Read idoma AYISÁYA 5 Bible Online

AYISÁYA 5 - idoma bible

AYISÁYA 5

¹Jāhɔ̄ ká n̄ lɛ ijē gwó ga awɔ lɛyíkwu ɔ̄cɛ nōo he um ɔtū ā mɛ́mla ɛhɔ̄ kú ɔcí ufáyin kú nū. Ɔ̄cɛ nōo he um ɔtū ā lɛ ɛhɔ̄ kú ɔcí ufáyin hī tá ɛyí ɛfu, nɛ̄ ajɛ kú nū lɔhi nɛ̄hi ā.

²Ó lɛ ajɛ bū, lɛ ɛcɔ̄ kpó yā ŋmá ipu ajɛ ā, klla lɛ īkpō kú ufáyin nēe lɔhi fíyɛ́ dúú ā kpó tū tū ɔ̄. Ó le inɔ̄ɔda gwó kwu ɛhɔ̄ ā nēé géē bá ī gbō ɔ̄. Ó klla lɛ ɛga o yá ejé bū ipu ɛhɔ̄ ā. Amáŋ eko nōo leyītáajɛ ka ufáyin kú ɛhɔ̄ ā kóō gwá ikpō kú ufáyin olɔhi ā, ikpō kú ufáyin omákáká nōó gwá á.

³Anɔ́ɔ ɔ̄cɛ nōo he um ɔtū ā kahíníī, “Ɛhɛ́ɛ! Ācɛ kú Ujerúsālɛm mɛ́mla ācɛ kú Ujúda, aá lɛ ɛpɔ̄ kú ami mɛ́mla ɛhɔ̄ kú ɔcí ufáyin kú um nyā hɛ́ lɛ alɔ.

⁴Ɔdí hile ká n yá ipu ɛhɔ̄ kú ɔcí ufáyin kú um nyā, nɛ̄ n yá ɛɛ́ ŋ́ mā? Ɔdí yá nɛ̄ eko nɛ̄ n leyīce ɔ́ kóō gwá īkpō kú ufáyin olɔhi, nōó gaá gwá īkpō omákáká āa?

⁵N géē da aá abālɔbányā, ɔdā nɛ̄ n gáā yá ɛhɔ̄ kú ɔcí ufáyin kú um ā. N géē je igá nɛ̄ n cē tū ɔ̄ mɛ́mla ɔcí ujē ā hɛ́ bónū, ka aɛ́bɛ́ kéē kwú ɔ̄ ú kpó gwó lé, cɛ́ɛ́ kéē klla bī ikpó kwú ɔ̄ ú da tāajɛ. N gēe je ɔdɔ nɛ̄ n gwó kóō gbō ɔ̄ ā catāajɛ, cɛ́ɛ́ ka aɛ́bɛ́ ā kéē bī ikpó kwú ɔ̄ ú da tāajɛ.

⁶Ń géē mā ɔ̄ tá je bū ácí. Ɔ̄cɛ dúúmā í gāa tá eyī tá aɔ́cí ufáyin ā, ɛ́ɛ́ nōó gē hī ɛhɔ̄ tū ajɛ ā gɛ ŋ́. Ó géē je bū ujē mɛ́mla ácí. N kōō gáā cɛ̄ lɛ ɔwɔ yā klá anú gɛ ŋ́.”

⁷Ɛyí kú ijē nyā wɛ ka ācɛ Ísrɛ̄lu lɛbɛ̄ɛka ɛhɔ̄ kú ɔcí ufáyin kú Ɔwɔicō, nōo lɔfú fíyɛ́ dúú ā. Ācɛ kú Ujúda kē wɛ ɔcí ufáyin olɔhi kú nū, nōó tū ā á. Ó tíne ō má ucē okpaakpa ŋmá ɛgiyí uwā, amáŋ ācɛ nēé bá ī ŋmó á. Ó leyīce kéē yá ucē kpaakpa, amáŋ ācɛ nēé bá ī yá ŋmó ā, nōó yɔ̄ ī pó ikwū ō je kú uwā á.

⁸Aá le jī ɛɛ́! Aá nēe bá ī lá aɔ́lɛ́ mɛ́mla ajɛ alɛwa ɔhá kwu ɛ̄nɛ̄ aá tɛtɛ lɛ ā jāāā gbēeko nɛ̄ ɛga í yɔ̄ lɛ ācɛ ɔhá kéē lā gɛ ŋ́ mā. Aá ōfōōfū aá gáā lā mɛ́ɛ̄ á.

⁹Amáŋ n le pó abɔ̄ Ɔwɔicō nōo lɔfú fíyɛ́ dúú cokónu ka aɔ́lɛ́ nɛ̄hi ɔ́ɔmā géē tá alácɛ̄, nɛ̄ ɔ̄cɛ dúúmā í gáā lā ipú uwā ŋ́.

¹⁰Ɛhɔ̄ kú ɔcí ufáyin, nēé hí tū odúúdú ajɛ nōo fíyɛ́ úlá igwó ā í gáā gwá ikpo ufáyin nēé gē yá ejé kú nū, mu ɔjá ɛtá ŋ́. Okoolo kú ikpɔ̄dɛ̄hɔ̄ ofu ahāanɛ nēé nyi ā, í gáā gwá īkpō nēé gē ce ga okoolo igwáahātá ŋ́.”

¹¹Aá le jī ɛɛ́! Aá nēe gē cāŋjɛ ɔcɔ̄ɔ̄cī, gē gbɔɔ́ ō gwá ejé olɔfú ā. Aá kē í gwá ejé jāā ga āhāpōtú gbēeko nōó lɛ aá kwú.

¹²Eko kú ucɛ kú aá, aá gē gwá ejé klla gē gwō ɛ̄ngwū mɛ́mla uba mɛ́mla icháka mɛ́mla ɛ́mla ō tá. Amáŋ aá lɛ ɛlā wu ɔdā nɛ̄ Óndú ā yá ā ŋ́.

¹³Ohígbū ɔ́ɔmā, é géē kwú aá bɛ̄ɛka aɔ́fiyɛ ga ajɛ ewɔhá. Ɛmiyɛ géē kpó aótrɛ̄yí kú aá ŋmó. Ijēēnyi ké ī kpó ācɛ ohile kú ɔlɛ́ aá ŋmó.

¹⁴Ohígbū ɔ́ɔmā, únóji kú ɔlíkɔtɔ lɛ okónu kú nū nwūla tɔ́ɔtɛ́ yɔ̄ ī gbēyī uwā. Ó kē í je aígabɔ̄ mɛ́mla ācɛ ojīlīma, mɛ́mla ācɛ nɛ̄hi, mɛ́mla ācɛ ɔlamu nēe ī yúuya nɛ̄hi kú Ujerúsālɛm ā kpó mlɛ kpɔkɔ́.

¹⁵Uwēyī géē kwú odúúdú ācɛ kú Ujerúsālɛm, é kē í tū ācɛ nēe ī yá ɔbɔ́ɔ́cɛ ā wāajɛ.

¹⁶Amáŋ é géē cɛ̄tra Ɔwɔicō nōo lɔfí fíyɛ́ dúú ā ohígbu koó gē ma īyī nū fú kú ɔ̄cɛ nōó wɛ ā ŋmá lɛ ucē okpaakpa nōó gē yá ā mɛ́mla ɛpɔ̄ okpaakpa nōo gē ka ā.

¹⁷Ipú alácɛ̄ kú aígelī ā géē je mu ácí, nɛ̄ ayí ɛwū mɛ́mla álá géē bá í lé ácí mɛ́mla ēpū ipú nū.

¹⁸Aá le jī ɛɛ́! Aá nēé mā ɔ́bíipú tá ohígbū ɛ̄kɛ̄mgbɛ̄ nɛ̄ aá ī ka ā glá ŋ́ mā.

¹⁹Aá klla ī ka kahíníī, “Ɔwɔicō kóō wā í yá ɔdā nōó ka anúɔ gē wā í yá ā fíyaa, cɛ́ɛ́ ka alɔ má ɔ̄. Ɔwɔicō kú Ísrɛ̄lu nɛ̄ ɔdā dúúmā í tōō le gbla anú ŋ́ mā kóō yá ɔdā nōó miya ā, ka alɔ má ojuju kú ɔtū kú nū.”

²⁰Aá le jī ɛɛ́! Aá nēe gē hī ɔdōbɔ̄bí ka ɔdōōlɔhi, klla gē hī ɔdōōlɔhi ka ɔdōbɔ̄bí ā. Aá gē je ofíyajɛ pīya obū klla gē je obū pīya ofíyajɛ. Aá klla gē je ɔdā ohɔ́ɔnɔ ka ɔdā olɔnyɛ, klla gē je ɔdā olɔnyɛ ka ɔdā ohɔ́ɔnɔ.

²¹Aá le jī ɛɛ! Aá gbɛlá ka aá ɔ́ɔ jéeyī nɛ̄hi tū īyī aá. Aá klla jé ula tū īyī aá nɛ̄hi.

²²Aá le jī ɛɛ́! Aá nēe wɛ ɔbá itɔ kú ejé ō gwá ā. Aá klla wɛ ɔka kú ejé olɔfú ɛdɔ ɛyɛ́ɛ́yɛ́yí ō pīyatɔ̄há.

²³Aá gē mīyɛ omíci lé kú aá hɛ́pɔ̄hi lɛ ācolɛpɔ̄bí ā, kú aá klla tá ō hɛ́pɔ̄hi lɛ ācɛ nēe cíkā ō lɛ́pɔ̄hi ā.

²⁴Ohígbū ɔ́ɔmā, ɛ́gɛ́nɛ̄ ígblɛ́nyī ɔlá gē je ácí mɛ́mla ácí nōo le ŋmó ā yi ŋmá ajɛ ā, ɛ́gɔ́ɔmā nɛ̄ ɛgba kú aá géē je wa, ohéepu kú aá géē je ŋmó, klla í gwó bónū. Ohígbū ka aá tá íne kú Ɔwɔicō, nōo lɔfú fíyɛ́ dúú ā. Aá klla lɛ ɛlá wu ɛlā kú Ɔwɔicō kú Ísrɛ̄lu, nɛ̄ ɔdā dúúmā í tōō le gbla anú ŋ́ mā ŋ́.

²⁵Ohígbū ɔ́ɔmā, Ɔwɔicō le cɔ̄nū da ācɛ ɔlɛ́ nū. Ó klla le abɔ̄ nāŋ́daa kóō yá uwā italā ɛɛ́. Ɛfu le jíliyē. Okwū kú aɛ́nɛ̄ e kwú ā kē bá úláyi bɛ̄ɛka īmū ā. Nááná, ícɔ̄nū kú Óndú ā í mɛ ŋ́ kpɔ́. Abɔ̄ kú nū kē le nāŋ́daa ō yá uwā ōwē kpɔ́.

²⁶Óndú ā géē ma ɔdōōcābɔ̄ fú lɛ aéwo ŋmá ɛga oligbó. Ó géē hī uwā igwú ŋmá oŋmɛ́yí kú ɛcɛ kéē wā. É kē í bá ī kwinya fíyaa bá ī hápápá wā.

²⁷Ɛ̄jɛ̄ í gē jɛ̄ odúúmā kú uwá ŋ́, ɛ́ɛ́ nēé gē lɛ ikpó gbo ajɛ ŋ́. Odúúmā kú uwā í gē gbiyɔ̄lā ce ɛyí ŋ́, ɛ́ɛ́ nēé gē gbiyɔ̄lā ŋ́. Īlī ō le gbɛ̄ɛ́nyɔ́ kú uwā í gē wī ŋ́, ɛ́ɛ́ nɛ̄ ɔ́ngbá áblákpá kú uwá dúúmā gē hɛ́ ŋ́.

²⁸Ɔyī kú uwá lulé nɛ̄hi, é kē le ɔtā kú uwá túce ɛɛ́. Ikpó kú aɔ́nya ɛfú kú uwá kwu ajɛ kitaa bɛ̄ɛka ɛcɔ̄ ā. Akā kú aúgbɔ́ɔnya kú uwā kē ī pīyeyī fíyaa bɛ̄ɛka ofulútu ā.

²⁹Aícɔ́ɔja ɔ́ɔmā gē dɛ̄gba bɛ̄ɛka aágábá nēe gē tōoji eko nēe lɛ aɛ́bɛ́ kwú bá ī kpó nyɔ̄ ɛga nɛ̄ ɔ̄cɛ dúúmā í mīyɛ ŋmá abɔ̄ uwā glá ŋ́ mā.

³⁰Eko nɛ̄ eko ɔ́ɔmā ga, é géē cīlɛ́fú tū Ísrɛ̄lu bɛ̄ɛka uya kú ísu nɛ̄hi ā. Cɛ́ɛ́ eko nɛ̄ ɔ̄cɛ pīyeyī má ajɛ kú Ísrɛ̄lu, obū mɛ́mla ákanya nōó géē má á. Ojuja odobū géē je ajɛ dobū kpímm ɔlɛ́ɛnɔ̄.