Read idoma AYISÁYA 50 Bible Online

AYISÁYA 50 - idoma bible

AYISÁYA 50

¹Ayisáya klla ka Óndú ā ɔ́ɔ kahíníī, “A gbɛlá ka n tá ācɛ ɔlɛ́ um, ɛ́gɛ́nɛ̄ ɔ̄cɛ gē tá ɔnyā nū ā nɛɛ? Ó lɛ ā iní nɛ̄ ɔkpá nɛ̄ n je lɛ ɔ́ kóō mafú ka n tá ɔ̄ ā kē yɔ̄ āa? Aá gbɛlá ka n je aá lá le cíla ulé ɛ́gɛ́nɛ̄ ɔ̄cɛ gē je ɔfiyɛ lá ā nɛɛ? Ó lɛ ā, ɔnyɛ nɛ̄ n bī ɔ̄ ulé ɛ́ɛ́ nɛ̄ n kpó aá lá lɛ ɔ́ āa? Ó lɛ ā ŋ́. Amáŋ ohígbū ɔ́bíipú kú aá, nēé kpó aá lá á.

²Ɔdíyá nɛ̄ eko nɛ̄ n wā ā, nɛ̄ ɔ̄cɛ dúú í yɔ̄ ŋ́ mā? Ɔdíyá nɛ̄ n hīgwú, nɛ̄ ɔ̄cɛ dóódu í tá um ohi ŋ́ mā? Aá gbɛlá ka ń lɔfú nɛ̄ n gē hɛ́ aá tá klla ī nya aá tá ŋ́ nɛɛ? N da aá kú aá jé ka n lɔfú nɛ̄ n gē je ɔ́da lɛ aítekwú mɛ́mla aísú kéē je ŋmó ŋmáajɛ, cɛ́ɛ́ ɛgiyí uwā kwú pīya aígbíli, nɛ̄ aɛ́béenyi nēe bá ipú uwā ā gē pɛ́ kwú, ī níípi ohígbū kú éŋkpɔ̄ í yɔ̄ lɛ uwá ŋ́.

³N lɔfú je ojuja nōbí pīya klá ɔkpáncō juu, bɛ̄ɛka ɛ́gɛ́nɛ̄ ɔcɛ í lɛ úwé ekwu nōbí wiyē eko nōó yēekwu ā.”

⁴Óndú ā nōo wɛ Ɔwɔicō ā, le ɛlā nɛ̄ n géē ka ā nwū um ɛɛ́, cɛ́ɛ́ ka n jé ɔdā nɛ̄ n géē ka nōo í lɔfú tū ācɛ nēe gbagbafú ā iyē. Ɔ̄cɔ̄ɔ̄cī dóódu, ó gē hɛ́ um eyī klla lɛ ɔtū kpoókpoó je gā um, cɛ́ɛ́ ká n̄ pó ɔdā nōó gáā nwū um ā.

⁵Óndú ā cɛ̄ ga um gē pó ɛlā kú nū, ń kē yá īkpɛ̄yí olɔfú tá ɔ̄ ɛ́ɛ́, nɛ̄ n gē kwúcē hɛ̄ ɔ̄ tá ŋ́.

⁶N kwú igbīhi kú um ú tá ɛcɛ lɛ ācɛ nēe bá ī gɔ́ um itali ā. N kē lɛ ábáa kú um tá lɛ ācɛ nēe bá ī fu um ɔnwū agba ā. Ń kē nyɛɛ hɛ̄ ācɛ nēe bá nyā tá ŋ́ eko nēé cá um ɛcá, klla ī tá ahɛ klá um eyī ā ŋ́.

⁷Amáŋ, abɔ̄ Óndú ā nōo wɛ Ɔwɔicō ā gē tá um abɔ̄ ā, uwēyī í gáā kwú um ŋ́. Anɔ́ɔ n lɛ ɔtū lé ká, ohígbū ka n jé ka uwēyī í gáā kwú um ŋ́.

⁸Ɔwɔicō nōo ī hɛ́ ɛpɔ̄hi gā um ā kwu um ajaajɛ. Ɔ̄cɛ dúúmā lɔtū kpó ɛlā dúúmā ce um glá āa? Ɔ̄cɛ ɔ́ɔmā kóō wā ká ālɔ̄ kɛpɔ̄ mɛ́ɛnɛ. Ɔ̄cɛ dóódu nōo tíne ō bɛ̄yíkwu um, kóō wā í leyīkwu um eyī mɛ́ɛnɛ.

⁹Óndú ā nōo wɛ Ɔwɔicō ā gē cɛ̄pɔ̄ um á, ɔnyɛ ɔhá kē ī ŋmó um ɛpɔ̄bí glá āa? Odúúdú ācɛ nēe gē kpɛ́lā ce um ā géē mɛ tāajɛ, bɛ̄ɛka īlī nɛ̄ ɛha kwú lé ŋmá ajɛ ā.

¹⁰Odúúdú aá nēe gē lɛ ojīlīma ce Óndú ā, klla gē lɛyítáájɛ lɛ ɛlā kú ɔ̄cocɛ̄hɔ̄ kú nū ā, ɔwɛ nɛ̄ aá géē yɛ ā, géē lɔfú dobū nɛ̄hi. Nááná, aá lɔtūce Óndú ā, kú aá gboló ce Ɔwɔicō.

¹¹Amáŋ aá nēe ī yá ucē bɛ̄ɛka igwu nōo le ɔha lé tū iyē cɛ́ɛ́ kóō le ŋmó eyē nōo kwú iyīnū í ŋmó ā, Óndú ā ka anúɔ abɔ̄yī anúɔ géē yá aá italā, nōo géē cɛ̄ lɛ aá móōwē nɛ̄hi piíí.”