Read idoma AYISÁYA 49 Bible Online

AYISÁYA 49 - idoma bible

AYISÁYA 49

¹Ayisáya klla ka ɔdā nōó má ā tɛ́ɛcɛ kpɔ́ kahíníī, “Aá jāhɔ̄ gā um, ācɛ kú aéwɔhá nēe bá ogbeé ɔhá kú ísu nɛ̄hi ā. Aá nēe lā ɛga oligbó nɛ̄hi ā. Ɛ́ɛ́ ka ɛ́nɛ́ um kóō ma um ā, Óndú ā le um fu kú n̄ wɛ ɔ̄cocɛ̄hɔ̄ kú nū. Ó kwú iyē ú ce um kwaá.

²Ó lɛ ɛlā okónu kú um yá kóō ī ga iyē bɛ̄ɛka ɔkpacaŋgelī nōo lulé nɛ̄hi ā. Ó kwú um tayínū ipú ɔtābɔ̄ kú nū, le abɔ̄ klá tū um. Ó lɛ um tútū kóō bī um le yúklɔ́, bɛ̄ɛka ɛ́gɛ́nɛ̄ ɔ̄cɛ ī tū ɔyī kú nū ulé ī je ɔ́ tayínū ipú aháŋgbā ā.

³Anɔ́ɔ ó da um kahíníī, “Ísrɛ̄lu, a wɛ ɔ̄cocɛ̄hɔ̄ kú um, ohígbū uwɔ̄ ācɛ í cɛ̄tra um.”

⁴Amáŋ n ka, n lɛ úklɔ́ yá bónū áncā ɛɛ́. N klla bī ɔfú kú um lɛ úklɔ́ yá tū iyē áncā ɛɛ́. Nááná n lɔtūce Óndú ā ka anú nɛ̄ n yúklɔ́ ā lɛ ɔ́ á, ó kē í cíla um ulé kú úklɔ́ dóódu nɛ̄ n yá ā.

⁵Gbɔbū ɛ́ɛ́ kú ɛ́nɛ́ um kóō ma um ā, Óndú ā lɛ um fu. Ó kwú um ú pīya ɔ̄cocɛ̄hɔ̄ kú nū, cɛ́ɛ́ ká n̄ lɛ ācɛ Ísrɛ̄lu, ācɛ kú ɔlɛ́ nū nēe pahīla klá ɛcɛ ā, kpó kwúcē igbīhi wā gé lɛ ɔ́. Ohígbū ɔ́ɔmā nɛ̄ Óndú ā le ojīlīma ce um, kllá lɛ ɔfú kú nū tū um iyē á.

⁶Óndú ā da um kahíníī, “Ɔ̄cocɛ̄hɔ̄ kú um, úklɔ́ ō kpó ācɛ aípɔ́ɔma kú Ísrɛ̄lu nēe wi ŋmá unwalu ā, kwúcē wā ɔlɛ́ uwā kéē kwú pīya éwo kú abɔ̄yī uwā kpɔ́ ā, í nwuné ce uwɔ abɔ̄ fúlufúlu ŋ́. Amáŋ n géē je uwɔ bɛ̄ɛka ɔlá ofíyajɛ lɛ aéwo dóódu kú ɛcɛ. Cɛ́ɛ́ ka a lɛ ɔfú kú um nōo ī nya ācɛ tá ā bī ga odúúdú ācɛ nēe lā ɛga dóódu kú ipú ɛcɛ nyā.”

⁷Ayisáya klla ka gɔbū ka, Óndú ā nōo wɛ ohɔ́nyɛtá mɛ́mla Ɔwɔicō kú Ísrɛ̄lu, nɛ̄ ɔ̄cɛ dúúmā í tōō le gbla anú ŋ́ mā, ɔ́ɔ da ɔ̄cɛ nɛ̄ ācɛ gē lɛ eyī gwū ɔ̄ bónū klla ī wɔ́tū nū nɛ̄hi ā, mɛ́mla ɔ̄cɛ nōo klla wɛ ɔfiyɛ kú aɔ́cɛ́ ā kahíníī, “Aɔ́cɛ́ géē má aá, kllá í cāŋjɛ lɛ aá, í je ojīlīma ce aá. Aótrɛ̄yí nēe ī gbāajɛ ā klla géē tū ɛyí kpɛɛ́ lɛ aá, í lɛ ojīlīma ce aá. Ó géē yá lɛ ā piíí, ohígbū ka Óndú ā nōo tōō lɔtūce ā, le aá fu ɛɛ́.

⁸Óndú ā da ācɛ ɔlɛ́ nū kahíníī, “Eko nɛ̄ eko nɛ̄ n miya ka n géē nya aá tá ā le yá, n géē tá aá abɔ̄. N géē yá ɔdā nɛ̄ aá gbɔ̄ɔkɔ kú nū ā lɛ aá. N kē le aá fu cɛ́ɛ́ kú aá bī okónu nɛ̄ n ce ka aéwɔhá géē leyī ōce dúú ā bī nyɔ̄ í ka lɛ uwá. N géē yá ka aá gaá lɛ ɔlɛ́ aá nōo tá alácɛ̄ ā túgwó. Cɛ́ɛ́ kú ācɛ kéē pɛ́ wā í lā ipú ajɛ ā kpɔ́.

⁹Aá géē hɛ́ aálagbá nēe bá ipú agbá odobū nɛ̄hi ā tá, cɛ́ɛ́ kéē lɛ ofíyajɛ kú ɛnɔ má eyī. É géē má ɔdōlé nɛ̄hi nēé í lé tɔ́ɔwɔɔwɛ abɔ̄ é géē yɔ̄ ī nyɔ̄ ɔlɛ́ ā. Ó kōō wɛ ɛyí ɛfu oŋmíkpākplā, é géē má ɔdōlé í lé kpɔ́, ɛ́gɛ́nɛ̄ aálá gē lé ɔdōlé tɔ́ɔwɔɔwɛ gē ga ɔlɛ́ uwā ā.

¹⁰Ɛmiyɛ í gáā ŋmó uwā ɛ́ɛ́ nɛ̄ ijēēnyi gē ŋmó uwā gɛ ŋ́. Ɛnɔ kú eko olugbáagbá ā mla owu okwɔ́lá kú ipú ígbíli ā í gáā yá uwā ɔdā dóódu ɛ́ɛ́ gɛ ŋ́. N géē méyīnyinyi uwā abɔ̄ n géē bī uwā jé ɔwɛ ga njɔlɔ alɛwa nɛ̄ énkpɔ̄ yɔ̄ ā.

¹¹N géē cīla aɛ́fu nɛ̄hi tū, cɛ́ɛ́ kú n̄ lɛ īkpāndrā yá lɛ ācɛ ɔlɛ́ um kéē yɛ.

¹²Cɛ́ɛ́ ācɛ ɔlɛ́ um géē pīyɛyí wā ŋmá ɛga oligbó. É géē wā ŋmá ɛhícō, é kē í wā ŋmá ɛnɔ̄ɔ̄nɛ̄. É klla kē í wā ŋmá igelī nɛ̄hi kú Usínim.”[3]

¹³Anɔ́ɔ Ayisáya kahíníī, “Ācɛ kú ɔkpáncō, aá tɔ́ɔga, ācɛ kú ipú ɛcɛ kóō gwéeyē! Ɔkɔ kú ijē nēé yɔ̄ ī gwó ā kóō ce ɛyí aɛ́fu gbōō. Ācɛ ɔlɛ́ Óndú ā móōwē nɛ̄hi. Ó kē le eyinyinyi uwā má klla le uwá ɔtū túlé dúú ɛɛ́.”

¹⁴Amáŋ ācɛ kú Ujerúsālɛm gē ka ka Óndú ā ɔ́ɔ kwú igbīhi í ce kwu aá, klla kwú ɛlá kú aá ú gwō ɛɛ́.

¹⁵Anɔ́ɔ Óndú ā tá uwá ohi kahíníī, “Ɛ́nɛ́ gē je mlanyī ɔyí nū nōo yɔ ī gwá amɛ̄ kú nū ā glá ā, kóō híī yíihɔtū ɔyí nōó ma ā ŋ́ nɛɛ? Ɔ́dāŋ ka aɛ́nɛ́ kōō le mlanyi ayí uwā nááná, ami ā í gáā mlanyī aá ŋ́.

¹⁶Aá mɔ́ɔ̄, n le ifotó kú igelī nɛ̄hi kú aá kpó tū ɔtābɔ kú um, cɛ́ɛ́ ká n̄ híī mlanyī aá ŋ́. N kē yɔ̄ ī gbɛlá kwu aá piyóó.”

¹⁷Óndú ā klla ka kpɔ́ kahíníī, “Ayááyí kú ɔlɛ́ aá géē pīyɛyí wá í tú igelī nɛ̄hi kú aá gwó fíyaa fíyɛ́ ɛ́gɛ́nɛ̄ é je ɔ́ catāajɛ ā. Ācɛ nēe kē je ɔ́ catāajɛ klla je ɔ́ yíífi ā géē kwúcē igbīhi ŋmá ɔlɛ́ aá.

¹⁸Aá je eyī gicō kú aá leyī yaajɛ bilíbilí kú aá má ɔdā nōo yɔ̄ ī yá ā. Ācɛ ɔlɛ́ aá gbɔɔ́ ō tūbá, kéē wā ɔlɛ́ ɛgiyí aá ɛɛ́. Ɔ́dāŋ nɛ̄ ami wɛ Ɔwɔicō nōo yēeyī á, a géē bī ācɛ ɔlɛ́ aá gwō klla í yɔ̄ ī yéeyī ūwā ɛ́gɛ́nɛ̄ ɔnyā nōo gáā lɛ ɔbá gē yéeyī aódūgbɔ nōó le yá ifa ā.”

¹⁹Óndú ā klla ka kpɔ́ kahíníī, “Ācɛ kú Ujerúsālɛm, é le ɔlɛ́ aá catāajɛ, ó kē tá alácɛ̄. Amáŋ é géē wā í tá ɔ̄ gwó. Abālɔbányā ó kē í je nyɛ́ lɛ áluka kú ācɛ nēe pɛ́ wā gáā lā anú ā. Ācɛ nēe je igelī nɛ̄hi ā catāajɛ klla cɛ̄ lɛ ɔ́ tá alácɛ̄ ā, gē tú gɛcɛɛcɛ ŋmá ɛgiyí aá. É kóō gáā túbla aá glá gɛ ŋ́.

²⁰Odúúdú ācɛ ɔlɛ́ aá nēé ma ipú ajɛ kú éwɔhá nēé kpó uwā nyɔ̄ abɔ̄fú ā, géē da aá ɛ̄cī éyi kahíníī, ‘Ajɛ nyā le nyɛ́ lɛ alɔ, alɔ cɛgbá ɛga onwuné fíyɛ́.’

²¹Cɛ́ɛ́ a géē da īyī aá ɔ̄kā eko ɔ́ɔmā ka, ‘Ɔnyɛ ma ayí nēe bá nyā lɛ alɔ mɛ́ɛ̄ āa? Ayí um le pɛ́ gekwú dúúdú, n kē kwú pīya ɔdɔma ɛɛ́. É klla lɛ um nū ŋmá ajɛ ɔlɛ́ um. Ānyɛ̄ bá yɔ̄ ā, ayī um kɛ̄ɛ̄, ɔnyɛ bī uwā jɛ̄ ā? N kē klá ōfōōfū um. Ó lɛ ā, iní nɛ̄ ayí nēe bá nyā wā ŋmá ā a?’”

²²Ayisáya klla ka Óndú ā nōo wɛ Ɔwɔicō ā ɔ́ɔ kahíníī, “N géē yá abɔ̄ lɛ aéwo ā cɛ́ɛ́, é kē í kpó ayí aá nɔnyīlɔ ce ɔkɔ, wā ɔlɛ́ gé lɛ aá.

²³Aɔ́cɛ́ géē leyīkwu aá bɛ̄ɛka é wɛ aádā kú aá ā. Aɔ́nyɔ̄cɛ́ kē ī téyī tá aá bɛ̄ɛka aɛ́nɛ́ nēe ma aá ā. É géē túkpɛɛ́ iyɔ̄bū aá, kllá í lɛ ojīlīma nɛ̄hi ce aá. Cɛ́ɛ́ aá le jé ka amí ɔ́ɔ wɛ Óndú ā á, ka ɔ̄cɛ dúúmā nōo ī lɔtūce um, uwēyī í gáā kwú ɔ̄ ŋ́.”

²⁴Ayisáya dɔɔkā kahíníī, “Ó tɔ́ɔtɛ́ lɛ ɔ̄cɛ dúúmā kóō nú iyó nɛ̄ ícɔ́ɔjá kpó abɔ̄fú ŋmá ɔgbɛ́fú ā glá āa? Ó tɔ́ɔtɛ́ lɛ ɔ̄cɛ dúúmā kóō hɛ́ ācɛ nɛ̄ ɔcɛ́ olɔfú kwú tū agbá ā tá glá ā?

²⁵Anɔ́ɔ Óndú ā tóohi ka, Ɛ̄nyā ɔ́ɔ wɛ ɔdā nōo gáā yá á. Ó ka anúɔ géē nuunu tá aólɛlā kú aá, cɛ́ɛ́ kú anúɔ lɛ ayípɛ̄ ɔlɛ́ aá nɛ̄ aícɔ́ɔja kwú je pīya aálagbá kú ɛfú ā hɛ́tá ŋmá abɔ̄ aícɔ́ɔja kú aólɛlā olɔfú nēe klla bɔ̄bíipú nɛ̄hi ā. É klla í nú iyó nēé wu ŋmá ɔgbɛ́fú ā ŋmá ɛgiyí uwā.

²⁶Óndú ā klla ka ka anúɔ géē yá kú ācɛ nēe gē yá ācɛ ɔlɛ́ anúɔ ŋmó ā, kéē gbɔɔ́ ō ŋmó aɔ́mpa uwā. Oyī kú aɔ́mpa uwā nēé géē ŋmó ā géē gbɔɔ́ ō yá uwā ígoíi gē yá uwā ā. Cɛ́ɛ́ odúúdú ācɛ kú ɛcɛ géē jé ka amí ɔ́ɔ nōo wɛ Ɔwɔicō nɛ̄ aá ī gbɛ̄ɛ̄gbā ā, le aá nyatá klla le aá hɛ́tá ɛɛ́. É kē í jé ka amī ɔ́ɔ wɛ Ɔwɔicō kú Ísrɛ̄lu, nōo lɔfú nɛ̄hi á.