Read idoma AYISÁYA 51 Bible Online

AYISÁYA 51 - idoma bible

AYISÁYA 51

¹Ayisáya klla ka ka Óndú ā kahíníī, “Aá jāhɔ̄ ga um, aá nēe tíne ō yá ɔdā okpaakpa ā, klla í lɛyítáajɛ lɛ Ɔwɔicō ā, aá yɛ tííkpa kú ucē kú Ébrahām. Anú ā lɛbɛ̄ɛka ápɛ́tɛ́cɔ̄ nēé cē alɔ ŋmá anú ā á.

²Aá gbɛlá kwu ádáádā aá, Ébrahām mɛ́mla Usɛ́ra, nēe ma aá ā. Eko nɛ̄ n hī Ébrahām igwú ā, ó lɛ ɔyí dúúmā ŋ́. Amáŋ n le ɔdā olɔhi yá lɛ ɔ́, klla lɛ ayí alɛwa kpó lɛ ɔ́.”

³Ɔwɔicō ka anúɔ géē tá ācɛ kú Ujerúsālɛm nēe lā ipú alácɛ̄ ipú igelī nɛ̄hi ɔ́ɔmā ā ɔtū lé. Ó ka anúɔ géē je ajɛ kú nū nōo lɛbɛ̄ɛka ígbíli ā, pīya ajɛ olɔhi o hɛ́ɛhɔ̄ bɛ̄ɛka ajɛ nɛ̄ anúɔ le hɛ́ɛ́hɔ̄ ipú ajɛ kú Ídɛn ā. Ɔtū géē he ācɛ ā, é kē í gwéeyē. É klla í bá ī gwíijē ī cɛ̄tra um klla í tá um ahínyá abɔ́ɔ.

⁴Ācɛ ɔlɛ́ um, éwo kú ɔlɛ́ um, aá jāhɔ̄ ga um, ka aá pó ɔdā nɛ̄ n gē ka ā. Ɔdā nɛ̄ n gē nwū ā géē yá kú ucē ō yá kpaakpa kóō wā, nōo í lɛbɛ̄ɛka ɔlá ofíyajɛ lɛ odúúdú aéwo kú ipú ɛcɛ ā.

⁵Ācɛ nēe lā ogbeé kú ísu ā bá ī gbēyī ká n̄ lɛ uwá hɛ́tá. N lɔfú klla le tútū ɛɛ́. Eko kpiíí n géē wā í nya uwá tá klla í wā í gbō odúúdú aéwo kú ɛcɛ nyā abɔ̄yī um.

⁶Aá je eyī gicō má ɔkpáncō, ka aá klla pīyeyī má ɛcɛ. Ɔkpáncō géē mɛ tāajɛ bɛ̄ɛka ódūdū ā. Ɛcɛ kē ī je lé híla bɛ̄ɛka īlī ā. Odúúdú ācɛ nēe lā ipú ɛcɛ ā í pɛ́ kwú bɛ̄ɛka iju ā. Amáŋ, n géē nya aá tá, ɔdā dúú í gáā yá aá gɛ ŋ́ piyōō. Okpaakpa kú um ī kē gáā mɛ gbogboō ŋ́.”

⁷Aá jāhɔ̄ ga um, aá nēe jé ɔdā okpaakpa, nēe klla bī íne kú um ɔtū ā. Aá kóō híī yúúfi eko nɛ̄ ācɛ ī cá aá ɛcá, klla ī ŋmó aá okónu ŋ́.

⁸Aólɛlā ā géē je kpó yíífi tāajɛ ɛ́gɛ́nɛ̄ ɛha gē tū īlī gē je ɔ́ lé tāajɛ ā. Amáŋ n géē nya aá tá piyóó. N kē í cɛ̄ lɛ aá yɔ̄ ī yálé ŋméeko téeko piyóó.”

⁹Óndú ā, le héyī, ká ā bī ɔfú kú uwɔ le yá odée lɛ alɔ. Le héyī, cɛ́ɛ́ ká ā lɛ ɔdā nɛ̄ a yá lɛ ācɛ ɔlɛ́ alɔ īkée ā yá lɛ alɔ dúú. Awɔ je ɛbɛ́ obɔ̄bí kú ísu nɛ̄hi, nēé hī ka Uráhābu ā[4] ŋmó, je ɔ́ wā nyɛŋɛnyɛŋɛ á.

¹⁰Awɔ je ísu nɛ̄hi ā ŋmó ŋmá ajɛ, klla tá ɔwɛ bū ipú nū ā, cɛ́ɛ́ ka ācɛ nɛ̄ a yɔ̄ ī nyatá ā kéē le bēhé á.

¹¹Ācɛ nɛ̄ a nyatá ā, géē kwúcē wā Ujerúsālɛm bá ī gwíjē kú éeyē tá ɔwɔɔwɛ. É kē í bá ī gwéeyē piyóó. Ɔtū géē he uwá, ɔtūnōbí mɛ́mla ikwū ō je í kē gáā yɔ̄ lɛ uwá igbɔhá ɛ́ɛ́ gɛ ŋ́.

¹²Ayisáya klla ka Óndú ā kahíníī, “Ami wɛ ɔ̄cɛ nōo gē tá aá ɔtū lé á, ɔdíyá nɛ̄ aá gē yúúfi ɔlɛɛcɛ, nōo gē kwú bɛ̄ɛka ácí nōo gē ŋmókókó āa?

¹³Aá kē kwú mlanyī ami nōo wɛ Óndū ā nōo yá aá ɛɛ́. Ami nā ɔkpáncō daa klá ɛhícō, klla lɛ ikpó kú ɛcɛ nyā táajɛ á. Ɔdíyá nɛ̄ aá bá gē yúúfi eko dóódu ā? Ohígbū nɛ̄ ācɛ nēe gē yá aá ŋmó ā géē cɔ̄nū nɛɛ? Kɛ̄ɛ ka ohígbū nēe le tútū kéē kpó aá yíífi ā nɛɛ? Ícɔ̄nū kú uwá í kē gáā lɛ abɔ̄ kwu aá gbógbóō glá gɛ ŋ́.

¹⁴É géē je odúúdú aálagbá ā nēe bá gē dɛ̄ kú ɔnɔ kú ɔkpíyē ā kpó hɛ́tá ānāānā. É gáā kwú ipú agbá ŋ́, é klla í lɛ ɔdōlé dóódu nōo ce uwá ɛgbá ā.

¹⁵Ami wɛ Óndú ā, nōo wɛ Ɔwɔicō kú aá á. Ami gē tá ísu nɛ̄hi ā úgbagwú ɛ́ɛ́ nōó gē yúuya kwūūū á. Iyē kú um kē wɛ Uyáwe nōo lɔfú fíyɛ́ dúú ā.

¹⁶N lɛ ɛlā kú um um ā nwū uwɔ ɛɛ́. N kē kwú uwɔ ú tayínū ipú abɔ̄ kú um ɛɛ́. Ami nā ɔkpáncō da klá icō, le ikpó kú ɛcɛ táajɛ á. N kē da ācɛ kú Ujerúsālɛm kahíníī, “Áá wɛ ācɛ ɔlɛ́ um”

¹⁷Ācɛ Ujerúsālɛm, aá le héyī, aá le héyī kú aá cāŋjɛ. Ōwē nɛ̄ aá má ohígbū ícɔ̄nū kú Óndú ā jɛ̄ ɛɛ́. Aá lɛ ōwē ā má jāā ga ajaajɛ nɛ̄ aá háyi kpaakpa glá ŋ́, bɛ̄ɛka ɔ̄cɛ nōo gwá ejé ŋmá ipú íkókwū jāā gbéeko nōó kwú odúúdú nū í gwá nōó lɛ ɔ́ kwú gē túgagá gɔwɛ ga ácí ā.

¹⁸Ɔ̄cɛ dúúmā í yɔ̄ ipú aá nōo gē kpó aá trɛ̄yí ŋ́, ɔ̄cɛ dúúmā í yɔ̄ ipú ācɛ ɔlɛ́ aá, nōo gē lɛ abɔ̄ tū aá abɔ̄ bī aá jé ɔwɛ ŋ́.

¹⁹Ámíyā ɛpa nēe bá nyā yá aá ā. É kwú ɔlɛ́ aá ú wúlatāajɛ, klla kwú pīya alácɛ̄. Ɔkpɛtá klla lɛ ācɛ ɔlɛ́ aá kpó ŋmó ohígbū ɛfú. Ɔcɛ dúúmā í yɔ̄ nōo ī méyīnyinyi aá ŋ́.

²⁰Ācɛ ɔlɛ́ aá bá ī wā ajɛ wɔɔlɔ aɔ́kíkā kú uláyi dóódu kú igelī ā. É bá ajɛ gbɔnɔkɔ ohígbū ɛ́gɛ́nɛ̄ abɔ̄ hɛ́ uwā iyē lɛ ā. É lɛbɛ̄ɛka īkpɛ̄ɛnū nɛ̄ ukpá kú ofītɛ́ lɛ ɔ́ kwú ā. Ó lɛ ā ohígbū ka Óndú ā nōo wɛ Ɔwɔicō ā, le cɔ̄nū da uwá yɔ̄ ī yá uwā italā.

²¹Ācɛ kú Ujerúsālɛm, aá bá ī móōwē. Aá kē bá gē túgagá gɔwɛ ga ácí bɛ̄ɛka ɔdā nɛ̄ ejé lɛ aá kwú ā, nááná nɛ̄ aá kē gwá ejé ŋ mā.

²²Amáŋ Óndú ā, nōo wɛ Ɔwɔicō kú aá, nōo gē cɛ̄pɔ̄ ācɛ ɔlɛ́ nū ā kahíníī, “N kwú ícɔ̄nū nɛ̄ n cɛ̄ tū aá nōo cɛ̄ lɛ aá móowē nɛ̄hi nōó cɛ̄ lɛ aá háyi kpaakpa glá ŋ́ mā ŋmá ɛgiyí aá ɛɛ́. Aá klla gáā móōwē ɛ́gɔ́ɔmā gbógbóō gɛ ŋ́.

²³Ācɛ nēe gē yá aá ŋmó ā, nɛ̄ n géē je ōwē ɛ́gɔ́ɔmā lɛ uwá á. Ācɛ nēe gē kpó aá gwutá ajɛ, gē lɛ ikpó da aá igbīhi tāajɛ bɛ̄ɛka ɔdā nɛ̄ aá wɛ úmúlá nɛ̄ ācɛ ī yɛ ɛyí nū ipú uláyi ā, nɛ̄ n gáā yá uwā ōwē ɔ́ɔmā mɛ́ɛ̄ á.