ um wɛ ā. Ń gáā cɛ̄ kéē je uwɛ̄yī gā um ŋ́, ɛ́ɛ́ nɛ̄ ɔ̄cɛ ámāŋ ka ɔdā ɔhá dúúmā gē kɔ̄ owófu nōo cíkā ō wɛ ákú um ā mla um ŋ́.

¹²Ayisáya klla kɛlā gɔbū kpɔ́. Ó ka Óndú ā ɔ́ɔ kahíníī, “Ācɛ kú Ísrɛ̄lu, aá nɛ̄ n fu ā, aá jāhɔ̄ gā um. Ami wɛ Ɔwɔicō á. Ami wɛ aflɛ́yí á, ami kē wɛ ámōōmɛ á.

¹³Ami bī abɔ̄ kú um lɛ ikpó kú ɛcɛ nyā tá ajɛ á. Ami kē nā ɔkpáncō daa klá ɛyí ɛcɛ á. Eko dúúmā nɛ̄ n lɛ ɛcɛ mɛ́mla ɔkpáncō hīīgwú, é gē pɛ́ wā í le jīla iyɔ̄bū um bōōbū.

¹⁴Odúúdú aá, aá le túbá kú aá jāhɔ̄. Odúúmā kú aɛ́cí kú aá ā lɔfú ka tɛ́ɛ́cɛ ɔdā nōo gáā yá ā glá ā āa? É lɔfú ka tɛ́ɛ́cɛ ka ɔ̄cɛ nɛ̄ ami nōo wɛ Óndú ā ɔ́ɔ fu ā, ɔ́ɔ nyɔ̄ gáā kpɛfú tá ācɛ Ubábīlɔn glá ā? Ó géē yá ɔdā nɛ̄ n tíne kóō yá.

¹⁵Ami wɛ ɔ̄cɛ nōo kɛlā, klla fu ɔ́ á. Ami klla bī ɔ̄ wā ā, n kē í yá kóō yálé ipú ɔdā dóódu nōó yá.”

¹⁶Anɔ́ɔ Ayisáya klla kahíníī, “Aá túblá um ajaajɛ kú aá jāhɔ̄ cɛ́ɛ́ kú aá pó ɔdā nɛ̄ n gē ka ā. Ŋmá ajaajɛ ā n gē kɛlā tɛ́ɛcɛ péēē lɛ aá. N klla kē yɔ̄ amānyā eko nɛ̄ ɔdā dúúmā gbɔɔ́ ā. Abālɔbányā, Óndú ā nōo wɛ Ɔwɔicō nōo fíyɛ́ dúú ā, kwú ɔfú kú nū ú gā um klla lɛ um tɛ̄hɔ̄ ɛɛ́.

¹⁷Ɔwɔicō kú Ísrɛ̄lu nɛ̄ ɔ̄cɛ dóódu í tōō le gbla ɔ́ ŋ́ mā, Óndú nōo nya aá tá ā kahíníī, “Ami ā wɛ Ɔwɔicō nōo wɛ Óndú aá á. Ami gē nwū aá ɔwɛ nōo géē lɔhi lɛ aá ā. N klla géē ma ɔwɛ nɛ̄ aá géē yɛ ā fú lɛ aá.

¹⁸Ɔ́dāŋ ka aá í lɛyítáajɛ lɛ íne kú um nɛɛ, abahi géē yɔ̄ ī ca aá bá eko dóódu, bɛ̄ɛka ísu nōó gē cēenyi eko dóódu ā. Olɔhi géē yɛ í wā kwūūū lɛ aá bɛ̄ɛka úgbagwú kú ísu nɛ̄hi ā.

¹⁹Ayí aá í yɛ í lɛwa bɛ̄ɛka úmúlá ā, ayááyí aá kē í yɛ í lɛwa bɛ̄ɛka ikpō ɔjɛ kú okónu ísu ā. N kē í yɛ í cɛ̄ kéē kpó uwá yíifi gbógbóó ŋ́.”

²⁰Anɔ́ɔ Ayisáya klla ka kpɔ́ kahíníī, “Aá bɛ̄cɛ ŋmá ipú ajɛ kú Ubábīlɔn cɛ́ɛ́ kú aá le kwu ŋmá ɛgiyí ācɛ Ubábīlɔn! Aá gwéeyē ká aá tɔ́ɔga gbōōō. Aá tɔ́ɔna gbōōō, cɛ́ɛ́ kú aá yá ka ācɛ nēe bá ɛga dóódu kú ipú ɛcɛ nyā kéē le jé, ka Óndú ā ɔ́ɔ lɛ Ísrɛ̄lu, ɔcōcɛ̄hɔ kú nū, nyatá ɛɛ́.

²¹Eko nɛ̄ Óndú kpó ācɛ ɔlɛ́ nū trɛ̄yí bū ipú ígbíli ā, ijēēnyi í ŋmó uwá ŋ́. Ohígbū koó je éŋkpɔ̄ lɛ uwá ŋmá ipú ápátɛ́cɔ̄ ā. Ó kwú ápátɛ́cɔ̄ ā ú yíla, anɔ́ɔ éŋkpɔ̄ kwú ca klɛ́ɛcɛ lɛ uwá á.

²²Amáŋ Óndú ā kahíníī, ‘Ācobɔbíipú í gáā lā ɛbɔ́ gbóógbóō ŋ́.’”